Lebih Asa Permenang - Paskah Ras Ngaloken Ulih PEMILU


Lebih Asa Permenang - Bahan Bimbingen Perpulungen Jabu-Jabu 21 - 27 April 2019
( Paskah Ras Ngaloken Ulih PEMILU )

Ogen : Roma 8 : 37 - 39
37. Tapi i bas si enda kerina tuhu-tuhu kita lebihen asa kalak si permenang erkiteken Kristus si erkeleng ate man banta.
38. Sabap aku enggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bage pe kai si jadi pagin.
39. Subuk kai pe si i babo doni tah si i teruh doni, la lit kai pe i bas kerina si enggo ijadiken Dibata si ngasup nirangken kita ras keleng ate Dibata, e me keleng ate si cidahkenNa i bas Kristus Jesus Tuhanta.
Kemenangen eme sada si iarapken, sierbanca meriah ukurta, apai ka adi enggo mentasi sada perjuangen si dem alu kinigenggengen. Piga-piga hal si tangkas iidah kita kerna kemenangen, eme kap asum kita ngasup ngelupaken kegagalen i bas paksa si lewat dingen tetap semangat ras maju. Paksa kita engkuasai diri i bas perbeben. Bage pe paksa kita ngasup ngaloken kerina situasi si jadi i bas kegeluhenta. Emaka situhuna melala kemenangen si tergejap i bas kegeluhenta enda. Labo terjeng menang i bas perlumban entah prestasi si meningkat saja tapi i bas erbage cibal kegeluhenta.

Surat Rasul Paulus enda itulisken sekitar tahun 55-56 M alu tujun guna mpetandaken dirina man perpulungen Roma. Bage pe nuriken kerna kalak si erkiniteken i bas persadanna ras Kristus i tengah-tengah kiniseran tupung kekaisaran Romawi. I bas oratenta Roma 8: 37 "Tapi i bas si enda kerina.." ertina ngingetken uga sangatna pe perbeben si jadi, tapi kalak si erkiniteken man Kristus ikataken: "Kita enda lebihen asa kalak si permenang". Kemenangen kai nge si imaksudken i jenda? I bas cakap Junani kata menang ipake kata ( ioge: Niketes ) si iertiken kalak si enggo ngaloken perkuah ate Dibata alu kinitekenna nandangi Jesus Kristus si tetap ipelimbaruiNa alu naluken dosa. Kalak si enggo menang encidahken tanda maka ia lanai seri ras doni enda ( bdk. Rom. 12: 1-2 ). Kemenangen kalak si erkiniteken eme i bas ia tetap njaga kiniersadan ras Kristus.

Iterusken ayat 38-39: "...sebab aku enggo tek..." Ngatakenca kalak si lebihen asa permenang e kinitekenna dingen kerembakenna ras Dibata nge si utamana. Kalak si lebih asa permenang labo ngerana soal gegeh kula, labo kalak si la lit kekurangenna. Persadanna ras Kristus nge erbanca ia megegeh. Melala i bas doni enda si banci erbanca kesirangen ras Dibata adi lenga paguh erkiniteken. Umpamana, kepiceten, uru-uru kalak, kurang pangan entah uis, ancamen, kematen rsd. Kematen i bas pemahamen Padan si Ndekah eme nirangken kalak ras kalak si ikelengina. Bage pe banci nirangken kalak i bas persadan ras Dibata. I bas Padan si Mbaru Rasul Paulus nuratkenca maka kematen eme keuntungen ( bdk. Pil. 1: 21 ).

Paskah sirayaken gerejanta teptep tahunna eme sada perentah i bas Dibata nari ( bdk. Kel. 12: 14 ). Nginget maka Dibata kap simbebasken bangsa Israel i bas Mesir nari. Paskah i bas Padan si Mbaru eme mperingeti kerna kekeken Tuhanta Jesus Kristus. KekekenNa i bas si mate nari eme kemenangenta i bas kuasa dosa. Kalak Kristen si enggo menang jadi saksi guna tetap ngerembakken dirina ras Tuhan i tengah-tengah perbeben kegeluhenna.

Janah istimewana April 2019 enda Paskah radu ras Pemilihan Legislatif ( Pileg ) ras Pemilihan Presiden ( Pilpres ) i bas tanggal 17 April 2019 si lewat enda ndai. Masa kampanye si enggo ilakoken singkat, enem bulan ngenca (13 Oktober 2017-13 April 2019). Teptep pemilihen pasti lit si menang lit ka si la menang. Uga kita ngasup ngalokenca alu nggejapken Dibata tetap erkeleng ate dingen ngergai kerina usahata. Adina terpilih, enda jadi kesempaten guna ndahiken si mehuli i bas pemerintahen. Tapi, bicara lenga menang pe labo e erbanca maka la kita ikut pesikap kutanta. Sabab kalak si permenang ngasup ngaloken situasi si ugapana pe erkiteken make gegeh Kristus. Bage pe ngawan perpulungen teruslah notoken si menang gelah ngasup ndahiken dingen nehi kai si enggo ijanjikenna i bas kampanye ras notoken dingen mereken pergegeh man si langa menang.

Tanda-tanda kalak permenang eme:
  1. Meteh maka Kristus tetap erkeleng ate man banta i bas kerina kecibal kegeluhenta.
  2. Rusia (rahasia) kemenangenta emekap kematen Kristus i bas kayu persilang si nebusi kita janah maba dame man banta.
  3. Nandai diri selaku kalak si erkiniteken man Kristus. Kita eme anak-anak Dibata si isuraken guna ndahiken dahin si mehuli.
EVALUASI : 
Turikenlah ulih aksi i bas HUT GBKP si lepas

DISKUSI : 
  1. Bas kai-kai saja nge kita enggo menang i bas kegeluhenta?
  2. Kai si ban i bas nuduhken kita kalak permenang? 
AKSI:
Si totoken i bas sada minggu enda kerina calon si menang ras lenga menang gelah tetap megegeh ras berkarya.

USULEN LAGU : 
  1. KEE GBKP No. 102 : 1      ( KLIK JUDUL KEE UNTUK MELIHAT LIRIK TEKS )
  2. KEE GBKP No. 183 : 1, 4  ( KLIK JUDUL KEE UNTUK MELIHAT LIRIK TEKS )
  3. KEE GBKP No. 282 : 1-3   ( KLIK JUDUL KEE UNTUK MELIHAT LIRIK TEKS )
  4. KEE GBKP No. 374 : 1-3   ( KLIK JUDUL KEE UNTUK MELIHAT LIRIK TEKS )
TOPIK PERTOTON SYAFAAT :
  1. Notoken perpulungen gelah mpebelin perhatinna kempak kekelengen Kristus si mbelin dingen ngasup tetap ngerembakken diri ras Dibata i bas kerina situasi nggeluh.
  2. Notoken kerina si enggo terpilih i bas PEMILU gelah erdahin alu tutus dingen si lenga terpilih tetap semangat ndahlken si mehuli i bas kegeluhenna.
  3. Siturah i bas perpulungen.

Pdt. Kristiani F. Br. Tarigan, M.Th


Belum ada Komentar untuk "Lebih Asa Permenang - Paskah Ras Ngaloken Ulih PEMILU"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel