Pentar Mbangun Jejaring - Ngembangken Jejaring ( Bahan PA Moria 28 Juli - 3 Agustus 2019 )


Bahan Bimbingen PA Moria 28 Juli - 3 Agustus 2019
Ngembangken Jejaring

SI MAN OGEN : 2 Kronika 1 : 12 - 17
12. E maka genduari Kubereken man bandu kepentaren ras pemeteh. Janah tambahenna, Kubereken man bandu tole erta ras kebayaken dingen kemulian lebih asangken kerina raja si enggo leben ntah pudin asa kam jadi raja.”

Kekuasan ras kebayaken Raja Salomo
(1Raj. 10:26-29)
13. E maka berkat Salomo i Gibeon nari, ingan Kemah Perjumpan ras TUHAN, jenari mulih ia ku Jerusalem. I je ia jadi raja Israel.
14. Itambahina gegeh tenterana alu pepulung 1.400 gereta kuda dingen 12.000 tentera si erkuda. Deba itamana i Jerusalem dingen si tadingna itamakenna i kuta-kuta si deban.
15. I bas paksa pemerentahenna, pirak ras emas bali buena ras batu i Jerusalem janah kayu aras bali ras batang ara.
16. Suruh-suruhen raja ngkuasai perbinagan kuda si rehna i Musri ras Kilikia nari,
17. dingen gereta kuda si rehna i Mesir nari. Kuda ras gereta kuda si iperluken raja Heti ras Siria, Raja Salomo ngelitkenca. Man raja-raja e sada gereta kuda idayakenna alu erga 600 duit pirak, dingen kuda alu erga 150 duit pirak.
T E M A : PENTAR MBANGUN JEJARING

T U J U N : Gelah Moria:
  • Kepentaren Salomo erbahan hubungen / jejaring ras kerajan-kerajan sideban.
  • Moria ngusih Salomo i bas mbangun jejaring guna ngembangken usahana. 
METODE PA : Diskusi

Kata Penaruh. 
"Modal Pergaulen" adi si germetken erti kata enda maka beluh ergaul, mbelang pergaulen, melala teman jadi modal i bas kegeluhen enda. La pe melala duit si banci si jadiken modal i bas geluhta tapi adi lit pergaulenta, maka si la lit i bas kita lit bas temanta banci ikataken lit i bas kita. I bas kekurangen ras kelebihen banci kita saling ngelengkapi i bas pergaulen ras pertemanen. Bagenda me perluna pergaulen maka jadi sada pengakun "modal pergaulen" si ikataken i bas bahasa si genduari "jejaring" entah pe "networking". Kusus i bas kita mbangun usaha entah pe memasarken ulih jumanta perlu kal kita mbangun jejaring gelah usahanta banci lancar. Enda salah sada cara si banci si pebelin i bas geluhta kususna i bas dunia usaha. Kuga caranta? Mari erlajar arah PA wari enda.
hubungen / jejaring mbangun jejaring

Mpebagesi Pengangkan Kerna Ogen.
Guna lebih ngangkai bahan PA-nta i bas wari enda perlu si eteh Iebe uga maka Salomo milih ersembah i Bukit Gibeon, padahal peti Perpadanen lit i Jerusalem. Batar-batar tembaga asli si ipake rusur guna persembahen tutungen si ilakoken nini-nini kalak Israel lit denga i je. Erkiteken alasen si e maka Salomo milih bukit Gibeon perban kinitekenna maka i je me ingan si payona man kalak Israel guna ersembah dingen jumpa ras Tuhan. Ulih raja Salomo ersembah dingen jumpa ras Tuhan eme iberekenNa kepentaren ras pemeteh dingen kebayaken ras kemulian lebih asangken kerina Raja si enggo leben entah pudin asa Salomo (ayat 12). Jenari mulih Salomo i Gibeon nari ku Jerusalem i ja ia jadi Raja dingen ipakekenna kepentaren si enggo ibereken Tuhan ( ayat 13 ). Salomo erbahan jaringen keamanen alu nambahi gegeh tenterana bagepe tentera erkuda, deba itamaken i Jerusalem dingen si tadingna itamaken i kuta-kuta sideban ( ayat 14 ). Kebayaken arah keuntungen usaha perbinagana tuhu-tuhu melala idatken eme pirak ras emas si bali buena ras batu i Jerusalem janah kayu aras bali ras batang ara ( ayat 15 ). Raja arah suruh-suruhenna nguasai perbinagan ( hubungen bilateral ) ras Musri bage pe Kalikia nari eme perbinagan kuda dingen gereta kuda i Mesir nari jenari idayaken man raja Heti ras Siria alu erga 600 duit pirak dingen kuda alu erga 150 duit pirak ( ayat 17 ). Arah nats enda banci si idah ras si pelajari kerna Salomo eme:
  1. Kepentarenna i bas mbangun jejaring. Arah kepentaren e maka jejaring si ibahanna lit i bas kebujuren, ngutamaken kepuasen alu pelayanen si mehulina.
  2. Jejaring si ibangun Salomo i bas bidang keamanen ras perbinagan kuda ras gereta kuda ( ekonomi ). 
  3. Pelayanen si ibereken Salomo man langganenna mereken kepuasen si maba keuntungen, 2 Kronika : 11 - 12 kepuasen raja Hiram erjejaring ras Salomo, 2 Kronika 9 : 5 - 6, Pujin ratu Syeba man Raja Salomo kerna kepentaren Salomo. 
Bagenda me Salomo i bas jamanna mpebelang kuasana, subuk secara pemerintahen bagepe secara perekonomin. Pas bagi nina kuan-kuan 'siapa menguasai ekonomi, dialah yang berkuasa'.

Pengkenaina. 
I bas ndalani kegeluhen bagepe ngembangken usahanta labo banci silakoken si sada, kita perlu mbangun kerja sama ras mpebelang kerja samanta ras enterem kalak, si ikataken eme jejaring. Jejaring entah pe kerja sama si perlu si bangun eme:
  • Jejaring informasi ras modal eme sesama manusia ( luas pergaulen ), Bank, Pendidiken, guna nambahi pemeteh bagepe agen-agen kesehaten gelah banci ngidah peluang usaha bagepe modal. 
  • Jejaring produksi eme rekanen entah pe teman kerja sama ras kalak sideban si erban usaha si seri ras kita entah pe usaha sideban guna banci encukupi target produksinta i bas pemindon langganen subuk i bas usaha si galang bagepe pemindon pasuken produksi si erbage-bage. 
  • Jejaring pemasaren eme pemeteh kerna i ja lit bahan baku si murah ras kualitasna mejile dingen lit kerja samanta kuje. Enda penting kal i bas usaha kuja idayaken hasil produksinta ras erlangganen kita dingen seh ka kal perluna mbuka peluang pasar sideban gelah ingan Pemasarenta banci reh belangna.
Ulih juma musimen entah pe ulih juma si jarang lit, enda pe perlu ibuka entah pe jejaring guna ipasarken ku daerah sideban, sabap megati murah ergana erkiteken melala produksi entah pe banjir i pasaren. Moria perlu pentar, alu megermet ras metenget si ngidah proses usaha enda. Si perlu kal si jaga i bas erjejaring enda eme kebujuren, gelar si mehuli arah nepati janji si enggo ibelasken ras isepakati subuk kerna mutu ( kualitas ) bagepe ketepaten waktu. Adi la nepati waktu nggalar utang ku Bank ntah ku CU maka banci masuk daftar hitam ( black list ) i bas kerina bank. Sekali lancung ujian seumur hidup orang tak percaya. Gelar si mehuli ergan asangken erta-erta, kekelengen kalak ergan asangken pirak ras emas ( Kuan-kuanen 22: 1 ). Janah pe guna banci kita erban jejaring ras nterem kalak, sada si perlu iperdiateken eme ula min lit imbangta tapi erdame ras kerina kalak sabap sada imbangpe mbuesa i bas erban jejaring.

Diskusi:  
Si Jingkat usahana erban keranjang hias i bas buluh nari. Sada paksa reh pemindon kalak si atena erlangganen si kebutuhenna 1000 keranjang hias perminggu. Meriah kal akapna ndatken kepercayan ras pemindon si bage belinna sabap sada peluang guna sukses. Emaka iusahakenna ncukupi target e tapi tengah dalan latih iakapna guna ncukupisa. Iukuri la akapsa terbanna 1000 keranjang ukir sada minggu, adi mindo penampat man kalak ningen mbiar ia pemetehna ieteh kalak sideban, mbiar ia buen kari ulih sideban asang ia. Emaka ban la tercukupisa maka la ndekah kerja samana ras langganen e ndai.
  1. Kuga adi kita pengusaha e? Kai si arus silakoken?
  2. Perukuren si kuga nge lit i bas diri sekalak perbinaga bicara radu ras ia erbinaga, bali binagana, ndeher inganna erbinaga, banci rubat i bas persaingen si la sehat?
Seribu teman kurang dan satu musuh terlalu banyak, ilmu yang dibagikan maka akan semakin banyak dan peluang sukses juga semakin besar, ketulusan dan komitmen melakukan yang terbaik itulah rahasia utama.


Pdt. Juniyanti Br Sembiring, SST.


Belum ada Komentar untuk "Pentar Mbangun Jejaring - Ngembangken Jejaring ( Bahan PA Moria 28 Juli - 3 Agustus 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel