Ngaturken Kegeluhen - Bahan Bimbingen PA Moria 14 - 20 April 2019


Bahan Bimbingen Moria Minggu, 14 -20 April 2019
Enterpreneurship Padan Si Mbaru


SI MAN OGEN : 2 Tesalonika 3: 6-12 ,
Ola perkisat
6. I bas gelar Tuhan Jesus Kristus ikataken kami man bandu o senina-senina, sirangindulah kerina senina-senina si perkisat, si la nggit ngikutken ajaren si ibereken kami.
7. Ietehndu maka arus idalankenndu bagi si ibahan kami. Labo kami perkisat asum kami i tengah-tengahndu.
8. La ipan kami nakan kalak la nggalar. Tapi erdahin kami alu latih. Erdahin kami suari ras berngi gelah ola lit i tengah-tengahndu si mberat iakapna erkiteken kami.
9. Si enda ibahan kami, labo perbahan la lit hak kami mindo penampat man bandu; si enda ibahan kami gelah jadi usihen si mehuli man bandu.
10. Asum kami ras kam usur ikataken kami man bandu, “Kalak si la nggit erdahin ola bere man.”
11. Si enda ikataken kami perbahan ibegi kami lit piga-piga i bas kam perkisat, si la kai pe ibahanna seakaten ncampuri sikerajangen kalak.
12. I bas gelar Tuhanta Jesus Kristus, ikataken kami man kalak si bagenda dingen ipersingeti kami maka arus idalankenna kegeluhen si metunggung dingen erdahin ncariken keperlunna.
T E M A : NGATURKEN KEGELLIHEN

T U J U N : Gelah Moria:
  • Erlajar arah pedah Rasul Paulus guna ngaturken kegeluhenna secara ekonomi.
  • Mejingkat ras kreatif ngaturken kegeluhen.
METODE PA : Study Kasus

Kata Penaruh. 
Tahun 2019 enda melala kita ngerana kerna wirausaha, erkiteken i bas GBKP tahun enda eme tahun entrepreunership. Mbangun kerina biak si mehuli ulihna nambahi kelebihen sekalak jelma ( karakter, mental skill ras moral ) guna ngidah peluang ras pang nanggung resiko. Anemgia secara umum masyarakat Karo mata pencarin eme ku juma, tapi banci ka lit turah perukuren guna rusaha, selain dahin utama. Entah pe mbangun jejaring arah ulih juma, alu ngidah ras ngargari kai si banci ikembangken, Enda me si perlu ipeturah i bas mbangun usaha, labo terjeng uga kita kerja keras tapi uga kita banci kerja kreatif ras ngidah peluang si banci si kembangken guna usaha. Adi ulih juma musiman, banci jadi ergana murah perban melala si nuansa. I bas paksa si bage, si idah cara sideban si lebih mehuli. Arah renungenta enda iajuk kita gelah ngidah peluang si banci si kembangken guna usahanta. Si penting nggit erdahin, ula mekisat.

Mpebagesi Penganqkan Kerna Ogen.
Paulus alu tangkas ngerana man perpulungen Tesalonika si mekisat ( malas ) erdahin. Alu tegas ngerana ia, tapi dem kekelengen gelah perpulungen Tesalonika displin i bas ndalani kegeluhenna. Ajaren ras usihen si enggo ilakoken Paulus gelah iusih perpulungen e. Paulus ngelai, tapi erdahin ka ia erbahan tenda guna ncukupi kegeluhenna. La ipanna nakan kalak alu la nggalar. La iberatina perpulungen guna kegeluhen ras pelayanenna. Iberekenna usihen i bas pendahin ras pelayanenna. Situhuna Paulus pe lit hakna guna ngaloken duit i bas pelayanenna, tapi la ialokenna erkiteken la ia nggit nuhsahi perpulungen si ielaina (ayat 10).

Paulus mpersingeti perpulungen gelah ula perkisat (ayat 16). Sabap adi perkisat la lit gunana, la patut ibere man. Ibegi Paulus maka piga-piga i bas perpulungen e la tertip, la nggit ngelakoken kai me. la nggit erdahin erkiteken lit kalak si ngataken maka Kristus lanai ndekah reh peduakaliken. Emaka ipetangkas Paulus man perpulungen kerna kerehen Jesus peduakaliken e lit terjadi kejahaten ras kekejamen. Amin pe terjadi situasi si bage rupana, perpulungen arus tetap erdahin encariken keperlun geluhna sekalak-sekalak bali ras Rasul Paulus ras teman-temanna si tetap tutus erdahin.

Dibata ndilo manusia gelah tetap erdahin, ngusahai, ras mpekena-kena tinepaNa. Ibereken akal pikiren, kengasupen ngukuri kerina alu mehuli. Ngukuri kiniulin la man dirina jine tapi man kerina si lit i sekelewetna. Paulus tegas mpersingeti perpulungen gelah ernanam man sekelewetna.

Pengkenaina. 
Pendahin eme pemere Dibata, i ja i bas kita erdahin la nguntungken man banta saja, tapi pe guna kalak sideban. Perayakenta erdahin guna kemulian Dibata, labo man dirinta jine ras labo ka guna duit ras kinibayaken. Palas pendahinta eme tanggungjabab man Dibata, labo kerna ulih, alu bage si dat ketenengen i bas erdahin. Semangat erdahin eme tanggungjababta kerna talenta sinibereken Tuhan man banta, gelah pendahinta mereken ulih si mehulina. Arah pendahinta banci min kita jadi pasu-pasu man kalak sideban. Ngasup kita mbuka ras ngidah peluang guna ngaturken kegeluhenta arah pendahin sinibereken Dibata man banta. Jadi pendahin man banta labo terjeng makeken kengasupen ras sumber daya si lit tapi ngasup kita ngubah prinsip, caranta erdahin, geluh i bas pelayanen gelah kerina erguna man kemulian Tuhan. Mejingkat ras kreatif i bas erdahin, kai pe banci sikelola adi si idah peluang guna rusaha. Ergakenlah pendahin sinibereken Tuhan, tekun (nunut) i bas ndahikensa dingen pakekenlah kesempaten si nibereken Dibata guna mereken si mehulina.

Study Kasus:
Nd. Ngutkut pendahinna eme perbinaga ku kuta-kuta, seh kal latihna iakapna erdahin sabap la pernah ngadi-ngadi , tiap wari ia ku kuta kalak erbinaga. Tapi perbulangenna i rumah saja la lit kai pe dahinna, ku kede ras erjudi saja lalap. Maun-maun Nd. Ngutkut enggo melawen mulih tiga nari banci seh tengah berngi. Emaka labo pernah ia jumpa ras anak-anakna sabap lawes ia ku tiga erpagi-pagi lenga medak anak-anakna, mulih kari ia tiga nari anak-anakna enggo medem. Anakna lit kalak 2 dilaki sada diberu. Sintua SMA kelas 2 si nomor 2 SMP kelas 3 ras singuda diberu SD kelas 5. Adi jumpa Nd. Ngutkut ras Bp. Ngutkut lalap rubat sabap Bp. Ngutkut lalap mindo sen ras labo ia nggit erdahin. Nd. Ngutkut erbinaga labo bujur, timbangenna pe labo pas. Perbahan labo ia sendalanen ras Bp. Ngutkut dungna selingkuh Nd. Ngutkut ras dilaki sideban supir si ras ia lalap ku tiga, janah Bp. Ngutkut Ialap nge erjudi emaka utangna pe enggo melala. Melala kalak nuntut man Nd. Ngutkut gelah utang Bp Ngutkut igalari. Piah dungna Bp. Ngutkut masuk penjara perban melala utangna la pernah nggit erdahin, malas.
  1. Uga nge pengakapndu keluarga Bp. Ngutkut enda, ise nge iakapndu si salah i bas keluarga enda?
  2. Menurutndu salah nge Nd. Ngutkut enda selingkuh erkiteken la idatna kedamen i bas jabuna? Diskusiken alu mbages.
  3. Kai nge si akapndu si perlu ilakoken Nd. Ngutkut ras Bp. Ngutkut guna mpekena jabu enda?
Pdt. Natalidna Tarigan, M.Th


Belum ada Komentar untuk "Ngaturken Kegeluhen - Bahan Bimbingen PA Moria 14 - 20 April 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel