Pentar Makeken Hak Pilih ( Pemilihan Presiden / Pileg ) - Bahan PA Moria 31 Maret - 6 April 2019


Bahan Bimbingen PA Moria Minggu, 31 Maret - 6 April 2019

SI MAN OGEN : Roma 13 : 1- 7
Patuh nandangi pemerentah si erkuasa
1. Kerina kam arus patuh man pemerentah si erkuasa, sabap labo lit pemerentah si la i bas Dibata nari, janah pemerentah si lit genduari e pe Dibata nge netapkenca.
2. Kalak si ngelawan pemerentah si lit e, ilawanna kap kai si enggo itetapken Dibata, janah kalak si bage perbahanenna, ilegina kap ukumen nandangi dirina jine.
3. Kalak si mehuli perbahanenna, labo mbiar man pemerentah; kalak si jahat perbahanenna nge si mbiar. Adi atendu gelah ola kam mbiar man pemerentah, bahanlah si mehuli, gelah pemerentah muji kam.
4. Sabap pemerentah e kap persuruhen Dibata si erdahin guna kiniulinndu. Tapi adi kam erbahan jahat, mbiarlah man bana, sabap labo sia-sia lit senjata i bas pemerentah guna ngukum. Persuruhen Dibata kap ia janah ia me si nehken ukumen si reh i bas Dibata nari nandangi kalak si erbahan jahat.
5. Erkiteken si e, patuhlah kam nandangi pemerentah, labo saja erkiteken mbiar kena ukumen, tapi erkiteken pusuh peratenndu pe nuruh kam.
6. Erkiteken si enda me pe maka kam arus nggalar pajak, sabap pemerentah ngaloken jabatenna i bas Dibata nari, janah alu bulat ukur idalankenna tugas-tugasna e.
7. E maka berekenlah man sekalak-sekalak kai si patut ialokenna. Galarilah pajakndu man si ngaloken pajak, cuke man pemungut cuke. Hamatilah kalak si patut ihamatindu, janah pehagalah kalak si patut ipehagandu.

TEMA : PENTAR MAKEKEN HAK PILIH

TUJUN : Gelah Moria :
  • Meteh kepatuhen rakyat man pemerintah eme bentuk kepatuhanna man Dibata
  • Nggit ras pentar makeken hakna i bas milih
METODE PA : Diskusi dan aksi.

Kata Penaruh.  
Patuh eme ngikutken alu bulat ukur kai si enggo iperentahken ngayaksa dung. Patuh nandangi kalak si mehuli, si beluh muat ukurta menukah kal, tapi patuh nandangi kalak si labo mehuli tentu seh kal serana. I je me kepentaren perlu gelah banci tetap patuh man si mereken perentah guna idalanken amin pe si arus ipatuhi kita e la bagi ukurta. Erbage-bage kepatuhen enda, anak patuh man orangtua,. murid man guru, pegawai man pemimpin, rayat man pemerintah. Salah sada kepatuhenta i bas paksa si ndeher enda iarapken ikut i bas nentuken pemimpinta presiden ras wakilta alu proses pemilihen. Ikut makeken hak pilihta alu milih pemimpin i bas negerinta seh lima tahun ku lebe eme salah sada kepatuhenta man pemerintah ( negara ). "Calon si man pilihen e banci saja la lit si bagi ukurku ntah pe la lit si tandai, si e la jadi alasen guna la makeken hak pilihta." Gelah reh bagesna pengangkanta, mari sigargari arah bahan PA minggu enda.

Mpebagesi Pengangkan Kerna Ogen
Kitab Roma pasal 13:1-7, eme sada pengajuk i bas Paulus nari nandangi perpulungen Roma. Kalak Kristen paksa e lit i bas kiniseran erkiteken pemimpin si labo encidahken kiniulin ( keberpihaken ) nandangi rayatna terutama kaiak Kristen. Tapi selaku rayat, kalak Kristen i Roma arus patuh man pemimpin si bage. I bas film kolosal kerna situasi politik pemerintahen Roma i bas jaman kitab Roma enda ( cth : Spartacus ) nuriken uga serana akap perpulungen Roma patuh man pemerintah. Tapi i bas situasi si bage me Paulus ngerana mereken pengajaren si mbages man perpulungen e.

a. Kerina kam arus patuh man pemerintah si erkuasa... (ay. 1-5), kerina ertina tep-tep kalak alu la erndobahen. Kepatuhen man Dibata ituduhken alu patuh man pemerintah si itetapken Dibata guna ngaturken kegeluhen manusia i doni enda. Labo lit kuasa pemerintah adi la kin ibereken Dibata. Kepatuhen man pemerentah arus alu pusuh si meciho. Kepatuhen arus raduken kehamaten si teridah arah pengerana ras perbahanen. Patuh man pemerintah alu patuh man hukum ras perundang-undangen si itetapkenna alu bujur. Hukum aturen nggeluh i bas kekristenen eme maba dame sejahtera erpalasken keleng ate. Kalak Kristen i Roma usur ngenanami kiniseran i bas pemerentah Roma nari, erkiteken pemerintah megati njadiken kalak Kristen jadi sangkalen ( kambing hitam ) i bas situasi gejek ntah pe perubaten i Roma. Kalak Kristen iadu-adu i bas gelanggang perubaten guna jadi tontonen man kaisar ras kalak bayak. Mesui ate tapi i bas situasi bage me Paulus ngajarken arus patuh erkiteken ia si erkuasa.

b. Erkiteken si enda me pe maka kam arus nggalar pajak (ay. 6-7). Pemerintah e kap persuruhen Dibata guna kiniulin rayat. Emaka pemerintah ndalanken pembangunen, njagai keamanen ras mereken kelengkapen ( fasilitas ) siniperluken kerina warga. Guna si e lit biayana emaka rakyat perlu nggalari kai si enggo itetapken, salah sada eme nggalar pajak. Alu nggalar pajak rakyat si ngakui wewenang pemerintah ras ndalanken aturen Negara. Selaku kalak Kristen, perpulungen Roma ngakui maka geluhna jadi pasu-pasu man Negara.

Pengkenaina.  
"Pentar makeken hak pilih" enda me tema-nta i bas PA Moria sekali enda. Enggo ndai kite erlajar arah Kata Dibata uga kite arus ncidahken Kemulian Dibata arah kepatuhenta man pemerintahta alu ndalanken hukum ras aturen si erdalan i tengah negaranta. Undang-undang negaranta mereken kesempaten man kerina rakyatna guna ikut milih pemerintah si mimpin 5 tahun. Milih pemimpin si ipatuhi kite guna ngaturken geluhta em hak ras kewajibenta. Adi la ikut milih maka kite lenga ngikuti aturen pemerintah ras la ikut nentuken kiniulin bangsanta. Emaka selaku kalak Kristen i ja pa pe kite ringan ula min la si pakeken hakta e. Banci saja ninta la ku eteh si man pilihen, sibuk aku, la lit si ateku ngena, la kutandai sadape calon si man pilihen, la lit si mereken upah, si kedungenna kite la milih ( golput ). Alasen kai pe banci nge siban, tapi kerina alasenta e ncidahken kinilapatuhenta nandangi pemerintah ras Dibata. Sabap mbelin pengaruh soranta nentuken pemerintah e, sabap kita nge milihsa. Adi si pilih kita e asal enggo maka ulihna pe menggo ka. Pentar ertina, si tandai si pilih, si siksiki, si totoken emaka si tentuken pilihenta.

Emaka si siksiklah calon pemimpin, mbue kita diskusi guna ndatken informasi kerna rekam jejak calon ( kelebihen ras kekurangenna ) tapi ula nggit sitahanen, alokenlah informasi kerna cara-cara pemilihen, tetapken pilihenta, berkat ku TPS ras pake hak pilihta. Ula kal kataken la milih erkiteken sibuk dahin ntah erkiteken la lit pengalonna, sabap e nuduhken maka kita la ipasu-pasu Dibata, e ertina si curnaken gelar Dibata maka si aloken me ukumen arah pemerintah si ngatur geluhta i tengah negaranta.

Diskusi / Niksiki Calon Pemimpin: 
  1. Kai nge si arus silakoken i bas pemilu enda gelah ula kita ngelawan pemerintah ras Dibata? Lakokenlah! 
  2. Siksiki calon pemimpin, tentuken pilihenndu bas pusuhdu dingen totokenlah.
Pdt. Juniyanty br Sembiring,STh.


Belum ada Komentar untuk "Pentar Makeken Hak Pilih ( Pemilihan Presiden / Pileg ) - Bahan PA Moria 31 Maret - 6 April 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel