Ipekena Mulihi ( Tantangen : Kebersihan dan Penataan Ruang ) - Bahan PA Moria 12 - 18 Mei 2019


Bahan Bimbingen PA Moria Minggu, 12 - 18 Mei 2019
Tantangen: Kebersihan Dan Penataan Ruang

SI MAN OGEN : Masmur 122:1-9
Pujin man Jerusalem
1. Si Daud empuna.
Meriahlah kal ukurku tupung aku iiahken kalak nina,
“Ota kita lawes ku Rumah TUHAN.”
2. Genduari enggo kami i je,
tedis i pintun gerbang Jerusalem.
3. Jerusalem e me kap sada kuta si enggo ipekena mulihi,
alu susunen si mehuli dingen serasi.
4. Ku je me reh kerina suku-suku.
Kerina suku-suku TUHAN,
ngataken bujur man TUHAN
sue ras si iperentahkenNa.
5. I jenda nari me raja-raja Israel,
ngerunggui kerina rayatna.
6. Ertotolah gelah Jerusalem dame,
“Mejuah-juahlah kalak si erkeleng ate man bandu.
7. Damelah i bas benteng-benteng enda,
dingen litlah ketenengen i bas istana-istanandu.”
8. Erkiteken kade-kade dingen teman-temanku,
ningku man Jerusalem, “Dame man bandu.”
9. Erkiteken Rumah TUHAN, Dibatanta,
ertoto aku gelah senang kam.
T E M A : IPEKENA MULIHI

TUJUN : Gelah Moria
  • Meteh kota Jerusalem si nggo ipekena mulihi alu susunen si mehuli ras serasi. 
  • Erdiate nandangi rumah ras lingkungenna dingen mpekena-kenasa gelah mehuli ras serasi 
METODE PA : Demonstrasi kebersihan Gereja.

Kata Penaruh. 
Lit si ngatakenca maka lukahen kepe menaken asangken mpekena sada-sada hal. Sabap adi enggo ipekena banci saja lanai bagi tangtangna ndube sikapna. Engkai kin maka arus ipekena? Biasana adi ipekena erkiteken enggo lit si ceda. I bas kegeluhen i doni enda, tangtangna ibangun, itukur dingen itepa Dibata ndube, sikap dingen mehuli kerina tapi kenca ipake, adi barang ntah rumah ndai banci ceda. Bagi doni si itepa Dibata, i bas tan manusia enggo ceda man pekenan. Arah PA minggu enda ngajuk Moria mediate ras megermet nandangi sekelewetna, alu bage i bas lit si ceda, man pekenan, ersuruh ukurna muat bagin guna pehulikensa.

Mpebagesi Pengangkan Kerna Ogen.
Jerusalem emekap kota si penting kal i bas kegeluhen bangsa Israel. Labo saja erkiteken Jerusalem jadi pusat pemerintahen i bas paksa raja Daud tapi pe Jerusalem jadi pusat keagaman ras kebaktin bangsa Israel. Bangsa Israel tek maka lit kehadiren Dibata i Rumah Pertoton i Jerusalem. Man bangsa Israel kehadiren Dibata jadi jaminen kerna keadilen, ketenangen. ras pe kedamen man bangsaNa. I bas Masmur 122 enda, lit piga-piga si arus si angkai eme :
  1. Jerusalem ringan i datas uruk bagepe Rumah Pertoton ipakeken i bas uruk Sion, ende-enden enda ibenaken i bas Masmur 120-134 paksa nangkih ku uruk ngerayaken dingen ngelakoken kebaktin. Ende-enden enda iendeken tupung mentasi pintu gerbang ntah pe seh ku kesain Rumah Pertoton.
  2. Ituriken maka Jerusalem e enggo ipekena, kota e enggo itata, la saja bangunen Rumah Pertoton tapi pe masyarakat si nggeluh i je, tetap ipekena gelah mehuli kota enda ingan raja-raja Israel, kota e jadi simbol kuasa ras keleng ate Dibata. Kalak si reh ku Jerusalem eme dilaki kalak Israel. I ja tep-tep tahun dilaki kalak Israel arus ngerayaken telu kali wari raya utama ( Ul. 16:16 ). 
  3. Perayaken dingen pertoton gelah kota e dame, la saja pemimpinna tapi ikut pe rayatna si ringan i je. Kedamen ras kejuah-juahen la saja erkiteken i je istana raja ikelilingi benteng si paguh tapi erkiteken Rumah Pertoton.
Pengkenaina.  
Litna Rumah Pertoton erperan penting nandangi kegeluhen kalak Kristen. Si enda lit hubungenna ras Gereja si sedekah enda si pergunaken guna ingan ersembah man Dibata. Tandana kita engkelengi Dibata eme arah kita engkelengi ingan i ja kita ersembah man Dibata, eme Gereja. Pengangkan si e njemba kita guna erdiate nandangi Rumah Dibata eme Gereja ras lingkungenna dingen mpekena-kenasa. Perlu metenget gelah ula kita terjeng beluh mbangun Gereja alu dana ratusen juta tapi kurang beluh kita ngerawatsa. Bagepe penataan ruang gelah ratur ras serasi. Amingia i tengah-tengah Gereja nggo lit koster, tapi peran Moria penting kal i bas mpekena-kena Gereja. Adi mulih kita Gereja nari, sampah i japa pe merap, tirai ras taplak meja pe nggo melket erkiteken abu, bunga pe la tertata alu mejile, bulung-bulungna iputiki danak-danak. Si perdiateken gelah adi lit piala la ngganggu pemandangen mata, lukisan bas dinding asal nggo itama. Kebersihen Gerejanta sekaligus perawaten barang-barang inventaris Gereja perlu kal itingkatken.

Bas kegeluhen tep-tep wari, Moria pentar njagai ras merawat barang-barang i rumah. Moria si mejingkat pasti rusaha gelah barang-barang i rumah teridah rapi ras mejile. Kebersihen rumah ijaga gelah ula lit sampah ras abu. Gorden jendela banci sebulan sekali nggo iganti warnana. Dekorasi rumah pe i tukar-tukar inganna gelah teridah serasi. Halamenna pe ipekena ras irawat nnejile. Isuan bunga guna ndukung keindahan. Rumahta pe teridah lebih mehuli ras serasi erkiteken ipekena ras irawat Moria i tengah jabu.

Arah PA wari enda si buat baginta guna ngkuhi kiniulin subuk Gereja, jabunta bagepe lingkungenta, mari mpekena si nggo ceda, si lanai banci ipake iganti. Ula si ambekken sampah alu sembarangan i Gereja ras lingkungenta. Si tata mulihi adi kurang menarik ingan lukisen, ingan bunga, ingan lemari, ras sidebanna. Adi nggo ipake kamar mandi ula lupa kita mbersihkenca. Sisuan bunga-bunga i pekarangaen Gereja gelah mejile man tatapan mata alu bage kerina kalak meriah ukurna natap taman Gereja. Tanda mehamat kita man Dibata sicidahken pe arah ngkelengi gerejaNa ras mpekena-kena gerejaNa, kerina perkakas bas Gerejanta, termasuk pe Iingkungen Gereja.

Demonstrasi Kebersihan Gereja.  
I bas PA Moria wari enda, tep-tep Moria sektor encakapken kerna rencana erban perlomban kebersihen Gereja entah pe erban taman Gereja guna ipertandingken. Ibereken waktu perlomban enda sedekah buena jumlah sektor tengah-tengah Moria. Adi jumlah Moria sektor lit 5 sektor, berarti perlomban e dekahna 5 minggu, Moria sektor 1 bas Minggu pemena ras seterusna. Perlomban enda tiap Minggu inilai. Si menilaisa eme BPMR ras Pengurus Moria Runggun. Pengurus Moria Runggun banci erbahan hadiah guna Moria sektor si menang bas perlomban enda.

Pdt. Mira Mutianta br Sinufingga,STh.


Belum ada Komentar untuk "Ipekena Mulihi ( Tantangen : Kebersihan dan Penataan Ruang ) - Bahan PA Moria 12 - 18 Mei 2019"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel