Terusken! Ola Ngadi ( Tantangan Kecerdasan Sosial ) Bahan Bimbingen PA Moria 21-27 April 2019



Bahan Bimbingen PA Moria 21 - 27 April 2019
Tantangan Kecerdasan Sosial

SI MAN OGEN : Kuan-kuanen 24 : 21-22 ; 30-34
Kuan-kuanen 24 : 21-22
21. O anakku, erkemalangenlah man TUHAN janah mehamatlah man raja. Ola ikut-ikutndu kalak ngelawan ia.
22. Kalak si bage banci kap kernep i bas sengkemirep, sabap labo perkara kitik kune Dibata ntah raja mereken cilaka.
Kuan-kuanen 30-34
30. Singa; rubia-rubia si jadi panglima man rubia-rubia si debanna, dingen la ia mbiar man ise pe.
31. Kambing bajarna,
manuk sabugan,
bage pe raja i lebe-lebe rayatna.
32. Adi erkiteken bodohndu maka meganjang ukurndu janah jahat sura-surandu, ukurkenlah e.
33. Sabap adi igawerndu susu, salih kap ia jadi mentega. Adi ipekpekndu igung kalak tedareh kap. Adi ipekekendu pernembeh kalak, nandangi rubat me kam.
TEMA : TERUSKEN ! OLA NGADI

TUJUN : Gelah Moria
  1. Ngangkai maka perbahanen ras biak si la mehuli la man usihen. 
  2. Ola ermedu-medu nerusken kai si enggo ibahanna ras neruskensa man anak-anak. 
METODE PA : Menginventarisir tantangen.

Kata Penaruh.  
Mbelin kal pengaruh kegeluhen i bas jabu ras lingkungen: pendidiken, masyarakat bagepe pertemanen ( pergaulen ) membentuk biak anak-anak i bas tengah jabu. Erkiteken sie megati orangtua metenget kal nehken pengajaren bagepe njagai anak i bas pertemanen ras pergaulenna. I bas kinata kegeluhenta labo pernah lit orangtua ndatken pendidiken uga arusna jadi orangtua si mehuli subuk arah sekolah, lingkungen ras i tengah jabu. Tapi banci ka nge kita jadi orangtua alu erbage-bage pengajaren erkiteken kita nggit erlajar. Tapi i bas paksa si genduari enda enggo lit ilakoken ceramah, seminar uga gelah jadi orangtua si mehuli, parenting. I ja parenting, eme cara ndidik anak si mehuli ilakoken i bas jabu alu mperdiateken erbage hal si tersedia i bas jabu bagepe lingkungen jadi kesempaten erlajar alu mandiri. Hubungen si mehuli ras terus menerus antara orangtua ras anak, arah bentuk ncukupken keperlun geluh, mereken pedah, njagaisa i bas pertumbuhkembangenna alu mereken usihen si mehuli. Arah PA-nta wari enda pe ibabai kita guna ngidah belinna peran orangtua i bas erbage dampar kegeluhen anak termasuk ngangkai kegeluhen i bas paksa si reh.

Mpebagesi Pengangkan Kerna Ogen
Kitab Kuan-kuanen jadi sada tulisen si mereken kesempaten si ngogesa jadi 'orangtua' si mereken pengajaren ras pedah man kalak sideban. Nikapken si ngogesa jadi kalak pentar ngantusi kegeluhen i tengah-tengah masyarakat si erbage-bage gelah jadi kalak si erkemalangen man Tuhan. Arah teks si jadi bahan PA enda lit piga-piga arus si pebagesi pengangkanta. Lit dua bagin i je eme :
  1. Ayat 21-22 pengajuk kerna erkemalangen ras mehamat, enda mulihken ku bas tema umum kitab Kuan-kuanen bindu 1:7, erkemalangen man Tuhan eme bena dingen ulu kepentaren. Ertina adi la erkemalangen dingen mehamat man si minpin geluhta banci mpeturah rawa raja ( Dibata ). Sabap kuasaNa luar biasa, nentuken kegeluhen rayat ras bangsaNa, kalak si la patuh banci ndatken ukumen ( Kuan-kuanen 16:14, 19:12; Roma 13:1-7 ). Emaka si perlu iukuri ras ilakoken eme erbahan ukur Dibata ( ukur raja meriah ) sabap bageme arusna, kalak si patuh ras erkiniteken. 
  2. Ayat 30-34 enda nuriken kerna kegeluhen kalak perkisat ras bodoh.
    • Ulih kinilengen kalak perkisat eme: juma e terulang, dukutna mbages, lanai erbide. Enda nuriken kuga ceda ras tondelna geluh kalak si perkisat, ceda ukur kalak natapsa dingen kinirugin ras kemusilen ngenca ulihna.
    • Ulih kalak si mperdiateken dingen la ngusihsa eme ndatken pelajaren i bas kinibodohen kalak sideban. Maka labo lit ulih jadi kalak kisat, kalak ngada-ngada ras cirempu sabap kemusilen enggo nimai dingen nogeng ia.
Arah pedah enda perlu kal jadi kalak patuh bagi arusna. Sabap kemulian ras kehamaten eme sikerajangen Dibata. Lakokenlah adi bagekin arusna, amin lit kalak si ngelawanca, labo man usihen sabap kalak motu kap e. Termasuk kalak perkisat labo man usihen sitik pe sabap la lit kiniulin i bas biak e nari banci man alonken ras si man usihen.

Pengkenaina
Melala kal caranta nehken pengajaren i bas mpebelin-belin anakta ( pengasuhen ). Metenget ras megermet nandangi sekelewet: pemimpin, tetangga ras kerina kalak si lit hubungenna ras dirinta. Cara erteman: kalak si nggit ngelawan alu ngusih kalak bandel ( pembangkang ) bagepe kalak si la mediate kerna kai pe dingen ngusih kalak perkisat. Mediate kerna sie banci ikataken salah sada bentuk kecerdasen, kecerdasen sosial, kengasupen ncibalken dirina ras lingkungen sosialna: pemerintah, masyarakat bagepe senina ras turangna. Kuga anak-anakta ngasup ngaloken sada ras sidebanna: keputusen ntah kebijaken orangtua sabap megati ceda ( hancur ) usaha sabap anak-anak rubati, pecah kongsi ras seninana, apai ka orangtua la iakapna bujur i bas mbagiken tading-tadingen ( warisen ).

Kuga orangtua i bas ndidik anak-anak gelah ermental kuat, la ngelabuh dingen talu amin lit reh perbeben. Megati, lingkungen, kegagalen, ‘jatuh bangun' ras erbage tantangen erbahanca ia ngadi, putus asa, ngelabuh. Kuga kita mabai ia gelah la kote erkiteken tantangen sie. Ia arus beluh ngubah 'batu antuken' ( tantangen ) jadi 'batu loncaten' ( peluang ), i bas erbage perubahen si turah i bas kegeluhen. Sabap, la sitik si idah arah kesuksesen orangtua i bas dunia usaha ntah pertanian, lanai ngasup anak selaku penerus guna mpertahankenca. Kai nge ndia si salah i je? La lah lit biakta orangtua si lebih memanjaken anak-anakta terjeng menikmati erta kinibayaken saja tapi labo ia si didik jadi pekerja keras ntah pe mental si ngasup ngalaken tantangen. Jadi perenungen man banta. Perlu tole si bekali anakta alu kecerdasen daya juang ras ngasup ertahan i bas erbage tekanen nari. Gelah anak-anakta ngasup ngalaken erbage tantangen i bas wari si reh enda, tupung lanai pe orangtua ndampingisa enggo ngasup ngalaken ras ndungi masalah si man alankenna.

Kengasupen si bage rupana perlu kal si pebelin, i bas ndalani dunia entrepreneurship, i ja mbelin kal persaingen si turah i bas hubungen si ibangun. Selain nikapken generasinta jadi pekerja keras tapi pe arus ngasup ngalaken tantangen si lit alu kengasupen ertahan, sabap modal ras kerja keras la bias nerusken. kiniulin si enggo ibenaken ndube. Terusken, ola ngadiken! Semangat!!

Menginventarisir
Darami contoh i bas lingkungen ras masyarakatta, usaha si 'hancur` ntah pe gagal erkiteken anak-anak la ngasup nerusken usaha si lit. Kai kira-kira si erbahanca? Kai kira-kira tantangen si turah i bas jamanna maka banci bage? Kai si banci ibahan guna nilahkenca (mengantisipasisa)?
Daftarkenlah:




Penulis : Pdt. Suenita Sinutingga,M.Th




Belum ada Komentar untuk "Terusken! Ola Ngadi ( Tantangan Kecerdasan Sosial ) Bahan Bimbingen PA Moria 21-27 April 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel