Bujur I Bas Erusaha - Enterpreneurship : Palas Spiritualitas ( Bahan PJJ 5 - 11 Mei 2019 )



Bahan Bimbingen Perpulungen Jabu-Jabu 5 - 11 Mei 2019
Bujur I Bas Berusaha
( Entrepreneurship : Palas Spiritualitas )

Ogen : Amos 8: 4 - 6
Keruntuhen Israel
4. Begikenlah enda, o kam si ndedehi kalak si kekurangen, kam si rusur ndarami dalan lako engkernepken kalak musil i bas negeri enda.
5. Nindu, “Ndigan ndia wari raya enda keri, gelah banci ka kita erbinaga gandum? Lanai kita sabar nimai wari Sabat enda mentas, maka banci ka sibenaken erbinaga! Kenca bage banci sipekitik tumba pendayan, sipeberat anak timbangen penukuren, janah sipake timbangen palsu guna nipu langganenta.
6. Gandum si lanai erguna meganjang sibahan ergana. Sidarami kalak musil si la ngasup nggalari utangna, subuk nggalar sepasang selop pe la ia ngasup, jenari situkur ia jadi budakta.”
Amos eme sekalak si asalna i bas Tekoa nari, dahinna permakan dingen ngutip buah ara. Daerahna enda mehumur erkiteken mbue ije ulu lau. Amos ndatken pendilo i bas Dibata nari lako mpeseh berita kerna sura-sura Dibata nandangi bangsaNa e. La ndekah Amos ndahiken pendahinna, eme sekitar sada tahun saja tapi hal penting siipersingeti Amos eme kritik na nandangi kinilabujuren i tengah-tengah bangsa Israel. Bage pe penindasan siilakoken man kalak si lemah secara gegeh bage pe secara materi.

Rikutken ogen PJJ nta minggu enda Amos nuriken ukumen Dibata. Ikatakenna Israel e desken buah pangan si dem sada raga ( ay. 1 ) si ngandingkenca kalak Israel desken buah si enggo sikap guna iukum Dibata erkiteken kesalahenna. Kinilabujurenna erbahanca maka pemakekenna erta kebayakenna mabai ia kempak ukumen. Sabab siilakoken kalak si la bujur eme: Ndedehi kalak si kekurangen, ndarami dalan lako ngkernepken kalak musil ( ay. 4 ). Bage pe mpekitik tumba pendayan, mpeberat anak timbangen penukuren, janah ipakena timbangen palsu guna nipu langganenna, gandum si lanai erguna meganjang ibahan ergana, idaramina kalak musil si la ngasup nggalari utangna, subuk nggalar sepasang selop pe la ia ngasup, jenari itukur maka ia jadi budakna ( ay. 5,6 ). Bage me perbahanen bangsa enda si la ngena ate Dibata.

Erlajar arah kegeluhen bangsa Israel i bas jaman Amos enda, perlu ka si pepayo kerna kecibal usaha pencarinta genduari enda. Perlu kal kita meteh kerna Jiwa Kewirausahaan ( entrepreneurship ) eme "perubahan, kreatif, inovasi, ngidah ras makeken peluang, pang nanggung resiko", alu bage labo terjeng ercakap kerna bisnis tapi pe kerna "cara rukur ( mindset ) karakter, mental, keahlian moral" rikut ras kegeluhen pertendin si mehuli. Palasta lako ndahiken pendahin ras usaha pencarinta eme Pustaka si Badia bage pe erlajar ka kita arah piga-piga tokoh gereja si mabai kita kempak kegeluhen usaha pencarin si payo.

Nina Marthin Luther: "setiap pekerjaan itu adalah ibadah". Dahin Pandita labo banci sempurna dikune kerina pendahin ntah pe profesi e la ilakoken alu mehuli, Sekalak pembantu rumah tangga ( asisten rumah tangga ) ntah pe sekalak tukang sepatu dikune ilakoken alu tutus maka bali ergana ras sekalak Pandita si erkotbah, erkiteken siidahiken e kerina eme guna Tuhan.

Johanes Calvin menekanken "kerja keras, ulet, gigih, hemat" sini ipalasi ku bas pengajaran moral rikutken Pustaka si Badia. Dibata la pernah tunduh ( bdk. Mas. 121 ) janah e jadi inspirasi karakter pekerja keras. Erpalas ku bas Epesus 1:4, "Ope denga ijadiken Dibata doni enda, enggo ipilihNa kita jadi sikerajangenNa arah persadanta ras Kristus gelah kita badia dingen la ersalah i lebe-lebeNa" emaka kita pe arus ngelakoken si mehulina.

Mari dage si renungken kata enda :
Dari kesaksian Alkitab maka yang dimaksud dengan "Jiwa Kewirausahaan" adalah sama seperti karakter Allah itu sendiri. Allah yang kita kenal adalah "Allah yang berencana, berkarya dengan kreatif dan inovatif, Allah yang berjuang mencari solusi dalam kebuntuan, Allah yang berani membayar harga untuk sebuah tujuan kasih bagi pembebasan umat manusia. Demikian juga dalam pemahaman para Bapa Gereja bahwa kerja keras, ulet, gigih, hemat adalah bagian spritualitas dan moral orang yang percaya. Ini adalah landasan Teologi tentang "Jiwa Kewirausahaan." Jadi, hendaknya setiap warga GBKP dan dalam setiap unit pelayanan GBKP memiliki karakter Allah yang ber"liwa Kewirausahaan" sejati. 

"Bujur I bas Erusaha" enda me si jadi tekadta, sabab bage nge si ngena ate Tuhan dingen sie mabai kita jadi sekalak si erdahin alu ngusih perbahanen Tuhan e janah ulihna pe tama kiniulin banta ras tama kemulian man Tuhan. Dahinta la terjeng ngayaki keuntungen saja ( Profit oriented ) tapi pe ngayaki kemulian Tuhan ( To The Glory Of God Oriented ).

EVALUASI
Turiken ulih kreatifitasndu i bas minggu si lepas!

DISKUSI :

Ngawan perpulungen ibagi 4 kelompok. Si gargari lebe kuga kita enggo ndalanken usaha pencarinta sedekah enda. Enggo nge kita "Bujur i bas Erusaha"? Adi enggo ntah langa, turiken alasenna erpalasken diskusi kelompok ta.
Ulih diskusi kelompok isehken ku tengah-tengah PJJ nta janah masing-masing ibereken waktu 5 menit. Labo perlu itanggapi kelompok si deban tapi sijadiken renungenta.

AKSI :
Mari si belasken tekadta i bas berngi enda guna si dalanken segedang-gedang geluhta, teptep kelompok erbahan yel-yel, contohna:
"O Tuhan, mulai genduari nari aku rukur, menaken ras ndahiken dahinku alu bujur"

USULEN LAGU
  1. KEE GBKP No. 175 : 1, 3, 4
  2. KEE GBKP No. 444 : 1 - 3   
  3. KEE GBKP No. 443 : 1 - 3  
  4. KEE GBKP No. 471 : 1        

TOPIK PERTOTON SYAFAAT :
  1. Gelah kerina ngawan ni perpulungen ras serayan Tuhan i bas GBKP enda "Bujur I bas Erusaha"
  2. Pemerentah tetap mendukung usaha pencarin siilakoken masyarakat Indonesia enda.

Pdt. Agustinus Ginting Manik,MTh.



Belum ada Komentar untuk "Bujur I Bas Erusaha - Enterpreneurship : Palas Spiritualitas ( Bahan PJJ 5 - 11 Mei 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel