Bahan PA Permata 31 Maret - 6 April 2019 ( PEMILU )


Bimbingen PA Permata 31 Maret 2019-06 April 2019
"PEMILU"

Nas : 1 Samuel 16 : 6-7
6. Kenca ia reh kerina, idah Samuel anak Isai, Eliap gelarna, jenari nina i bas ukurna, “Si enda, si tedis i jenda i bas adep-adepen TUHAN, la banci lang enda me si enggo ipilihNa.”
7. Tapi nina TUHAN, “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna.”
Tema : Pentar Ibas Milih

Gelah PERMATA GBKP:
  1. Ngangkai pentingna ikut muat bagin guna memilih Pemimpin singena ate Tuhan erpalasken teks 
  2. Berperan aktif guna notoken ras berpartisipasi ibas pesta demokrasi ( PEMILU 2019 ) 
Metode : Doa dan Aksi

I. BENA KATA 
Kegeluhen ibas doni enda silih berganti. Bagi sinuan-sinuan, lit paksana turah, ertunas, ergalangna, metua, jenari ndabuh ras mate. Turah ka tunas simbaru. Bagepe kerna pemerintahen ibas kerina bangsa-bangsa idoni enda, nai-nai nari seh asa gundari. Lit masana erkuasa, tapi dungna ngadi, mundur ras iganti pemerintahen simbaru ka. Denggo simbaru e pe ngadi ka, igantiken pemerintah selanjutna seh ku akhir periodena, dungna ngadi ka ras selanjutna iganti ka. Kerina perdalanen pemerintahen bangsa-bangsa e tetap iperdiateken Tuhan, janah Ia ikut campur tan khususna ibas proses pergantin sada periode pemerintahen ku periode pemerintahen selanjutna. Pokok bahasenta sekalenda pe berkaiten ras milih pemimpin ibas proses perdalanen pemerintahen tah pe kerajaan Israel.

II. ISI 
Arah nas si enggo sibaca ras ras ndai enggo siidah bahwa la ate Dibata lit kekosongan ibas pemerintahen Israel. Kenca Saul lanai ngena ate Dibata, emaka isikapken Tuhan penggantina. Isuruhna Nabi Samuel lako memimpin ras mensukseskan program penggantin raja. Kai langkah-langkah ras uga proses penggantin raja e tahap demi tahap jelas kal ipimpin Tuhan Dibata.

Nabi Samuel pe manusia biasa bali nge ras kita. Emaka Nabi Samuel sempat takjub ngenehen Eliap, si akapna erkiteken mbestang ras mejile rupana ia me sicocokna jadi raja. Tapi Tuhan Dibata lit kriteriaNA sendiri, mis kal lang nina man Nabi Samuel. Jenari ibabaiNa Nabi Samuel seh ku Daud gelah ia ipilih jadi raja berikutna.

Kepeken Tuhan Dibata seh kal seriusna ibas proses penggantin pemerentahen, emaka ibabaina bangsa-bangsa e ibas memilih ise pemimpin berikutna. Sebab ibas ngekelengi manusia kepeken Dibata la hanya ngkelengi manusia secara individu per individu, tapi pe secara kolektif emekap bangsa ku bangsa. Ipilih Tuhan Dibata Daud sebagai pemimpin labo erkiteken ngena ate Dibata Daud saja, tapi pe erkiteken ngena ate Dibata Bangsa Israel. Emaka kerina bangsa bangsa ibas doni enda ngena kal ate Dibata, jenari maka perlu kal memilih secara ertanggung jawab pemimpin si ngena Ate Dibata.

PENGKENAINA 
Adi bage, ibas proses memilih pemimpin e, kerina jelma khususna PERMATA GBKP harus seri ras Nabi Samuel mbegiken petunjuk Dibata. PERMATA GBKP harus yakin ras percaya bahwa Tuhan nge singatur ras sinentukensa kerina pemimpin ibas bangsa-bangsa idoni enda, Emaka ibas memilih e, harus sieteh apai calon si memenuhi kriteria si sentudu ras Dibata. Ula nen mbestang ras rupa mejile saja, sebab labo tentu e si ipilih Dibata.


IV.DISKUSI 
  1. Kai sebabna Samuel sempat yakin hahwa Eliap nge si cocok jadi raja Israel? Ras kai akapndu hubungenna ras cara nta menentuken pilihen ibas jamanta si genduari? 
  2. Uga nge akapndu kriteria Dibata nandangi pemimpin ibas jaman now enda?
  3. Uga carana gelah kerina PERMATA GBKP jadi sekalak pemilih si pentar? Pemikiren tah prilaku kai harus itadingken ras pemikiren tah prilaku kai ka harus iperkuat ibas diri kerina anak PERMATA GBKP?

V. USULAN ENDE-ENDEN 
  1. KEE GBKP No. 108    ( Klik Judul Lagu Untuk Melihat Teks Lirik Lagu )
  2. KEE GBKP No. 257    ( Klik Judul Lagu Untuk Melihat Teks Lirik Lagu )
  3. Kau Telah Memilihku  ( Klik Judul Lagu Untuk Melihat Teks Lirik Lagu )

Pt. Analgin Ginting 081286969795

Belum ada Komentar untuk "Bahan PA Permata 31 Maret - 6 April 2019 ( PEMILU )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel