Kiniteken Mpeturah Kepentaren - Tantangen : Identitas Berusaha ( Bahan PA Moria 5 - 11 Mei 2019 )


Bahan Bimbingen PA Moria 05 - 11 Mei 2019
Tantangen : Identitas Berusaha

SI MAN OGEN : Kuan-kuanen 23:23
23. Kebenaren, kepentaren, pengajaren, dingen pengertin kerina perlu itukur, tapi ola kal dayaken.
T E M A : KINITEKEN MPETURAH KEPENTAREN

T U J U N : Gelah Moria
  • Tetap ndarami kebenaren, pengajaren dingen kepentaren.
  • I bas rusaha tetap njagai kinitekenna
METODE PA : Sharing pengalamen ras NoBar ( Nonton Bareng )

Kata Penaruh
Adi lawes kita ku ingan pusat perbelanjan, selain faktor mesunah ras nyaman, mbue ka pe tawaren-tawaren si menggiurken. Umpamana i bas bulan tertentu lit diskon seh 70%, tukur sada dat 2 (SALE by one get two ras sidebanna). Situasi enda erbahanca kita selaku konsumen lanai ngasup mbedakenca apai keperlun ras apai kerincuhen. Adi keperlun eme nukur beras, nggalar uang sekolah anak, nukur token listrik, enda eme si la banci lang. Tapi adi kerincuhen banci denga itunda, umpamana: Moria merincuh nukur berlian erkiteken idahna sikerajangen kalak, tapi erkiteken lenga lit sen banci denga itunda. Mbue tawaren si menarik gelah si tukur, piah dungna lanai si eteh tumburen, lanai kita ngasup mbedaken apai keperlun apai ka kerincuhen, kedungenna si la man tukuren pe enggo itukur. Prinsip ekonomi i bas bisnis "dengan modal sekecil-kecilnya mendapat untung sebesar-besarnya", enda lumrah, asal saja ilakoken erpalasken 'kepentaren' si erpalasken kiniteken man Jesus ( jujur, benar ras transparan / la nggit nokoh). Arah bahan PA sendah sehubungen ras tahun program GBKP 2019 eme: "meningkatkan jiwa kewirausahaan ( Enterpreunership ) warga GBKP dalam bidang ekonomi, serta kepedulian terhadap kesehatan dan lingkungan", Moria iajuk gelah i bas erwirausaha kita tetap njaga / melihara prinsip-prinsip kebenaren ras kepentaren erpalasken Kata Dibata. Ertina, ercakap kerna berwirausaha / bisnis e pe bagin kiniteken.

Mpebagesi Pengangkan Kerna Ogen. 
Kuan-kuanen 23:23 "Kebenaren, kepentaren, pengajaren dingen pengertin kerina perlu itukur, tapl ola kal dayaken". Eme sada hal si seh kal ergana. Tapi amin bage pe nina Salomo: perlu itukur ras la kebiarenken amin gia meherga. Engkai maka bage nina Salomo? La ia kurang erta ras ia kalak termurmur tapi nina ayaki kebenaren, kepentaren, pengajaren dingen pengertin sabap e la banci bene ras e ( kebenaren, kepentaren ras pengertin ) mabai kita kempak dalan si payo, ketenengen. I bas Pustaka Si Badia banci si idah piga-piga contoh:
  1. Jesus alu tegas, pang, la nggit kompromi ras imam-imam bage pe ahli Taurat guna mpertahanken kebenaren Dibata erbahanca IA ( Jesus ) arus ngenanami kiniseran seh dungna mate i kayu persilang. E ertina Jesus la nggit ndayaken kebenaren tapi nukur kebenaren e alu erga mahal.
  2. Johanes la nggit ndayaken kebenaren Injil si erbahanca ia ibuang ku pulau si mesuni i Patmos.
  3. Ajar-ajar Jesus nggit nadingken kerina erta ras pendahinna guna ngikutken Jesus e pe termasuk nukur kebenaren alu erga si meherga. 
Tapi kerina erga si arus igalar alu meherga enda la pernah sia-sia sabap tujunna guna keselamaten ( kiniulin ) subuk man banta bage pe jelma si enterem. Kalak si nggejapken nilai pengorbanen Jesus i kayu persilang e rendah ( murahen ) ngenca si nggit ndayaken kebenaren. Kerina e ulihna i bas Dibata nari, itukur ertina lit usaha ras pengorbanen guna ndatkenca, la bias alu duit tapi alu kekelengen, alu kehamaten ras perayaken guna kegeluhen. Raja Salomo si termurmur raja si pentar ras malang man Tuhan; i bas ketermurmurenna terbukti maka lit ka kelemahenna eme ia sempat ndayaken kebenaren alu mpediat rayatna ersembah man dibata-dibata si iteki ndehara-ndeharana.

Pengkenaina.
Kecibal kegeluhen gundari enda la sitik jadi `jual beli` kebenaren. Umpamana i kantor lit tawaren man banta guna muat jalan pintas i bas sada-sada kebijaken, tapi si pilih jujur sue ras kebenaren Kata Dibata, amin pe mberat resikona, tapi e ertina kita sangana nukur kebenaran. Arah mpertahanken si bage erbahanca kita jadi pribadi si berintegritas, sabap si eteh apai si utama i bas geluhta. Sebalikna contoh ndayaken kebenaren: tupung kita la ndalanken Kata Dibata i bas kegeluhenta enda, entah pe mutarbalikkenca, kita enggo ndayaken kebenaren. Sabap megati antara kebenaren ras kejahaten e lanai eteh batasna, tempa-tempa kerina situasi enda pe perlu si tengeti i bas erusaha. Payo, entrepreneurship jadi perayaken tahun enda tapi labo ngajuk kita guna ngelakoken kai pe ntahsa `menghalalkan segala cara'. I bas kerina usaha, tetap njagai kebenaren Dibata. Emaka ayakilah kebenaren, kepentaren ras pengertin alu tutus ngorati ras ndalanken Kata Dibata. Kiniteken mpeturah kepentaren eme si jadi tema PA-nta sendah. Ertina erkiniteken enda arus teridah i bas pendahinta; kai pe si ukuri, si belasken ras silakoken kita arus erpalasken kiniteken gelah alu bage kita jadi Moria si pentar ( berhikmat ). Tukurlah kebenaren e amin pe alu erga si meherga. Lit istilah i bas bahasa Inggris: "be the first to buy the truth."

Sharing Pengalaman ras NoBar 
Cuba cakapken pengalamenndu, kuga contoh ras kai ulihna adi i bas pendahinta / geluhta kita ndalanken kebenaren Dibata ras adi la ndalanken kebenaren Dibata.

Pdt. Hermanto Tarigan, Mth

Film : https://youtu.be/kLr_tvQj7Gs
Judul : Makhluk Gaib Dan Usaha



Belum ada Komentar untuk "Kiniteken Mpeturah Kepentaren - Tantangen : Identitas Berusaha ( Bahan PA Moria 5 - 11 Mei 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel