Tutuslah I Bas Si Kitik ( Pemilu ) - Bahan PJJ 31 Maret - 6 April 2019


Bahan Bimbingen Perpulungen Jabu-Jabu 31 Maret - 6 April 2019
Tutuslah I Bas Si Kitik 
( PEMILU )

Ogen PJJ : Lukas 16:10-15
Tutuslah i bas si kitik
10. “Ise pe situtus i bas si kitik, tentu tutus pe ia i bas si mbelin; ise si la bujur i bas si kitik, tentu pe la ia bujur i bas si mbelin.
11. Dage, adi la kam tutus i bas erta doni, labo ibereken man bandu erta si tuhu-tuhu.
12. Janah adi la kam terteki nandangi sikerajangen kalak ise nge si nggit mereken ertandu jine man bandu?
13. Labo mungkin sekalak juak-juak dua tuanna. Sabap adi bage ugapa pe nembeh atena nandangi si sekalak, janah si sekalak nari ikelengina; sekalak ihamatina janah sekalak nari igombangina. Kam la banci erkeleng ate man Dibata janah erngena ate man erta doni enda.”
14. Kerina si ikataken Jesus e ibegi kalak Parisi; perbahan ia rangap nandangi duit, e maka icacina Jesus.
15. Tapi nina Jesus man bana, “Kam pekulah-kulahndu bujur i lebe-lebe jelma si nterem, tapi ieteh Dibata nge isi pusuhndu. Sabap kai si meherga iakap manusia la kap lit ergana i bas Dibata.”
Pemilihen Presiden ras pemilihen Anggota Dewan Perwakilen Rakyat (DPR), Dewan Perwakilan Daerah (DPD) ras Dewan Perwakilen Rakyat Daerah (DPRD) ilakoken setiap lima tahun sekali. Khususna pemilihen Presiden ras pemilihen anggota Legislatif tahun enda, ilakoken secara serentak i bas tanggal 17 April 2019. Ikut muat bagin i bas Pemilu ( Eksekutif / Legislatif ) eme dahin si ibereken Tuhan man banta. Umumna si berperan ras si jadi peserta pemilu eme partai-partai politik si mereken 'aspirasi' rakyat ras si mengajuken calon-calon guna ipilih rakyat i bas pemilihen e. I bas Pemilu si enggo ndeher ilakoken, selaku rakyat bage pe ngawan ni perpulungen GBKP ikut muat bagin jadi calon (kandidat). Jadi, arah renungenta enda tole ipersingeti sura-sura jadi anggota eksekutif / legislatif mehuli adi jadi pasu-pasu si mereken kesejahteran man rayat si rulo.

I bas teks renungenta enda Jesus ngerana kerna "mamon" asal katana arah bahasa Aram "mamona" si ertina kebayaken entah pe keuntungen, ras i bas pemakenna mengacu ku bas erta doni entah pe duit. Tupung ikataken Jesus, ise pe situtus i bas si kitik, tentu tutus pe ia i bas simbelin, si imaksudken Jesus tutus i bas si kitik eme kerna erta doni, janah tutus i bas si mbelin si imaksudken Jesus eme kerna kegeluhen sirasa lalap ( surga ). Si ikataken Jesus enda banci saja mesera siakap ngalokensa adi ikatakenNa erta doni e perkara si kitik, sebab adi nggeluh la erduit ras la lit erta mesera ndalani kegeluhen enda. Situhuna Jesus labo ngelarang kita mpepulung duit ras erta. Melala pe duit ras erta labo salah, adi sipepulung alu cara si payo si ngena ate Tuhan sebab kerina silit bas kita enda pe kap pemere Tuhan. Si ilarang Jesus eme ula sempat merangap nandangi duit, sebab merangap bali kap ras nembah man berhala ( bdk. Ep. 5:5 ) ras ula ertuanken duit bage pe iperbudak duit, sebab :
  • Duit la mereken keseiamaten si tuhu-tuhu ras njamin kedamen man banta.
  • Merangap nandangi duit eme sumbul kerina kejahaten ( bdk. 1 Tim. 6:10a ) ertina adi perayaken nggeluh enda si utamana kel erta doni megati lanai ieteh bujur sierbahanca ndabuh ku bas kejahaten, eme make kerina cara ngelasamken kiniteken, jabu, perkade-kaden termasuk pe kesehaten, rsd.
  • Merangap nandangi duit lanai tetap i bas kiniteken janah gulut ukurna ibahan erbage-bage kecedan ate ( bdk. 1 Tim. 6:10b ). 
Erkiteken sie, i bas ayat 13 ituriken Jesus la banci erdua tuan eme erkeleng ate nandangi Tuhan ras erngena ate nandangi duit ( erta ), sebab adi bage ugapa pe nembeh atena nandangi si sekalak, janah si sekalak nari ikelengina, sekalak ihamatina janah si sekalak igombangina. Aruslah kita pentar i bas erbahan keputusen si ertuanken Tuhan. Megati i bas ranan sikataken Tuhan jadi tuannta tapi i bas pusuh ras praktekna duit nge si jadi tuannta. Perlu siinget maka duit ras erta labo dosa tapi duit ras erta pe labo tuan, ertina "uang memang bisa membeli banyak hal, tapi uang bukan segala-galanya".

Arah nats renungenta enda kita ipersingeti, la kepe ngena ate Dibata adi kita merangap, ertuanken ras iperbudak duit. Khususna nandangi ngawan perpulungen si jadi calon eksekutli / legislatif, Tuhan ernembeh ate adi tujun utama jadi anggota eksekutif / legislatif gelah bayak secara erta doni ras makeken duit guna nogok jelma sienterem gelah ndatken kekuasan. Bage pe kita ngawan perpulungen si "milih" legislatif / eksekutif, ula kita nggit isogok, sebab adi sialoken erdosa kap kita, alu bage si suruh wakilta si kundul i 'parlemen' ras i bas struktur pemerintahen gelah la korupsi, sebab enggo mbue duitna keri, ulihna asa ndigan pe negaranta enda labo banci maju ras kita selaku rakyat labo banci sejahtera.

Kerina kandidat i bas Pemilu enda arus ngangkai visi ras misi si palasna "panggilen Dibata" guna "ngelai" alu ngelakoken perentah Dibata eme "tutus i bas si kitik" gelah ibereken Dibata siterbelinen, ertina:
  • Tujun utama jadi anggota eksekutif / legislatif labo duit, erta, kebayaken ras kekuasaan tapi ngelai Tuhan ras masyarakat entah pe gelah banci jadi pasu-pasu man jelma sienterem.
  • Ngukurken ras ngelakoken si mehuli, bujur ras adil.
  • Mperdiateken ras berusaha meningkatken kesejahteran rakyat.
  • Mpeseh sura-sura rakyat. Mpelebeken kepentingen negara / rakyat asa kepentingen pribadi, kelompok ras golongen. 
  • Mereken pertanggungjawaben secara moral ras politis nandangi pemilih ras nandangi daerah pemilihenta.
  • Patuh nandangi aturen perundang-undangen, la nggit KKN ( Korupsi, Kolusi, Nepotisme ) 
  • Kune la terpilih, ula sempat e erbahanca bene kinitekenta ras mpeturah pinakit, sebab labo arah anggota legistiatif / eksekutif ngenca kita banci ngelai Tuhan ras jadi pasu-pasu man jelma sienterem.
Singena ate Dibata eme kita harus tetap ertuanken Tuhan i bas encariken duit ras erta harus alu cara sipayo bagi singena ate Tuhan.

Evaluasi
Enggo sidarami informasi nandangi calon legislatif ras Capres / Cawapres si man pilihen?

Diskusi
  1. Kai kin ertina itutus i bas si 'kitik' rikutken tema renungenta?
  2. Turiken uga carana gelah pang kita nulak sogok
AKSI
I bas pertoton syafatta si tep-tep wari i rumahta tetap sibaba topik pertotonta eme "Notoken gelah pemilu 17 April 2019 erdalan alu mehuli" bage pe gelah kerina calon eksekutif / legislatif si terpilh ras si la terpilih tetap erkemalangen man Tuhan, sehat ras mejuah-juah".

USULEN LAGU : 
  1. KEE GBKP No. 102 : 1,4
  2. KEE GBKP No. 255 : 1-2
  3. KEE GBKP No. 385 : 1 - 
  4. KEE GBKP No. 396 : 1,3

TOPIK PERTOTON SYAFAAT : 
  1. Notoken Ngawan perpulungen gelah la ertuanken "mamon" tapi tetap ertuanken "Tuhan"
  2. Notoken Ngawan perpulungen gelah ngangkai ikut i bas Pemilu eme dahin siibereken Tuhan
  3. Notoken Ngawan perputungen gelah si jadi calon Legislatif / Eksekutif nikapken diri ipilih ras la terpilih
  4. Notoken Ngawan perpulungen gelah si jadi calon Legislatif / Eksekutif ngangkai orat nggeluh kalak siipilih Tuhan

Pdt. Elieser Tarigan Tambun, S.Th.



Belum ada Komentar untuk "Tutuslah I Bas Si Kitik ( Pemilu ) - Bahan PJJ 31 Maret - 6 April 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel