Ngergai Kinibeluhen Teman ( Tantangen: Kurang Ngergai ) - Bahan PA Moria 28 April - 4 Mei 2019


Bahan Bimbingen PA Moria 28 April - 4 Mei 2019
Tantangen: Kurang Ngergai

SI MAN OGEN : Jakup 3 : 13 - 18
Kepentaren si rehna i datas nari
13. Lit kin sekalak i tengah-tengahndu pentar dingen erpengangkan? Arus icidahkenna e arah kegeluhenna si mehuli, alu perbahanen mehuli si idalankenna alu meteruk ukur dingen kepentaren.
14. Tapi i bas ukurndu kam percian, perngilas, dingen dirindu saja ngenca iranakenndu. Ola megah iakapndu kerna si e, janah ola erbual nandangi si tuhu.
15. Si enda labo kepentaren si rehna i Surga nari, tapi biakna biak doni, biak binatang, biak setan.
16. I ja lit cian ate, ras ngukuri kepentingen diri sendiri saja, i je lit erbage-bage perubaten ras perjengilen.
17. Tapi kepentaren si rehna i datas nari si pemena e me bersih pusuh peraten, nggit erdame, lemah lembut, la megogo. Dem perkuah ate i bas ia dingen erbuahken perbahanen si mehuli. La rayo-ayo, ras tangkas ukur tangkas kata.
18. Tuhu payo maka si mehuli e me buah si iperani i bas benih perdamen si isuan kalak si erngena ate nandangi perdamen.
TEMA : NGERGAI KINIBELUHEN TEMAN

TUJUN : Gelah Moria
  1. Meteh maka cian ate mpeturah erbag perubaten ras perjengilen.
  2. Ngasup ngergai ("mengapresiasi") ulih pendahin temanna ras kalak sideban.
METODE PA : Inventarisir kelebihen si lit i bas teman ( kalak si deban )

Kata Penaruh.
Adi lit temanta si rulih ia i bas usahana ( berhasil ) si ibenakenna kin i bas si kitik-kitik nari, uga nge ukurta nandangi temanta e? Si ergaken ras si pujiken nge entah si darami kekurangenna? Si tuhuna i bas keberhasilen temanta, em dalanta mujiken ia ras ikut pe numpak-numpak kinibeluhenna e gelah reh ulina. Biak mujiken, ngergaken, ngenen si mehuli bas temanta, anakta, perbulangenta perlu kai si pebelin i bas kegeluhenta. Sabap sitik pujin banci jadi gegeh si luar biasa man kalak sideban janah labo sitik pe lit rugita. Tapi adi biak cian la saja ncedai ukur teman tentu pe engkurangi temanta. Arah bahan PA Minggu enda mari si siksiki biak kalak si mehuli enda.

Mpebagesi Pengangkan Kerna Ogen.
Jakup 3 : 13 - 18 si jadi ogenta eme sada ajar si erguna si ibereken man kerina anak-anak Dibata si merap marpar kesilang i babo doni enda. Isi pengajaren e eme uga kin arusna lagu langkah kalak Kristen nekanken kepentaren bage pe orat nggeluh erpengangkan (ay. 13). Erpengangkan i bas encidahken kegeluhen si mehuli arah perbahanen si idalanken alu meteruk ukur si dem alu kepentaren Dibata. Sabap eme jadi gegeh man kalak si la ngasup ngampar bana, ndauh i bas perbahanen si mehuli nari, mahanca ndauh pe i bas kiniteruken ukur.

Mpedauh kalak arah perukuren si percian, perngilas, ngukurken dirina ( serap-serap ) ras sidebanna. Sabap perukuren si bagenda merugiken ras ncedai kiniersadan perpulungen. Si pagitna ikataken Jakub kerna biak-biak enda e me "binatang" biak "setan" ( ay. 15 ) ngatakensa enda me biak si mejin, si encedaken, merugikan (turah perubaten ras perjengilen ( ay 16). Ertina sitik pe biak enda la man usihen tapi man bunuhen di kune lit i bas ukur ras pusuhta ras perpulungen. Sabap Jakup ersura-sura katak si tek tetap min ngasuhi biak-biak Kristus.

Siniarapken penulis surat enda eme gelah kasakai perantau si marpar merap ( si ngaloken surat Jakup ) e banci tetap irakut, ipersadaken alu kepentaren si rehna i bas Dibata nari ( ayat 17 ). Guna mpeteguhi kiniersadanna ras mpeturah kiniteken si dewasa i bas kiniersadan e. Ula erdandanken pengelako pengerana, perbahanen ras perukuren si bagi "setan" ndai ngkuasai biak tep-tep perpulungen seh maka lanai banci si ergan ras si hamaten sada nandangi sidebanna. Emaka perpulungen arus pentar guna nandai biak-biak alu ngasuhi biak kepentaren surga si erbuahken buah si mehuli, si ngena dingen merincuh kalak ngalokenca.

Pengkenaina.
I bas sada kuta, lit dua kalak si enggo tersena igelari si "percian" ras si "percemburu". Tuhu-tuhu enggo ngalah iakap anak kuta ndameken kalak e duana. Ula lebe ndamekenca, nggeluh ndeher ras ia pe kalak enggo kisat. Sabap kai pe si lit i bas kuta mpeturah perubaten man kalak enda duana. Adi lit pembagin kai pe bas dana desa, si perdan ndai mis nggei-nggei. Janah si percemburu ndai mis ngidoi. E tuhu latih, berita kerna kalak enda duana nggo mbar ku sebelang kuta ras pe ku kuta-kuta sideban.

Emaka sada paksa, reh sekalak si bayak namura ertandang ku kuta e janah ibegina perbeben anak kuta e. Iusulkenna maka icubakenna me atena ndungi persoalan kalak si dua ndai. Nina, mari kam duana si percian ras si percemburu, ikut kam ras aku bas perdalinen si ndauh. Ise pagi si ngasup erdalan seh ku tujun, ku bere upahndu si seh kal belinna sue ras pemindonndu. Megi kata kalak bayak enda ndai, si percian ras si percemburu enda mis merincuh. Emaka erwari-wari dekahna ikut me kalak ndai duana i bas perdalanen ras kalak bayak ndai. Duana ia erpala-pala nerusi perdalinen gelah ola lit situalen. Kenca seh i tujun, si percian ras si percemburu ngoratken upahna man kalak bayak ndai.

Nina kalak bayak ndai, erdandanken duana kam ngasup seh ku tujun, emaka ukuri kai si atendu ipindondu nina. Saja ngenca lit sada saratna eme : Ise si mindo pudin idatna me dua kali lipat asa si mindo leben. Banci si bayangken syarat enda radumken sifat duana kalak ndal nggo pasti "si dengedengen ( si timan )" ndekah nimai, la lit si menakensa mindo leben. Dungna si jerlengen me ia duana. Si garan ayo, radu ngesken ipenna pe natap imbangna. Sabap ietehna maka si mindo pudin daten dua kali lipat asa si mindo leben emaka kedungenna ngerana me si percian nina. Adi bage aku leben mindo nina: Cungkil dage mata ku e sembelah pemindoku nina. Adi nggo ilebei si percian nuriken pemindon maka duai e na matana icungkil kalak bayak ndai. Minter ngerana si percemburu : "batal mindo". Robah kami, mulai genduari nari lanai kuasuhi biakku percemburu nina. Si percian pe ngataken bujur janah ngaku salah ka erdandanken matana la sahun icungkil lanai ku asuhi biakku si percian nina. Ngolih ia duana alu erdame. Sabap ngerugiken man bana kepe ngenca ngasuhi biak-biak si dua enda ndai.

Erlajar kita arah ogenta ras turi-turin si i datas enda, mehuli adi sitadingken biak percian ras percemburu. Sura-suranta arah PA enda kita termotivasi, terjemba pusuhta lako jadi juru dame alu nggitna kita ngergai kinibeluhen temanta. Ngasup ngampar bana alu ngaloken ras mujiken ulih kepentaren ras kengasupen kalak si deban. Carana la si pandangi, si ergaken usahana i bas ngelitkensa, la si dabuhken alu njurukensa tapi semangati ia gelah reh sikapna ras reh suksesna ia. Arah e pe teridah kai si lit i bas ukurta. Alu la pekulah-kulah si jaga wibawa kegeluhen kalak si deban. Nggit kita ikut makesa ulih kinibeluhenna e. Si pembarken maka kinibeluhenna e banci ras-ras si pergunaken. Bageme carana ngergai, mujiken ras mereken nilai si mehuii nandangi kinibeluhen temanta i bas ndalanken usahana. Meriah ukurta adi sukses temanta.

Nginventarisir Kelebihen Si Lit 1 Bas Teman. 
Lengkapi table si i teruh enda

Pdt. Hermawati br. Bukit, S.Th


Belum ada Komentar untuk "Ngergai Kinibeluhen Teman ( Tantangen: Kurang Ngergai ) - Bahan PA Moria 28 April - 4 Mei 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel