Pentar Encibalken Diri, Bahan PA Moria 3-9 Maret 2019

Bahan PA Moria 03-09 Maret 2019 
( Kepentaren Secara Holisti )

SI MAN OGEN : 1 Samuel 25:1b-3a, 14-22 
TEMA                : PENTAR ENCIBALKEN DIRI
TUJUN               : Gelah Moria
  • Ngidah kepentaren Abigail i bas situasi si man alanken.
  • Ngusih kepentaren Abigail: megermet, metenget ras mediate. 
METODE PA      : Sharing Pengalaman.

Kata Penaruh
I bas kegeluhen genduari enda, mbue kal tantangen si jadi i sekelewetta, subuk i bas dampar sosial, ekonomi, kesehaten ras lingkungen. Emaka perlu kita pentar ngalakenca, adi la pentar banci kal kita bene. Sabap kepentaren e banci nelamatken kita arah mara nari ras njagai dirinta gelah ula papak. Kepentaren e mabai perukuren, perbahanenta ras pengerananta reh ulina. Pengogenta sekali enda ncidahken kuga si Abigail encibalken bana i bas situasi si mesera. Mari si gargari bahan PA-nta wari enda.

Mpebagesi Pengangkan Kerna Ogen

Daud ras piga-piga tentarana lawes ku taneh mesawang, si igelari Paran. Atena cebuni i bas Saul nari (ay. 1-3). I bas ingan e lit sekalak dilaki bas terpuk Kalep nari, Nabal gelarna ( i bas cakap Ibrani ertina "Kalak motu" ). Ia kalak bayak tuhu-tuhu. Biri-birina lit 3000, kambingna lit 1000. Kidekah ia ringan i bas taneh si mesawang e, Daud ras suruh-suruhenna ikut njaga biri-biri e gelah ola itangko kalak.

Si mada biri-biri, erbahan pesta pengataken bujur ras pengguntingen mbulu biri-biri rikutken semalna nandangi si ermakan bagepe kalak sideban. Terlebih-lebih di kune lit kalak pertandang ku daerah e, oratna kin tuan rumah ngalo-ngalosa desken temue. Daud pe megi sura-sura Nabal erbahan pesta. Isuruh Daud sepuluh kalak anak perana nehken tenah kata mejuah-juah man si Nabal. Erpengarapen kal Daud maka Nabal pe erbahan si mehuli man suruh-suruhenna (ay. 8).

Tapi kepeken Nabal labo jelma si mehuli. La ia mediate nandangi kalak sideban, sabap ia mediker ras macik lagu langkahna (ay. 3). Ipelawesna suruh-suruhen Daud alu kasar, nina Nabal "La aku nggit muat roti laungku ras asuh-asuhen si enggo kugeleh man si nggunting biri-biringku, jenari merekenca man kalak si la ku eteh i ja nari rehna" (ay. 11). Megi jabab si bage i bas Nabal nari, erbahanca Daud merawa ras ersura-sura merangi Nabal alu mbentingken pedangna rikut 400 kalak temanna. Tupung si e, ndehara Nabal si gelarna Abigail, megi uga rawana Daud arah sekalak suruh-suruhen Nabal. Ipergermetkenna maka enda banci maba cilaka si mbelin man Nabal ras kerina keluargana (ay. 17). Emaka i bas situasi si bage minter ersikap Abigail. Ipesikapna kai si iperluken Daud ras suruh-suruhenna, jenari lawes ia njumpai Daud. Kenca Abigail ngidah Daud, pedas-pedas ia nusur i bas keldena nari jenari minter ia erjimpuh ku taneh, engkenai nahe Daud (ay. 23). Ituriken si Abigail kerna sura-surana man Daud:
  1. Abigail mindo perkuah ate Daud gelah ola erbalas i bas kerina si enggo ilakoken perbulangenna Nabal. 
  2. Ertoto man Dibata maka iolangiNa Daud munuh imbang-imbangna. Dibata nge pagi ngukumsa kerina imbang-imbang Daud ras kerina kalak si erbahan jahat man bana (ay. 26). 
  3. Ngendesken luahna man Daud ras teman-temanna. 
  4. Erpengarapen ia maka iangkat Tuhanlah Daud jadi raja. Gelah Dibata si engkawali Daud bagi sekalak si njagai barang meherga. Janah erpengarapen pe ia maka ola ilupaken Daud ia, kenca Daud jadi raja (ayat 31)
Arah kai si ilakoken Abigail enda teridah maka ia pentar encibalken dirina. Itandaina biak ras kekurangen perbulangenna. Iangkana kai si arus ibahanna guna namburi kinilabeluhen perbulangenna.

Pengkenaina
Erlajar arah Abigail enda maka Moria pe arusna pentar encibalken dirina nandangi kalak sideban si ersegat ate nandangi perbulangen ntah keluargana. Kepentaren sekalak Moria erkawiten ras kinibeluhenna rukur (nalar), nikapken ras ndarami serpang pulah nandangi persoalen si reh bage pe perbeben si turah. Kepentaren Moria e pe teridah arah kinibeluhenna ngaturken perukuren, pengerana ras perbahanen, bagepe ngangkai ukur kalak sideban. Moria si pentar lit kesabarenna ngamper bana nandangi persoalen si lit. Bage pe la mesukah merawa, la pergelut, la bene ukurna, la per-aru, janah mehuli hubungenna ras kalak si deban. Bage pe kepentaren Moria teridah arah kininggitenna mulahi bana biak-hiak si la pavo nari. Lit usaha guna rembak dingen erkemalangen man Dibata. Ngasup ia engkelengi temanna manusia ras kerina tinepa Dibata sideban. Pentar encibalken bana ertina terjemba ia ngelakoken kinibujuren, meteruk rukur, ras mediate nandangi kalak si deban. Kalak si beluh encibalken bana, la bene pengarapenna i bas ngalaken perbeben. Perbeben nggeluh labo ngenca kerna ngalaken anak jabu bagi si Abigail. Tapi pe mbue perbeben si debanna si arus si alaken. Umpamana: peredaren narkoba, pergaulen bebas, bagepe pengajuk media sosial si la mehuli. Uga dage Moria encibalken bana ras njagai anak-anakna? I bas kerina perbeben i tengah-tengah jabu, bas perpulungen, persoalen ekonomi, entah pe ngalaken pinakit, uga kita encibalken perukurenta? Kalak si pentar tentuna ngasup ia rukur pentar. I bas ngalaken perbeben geluh, rananna banci mpetetap ukur anak jabuna bagepe kalak sideban. Ertina, kepentaren arus ikawitken ras Kata Dibata, Nina kitab Kuan-kuanen "Kepentaren e ndauh ergan asangken emas." Kepentaren e ndauh kal ergan asangken kerina si meherga i bas doni enda. Ernaka jadilah Moria si pentar i bas kerina dampar geluh.

Sharing Pengalaman:  
  1. Moria ibagi ku kelompok (sada kelompok 3 kalak) 
  2. Tep-tep kelompok si nuriken kerna : 
    1. Kuga Abigail pentar ncibalken dirina i bas situasi si man alanken.
    2. Pengalamen nggeluh ngalaken perbeben si mberat.
    3. Tuliskenlah tekad kelompok i bas sada kertas. Isina kerna "Pentar Encibalken Bana." 
  3. Ertoto i bas kelompok gelah ngasup jadi Moria si pentar.

Pdt. Dewi Setianna Tarigan,SSi Theol

Belum ada Komentar untuk "Pentar Encibalken Diri, Bahan PA Moria 3-9 Maret 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel