Makeken Ulih Pemeteh - Tantangen : Kurang Paham Nggunaken IT ( Bahan PA Moria 26 Mei - 1 Juni 2019 )


Bahan Bimbingen PA Moria 26 Mei - 1 Juni 2019
Tantangen : Kurang Paham Nggunaken IT

SI MAN OGEN : Kejadin 6:9-22
Nuah
9-10. Enda me turin-turin kerna si Nuah. Lit telu anak dilaki ipupusna, e me: Sem, Ham, ras Japet. I bas jamanna Nuah ngenca si mehuli, janah la lit kesalahenna. Ia erdalan i bas dalan Dibata,
11. tapi kerina kalak si deban tuhu-tuhu jahat i lebe-lebe Dibata, janah i japa pe terjadi kejahaten.
12. Itatap Dibata doni enda, janah idahNa kejahaten kerina i je, sabap manusia kerina enggo mbau lagu langkahna.
13. Nina Dibata man Nuah, “Enggo Kutetapken maka Kusasapken me kerina manusia. Kukernepken ia kerina, erkiteken doni enda enggo dem alu kejahaten manusia.
14. Bahanlah sada kapal man bandu i bas kayu si nteguh nari. Bahan kamar-kamarna janah lapisi alu ter arah bas ras arah darat.
15. Bagenda bahan kam ukurenna: gedangna 150 meter, belangna 25 meter, ganjangna 15 meter.
16. Bahanlah tarumna setengah meter ganjangna i babo dingdingna nari. Kapal e ertingkat telu i bas, janah tama sada pintunna i bas sada dingding.
17. Kuban ateKu banjir si mbelin i doni enda, gelah kernep kerina si nggeluh. Kasa kai si lit enda la banci la mate kerina,
18. tapi ateKu erbahan sada perpadanen ras kam. Bengketlah kam ku bas kapal ras ndeharandu, anak-anakndu, bage pe ras permainndu.
19-20. Tamaken ku bas kapal e sada pasang i bas tep-tep erbage rubia-rubia ras tep-tep erbage perik-perik gelah ola keri mate.
21. Tamaken ku bas kapal e kerina erbage pangan man bandu ras man rubia-rubia ras man perik e.”
22. Ilakoken Nuah kerina kai si iperentahken Dibata man bana.

T E M A : MAKEKEN ULIH PEMETEH

TUJUN : Gelah Moria
  1. Meteh kepentaren Nuah ngikutken perentah Tuhan.
  2. Pentar makeken duit guna usaha.
METODE PA : Nuriken pengalamen nggunaken IT ( Teknologi Informasi ) / Nobar.

Kata Penaruh.  
"Adi atendu nguasai doni maka kuasailah informasi " alu sada alat kitik i bas tanndu maka banci ietehndu kerina perkembangen i bas doni enda. Enda me sebagin ( cupliken ) iklan si nawarken alat guna banci nangkap kerina siaren TV alu mejile. Berita, seh kal perluna i bas kegeluhenta sabap banci nambahi pemeteh. Berita e banci pedas sialoken erkiteken teknologi si cukup mehuli paksa enda. Em si gelari Teknologi Informasi ( IT ). IT eme informasi ras teknologi entah pe cara guna mereken informasi ras ndatken informasi. Rikut ras alat si sinipakeken guna mpeseh ras ndatken informasi. Banci buku, televisi, radio, iklan, telepon, sms, internet, selebaren, spanduk ras sidebanna. Amin bage gia perlu nge kita metenget sabap kerina alat enda ndai banci ipake kalak si la ertanggungjawab, ulihna la uli. Kerina enda ulih pemeteh manusia si banci ipaksaken guna kiniulin kegeluhenta. Arah bahan PA enda tole nari si siksiki kerna pemeteh Nuah si ipakena guna kiniulin ku sekelewetna.

Mpebagesi Pengangkan Kerna Ogen.  
Arah Kejadin 6:9-22 lit piga-piga hal si arus ipergermetken i bas konteksna:
  1. Dibata nandai kerina jelma ras meteh kerina perbahanenna, si mehuli bage pe si jahat. Kiniulin Nuah ras isi jabuna pe tangkas i bas Dibata ( Kejadin 6:9-10 ). Kejahaten manusia i sekelewet Nuah epe la terligen man Dibata. Janah kejahaten e arus iukum. Dibata la nggit ersada ras kejahaten. 
  2. Nuah ngena ate Dibata. I bas jamanna Nuah ngenca si mehuli, la lit kesalahenna, ia erdalan i bas dalan Dibata ( ayat 9 ). Ijagana kebadian geluhna, la ia nggit ngelakoken kejahaten bagi i sekelewetna. Ia nggeluh rembak ras Dibata, ilakokenna kerina kai si iperentahken Dibata man bana (ayat 22). 
  3. Erkiteken Nuah ngena ate Tuhan (8), maka guna nelamatken Nuah ras keluargana rikut ras kerina rubia- rubia maka Tuhan merintahken Nuah erban kapal i bas kayu si nteguh ( kayu gopir ) arus ibahanna 3 tingkat, erbahan kamar-kamarna, ilapisi alu 'ter' arah bas ras arah darat (14). Kapal enteguh, seimbang, jadi ingan guna nelamatken rubia—rubia. 
  4. Ukurenna kapal e, gedangna 150 m, belangna 25 m, ganjangna 15 m, tarumna 1/2 m ganjangna i babo dindingna. Kapal e ertingkat 3 i bas, janah sada pintunna i bas sada dinding (15-16). Guna keseimbangen kapal e, ibahan jendela kitik ku datas gelah cahaya banci ku bas, ibahan ka pintun samping gelah banci ku bas ku darat. Arah enda kepatuhen Nuah teruji. 
  5. Enda cara Dibata guna engkernepken ras nelamatken kegeluhen i doni enda alu teknologi erbahan kapal. Alu kapal si irancang Dibata ras ibahan Nuah maka keselamaten kegeluhen tersehi.Kepatuhen Nuah nandangi Dibata jadi kunci i bas erbahan kapal rikut i bas pemakenna guna kiniraturen kegeluhen.
    Ertina, i bas jaman Nuah mbarenda enggo nge lit teknologi. Teknologi: erbahan kapal. 
Pengkenaina.
Arah Kata Dibata enda banci kita erlajar maka Tuhan mereken informasi kerna kejadin si reh ras Tuhan pe mereken pemeteh man Nuah guna erban kapal, i ja secara sederhana eme teknologi. Jadi teknologi ras informasi gunana eme gelah kegeluhen i doni banci reh ulina. Genduari enda alat teknologi si banci si pake guna ndatken informasi seh kal buena. Kerina informasi si perluken banci si darami asal tutus ateta. Ketutusen ate i bas erlajar ras makeken teknologi erbahansa reh mesunahna si akap ndahiken dahinta. Umpamana, pedas kita ndatken informasi i bas uga kita menaken usaha-usaha, uga ndatken modal, rikut ras pemasarenna. Arah IT pe kita banci ndatken informasi peluang erdahin ras beasiswa, maka Pakelah teknologi ras informasi gelah tambah kemajunta guna ndatken masa depan si terulin. I bas wari perpudi enda guna ngelamar ras ngumumken kerna Aparat Sipil Negara ( ASN ) pe enggo arah Internet. Erbinaga enggo online. Ertina bage buena peluang ras perkembangen jaman si nampati kita guna rusaha. Gelah reh semalna. Ula promosiken dirinta ras masalahta tapi promosikenlah ulih pendahinta. Adi la kita nggit erlajar nggunaken alat teknologi gundari maka jadi me kita kalak gaptek ( gagap teknologi ).

Nuriken Pengalamen Nggunaken IT 
Tupung erdalan-dalan ku bas sada ingan tergejap me muas. Erkiteken lupa maba perbekalen inemen maka isuraken guna nukur inemen. Si erbinaga inemen bas ingan ndai rembang mesin. Sada kulkas galang tertutup alu erbage macam inemen i je. Adi ateta nukur inemen cukup masukken sen asa si tersurat i je ku bas sada lubang alu nekan tombol 'bell', emaka pilih inemen alu nekan tombol arah inemen si suraken kita maka ndarat me inemen e arah lubang emaka nggo banci si buat. Adi la si eteh ras la nggit erlajar make alat e maka muas me kita i bas ingan e. Tipe si apai nge kita, lancar make teknologi entah gagap teknologi (gaptek)? Apai buen maba kiniulin ntah kinirugin man banta? Nambahi pendapaten nge ntah nambahi uang keluar? Kai tantangenta i bas makeken IT?

Coba dan gagal adalah biasa dalam belajar memakai teknologi tapi berani mencoba dan tidak malu gagal adalah modal untuk lancar memakai teknologi. 

Pdt. Juniyanti Br. Sembiring, SST

Film : Dampak Negatif IT




Belum ada Komentar untuk "Makeken Ulih Pemeteh - Tantangen : Kurang Paham Nggunaken IT ( Bahan PA Moria 26 Mei - 1 Juni 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel