Ngasup Makeken Waktu ( Pentar Makeken Kesempaten ) - Bahan PA Mamre 28 April - 4 Mei 2019


Bahan Bimbingen PA Mamre 28 April - 4 Mei 2019
Ngasup Makeken Waktu

Ogen : Epesus 5 : 16 - 17
16. Pergunakenlah kesempaten si lit i bas kam alu mehuli, sabap wari-wari enda la kap mehuli.
17. Dage ola bodoh, tapi pergermetkenlah kai si ngena ate Tuhan guna idalankenndu.
Tema : Pentar Makeken Kesempaten

Tujun : Gelah Mamre
  1. Meteh maka waktu ras kesempaten e me pemere Dibata si arus iergai.
  2. Ngasup makeken waktu alu mehuli 
Metode : Aksi erbahan jadwal waktu masing-masing

KATA PENARUH
I bas pemaken waktu, pernah terbegi istilah: Pemena, Sada, dua, lima (1,2,5). Ertina, sada cangkir kopi / teh manis, dua goreng pisang ras lima jam ngeranai. Istilah enda nggambarken perbapan si dekahen i kede kopi asa erdahin. Melala waktu si terbuang. Peduaken, `Time is money' ( waktu adalah uang ). Istilah enda nggambarken uga mehergana waktu. Peteluken, `Life is short' ( hidup ini terlalu singkat ). Geluh enda eme kesempaten si terbatas. Arah kerina istilah i datas nuriken maka kesempaten geluhta i bas doni terbatas. Adi nina Masmur 90:10, Dekahna kami nggeluh lit pitupuluh tahun, adi kami megegeh banci jadi lit waluh puluh tahun..." Kai si kataken pemasmur enda eme kinata si jadi i bas kegeluhenta. Ertina, kesempaten ntah waktunta nggeluh i bas doni enda lit ujung ntah limitna. Alu kesadaren enda, selaku Mamre kita perlu erpengue bagi pemasmur: "Ajari kami ngertiken uga gendekna umur geluh kami gelah kami jadi kalak pentar, E maka mari kita erlajar arah bahan PA-nta sendah.

URAIAN TEKS / TAFSIREN
  1. Perpulungen Epesus eme sada perpulungen si termasuk nguda denga ras mesunah mulih / ndabuh ku bas pengajaren si adi ntah pe kiniteken si dekah ( bdk. 5:8 ). E maka, salah sada misi rasul Paulus nehken surat enda eme mendewasaken kiniteken perpulungen enda. Kedewasaan si imaksudkenna e me, "...seh kita ku tingkat kedewasaan Kristus si serta." ( 4:13 ). Kalak Kristen si dewasa e me kalak si kegeluhenna erpatron ( ngusih ) ku bas kegeluhen Jesus. Kristus takalna, perpulungen kulana ( 1:10; 4:15-16 ). Adi Kristus e enggo jadi usihen kalak Kristen ( 5:1 ), maka teridah me sinalsal ( terang ) Kristus ibabona ( 5:1b ). Kalak si bage, lanai mesunah iombang-ambingken dingen ijole-joleken kujah-kuje alu alu angin tertiadap kesehatan dan lingkungan. pengajaren si nipu, si mbabai kalak papak alu penebu-nebuna si guak ( 4:14 ). Kristen si dewasa maka banci mpebincar terang Kristus ntah pe jadi pasu-pasu man doni enda.
  2. Selaku anak-anak kekelengen Tuhan (5:1), lit si man silahenken ( la patut ) ras lit ka si man ikutenken. Si man silahenken eme kegeluhen i bas gelap: erlua-lua, erlagu la mehuli ntah pe merangap, ercakap caram, cakap silang-lang, cakap kemali, nembah man berhala ras sidebanna. Perbahanen-perbahanen si bagenda labo dat bagin i bas Kinirajan Dibata ( 5:3-5 ). Siman ikutenken eme kegeluhen i bas terang: Si mehuli, si bujur, si tuhu-tuhu, idemi Kesah Dibata, ercakap-cakap alu make Masmur ( erpalas kata Dibata ), rende muji Tuhan ras ngataken bujur i bas kiniulin Tuhan ( 5:9,18-20 ). Mbelin perulihen kalak si ndalanken perbahanen si bangenda ( 5:9 ).
  3. Rasul Paulus mindo man perpulungen gelah iperdiatekenna ( megermet, lndo. Perhatikan dengan seksama ) lagu-langkahna masing-masing. Ola nggeluh bagi kalak motu, tapi bagi kalak pentar ( 5:15 ). Si imaksudken motu (bodoh), e me kalak si ndalanken perbahanen si man silahenken. Sabab perbahanen si bage nuju ku bas kebenen ( la dat bagin i bas Kinirajan Dibata ). Terkait ras perbahanen bodoh enda, pernah itujuken man kalak bayak singandalken kebayakenna guna keselamatenna ( Luk.12:13-21 ) ras 5 diberu lenge si la ersikap seh nimpet lampuna ope pengantin si itimaina reh, e maka la ipediat ia bengket ku pesta e ( Mat 25:1-13 ). Perbahanen si motu eme perbahanen si labo ernalem man Tuhan ras tertaban ku sura-sura daging ntah pe keriahen doni enda. Si imaksudken kalak pentar, e me kalak si ndalinken perbahanen si man ikuteken. Perbahanen si bage ngena ate Tuhan ras mbelin perulihenna. Kalak pentar e me kalak si i bas geluhna malang man Tuhan ( bdk. Kua.1:7; Job 28:28 ). Perbahanen pentar pernah itujuken man bendahara si cerdik, si ngasup mpergunaken erta ras waktu si lit alu mehuli ndarami teman ( Luk. 16:1-9 ) ras pe itujuken man diberu si cerdik, si lampuna tetap erminak ras gara seh pengantin si itimaina reh. E maka, iatanken ia bengket ku bas ingan pesta e. Kalak si pentar e me kalak si ernalem man Tuhan lebih asa kai pe i bas kegeluhen enda ras nggeluh alu bijaksana makeken kai lit i bassa rikut si ngena ate Tuhan.
  4. Rasul Paulus ngajuk perpulungen gelah mpergunaken kesempaten alu mehuli, sabab wari-wari enda labo mehuli ( 5:16 ). Kesempaten ( Junani: kairos ) ertina waktu yang ada. Kegeluhen manusia i bas doni sekitar 70-80 tahun saja. Ertina, seiring waktu, kesempaten nggeluh manusia terus berkurang ras kedungenna rujung geluhna (mate). La terjeng je ngenca, Dibata denggo erbahan perhitungen ( penghakimen ) nandangi uga kita mpergunaken kesempaten si iberekenNa, desken juak-juak si ngaloken talenta ( bdk. Mat. 25:14-30 ). E maka, Rasul Paulus ngajuk perpulungen gelah mpergunaken waktu si lit alu mehuli. Carana, kesempaten e arus si idah selaku pemere Dibata si meherga. Adi meherga, tentu irawat ras sikelola alu mehuli. Kesempaten e ipergunaken guna ndahiken dahin-dahin si ngena ateNa ( si man ikutenken ). I bas sie pe, rasul Paulus mpersingeti maka wari-wari enda la kap mehuli ( 5:16b ). Si imaksudken Paulus, labo wari-wari e si la mehuli, sabab kerina si ijadiken Tuhan, termasuk wari-wari, mehuli kal ( Kej, 1:31 ). Tetapi, i bas wari-wari e pe erdahin kuasa-kuasa gelap, kuasa-kuasa si la teridah, si ngajuk manusia erbahan si jahat ( Ep. 6:11-12 ). Kuasa-kuasa enda mabai manusia ndalanken si la man ikutenken, si nuju ku kebenen. Em sababna perpulungen arus mperdiateken lagu langkahna, gelah tetap ngasup makeken kesempaten alu dahin-dahin si mehuli.
Aplikasi
Temanta: Pentar Makeken Kesempaten. Rikut bahan PA-nta lit piga-piga hal si banci sirenungken guna sidalanken selaku Mamre:
  1. Kesempaten ( waktu si lit ) terbatas. Piga-piga isi Pustaka Si Badia nuratken kesempaten geluh manusia lit batasna, umpamana i bas Masmur 90 : 9 -10, Pengerana 8:8. Emaka erkiteken kegeluhen e me pemere Dibata, harus iergai ras ipergunaken alu mehuli. 
  2. Kesempaten e erguna Kesempaten si lit labo hanya banci sipake guna hal-hal si mehuli, tapi ije pe lit kemungkinen erbahan si jahat Imbang-imbangndu bagi singa si erngaum-ngaum ndarami si man jerngemenna ( bdk. 1 Ptr. 5:8 ). E maka, Mamre arus mperdiaten alu megermet (waspada) gelah ula makeken waktu alu sia-sia ntah pe perbahanen si jahat, si maba ku kebenen. Mamre arus mengisi kesempaten e alu perbahanen si mehuli, si ngena ate Tuhan. Ijenda kita perlu erlajar ngaturken penggunaan waktu setiap wari alu mpesemal ( membiasaken ) dirinta erbahan jadwal ( time schedule ) si isi pendahin-pendahin si mehuli. Alu bage, tiap wari banci si evaluasi ras kita banci bertumbuh ku bas pribadi si ngasup mpergunaken kesempaten alu maksimal ras mehuli. Kita arus makeken kesempaten selaku kalak si penta.
  3. Penggunaan Kesempaten alu efektif ras efesien.
    "Lit sekalak Kristen si mbelin perusahaanna. Ia bayak namura, tapi jarang reh ku Gereja. Asum lit perkunjungen ku rumahna, isungkun engkai maka ia la reh-reh, alasenna, "Aku sibuk. Melala si mandahinken, rapat, pelatihen rsd. Ma enggo tehndu bage buena si man aturenken. Keperlun perusahaan ras pe erbage jelma si erdahin." Nina alu ringan ras bangga. Kenca piga-piga dekah, lit keluhen i bas tentenna. Lanai tertahansa, e maka lawes ia ku dokter. Nina dokter, "Lit masalah i bas paru-parundu. Mungkin enda gejala kanker." Seh kal ia biarna mate. E maka melala waktuna ku dokter. Enggo ka lit waktuna ertoto. Enggo ka lit waktuna reh ku Gereja." Kepeken kalak cenderung mpergunaken kesempaten / waktu ku kai si akapna si mehergana. Adi perusahaan kin akapna si mehergana, tentu ku je ibahanna waktu si utama. Adi kesehaten si mehergana, tentu ku dokter si nomor sadana. Adi keselamaten tendina si utama, tentu ku ibadah ras ku Gereja prioritas waktuna. Selaku Mamre aruslah berlaku "Tapi sipentingna, darami lebe KinirajanNa, janah dalanken si ngena ateNa, maka icukupkenNa kai si perlu man bandu," ( Mat. 6:33 ). Doni enda lesap me, tapi kalak si ngikutken kata Dibata tahan rasa lalap ( bdk. 1 Joh. 2:17 ). Apai si pilih? Arusna, Tuhan si pertama terutama i bas geluh Mamre si dewasa ras pentar.
DISKUSI
  1. Rikut bahan PA Mamre sendah, uga nge si ikataken kalak si pentai mpergunaken waktu? 
  2. Selaku Mamre si pentar, mari sibenaken erbahan prioritas penggunaan waktu i bas pendahinta si tep-tep wari! Adi lit Mamre si enggo erbahan jadwa harian, mingguan, bulanan ntah tahunen, ibere kesempaten nuriken pengalamenna, khususna manfaatna.
USULEN ENDE-ENDEN
  1. KEE GBKP No. 205 : 1,5   ( KLIK JUDUL KEE UNTUK MELIHAT TEKS LIRIK )
  2. KEE GBKP No. 62 : 1,2    ( KLIK JUDUL KEE UNTUK MELIHAT TEKS LIRIK )
  3. KEE GBKP No. 255 : 1,4   ( KLIK JUDUL KEE UNTUK MELIHAT TEKS LIRIK )
  4. KEE GBKP No. 15 : 1,2     (Persembahen)
  5. KEE GBKP No. 273 : 1-2   ( KLIK JUDUL KEE UNTUK MELIHAT TEKS LIRIK )

Pdt Arapen Peranginangin, M.Th 
HP: 081362120955



Belum ada Komentar untuk "Ngasup Makeken Waktu ( Pentar Makeken Kesempaten ) - Bahan PA Mamre 28 April - 4 Mei 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel