Ipilih, Itetapken Ras Ibere Kuasa - Persikapen Pemilihen Pertua Diaken ( Bahan PJJ 19 -25 Mei 2019 )


Bahan Bimbingen Perpulungen Jabu-Jabu 19 -25 Mei 2019 
Ipilih, Itetapken Ras Ibere Kuasa
( Persikapen Pemilihen Pertua Diaken )

Ogen : Markus 3 : 13 -15
Jesus milih Rasul si sepuluh dua kalak
(Mat. 10:1-4; Luk. 6:12-16)
13. E maka lawes Jesus ku das uruk-uruk, janah idiloNa kalak rikutken si payo iakapNa. Kalak enda ndai reh ndahi Jesus.
14. E maka itetapken Jesus sepuluh dua kalak jadi Rasul. Nina Jesus man si sepuluh dua kalak ndai, “Kam enggo Kupilih gelah ras Aku. Kusuruh kam ngajar, 
15. janah lit kuasandu mpelawes setan-setan.”
Sue ras pengelayasi Moderamen GBKP, si enggo isehkenna man kerina Runggun-runggun, pelaksanan pemilihen Pertua Diaken ilakoken i bas minggu pertama bulan Juni si reh enda. Calon Pertua Diaken si enggo terpilih i bas sektor imomoken i bas Kebaktin Minggu ( nen Pengelayasi Pemilihen Pertua Diaken ). Biasana adina lit pemilihen secara doni lit nge kampanye, ise sipilih, kai si dat adi ia si pilih, ras si debanna. Tapi adi kita miiih serayan Tuhan pasti cara doni labo payo sabab kita kerina enggo notoken calon-calon si enggo imomoken ndai, gelah Dibata ngajari kita guna milih apai kin simehulina iakap Dibata si mada gerejaNa. Kita kerina sadar maka teptep lit pemilihen lit si terpilih janah lit ka si Ia terpilih. Man si terpilih, pakeken keterpilihen e guna nerusken ndahiken tritugas Gereja alu tutus, i bas periode enda. Janah si la ka terpilih lit ka pagi kesempatan i bas periode si reh, tapi labo berarti la banci ndahiken dahin gereja. Kerina nge kita ipake Dibata guna dahinNa i bas erbage-bage bidang pelayanen. Ertoto ope milih, ertoto ka kenca milih ras totoken ka tetap si enggo terpilih, gelah mehuli ras tutus ndahiken dahin pelayanen.

Kenca Jesus iperidiken, emaka ipiiihNa me ajar-ajarNa, si erbage-bage latarbelakang pendahinna. Engkai maka ipilihNa ajar-ajar? Erkiteken perlu iakapNa sindahiken pelayanen itengah-tengah doni enda kenca IA lawes ku surga. E me guna meritaken Berita si Meriah gelah enterem manusia ndatken keselamaten. Guna si e, Jesus mperlengkapi ajar-ajarNa, bagepe gerejaNa arah perbahanen bage pe arah pertotonNa (bdk. Joh. 17:1-26).

Ajar-ajar sini pilih Jesus enda ibereNa kuasa gelah banci ndahiken dahin e alu mehuli. Tentuna "kuasa" si ibereken Jesus enda, guna mbuktiken man doni enda maka IA me si milih ras mperlengkapi ajar-ajarNa. Keterpilihen si sepuluh dua kalak e, eme keterpilihen serayan ( pertua Diaken ). Si milih Pertua Diaken e eme Jesus jine, arah ngawan perpulungen lako nehken sura-suraNa. Dahin enda me si man lakonkenta i bas bulan Juni enda, guna periode 2019-2024.

Selaku ngawan perpulungen, si gejab maka Pertua Diaken rehna i bas ngawan perpulungen nari. Si enda silakoken gelah tetap banci erdalan dahin siampeken Tuhan man gerejaNa. Bagi ajar-ajar ngikutken Jesus kita pe ngikutken IA sue ras pendiloNa.

Erpalasken aturen Gerejanta GBKP ilakoken pemilihen Pertua Diaken lima tahun sekali. lbenaken muat calon-calon Pertua Diaken i bas sektor-sektor nari. Kenca si e imomoken i bas kebaktin minggu jenari seh me paksana ilakoken pemilihen Pertua Diaken secara Runggun. Calon si ipepilihken rikutken si iperluken sue ras aturen gerejanta. Emaka si pepayolah calon-calon e kerina, sipilihlah singena ate Dibata ula erpalasken: teman, perkade-kaden, pangkat, jabaten ras erta.

Si terpilih e arus tutus, ertanggung jawab, nggit erkorban ras nggit ngaloken persinget. Keterpilihennta e labo erpalasken kehebatenta, bagi nina Musa man Dibata "ise kin aku enda..? (bdk. Kel. 3:11). Kita pe perlu kal nandai dirinta, maka labo lit gegeh ngasupta tapi erkiteken ipilihNa kita, si ueken pendiloNa e bagi nabi Jesaya si ngakuken nina "Aku, suruhlah aku" ( bdk. Jes. 6:8 ). Emaka man banta perpulungen kenca terpilih serayan e marilah tetap sitatang-tatang arah pertotonta. Emaka perlu kal si pebelin semangat ndukung ras nampati. Sabab tantangen ku wari si reh enda tetap reh beratna, emaka serayan siterpilih pe pebelinlah kininggiten erlajar gelah reh ulina pelayanennta.

Mari dage si lakoken pemilihen serayanNa alu mehuli ras payo. Si silahkenlah cara-cara pemilihen doni enda, tapi sipakelah cara-cara sini ajarken Dibata man banta kerina. Gelah ula lit kata erkadiola arah pudi. Gelah si terpilih ras si langa terpilih tetap tutus erkiniteken ras ngkelengi gerejaNa. Gelah kerina kita ngaloken rudang-rudang kegeluhen si enggo isikapken Dibata man banta sekalak-sekalak (bdk. 1 Pet. 5:4).

EVALUASI :
Kai-kai nge sie enggo berubah I bas dirinta rikutken aksita mingg si lewat?

DISKUSI
  1. Kai nge iakap ndu sibahan maka, arah pemilihen Pertua Diaken periode 2019-2024 enda, Gerejanta reh majuna?
  2. Kai nge arapenta selaku ngawan, nandangi kalak si terpillh jadi serayan Tuhan?
AKSI :
Kerina kita erbahan pertoton syafaat bas jabu-jabunta, subuk perpulungen bage pe calon si pepilihken pagi, (Mamre, Moria, Permata, KA-KR).

USULEN LAGU :
  1. KEE GBKP No. 68 : 1-2  
  2. KEE GBKP No. 102 : 1-2
  3. KEE GBKP No. 183 : 1-2
  4. KEE GBKP No. 309 : 1-2
TOPIK PERTOTON SYAFAAT
  1. Notoken kerina si jadi calon Pt-Dk, gelah sehat rohani ras jasmani, bage pe panitia se GBKP. 
  2. Gelah pemilihen pagi lancar iaturken panitia.
  3. Si turah bas perpulungen.
Pdt. Andarias Brahmana, S,Th.

2 Komentar untuk "Ipilih, Itetapken Ras Ibere Kuasa - Persikapen Pemilihen Pertua Diaken ( Bahan PJJ 19 -25 Mei 2019 )"

  1. Postingendu sangat mbantu.
    Tetap semangat Tuhan memberkati

    BalasHapus
    Balasan
    1. Bujur..Tetap semangat perpulungen man banta kerina..

      Hapus

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel