Pilpres dan Pileg: Kelebihan Mamre I Bas Politik - Bahan Bimbingen PA Mamre 7 - 13 April 2019


BIMBINGEN PA MAMRE TANGGAL, 07 - 13 APRIL 2019 ( PILPRES DAN PILEG ) : KELEBIHAN MAMRE I BAS POLITIK

Ogen : 1 Samuel 16 :1 - 7
Daud ipilih jadi raja
1. Nina TUHAN man Samuel, “Asa kai nari dekahna atendu ceda kerna Saul? Enggo kutulak ia jadi raja Israel. Tapi genduari buatlah minak saitun jenari laweslah ku Betlehem ndahi Isai, sabap enggo Kupilih sekalak anakna jadi raja.”
2. “Uga banci kubahan si e?” nina Samuel nungkun. “Adi ibegi Saul kerna si e tentu ibunuhna aku!”
Nina TUHAN njabapsa, “Babalah sada anak lembu jenari kataken maka kam reh ku je erbahan persembahen gelehen man TUHAN.
3. Undang Isai ku lakon persembahen e, jenari Aku denggo ngatakenca kai si man bahanen. Tangkuhkenlah jadi raja kalak si Kutuduhken man bandu.”
4. Minter idahiken Samuel kai si isuruh TUHAN, jenari lawes ia ku Betlehem. Peminpin-peminpin kuta e alu nggirgir reh ngalo-ngalo ia janahna nungkun, “Ma dame nge kerehenndu enda?”
5. “Dame” nina ngaloi, “Aku reh nehken persembahen man TUHAN. Bersihkenlah dirindu jenari ikutkenlah aku.” Isai ras anakna pe isuruh mersihken dirina, jenari iundangna kerina ku bas lakon persembahen e.
6. Kenca ia reh kerina, idah Samuel anak Isai, Eliap gelarna, jenari nina i bas ukurna, “Si enda, si tedis i jenda i bas adep-adepen TUHAN, la banci lang enda me si enggo ipilihNa.”
7. Tapi nina TUHAN, “Ola nehen kuga gedangna ras kuga jilena rupana. La ia Kupilih, sabap pertimbangenKu la bali ras pertimbangen manusia. Adi manusia inehenna si teridah arah darat, tapi Aku Kupernehen pusuhna.”
Tema : Milih Peminpin Alu Kiniteken Ras Pusuh Si Mehuli

Tujun : Gelah Mamre
  • Meteh maka Dibata ersura-sura mpekena bangsaNa alu milih kalak si erkiniteken ras bujur.
  • Meteh maka Dibata ndilo Mamre guna ikut berperan i bas milih peminpin si mpekena bangsanta.
Metode : Sharing

KATA PENARUH
Peminpin menurut Kamus Besar Bahasa Indonesia e me orang yang meminpin, contoh: ditunjuk atau dipilih untuk meminpin suatu organisasi / wilayah. I bas tahun enda kita bengket ku bas pesta demokrasi e me kita milih peminpin i bas tingkat Negaranta e me pemilihen Presiden ras wakil Presiden, bage pe memilih anggota Dewan Perwakilan Rakyat (DPR) ras Dewan Perwakilan Daerah (DPD). Tentuna kita harus mempersiapkan dirinta alu mehuli, segelahna kita banci memilih calon peminpinta bekas arah totonta ras pusuhnta nari. Segelah kita la dabuh kubas "money politik", ras nepotisme. Guna sie, mari kita erlajar arah pengogenta kitab 1 Samuel 16: 1- 7 kerna memilih sekalak peminpin alu payo rikutken sura-sura Dibata.

URAIAN TEKS / TAFSIREN
Ogenta 1 Samuel 16 :1 - 7 nuriken kerna Dibata milih peminpin si mbaru guna mimpin kalak Israel erkelangken hakim Samuel. Ija raja sebelumna eme raja Saul enggo itulak Dibata erkiteken lanai patuh man Tuhan Dibata. Kinilapatuhen raja Saul e me:
  1. La disipilin: Saul mpersembahkan korban tutungen erkiteken lanai sabar nimai kerehen hakim Samuel. Padahal mpersembahkan korban tutungen e me tugas imam, hakim, nabi-nabi ( 1 Sam. 13:9-11 ). 
  2. Meremehkan kata Dibata ras la konsisten: erkelangken Samuel, Dibata nuruh Saul ngkernepken kerina bangsa Amalek ras ula buat barang kalak Amalek. Memang Saul ikernepkenna kalak Amalek, tapi tetap ibuatna barang-barang simeherga i bas kalak Amalek nari (1 Sam. 15:9). 
  3. Suka cari nama: Saul majekken tugu peringet-ingeten kerna dirin a jine arah hasil "jarahen" barang-barang simeherga kalak Amalek ( 1 Sam. 15:12 ).
  4. Cian dingen pendendam: cian ate Saul teridah sanga Daud menang naluken Goliat ( 1 Sam. 18:8 - 9 ), sehingga Saul nembeh ras ersura-sura munuh Daud,
  5. La mpehaga gelar Tuhan: enda teridah tupung Saul nagangi jubah Samuel seh merigat ( 1 Sam. 15:27 ).
  6. Nggit erguru: Saul erguru"guru sidiberu i En-Dor" guna mpereh tendi Samuel. Erkiteken Dibata lanai megiken pertoton Saul, seh maka Saul nungkun man Samuel si enggo mate kerna situasina paksa sie. 
I bas hal enda hakim Samuel berkat ku Betlehem ndahi Isa guna ndarami pengganti raja Saul. Saja lit kebiaren Samuel nandangi raja Saul. Ayat 2-3 merupaken nasehat Dibata man Samuel, segelahna Samuel tetap aman i bas milih raja si mbaru. Peminpin-peminpin si tading i bas kuta Betlehem nggir-nggir ngalo-ngalo kerehen Samuel alu tiba-tiba, erkiteken iakapna maba berita kerna hukumen ras kinirawan Dibata. Tetapi Samuel maba dame ras maba kurban persembahen.

Ayat 6 - 7: merupaken kerna pemilihen pengganti Saul. Ija bena-benana iidahna Eliap ( postur tubuhna gedang ras mejile rupana ), emaka Samuel tek bahwa ia me si tepat ras ipilihNa guna nggantiken Saul menjadi raja. Tapi Dibata la nguweken nina Samuel, erkiteken Dibata la ngenen peminpin rikutken kuga gedangna ras kuga jilena. Sebab pertimbangan Dibata berbeda ras pertimbangan manusia. Adi manusia ngidah tampilen luarna tapi Dibata ngenen i bas pusuhna nari. I bas hal enda 7 kali Isa ndilo ras nuduhken man Samuel tapi lang nina Dibata, seh maka Daud anakna siterakhir ( Daud eme anak Isai si nguda i bas 8 sembuyak; 1 Sam. 17:12 ) dungna ipilih ras itangkuhken Tuhan menjadi raja simbaru i bas kalak Israel. Daud itangkuhken alu make minak saitun, jenari ia ikuasai Kesah Tuhan. Enda me si jadi modal man Daud guna minpin ras mpekena-kena kegeluhen kalak Israel. Engkai Dibata milih Daud? Erkiteken Daud nguda denga, sehat, mejile, erkiniteken man Tuhan Dibata, bersih pusuhna ras ndahiken ndahin singena ate Tuhan, sebage permakan janah Daud sebagai anak si biasa-biasa yang tidak dapat dibanggakan i bas jabuna, bagepe Daud sekalak si meteruk rukur.

APLIKASI
  1. Saul itolak Dibata guna tetap jadi raja, erkiteken ia lanai patuh man Tuhan Dibata. 
  2. Samuel menjadi perpanjangan tangan Tuhan guna ndarami pengganti Saul.
  3. Samuel patuh ndalanken kai si enggo isuruh Tuhan man bana.
  4. Bena-benana Samuel ngenen arah tampilan darat guna minpin kalak Israel, tapi ipersingeti Dibata, jenari Samuel ngikutken sura-sura Tuhan.
  5. Samuel milih Daud ( kiniteken, pusuhna, kesehatenna ) rikutken sura-sura Tuhan.
  6. Penolakan ( reshuffle ) dan pemilihen peminpin simbaru banci saja terjadi i bas wilayahta masing-masing.
  7. Kita ( Mamre ) me genduari si menjadi Samuel-Samuel simbaru guna milih peminpinta i bas tahun enda rikutken sura-sura Tuhan. Labo arah tampilen darat, pangkatna, bayakna ras perban kade-kadenta bagepe ula kita nggit ibayar alu sen untuk memilih calon peminpinta. Emaka pilihlah calon peminpinta ( DPRD tingkat kabupaten, provinsi, DPR RI, DPD, bage pe Presiden ras wakil Presiden ) si berintegritas, berkarakter, simbiar man Tuhan Jesus, anti korupsi. Mamre memilih calon-calon peminpin arah bekas totonta kerina bage pe penilaianta sekalak-sekalak.
  8. Adi si idah i bas TV, Koran, Facebook, Google gundari, maka melala pejabat si terkena kasus Korupsi. Ula enda erbahanca kita ( krisis kepercayaan ) la nggit memilih calon peminpin i bas tahun enda, sebab tek kita peminpin si enggo ipilih kita enda guna mpekena-kena kegeluhenta
  9. Selamat memilih calon peminpinta rikutken sura-sura Tuhan.
DISKUSI
Peminpin si ugakin si ngena ate Tuhan? Lit denga kin pemilihen bagi si ilakoken Samuel nandangi Daud i bas paksa enda? Turikenlah.
Rikutken pengidahta enggo nge peminpin kuta, kecamatan, kabupaten, provinsi ras negaranta mpekena-kena kegeluhenta i bas paksa enda? Turiken alasenta ras solusina.

USULEN ENDE ENDEN 
  1. KEE GBKP No. 59 : 1-2   
  2. KEE GBKP No. 386 : 1-2 
  3. KEE GBKP No. 299 : 1-2 
  4. KEE GBKP No. 290 : 1-2 
Pdt. Masada Sinukaban 
Ketua Klasis Barus Sibayak 
HP. 08126427476

Belum ada Komentar untuk "Pilpres dan Pileg: Kelebihan Mamre I Bas Politik - Bahan Bimbingen PA Mamre 7 - 13 April 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel