Erdahin ( Pondasi Jiwa Enterpreneurship ) Bahan PA Moria 24-30 Maret 2019


Bimbingen PA Moria 24 - 30 Maret 2019
Entrepreneurship Padan Si Ndekah


SI MAN OGEN : Kejadin 1:1 - 31
Turi-turin kejadin si nasa lit
1. Mula-mulana ijadiken Dibata langit ras doni.
2. Doni lume denga, la lit tempasna. Lawit si mbelang ergalumbang itutupi gelap mesangat, janah kesah Dibata kelaling-kelaling i babo lau engkuasaisa.
3. Nina Dibata, “Jadi lah terang” -- e maka jadi me terang.
4. Idah Dibata maka terang ndai tuhu-tuhu mehuli. Jenari isirangken Dibata terang ibas gelap nari.
5. Terang igelariNa “Suari”, gelap igelariNa “Berngi”. E maka ben me wari, jenari siang -- e me wari si pemena.
6-7. Jenari nina Dibata, “Jadi lah awang-awang guna nirangken lau ras lau si deban ras njagaisa gelah ola ersada.” Jadi me bagi si iperentahken Dibata e. Bage me ijadiken Dibata awang-awang guna nirangken lau si i das ras lau si i teruh.
8. Awang-awang ndai igelari Dibata “Langit”. E maka ben me wari, jenari siang ka -- e me wari si peduaken.
9. Nina Dibata, “Ersada lah kerina lau si lit i teruh langit i bas sada ingan, gelah lit teridah taneh kerah.” E maka jadi me bage.
10. Igelari Dibata taneh si kerah ndai “Daraten”, janah lau si enggo ersada ndai “Lawit”. Idah Dibata maka sinijadikenNa e tuhu-tuhu mehuli.
11. Kenca bage nina Dibata, “Turah lah i bas taneh nari kerina sinuan-sinuan, e me dukut-dukut si erbuah, kayu si erbuah si lit sinuanna i bas buahna.” E maka jadi me bage.
12. Turah me ibas taneh nari kerina erbage sinuan-sinuan; janah idah Dibata maka sinijadikenNa e tuhu-tuhu mehuli.
13. E maka ben me wari, jenari siang ka, -- e me wari si peteluken.
14. Nina Dibata, “Lit lah i langit barang si erbanca terang, guna nirangken suari ras berngi, jadi tanda-tanda permulan wari, tahun ras musim.
15. Janah ersinalsallah i langit barang si terang ndai guna mereken terang man doni.” E maka jadi bage.
16. Ijadiken Dibata dua barang terang si galangna, e me: matawari guna ngkuasai suari ras bulan guna ngkuasai berngi. Bage pe bintang-bintang ikut ijadiken Dibata.
17. Itamaken Dibata barang-barang si terang ndai i langit, guna nerangi doni,
18. ngkuasai suari ras berngi dingen nirangken terang i bas gelap nari. Idah Dibata maka sinijadikenNa e tuhu-tuhu mehuli.
19. E maka ben me wari, jenari siang ka -- e me wari si peempatken.
20. Nina Dibata, “Lit lah erbage-bage macam si nggeluh ndemi lau ras erbage-bage perik ndemi awang-awang.”
21. Jenari ijadiken Dibata rubia-rubia si mbelin si nggeluh i bas lawit, bage pe kerina erbage rubia-rubia si deban si nggeluh i bas lau, ras pe kerina erbage perik-perik. Idah Dibata maka sinijadikenNa e tuhu-tuhu mehuli.
22. Ipasu-pasuNa kerina. Nina Dibata man rubia-rubia si nggeluh i bas lau ndai, “Ertambah-tambahlah janah demi lah lawit.” Nina man perik-perik, “Ertambah-tambahlah.”
23. E maka ben me wari, jenari siang ka -- e me wari si pelimaken.
24. Nina Dibata, “Jadi lah i bas taneh nari kerina erbage rubia-rubia si nggeluh: kerina erbage asuh-asuhen ras kerina rubia-rubia si meliar, si galang ras kitik.” E maka jadi bage.
25. Ijadiken Dibata kerina erbage rubi-rubia si meliar, kerina erbage asuh-asuhen, ras kerina rubia-rubia si njoler. Idah Dibata maka sinijadikenNa e tuhu-tuhu mehuli.
26. Nina Dibata, “Genduari Sijadikenlah manusia si sentudu ras tempasTa, si menam seri ras Kita, gelah ikuasaina kerina nurung, perik-perik, bage pe kerina asuh-asuhen ras rubia-rubia si meliar, subuk si galang ras si kitik.”
27. E maka ijadiken Dibata manusia, si sentudu ras tempasNa; dilaki ras diberu ijadikenNa. 
28. Ipasu-pasu Dibata manusia ndai, nina, “Ertuahlah kam jadi nterem, demi dingen taluken doni enda, kuasai kerina nurung, perik-perik i awang-awang, bage pe kerina rubia-rubia i daraten.
29. Kubereken man panganndu kasa kai sinuan-sinuan si erbuah i babo doni enda ras kerina batang kayu si erbuah si lit sinuanna i bas buahna.
30. Tapi man kerina rubia-rubia i daraten ras man perik-perik i awang-awang, Kubereken dukut-dukut si meratah ras sinuan-sinuan si erbulung man panganna.” E maka jadi me bage. 
31. Kenca bage itatap Dibata, janah idahNa maka kerina si enggo ijadikenNa tuhu-tuhu mehuli. E maka ben wari, jenari siang ka -- e me kap wari si peenemken.

TEMA : ERDAHIN (PONDASI JIWA ENTREPRENEURSHIP)

T U J U N : Gelah Moria
  • Ngidah cara Dibata erdahin ras ulihna.
  • Ngumban cara Dibata i bas dahin ras usahaNa.
METODE PA : Nggar-gari ras ngusih pendahin Dibata.

Kata Penaruh.
Umumna kerina manusia ersura-sura nggeluh alu mejuah-juah, salah sada bentukna teridah arah pendahin ras ulih si mehuli. Emaka manusia nai nari seh asa genduari erjuang ndatken pendahin ras ulih pencarin si mehuli. I bas tahun enda, Gerejanta rukur guna mpeturah jiwa entrepreneurship i bas ngawan GBKP. Tema enda perlu kal si ukuri alu payo sabap pengertinta nandangi entrepreneurship mpengaruhi kita i bas erdahin, erkiteken cara nggeluh manusia mbelin hubungenna ras pengertinta kerna erti erdahin. Pertumbuhen ekonomi masyarakat ras bangsanta, banci jadi salah sada bukti pengertinta kerna erti ras makna erdahin. Menurut pengamaten pakar ekonomi, enggo melala jelma si enggo sukses ndatken pendahin si mehuli, tapi si lenga sukses pe ia ka tanggung buena. Si jelas, sura-suranta gelah reh buena dalanta radu mejuah-juah secara ekonomi, kesehaten ras lingkungen. Si lenga jelas eme; kai kin hubungen entrepreneurship ras pendahin? Kai nge ndia sura-sura Dibata arah pendahinta? Uga ndia cara Dibata erdahin ras maba kiniulin man banta manusia ras kerina isi doni enda? Guna njawab penungkunen enda, mari radu ras kita erlajar nggar-gari pusuh ras cara kerja Dibata erkelangken PA-nta minggu enda.

Mpebagesi Pengangkan Kerna Ogen.
Kitab Kejadin ibenaken alu kata ( berita ) maka "Doni lume denga, la lit tempasna. Lawit si mbelang ergalumbang itutupi gelap mesangat...". I bas doni si rontang enda me Dibata erdahin maba kiniulin. Piga-piga cataten penting arah teks enda:
  • Dibata ngaturken ( menata ) doni si rontang jadi ingan kegeluhen si mehuli man kerina tinepa. Nikapken ingan kegeluhen si mehuli man kerina tinepa eme biak Dibata Bapanta si teridah, la i bas kitab Kejadian saja tapi i bas kerina isi Pustaka Si Badia. 
  • Dibata pe nuanken jiwa interdependensi (jiwa kesaling tergantungan)i bas kerina tinepa si mere diri guna kiniulin tinepa si deban. Taneh enda bali ras orangtua si idilo Dibata guna mereken dirina jadi inganta tading raduken sangkep geluhta. Batang kayu ras sinuan-sinuan mereken dirina jadi inganta cio-cio, mereken udara si segar gelah kita sehat. La ketadingen, perik-perik ras rubia-rubia sideban mereken dirina jadi aron Dibata guna njagai keseimbangen alam, mejingkat ia maba benih sinuan-sinuan ku jumanta janahna rende mpepalem pusuh jelma.
  • Si luar biasa, Dibata pe nepa kita tudu ras tempasNa. Meriah akapNa erbahan kita medolat mehaga bagi IA. Si enda ningetken maka biak Dibata enda eme sada missi man banta gelah kita pe nggeluh nikapken anak kempunta, rikut pe temanta manusia gelah medolat mehaga bagi Dibata erbahan kita medolat mehaga
  • Lebih asa si e ( diluar sepengetahuanta ras pemindonta ), Dibata pe ngaturken perdalan doni ( jagad raya ) gelah ratur perdalan pertibi enda. Dibata teridah bagi sekalak nande si ia erngadi-ngadi ngukurken si mehuli man anak-anakna, la gia anakna beluh mindo dingen ngaturken bana.
  • Teptep kali Dibata erdahin, emaka itatap Dibata kerina si idahikenNa; maka mehuli kal kerina. "Emaka ben me wari jenari terang ka, eme wari si pemena...." Kenca Dibata erdahin nge maka lit wari-wari, pendahin Dibata me si erbahan waktu. Labo wari ras waktu si ngaturken pendahin Dibata. 
  • Teptep dahin si ilakoken Dibata maba kiniulin ku bas wari si mbaru. Dibata erdahin dem alu rancangan si mehuli, seh maka cara kerja Dibata wari enda maba kiniulin ku bas wari si pepagi.
  • I bas wari si perpudina, itatap Dibata kerina si ijadikenNa, niNa: "Andiko, seh kal ulina kerina." Malem ate Dibata ngidah kerina si mehuli si isikapkenNa man kegeluhen manusia ras kerina tinepa. Si enda perlu kal si angka, sabap la lit si la mehuli ibahan Dibata man doni enda. Doni enda ceda kenca manusia erdosa, nundalken Dibata dingen nggeluh ngukurken bana.
Pengkenaina. 
Dibata berprakarsa ndilo kita anak-anakNa nerusken kerina ulih si enggo ibahanNa ras maba pasu-pasu nandangi bangsanta. I bas diri Dibatanta
teridah jiwa si seh kal muliana, si mpebayak pengertinta kerna jiwa entrepreneurship. Jiwa entrepreneurship e teridah arah sura-sura maba kiniulin man temanta manusia, rikut pe caranta engkelengi tinepa Dibata si deban gelah kerina manusia seh ku anak kempunta banci mejuah-juah pagin ndalani kegeluhenna. Engkelengi tinepa sideban ras temanta manusia eme pendilo man banta guna njaga masa depan anak kempunta, keluarga, Gereja ras bangsanta. Cedana keluarga, Gereja ras masyarakat erkiteken jiwa saling memberi diri ras sitatang-tatangen enggo bene. Ogenta enda nuduhken maka, geluh si enggo ipeilmbarui mbelin hubungenna ras kiniteken bage pe orat geluh ( karakter si terperagakan ). Kejuah-juahen labo erkiteken kerina kondisi kegeluhen mehuli, la lit persoalen ras tantangen, teridah arah pendahinta si maba kiniulin ku bas wari-wari si reh enda. Erdahin labo terjeng ngidah ras muat erbage kesempaten tapi pe nciptakan peluang si mbaru alu njagai ulu ( sumber-sumber ) kegeluhen gelah tersedia tep-tep paksa.

Selaku orang tua, erdahin alu jiwa entrepreneurship eme salah sada cara ndidik ras mewarisken kesegambarenta ras Dibata man anak kempunta. Keluarganta, Gerejanta ras bangsanta merluken jelma si erkarakter mbangun sesama. Tentuna Gereja ras bangsanta reh pedasna erkembang adi reh buena jelma si meriah akapna erbahan temanna manusia mejuah-juah. Ola kal si pelepas i bas dirinta turah biak nggeluh ngukurken bana, sabap eme tanda kesirangen ras Dibata si nepa kita tudu ras tempasNa. Sirang ras Dibata mabai geluhta jadi penumpang gelap i bas doni tinepa Dibata enda. Sirang ras Dibata erbahan doni enda jadi ingan rubat ras ingan kebiaren segedang geluh. Tapi "ketuahen kalak si muas melihe nehken peraten Dibata; sabap ibesuriNa me ia. Ketuahen kalak si perkuah ate dingen perkeleng; sabap ia me ngaloken perkuah ate Dibata" (Matius 5: 6-7).

Nggar-gari Ras Ngusih Pendahin Dibata:
  1. Mari si gar-gari tole nari biak-biak Dibata Bapanta si teridah i bas pendahinNa. Banci idarami selain i bas bahan ogenta enda.
  2. Kai nge pengertinta sedekah enda kerna erdahin ras turiken rungga-runggana i bas kita erdahin! Runggana ertina tantangen.
  3. Kenca kita ngorati bahan PA enda, kai ateta si minter si dahiken amin gia lit rungga-rungana? Suratkenlah e (sediaken kertas kitik ras berwarna) gelah banci si tempelken i bas rumahta jadi penjemba semangat erdahin man banta.
Pdt. Krismas Imanta Barus, M.Th

Belum ada Komentar untuk "Erdahin ( Pondasi Jiwa Enterpreneurship ) Bahan PA Moria 24-30 Maret 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel