I Bas Wari Pendungi Kerina Arus Ipertanggungjawabken - Konfesi : Eskatologi ( Bahan PJJ )


Bahan Perpulungen Jabu-Jabu 16 - 22 Juni 2019
I Bas Wari Pendungi Kerina Arus Ipertanggungjawabken

Si Man Ogen : Matius 12 : 33 - 37
Kerna batang ras buahna
(Luk. 6:43-45)
33. “Guna ndatken buah si mehuli arus lit batang si mehuli; adi batang la mehuli tentu buahna pe la mehuli. Sabap arah buahna itandai kap batangna.
34. O, kesusuren nipe si jahat! Kuga nindu ngataken si mehuli adi ukurndu pe jahat nge? Sabap kai si ibelasken, e me si erburak i bas pusuh nari.
35. Kalak bujur tentu teridah i bas ia nari si mehuli, ndarat i bas pusuh peratenna si mehuli nari; janah kalak jahat ndarat me si jahat i bas pusuh peratenna si jahat nari.”
36. “Tapi ingetlah! I bas wari pendungi pagi kerina si la mehuli si enggo ibelaskenndu arus ipertanggung-jawabken. 37Sabap arah kai si enggo ibelaskenndu me kam iadili.”
T E M A : Konfesi:Eskatologi

Eskatologi ( Junani: ta eskata ) e me doktrin ( ajaren ) kerna wari pendungi. I bas Pustaka si Badia ( Padan si Ndekah ) i cidahken kecibal wari pendungi enda eme Wari Tuhan si ibenai alu kejadin si mejin desken sada bencana man manusia ( bdk, Mal. 4:5-6 ); kalak si la tek man Tuhan si la nggit jera ngenanami "ukumen si rasa lalap" ( bdk. Jes 66:24 ); bangsa Israel si enggo mate ipekeke mulihi ( bdk, Dan. 12:2 ).

I bas Padan si Mbaru, eskatologi erkawiten ras Kinirajan Dibata i bas pengajaren Jesus kerna kerehen Anak Manusia mulihken si rusur igelari parousia si nandangi jadi i bas paksa si reh. Ise saja si tek man Jesus ipekeke mulihi janah ibereken "kula si mbaru" guna ngaloken Kinirajan Surga ( bdk. 1 Kor. 15:35-53 ). Janah kerehen Jesus mulihi e jadi penjemba man banta si tek man Jesus gelah nggeluh bagi si ngena ate Tuhan ( bdk. Mat. 13:30 : "kerna sesa si turah tengah page").

I bas Konfesi (Pengakuan Iman) GBKP BAB XVI : "KEDATANGAN JESUS KRISTUS KEMBALI" isina, Kami percaya, bahwa:
  • Kedatangan Jesus Kristus kembali merupakan penggenapan janji yang dinyatakanNya sebelum naik ke surga.
  • Kedatangan Kristus kembali terjadi pada waktu yang tidak terduga, sebagaimana datangnya pencuri pada waktu malam. ( bdk. 1 Tes. 5:4; Luk. 21:34; 2 Pet. 3:10 ).
  • Dia akan datang kembali untuk menghakimi orang yang idup dan mati. ( bdk. 2 Tim, 4:1; Kis. 10:42, 17:31; 2 Kor. 5:10 ). Pada kedatanganNya yang kedua kali, setiap orang harus mempertanggungjawabkan semua perbuatannya ( bdk. Mat. 6:4; 6:16, 12:34 ).
Alu bage, terang ituriken i bas Konfesi GBKP maka kerehen Jesus mulihi e pasti jadi. Soal ndigan paksana labo lit si metehsa. Si penting e me ope kerehenNa si mulihken e si pekena-kena dirinta perukurennta, perbahanenta jadi bukti kita kalak si tek ras nembah man Jesus. Sabab kerina pagi kita ngadap man baNa guna iadili sue ras perbahanenta sekalak-sekalak ( bdk. Joh. 5:28-29 ).

Bahan PJJ-ta sekali enda nehken kata persinget erpalasken Pustaka si Badia man banta kerina guna dalanta ersikap ngalo-ngalo kerehenNa mulihken. Persikapenta e me alu erlajar arah sada anding-andingen kerna batang kayu ras buahna. "Guna ndatken buah si mehuli arus lit batang si mehuli; adi batang la mehuli tentu buahna pe la mehuli. Sabap arah buahna itandai kap batangna", (ayat 33). I bas ayat 34-37, si jadi penekanen e me kerna isi pusuh ras kata-kata ntah perbahanen si jahat. Tentu "buah-buah" si la mehuli melala denga selain "cakap si la mehuli".

E maka i bas ayat 34 tangkas isuratken penulis: "O, kesusuren nipe si jahat! Kuga nindu ngataken si mehuli adi ukurndu pe jahat nge? Sabab kai si ibelasken, e me si erburak i bas pusuh nari". Kata si ibelasken nuduhken isi pusuh. Jadi, labo esah adi ninta "pusuhku mehuli kap", tapi perbahanenta la mehuli, Adi mehuli kin ukurta ( pusuhta ), erbelas pe kita mehuli, si jaga kata-katanta payo i bas pusuh temanta. Si mehuli e me, adi ngerana kita banci mpekeke kiniteken temanta. Kai nina orangtuanta: Sik-sik lebe maka tindes". I bas Jakub 1:19,20 nina : "O senina-seninangku, ingetlah! Kerina arus metinggel, tapi ola minter ngerana, dingen ola sukah merawa. Rawa manusia labo ngasup erbahan si mehuli si ngena ate Dibata". 

Terdauhen, kai silakoken kita e kerina lit ulihna, i bas wari pendungi. Teptep kalak arus mpertanggungjababken kai si ilakokenna termasuk arah si ibelaskenna. Ertina, pengeranata e pe pagi iadili Dibata. I bas Efesus 4:29 isuratken "Adi kam ngerana ola sitik pe belasken cakap si la erturi-turin. Tapi kata-kata si ergunalah belasken, si banci nampati kalak si deban rikutken perluna, gelah kata-katandu e maba kiniulin man si megisa." Dage, anjar-anjar erbelas, ukuri lebe maka belasken gelah ula pagi dilahta erbanca kita ku neraka. Jaga pusuh ras dilahta. Pusuh si bersih ras dilah si Pehuliken erbanca kita pulah i bas ukumen nari.

EVALUASI :
Uga kerna ulih kerja raninta? Kai si man pehulin guna tahun si reh?

DISKUSI :
  1. Sabap arah kai si enggo ibelaskenndu me kam iadili" ( ayat 37 ) Nggo nge kita pang arah pengerananta sedekah enda ngalaken pengadilen e?
  2. Sanga arih-arih i bas jabu, mekatep kita ngerana kerna rencana jabu. Adi i bas PJJ kita ngerana kerna program-program sektor / PJJ. Apai nge buen si belasken kata-kata si erguna entah si la erguna, memotivasi entah melemahken, mereken solusi ( jalan keluar ) entah nambahi soal si mbaru, ndarami peluang entah ndarami kendala? Diskusiken uga si mehulina. 
AKSI :
Cuba benaken i bas Minggu enda ukuri si mehuli kerna kai pe ras belasken ka si mehuli. Umpamana, ukuri maka "mehuli kal Dibata nepa kita". Emaka belasken i bas pusuhndu tep-tep wari "aku meherga i lebe-lebe Tuhan". Kenca bage gejapken uga nanamna.

USULEN LAGU :
  1. KEE GBKP No. 201 : 1,4
  2. KEE GBKP No. 381 : 1-3
  3. KEE GBKP No. 199 : 1,4
  4. KEE GBKP No. 468 : 1,2

Topik Pertoton Syafaat
  1. Gelah ngawan GBKP rukur ras melasken si erguna segedang-gedang geluhna.
  2. Gelah kerina Pengurus PJJ, Kategorial, kepanitiaan si lit rukur ras melasken si erguna gelah alu bage program kerja erdalan alu mehuli.
  3. Gelah kerina Serayan Tuhan pe rukur ras melasken si erguna i bas mabai perpulungen ersembah man Tuhan ras ngikuti dahin-dahin gereja.

Pdt. Jekson Barus, M.Th.




Belum ada Komentar untuk "I Bas Wari Pendungi Kerina Arus Ipertanggungjawabken - Konfesi : Eskatologi ( Bahan PJJ )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel