Kalak Si Erkiniteken Pentar Erbahan Perencanaan - Managemen Keuangan ( Bimbingen PA Mamre 5 - 11 Mei 2019 )


Bahan Bimbingen PA Mamre 5 - 11 Mei 2019
( Managemen Keuangan )

Ogen : Kejadin 41 : 39 - 49
39. Nina raja man Jusup, “Enggo icidahken Dibata man bandu kerina kejadin enda. Erkiteken si e teridah maka ganjangen pemetehndu ras kebeluhendu asang ise pe.
40. E maka kutamaken kam jadi si ngaturken negeringku, janah kerina rayatku patuh man bandu. Kenca aku kuasandu ngenca si mbelinna i bas negeri enda.”
41. Genduari kuangkat kam jadi wakil raja i belang-belang Mesir.
42. Itangtangi raja cincin stempel kerajanna, jenari itamakenna ku jari-jari Jusup. Ipakekenna man Jusup baju si mejilena kal, janah iburakenna man Jusup bura emas.
43. Iberekenna gereta kinirajan si peduaken man Jusup janah pengawal kehormaten erdalan arah lebe gereta e janahna erlebuh, “Pelapang! Pelapang dalanna.” Bage me Jusup enggo itangkuhken jadi wakil raja i belang-belang taneh Mesir.
44. Nina raja man Jusup, “Aku raja tapi ise pe la banci erban kai pe adi la nungkun man bandu.”
45-46. Ibanna gelar Jusup gelar bangsa Mesir e me: Sapnat Panea. Iberekenna ka sada diberu man ndeharana e me: si Asenat anak Potipera imam i kuta Heliopolis.
Sanga e enggo telu puluh tahun umur Jusup. Itadingkenna istana raja, lawes ia ndalani taneh Mesir kerina.
47. I bas pitu tahun si riba-iba e, melala tuhu ulih taneh.
48. E maka ipepulung Jusup me kerina pangan e, itamakenna ku lumbung i bas tep-tep kuta. I tep-tep kuta ipepulungna buah juma sekelewetna.
49. Seh kal buena juma ipepulungna seh maka enggo seri buena ras kersik i tepi lawit. Perban e lanai isukati pe.
Tema : Kalak Si Erkiniteken Pentar Erbahan Perencanan
Tujun : Gelah Mamre
  1. Pentar erbahan perencanan ekonomi man keluarga ras jelma si enterem
  2. Ngasup menciptakan peluang pengembangan ekonomi man jelma si enterem
Metode : Sharing

KATA PENARUH
Salah sada peribahasa i bas manajemen keuangen si cukup populer sebab rusur terbukti kebenarenna eme: "failing to plan is planning to fail" ( gagal merencanakan berarti merencanakan kegagalan ). Ertina perencanan si mehuli penting kel ilakoken gelah tujun banci berhasil icapai. Adi perencanan ilakoken alu asal-asalen, usaha sinilakoken kita situhuna sea-sea sebab kemungkinen besar pasti gagal. Kata Dibata pe enggo leben mpersingeti kita kerna sienda: "Rencana si megermet maba keuntungen, perbahanen si merudu-rudu mereken kerugin" ( Kua. 21:5 ). Alu bage tangkas me maka perencanan si mehuli i bas kerina bidang perlu kel silakoken. Kai kin palas si perlu lit i bas kita gelah kita ngasup ngelakoken perencanan si mehuli? Enda me si jadi oratenta i bas Kata Dibata si ni oge kita i bas paksa enda.

URAIAN TEKS/TAFSIREN
Jusup ngasup nuriken erti nipi Raja Mesir eme kerna rehna 7 tahun masa kemakmuren i bas negeri Mesir janah kenca sie reh ka 7 tahun masa kiniseran ( kelihen si mesangat ). Alu bage Jusup pe ngasup nuduhken solusi man Raja Mesir kerna strategi ras rencana i bas menghadapi masa 7 tahun kiniseran e me gelah rayat Mesir i bas 7 tahun masa kemakmurenna la ia boros, tapi nggit nabung, nggit mpepulung persedian pangan bas lumbung i tep-tep kota (ayat 48) e maka cukup megegeh guna ngalaken masa kiniseran e.

Engkai maka lit i bas Jusup ide-ide si cemerlang seh maka analisa masalah ras perencanan si ibahanna guna ndungi masalah ndai tuhu-tuhu banci terbukti efektif ? Sebab Jusuf tuhu-tuhu tek man Dibata janah kinitekenna e labo terjeng biber ngenca, tapi teridah i bas kerina dampar kegeluhenna. Kiniteken si bage rupana ngasup mabai Raja Mesir pe ngidah maka i bas diri Jusup ringan Kesah Dibata ( ayat 38 ).

Perbahan kinitekenna pe la tanggung-tanggung e maka Dibata pe mereken kepentaren si la tanggung-tanggung man Jusup ( ayat 39 ). La saja kepentaren, tole pe Dibata mereken pasu-pasu si simpar man Jusup arah jabaten, kehamaten ras jabu si ituahiNa ( ayat 40-46 ) janah kegeluhen ras kepeminpinen Jusup pe jadi pasu-pasu man enterem jelma i negeri Mesir ( ayat 47-49 ). Alu bage teridah kuga kalak si ndube i dayaken jadi budak, i fitnah, ras i penjaraken bagi si i nanami Jusup kedungenna salih jadi kalak si dem alu kepentaren, kreatifitas, kehamaten, kuasa, ras ertuah bayak. Sie kerina perbahan i bas setiap perbeben geluhna, Jusup lalap ndarami si ngena ate Dibata. I bas situasi-situasi si mesera i bas geluhna, Jusup buen ras dekahen ngukuri persoalen jelma si enterem asangken persoalen pribadina. Emaka geluhna tuhu-tuhu jadi pasu-pasu man enterem jelma. La pernah ia nilah i bas dalan Dibata nari e maka kerina perencanan ras kebijaken si ibahanna mereken ulih si mehuli i bas pemasu-masun Dibata.

APLIKASI
Megati terjadi Mamre subuk secara pribadi bagepe secara institusi erpengakap enggo ngelakoken perencanan si mehuli tapi kedungenna megati ka terbukti gagal, gia enterem ka nge Mamre si sukses. Kegagalen e eme kegagalen si sementara, si kedungenna banci salih jadi kesuksesen adi Mamre tetap ernalem man Dibata bagi si enggo ituduhken Jusup. Emaka Mamre la banci menyerah i bas kiniseran geluh, harus tetap optimis janah erusaha alu erpersukuten man Dibata, umpamana i bas nekolahken anak, sakit-pinakit, perbeben i bas jabu, i bas kuta bage pe i bas Gereja. Perencanan ras strategi si ialoken Jusup i bas Dibata nari pe perlu kel si usih selaku Mamre: i bas masa produktifta ula kita boros, nggitlah kita nabung, kurangi ngisap, janah la ngelakoken kebiasan / pendahin si sea-sea. Selaku kepala keluarga, mari tuhu-tuhu si kelengi jabunta. Mamre pe perlu ngusih Jusup i bas orientasina kerna kalak sideban. I bas masa-masa gulut pe i bas kegeluhenna, dekahen nge ia ngukuri kepentingen kalak si enterem asangken kepentingen pribadina. Uga gelah kalak sideban jore, untung dingen selamat, bage nge lalap iukurina. Emaka geluhna tuhu-tuhu jadi pasu-pasu man enterem jelma seh maka ia ngaloken kepercayan guna minpin jelma si enterem. Bage me usihen si enggo icidahken Jusup. Tuhan Jesus pe enggo mereken usihen si bage rupana man banta.

Gerejanta pe perlu ngusih semangat si enggo i cidahken Jusup, janah Mamre min peloporna. I bas Tata Gerejanta bagin Tata Laksana pasal 1 butir 4 nuriken kerna salah sada indikator umum wujud GBKP si ideal eme: "sebagian besar anggaran gereja baik dalam perencanaan dan realisasinya digunakan untuk pelayanan kasih yang dilaksanakan bersama atau untuk pihak di luar gereja". Ertina enggo lit pengakunta maka kita banci simpar ngaloken pasu-pasu Dibata adi kita erbahan rencana anggaren si buen beliganna guna kiniulin kalak sideban. Adi kurang denga pe kengasupenta ngelakokensa i bas paksa enda, mari si usur-usur gelah reh dekahna reh ngasupna kita ngelakokensa sebab bage me si ngena ate Dibata. Mari sipergermetken dage piga persen enggo anggaren gerejanta situjuken guna kalak sideban, piga persen anggaren panitia-panitia si lit guna kalak di luar GBKP entah pe di luar kalak Kristen? Adi kita dekahen ngukurken kepentingen pribadinta asangken keperlun kalak sideban ula mamang ateta adi kegeluhenta subuk secara pribadi entah pe sebagai institusi gereja katepen gagal asangken berhasil. Jadi Mamre si tuhu-tuhu berhasil min kita kerina. Ula ka min keberhasilenta e me keberhasilen si semu entah pe si sementara ngenca. Adi berhasil pe kita alu ngelakoken si la ngena ate Dibata ( menghalalkan segala cara ) pasti kedungenna salih nge keberhasilenta jadi kegagalen / kemunduren si mesera mpesikapsa. Tapi adi kita jadi mamre si setia man Dibata pasti iberekenna daya pikir ras kreativitas si la erkeri-kerin seh maka berhasil kita i bas perencanan bagepe berhasil ka kita i bas realisasi rencana ndai. Dibata simasu-masu kita kerina.

DISKUSI 
  1. Kai sifat-sifat Jusup si banci si usih gelah kita pe ngasup ngelakoken perencanan geluhikegiaten alu payo dingen rulihken hasil si mehuli?
  2. Kai nge si perlu sibahan gelah rencana kerja (anggaren) bas Gerejanta banci nehi indikator bas Tata Gereja bagin Tata Laksana pasal 1 butir 4 ndai?
USULEN ENDE-ENDEN
1. KEE GBKP No. 249 :1-2 ( Klik Judul KEE Untuk Melihat Lirik Teks )
2. KEE GBKP No. 323 :1-2 ( Klik Judul KEE Untuk Melihat Lirik Teks )
3. KEE GBKP No. 379 :1-2 ( Klik Judul KEE Untuk Melihat Lirik Teks )
4. KEE GBKP No. 279 :1-2 ( Klik Judul KEE Untuk Melihat Lirik Teks )

Pdt. Bumaman Teodeki Tarigan, MM 
HP. 081262075000

Belum ada Komentar untuk "Kalak Si Erkiniteken Pentar Erbahan Perencanaan - Managemen Keuangan ( Bimbingen PA Mamre 5 - 11 Mei 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel