Bapa Si Ngepkep Jabu - Tanggungjabab Mamre Selaku I Bas Jabu ( Bahan PA Mamre 21 - 27 Juli 2019 )


Bahan Bimbingen PA Mamre 21 -27 Juli 2019
Tanggung Jabab Mamre Selaku I Bas Jabu


Ogen : 1 Timotius 3: 4- 5
4. Arus ietehna ngepkep jabuna alu mehuli janah ngasup erbahanca anak-anakna ngikutken katana dingen mehamat man bana.
5. Sabap adi la ia ngasup ngepkep jabuna, labo ia ngasup ngepkep perpulungen Dibata.
Tema : Bapa Si Ngepkep Jabu
Tujun : Gelah Mamre
  1. Meteh tanggungjabab bapa selaku imam tengah jabu
  2. Ngasup jadi peminpin kiniteken i bas jabu
KATA PENARUH
Imam, e me sekalak si erdahin i rumah pertoton. Ia me si jadi kelang-kelang Dibata ras perpulungenNa. Imam si nehken persembahen perpulungen man Dibata dingen si nehken sura-sura Dibata si man dalanenken perpulungen. Rumah pertoton si kitik-kitik e me jabu, janah si jadi imam ije e me bapa. Nina kalak Jahudi, si la lit jabuna la lit asal usulna. Emaka kalak enda rusaha gelah kerina lit jabuna. Pentingkal jabu e bas kalak Jahudi, erkiteken sie aturen-aturen perjabun pe tangkas ituriken ras jadi sada undang-undang. Umpamana, la banci erjabu ras diberu asing si la erkiniteken man Dibata, bagepe si la mehamat man orangtua. Jadi keluarga Dibata, em perayaken kerina jabu. Gelah perayaken enda tersehi, man se isi jabu tetap ibereken pengajaren kerna kata Dibata bagepe kerna orat nggeluh kalak si erkiniteken. Si mereken pengajaren e eme bapa. i bas kalak Jahudi, bapa arus nikapken waktuna man keluargana si sitikna sada jam sada wari. Ije ia mereken pengajaren, bimbingen, disiplin, man anggota jabuna, khususna ngajarken kata Dibata. Guna sie sekalak bapa la banci lang tetap erlajar kerna kata Dibata, dingen malang man Dibata. Kai si iajarkenna e min enggo teridah bas dirina.

URAIAN TEKS / TAFSIREN
Ogenta enda ngajari kita kerna uga kin arusna sekalak peminpin i bas jabu, si banci jadi pengepkep bas perpulungen. Bas ayat 2 ras 3 ituriken maka bapa si jadi peminpin jabu arusna la erpandangen, ndeharana sada ngenca. Ia arus saber, terkuasaina dirina janah ratur lagu langkahna. Meriah ukurna ngalo-ngalo kalak si kesilang ku rumahna dingen ia ngasup ngajari. Ia la perampang, lemah lembut ras la mata diuten. Enda kerina biak si lit i bas dirina nari.

Ayat 4,5, nuriken kerna kai arus ibahan bapa selaku imam i bas jabuna, e me;
  1. Ngepkep jabuna alu mehuli
    Ngepkep ningen e njagai, emperdiateken, ras mabai jabu ku si mehuli. Bapa selaku imam, ijagaina kebadian jabuna; dirina, ndeharana, ras anak-anakna. Bapa jadi usihen nggeluh badia man isi jabuna; teridah kesetianna man ndeharana, tutus dingen bujur bas ndahiken dahin teptep wari, nggit ngakuken kesalahen siilakokenna man anak-anak entah man ndeharana. Ibabaina pe seisi jabuna ku rumah pertoton. Ije ia ertoto man Dibata mindo pengalemi dosa pribadina ( bdk. Job. 1:4,5 ). Itotokenna pe gelah se isi jabuna sehat dingen mejuah-juah, ertambah-tambah kepentaren Dibata bas jabu, janah ngasup jabuna jadi pasu-pasu man keluarga si deban. Radu ras ia megiken kebenaren Firman Tuhan i rumah pertoton, janah i rumah pe tetap iulihina, gelah kai pe si ibahan kerina anggota jabu e tetap erpalas ku bas kata Dibata. La ia lupa nehken persembahen pengataken bujur man Dibata erkiteken pasu-pasu si mbelin seh ku bas jabuna, dingen njadiken jabuna jabu si ersembah man Dibata. 
  2. Ngasup erbahanca anak-anakna ngikutken katana dingen mehamat man bana. Mabai ras ngajari anak-anak bas jabu labo mesunah, dem nge alu pengorbanen ras perjuangen. Pengajaren si mehuli ras efektif ilakoken labo arah ngerana tapi arah kegeluhen si teptep wari. Banci saja bapa e la beluh ngerana, tapi ituduhkenna bas geluhna maka Jesus lit bas ia. Arah pengajaren ras usihen si ilakoken bapa tengah jabu, mahan bana anak-anakna mehamat man bana dingen ngikutken pengajaren e. Ulihna anak-anak e erngena ate ku bas dahin Tuhan, ermeteruk ukur ras lit prinsip geluhna, la murah ijolah-joleken pengajaren doni enda. Anak-anak e banci jadi pasu-pasu man sekelewetna.
  3. Adi la ia ngasup ngepkep jabuna , labo ia ngasup ngepkep perpulungen Dibata. Perpulungen Dibata ibenai i bas jabu si kitik . Ngasup ngepkep jabu si kitik rikutken sura-sura Dibata, jadi sada asam guna ngelai perpulungen si terbelinen. Adi kerina bapa tetap ngepkep jabu bagi sura-sura Dibata tentu kerina perpulungen nggeluh bagi sura-sura Dibata.
APLIKASI
Melala jabu genduari enda lanai sempabu erkiteken kerina isi jabu lanai ndalanken fungsina sekalak-sekalak. Enggo nggeluh erbana-bana. Bapa lanai ndalanken tugasna selaku imam, nande lanai ndalanken tugasna selaku penampat, anak-anak lanai megiken pengajaren. Melala gundari jabu Kristen lanai erbahan Kristus palas jabuna Lit deba erlumba ngayaki pemeteh, deba erlumba ngayaki jabaten, pangkat, keduduken, deba ka erlumba ngayaki erta. Guna ndatkensa ije melala persaingen si erbahansa lanai lit waktu jumpa ras se isi jabu, apaika erlajar kerna kata Dibata. Gegeh ras pemetehna ipakena guna nehi perayakenna. Kai ulihna? Labo lit kemalemen ate bas jabu e. Adi jabu e lanai erdalan bagi arusna rikutken sura-sura Tuhan, e enggo melala si man pekenan.

Kerina bapa i tengah jabu mulihlah ku fungsina semula e me, imam i bas jabu. Selaku imam bapa erdahin encukupi keperlun jabuna, ngajari se isi jabuna kerna sura-sura Dibata. bagi Jesus mpersembahken diriNa selaku imam si mbelin ( bdk. Heb. 10:21 ), mehuli kal adi bapa mpersembahken jabuna man Tuhan jadi persembahen si nggeluh. Jabuna tetap muat bagin i bas ndahiken dahin Tuhan alu dem keriahen ukur, subuk arah waktu, tenaga, perukuren bage pe ertana. Bapa tetap mereken pengajaren maka karina si lit bas ia ras se isi jabuna e me pemere Dibata, seh maka kerina anak jabuna la biar-biaren ngikutken Tuhan alu mereken persembahen si mehulina. Selaku imam, bapa jadi pendoa syafaat nandangi anak jabuna. Mabai anak jabuna ertoto, ngoge Pustaka si badia, rende muji Tuhan teptep wari. Erkiteken si e perlu nikapken waktu jumpa ras anak jabu gelah kerina nggeluh i bas Tuhan. Kunci terbaik untuk memenangkan seluruh anggota keluarga terletak di tangan seorang ayah yang takut akan Tuhan ( bdk Perb. 16:31; 18:8 ).

DISKUSI  
  1. Turiken pengangkanndu, kerna sekalak imam i bas jabu erpalasken ogenta!
  2. Turiken pengalamenndu sekaiak-sekalak selaku imam bas jabu!
USULEN ENDE-ENDEN
  1. KEE GBKP No. 313:1,2   ( Klik JUDUL KEE UNTUK MELIHAT LIRIK )
  2. KEE GBKP No.182:2,3,5   ( Klik JUDUL KEE UNTUK MELIHAT LIRIK )
  3. KEE GBKP No.350:1,2   ( Klik JUDUL KEE UNTUK MELIHAT LIRIK )
  4. KEE GBKP No.374:1-3    ( Klik JUDUL KEE UNTUK MELIHAT LIRIK )

Pdt. Nurbety br Ginting, M.Th HP. 082168696383


Belum ada Komentar untuk "Bapa Si Ngepkep Jabu - Tanggungjabab Mamre Selaku I Bas Jabu ( Bahan PA Mamre 21 - 27 Juli 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel