Ikawali Dingen Itegu-Tegu Tuhan - HUT SAITUN ( Bahan PJJ 28 Juli - 3 Agustus 2019 )


Bahan Bimbingen Perpulungen Jabu - Jabu 28 Juli - 3 Agustus 2019
Ikawali Dingen Itegu-Tegu Tuhan
( HUT SAITUN )

Ogen : Masmur 37 : 23 - 26
23. Kalak si ngena ate TUHAN,
ikawali dingen itegu-teguNa geluhna.
24. Guling pe ia la mekelek,
sabap TUHAN kap si negu tanna.
25. Mulai kin kitik-kitikku nari seh bagenda enggo metua,
la enggo kuidah kalak bujur itadingken TUHAN,
tah kempuna jadi pemindo-mindo.
26. Pepinjamken dingen melumbar ia mere lalap,
dingen anak-anakna mereken kemalemen ate man bana.
Sangap kal kalak si enggo jadi Saitun. Engkai? Sebab Dibata enggo erpadan nepati padanNa nina: "Aku kap Dibatandu, emaka Ku embah-embah kam, seh kam metua, janah ubanen. Aku sinjadiken kam, emaka Ku tatang-tatang, Ku angkip-angkip, janah Ku kelini kam (Jes. 46:4)". Enda ngatakenca maka adi enggo Saitun pengataken bujur naringe man Tuhan, "bujur Tuhan aku enggo Saitun. "La iit kemelan adi enggo Saitun apaika adi enggo lit ubanna. Sebab uban desken mahkota si meherga kap ( bdk. Kuan. 16:31b ; 20:29 ).

Pemasmur i bas Masmur 37:23-26, nuriken kerna kalak bujur si ikawali dingen itegu-tegu Tuhan. Aminna pe ia guling la mekelek sebab Tuhan si negu tanna. Lidah Pemasmur mulai kin kitik-kitikna nari seh enggo metua la enggo idahna kalak bujur itadingken Tuhan entah kempuna jadi pemindo-mindo, justru kalak bujur pepinjamken dingen melumbar ia mere lalap dingen anak-anakna mereken kemalemen ate man bana. Sebab kemegahen anak-anak eme kap orang tua ( bdk. Kuan. 17:6b ). Enda me buktina sidalanken Pedah Dibata si pelimaken eme "mehamatiah man bapandu ras nandendu gelah banci kam ndekah nggeluh i bas negeri si Kubereken man bandu pagi". Selaku anak-anak uga kita mpekena-kena orang tuanta alu mehuli, gelah malem atena i bas ia enggo saitun. Kerina orang tuanta si enggo saitun, tetap min si perdiateken.

Ndatken kemalemen ate gelah ikawali dingen itegu-tegu Tuhan labo hal si mesunah. Kebujuren eme kap kata kuncina ras kalak si erkemalangen man Tuhan Dibata. Bagi Masmur 128:16 sinuriken maka kalak si sangap eme kalak si erkemalangen man Tuhan si nggeluh ngikutken kerina perentahNa maka cawir metua janah sempat idahna kempu-kempuna. Kalak sibagenda ngena kal ate Dibata erkiteken persadanna ras Tuhan. Medak erpagi-pagi saitun e, enggo ertoto man Tuhan, totokenna kerina anak-anak ras kempu-kempuna ras sidebanna. Rende ia muji gelar Tuhan, la lit waktuna jungut-jungut, tapi ikut muat bagin ia guna mpekena-kena kegeluhen subuk i tengah-tengah jabu, bagepe muat bagin i bas dahin-dahin gereja si ngasup denga ikut muat bagin. Enda me contoh si mehuli i bas diri saitun.

HUT Saitun, tahun enda enggo genep usiana sipe-28 tahun ken,i bas tanggal 12 Agustus 2019, sitotoken gelah sehat-sehat orangtuanta enda kerina janah tetap megegeh kinitekenna, saber ia i bas ndalani kegeluhen enda gelah malem atena nggeluh. Selaku anak-anak ras kempu-kempu kerina ras pengurus saitun arihken kai aksinta si bahan man kerina orang tuanta kerina, gelah i bas HUT na enda meriah ukurna janah kita kerina pe meriah ukurta i bas ngelakokenca. Selamat Ulang Tahun man bandu kerina orang tua kami saitun kekelengen kami ija pa pe kam ringan, Tuhan Dibata tetap si masu-masu kita kerina. Tetap Semangat!

EVALUASI :
Enggo nge sicatatken kai-kai saja inovasi siakap perlu ilitken i bas kegeluhenta?

DISKUSI :
  1. Turikenlah pengalamenndu uga kalak bujur ikawali dingen itegu-tegu Tuhan?
  2. Kai nge banci si ban man orang tuanta saitun gelah malem atena nggeluh i bas ia ndalani kegeluhenna?
AKSI :
Bahanlah sada aksi i bas ulang tahun orangtuanta Saitun si banci maba keriahen ukur man bana. Cakapken alu mehuli.

USULEN LAGU :
  1. KEE GBKP No. 15 : 1,2     ( KLIK JUDUL KEE UNTUK MELIHAT LIRIK TEKS )
  2. KEE GBKP No. 80 : 1,4,6  ( KLIK JUDUL KEE UNTUK MELIHAT LIRIK TEKS )
  3. KEE GBKP No. 320 : 1,2   ( KLIK JUDUL KEE UNTUK MELIHAT LIRIK TEKS )
  4. KEE GBKP No. 182 : 1,5   ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT :
  1. Notoken kerina saitun begepe pengurus saitun i bas kerina wilayah pelayenen GBKP gelah sehat-sehat, megegeh kinitekenna, malem atena katawari paksa pe i bas kekelengen Tuhan.
  2. Si turah i bas perpulungen.

Pdt. Gresiomala br Pinem, S.Th.




Belum ada Komentar untuk "Ikawali Dingen Itegu-Tegu Tuhan - HUT SAITUN ( Bahan PJJ 28 Juli - 3 Agustus 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel