Enterpreneurship Dan Lingkungan Hidup - Bahan PA Mamre 17-23 Maret 2019


BIMBINGEN PA MAMRE 
TANGGAL, 17 - 23 MARET 2019
( ENTREPRENEURSHIP DAN LINGKUNGAN HIDUP ) 

Ogen : Kejadin 2: 4b-15
Peken Eden
Sanga Dibata njadiken kerina si nasa lit,
5. langa lit kai pe turah i doni. Langa lit benih ersuli, erkiteken langa ipesusur Dibata udan, janah langa lit ise pe ngusahai taneh e.
6. Tapi mulai me turah ulu lau i bas taneh, janah e me erbahanca maka enggo litap kerina taneh e ibahanna.
7. Ibuat TUHAN Dibata sitik abu taneh ijadikenNa jelma; iembuskenNa kesah kegeluhen ku bas igungna, e maka mulai me jelma ndai nggeluh.
8. Kenca bage ibahan TUHAN Dibata sada peken i Eden, arah Timur, janah i je me itamakenNa manusia si enggo ijadikenNa e.
9. IjadikenNa erbage-bage batang kayu si mehuli turah i je janah buahna pe mehuli. I tengah-tengah peken e, lit turah sada batang kayu si mereken kegeluhen ras sada batang kayu si mereken pemeteh kerna si bujur ras si jahat.
10. I Eden lit sada lau belin, janah ipalerina peken e. Kenca ngepari Eden, lau ndai erbelah empat. 11. Si pemena Pisun gelarna, maler ngkeleweti negeri Hawila.
12. ( I je lit emas, si merim-merim, ras batu permata si meherga.)
13. Si peduaken Gihon gelarna, maler ngkeleweti negeri Kus.
14. Si peteluken, Tigris, maler arah Timur negeri Assur, janah si peempatken Eprat.
15. Kenca bage, itamaken TUHAN Dibata manusia ndai i Peken Eden, guna ngusahai ras njagaisa.
Tema : Mamre Kreatif Ras Mehuli
Tujun : Gelah Mamre
  1. Ngangka maka kewirausahaan (entrepreneurship) eme pendilo Dibata 
  2. Ndahiken dahinNa tetap njaga/mpekena-kena lingkungen labo i cedai
Metode : Diskusi

KATA PENARUH
Kreatif ras mehuli e me biak Dibatanta. I bas Pustaka si Badia ituriken kerna cara Dibata encidahken "kreatifitasna" alu nepa ( mencipta ) doni ras kerina isina. Doni si sontar ( kacau ), la teringani sabap la lit i je kegeluhen tapi banci ibahan Dibata jadi mehuli janah lit ka pe ije kegeluhen. Janah ikuhi Dibata pe doni enda alu erbage-bage tinepa ibas si lalit banci jadi lit. Si enda megati ikataken sebage creatio ex nihilo. Enda me si mbedaken Dibata ras manusia i bas kengasupen nepa. Dibata ngasup njadiken si la lit jadi lit, tapi manusia njadiken si lit arah kerina si enggo itepa Dibata. Manusia e tinepa Dibata tapi sekaligus i bere kengasupen guna ngusahai tinepa si deban. Si peduaken, maka nilai i bas pendahin Dibata e mehuli. Dibata nugasken manusia njaga erbage-bage kiniulin alu "kreatif' guna erbahan kiniulin-kiniulin si mbaru.

URAIAN TEKS / TAFSIREN
Turi-turin Dibata nepa doni eme salah sada bagin penting i bas kiniteken kalak Israel. Bangsa enda tek maka langit ras doni bagepe kerina isina eme tinepa Dibata. Janah si e kerina nuriken kemulian ras kepentaren Dibata. Turi-turin Dibata nepa doni enda jadi gambaren maka doni enda lit erkiteken pendahin Dibata labo bage-bage saja ntah pe rempet lit. I bas kitab Kejadin lit dua turi-turin penciptaan si saling melengkapi, eme: si pemena (Kej. 1:1-2:4a); make pendekaten si sistematis janah nuriken kerna penciptaan e secara luas ( alam semesta/jagad raya ). Proses penciptaan e nekanken ku bas kata Dibata/firman si kreatif (kata e erkuasa nciptaken) sebage alat nepa doni. Janah turi-turin enda tampukna e me Dibata nepa manusia, dilaki ras diberu. I bas Kejadin 2:4b-25, igambarken pendahin Dibata alu mbages. La bagi turi-turin si pemena si fokusna kerna perbahanen Dibata si nepa
doni enda kerinana (secara luas). Tapi turi-turin si peduaken lebih fokus nandangi pendahin Dibata desken sekalak pande kudin si alu tanna nepa manusia (bdk. Heb. 2:7).

I bas ayat 4b-7 teridah peran Dibata si cukup penting secara khusus eme kerna Dibata nepa manusia. I bas pasal 1 la ituriken kerna cara Dibata nepa manusia, tapi ituriken ije maka manusia i tepa sentudu ras tempas Dibata. Tapi i bas Kejadin 2:7 ituriken proses si cukup berbeda ras proses penciptaan doni si iturikeni bas Kejadin 1. Manusia itepa Dibata alu tanNa. I bas tan Dibata, manusia ijadiken. janah Dibata makeken abu taneh jadi alatNa nepa manusia, jenari iembuskenNa kesahNa kempak manusia e. Arah turi-turin enda si idah lit nge kekhususen manusia asangken tinepa Dibata si deban si icidahken arah proses penciptan manusia. Tapi labo e ngatakenca maka derajat manusia e lebih asangken tinepa si deban. Sabab manusia e pe ijadiken Dibata arah abu taneh ngenca. I bas cakap Heber, taneh : adama', sedangken gelar manusia: Adam, ibuat i bas kata adama'. E nuduhken maka manusia pe bagian dari tinepa Dibata has doni enda. Kesah Dibata eme daya kreatifitasNa si erbahanca debu taneh ndai nggeluh jadi manusia.

I bas ayat 8-14 ituriken kuga Dibata nikapken ingan man manusia (adam), si nggo itepaNa alu mehuli si igelari peken Eden. Eden i bas cakap Heber ertina 'kesenangen'. Peken enda i isi alu erbage-bage batang kayu si mehuli janah buahna pe mehuli. I bas peken e lit lau maler si cabangna ibagi empat paleren lau si cukup mbelin si ncidahken maka lau si lit i bas peken eden e cukup mbelin. Peken e sebage karya Dibata banci ikataken kuh guna jadi ingan manusia nggeluh. Sabab erbage-bage kebutuhen utama manusia nggo isikapken Dibata: pangan ras lau man inemen.

I bas ayat 15, ituriken maka eden me jadi ingan manusia nggeluh. Erbage-bage kiniulin Dibata arah tinepaNa iendesken Dibata man manusia. Si enda banci si idah arah gambaren Pustaka si ngataken manusia itamaken i eden guna ngusahai ras njagai. Ngusahai ertina labo guna mengeksploitasi ntah pe menguras habis, ncedai rsd. Pemahamen si e keliru sabab adi manusia (adam) reh i bas adama"(taneh) nari, maka ncedai tinepa Dibata ertina manusia pe ncedai dirina. Tentu labo mungkin Dibata mereken ijin man manusia guna ncedai tinepa si deban si jadi bagin diri manusia e. Ngusahai ijendai banci iertiken ndahiken taneh, makeken, ras ngusahaisa guna kiniulin kegeluhen manusia bagepe peken Eden e. I bas konteks manusia sebage tinepa Dibata si itepa sentudu ras tempas Dibata, maka ngusahai banci iertiken sebage kesempaten manusia guna berkreasi arah erbage-bage kiniulin Dibata guna ndatken kiniulin si deban. Ngusahai pe si idah men arah ku bas pemenuhen kebutuhen nggeluh manusia. Kata njagai mengarah ku mpertahanken kesinambungan/kelestarian peken Eden gelah tetap mehuli, metunggung jadi ingan tading manusia, janah mpertahanken kiniulin Dibata si lit i bas peken e. E maka labo banci manusia rate-ate ngusahai ras makeken si ibereken Dibata tapi arus ka nge iusahai ras ilestariken pe.

APLIKASI
Kreatif ras mehuli e me dua hal si la banci ipisahken i bas kita erdahin sebage anak-anak Dibata bagepe i bas kita ncukupi keperlun kegeluhennta. Kreatifitas erbahan kita ngasup erbahan arah tantangen kegeluhen si berubah-ubah. I bas erusaha, kreatifitas jadi nilai tambah si mbelin kal keuntungenna sabab banci ningkatken nilai tambah sada barang bage pe nilai jualna. Kita idilo guna makeken kepetarennta gelah ngasup makeken kai si lit guna kiniulin geluhta bagepe guna kiniulin doni. Kreatifitas si lakoken kita tentu arus positif ntah pe mehuli. Kreatifitas e la banci terjeng materi/uang/hasil saja tapi pe ia arus maba dampak si positif subuk man kalak si isekelewetna bage pe nandangi ingan/lingkungenna. Manusia labo banci ilepas-pisahken ras lingkungen si jadi inganna tading. Encedai lingkungen seri ras encedai kegeluhennta. Janah enda erlawanen ras biak Dibata si nepa/erdahin maba kiniulin.

DISKUSI
  1. Marilah si perdiateken kegiaten-kegiaten si cenderung mengeksploitasi (merusak) lingkungen guna ndatken hasil/keuntungen. Janah hal-hal kreatif si banci silakoken gelah ndatken hasil si mehuli tapi tetap njaga kelestarian lingkungen ntah pe mpertahanken kiniulin/kemulian Dibata i bas erbage-bage tinepana has doni enda.
  2. Erbahan aksi si kreatif ras maba kiniulin man lingkungennta.
USULEN ENDE-ENDEN:
  1. KEE 306  
  2. KEE 260    
  3. KEE 261    
  4. KEE 262    
Pdt. Vicardo A. Ginting, S.Th 
Ketua Klasis Tigabinaga 
HP.081362439302

Belum ada Komentar untuk "Enterpreneurship Dan Lingkungan Hidup - Bahan PA Mamre 17-23 Maret 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel