Kebebasen Guna Kiniulin - Hari Ulang Tahun RI ( Bahan PA Moria 11 - 17 Agustus 2019 )


Bahan Bimbingen PA Moria 11 - 17 Agustus 2019
Hari Ulang Tahun RI

SI MAN OGEN : Galati 5: 13 -15
13. Kerna kam o senina-seninangku, kam enggo ipilih Dibata gelah bebas. Tapi jagailah maka ola kebebasenndu e jadi alasen si erbahanca kam ikuasai perukurenndu secara manusia. Tapi berelah maka keleng ate njemba-njemba kam guna si sampat-sampaten.
14. Sabap kerina Undang-undang ipersada i bas sada pedah, e me, “Kelengilah temanndu manusia bagi kam ngkelengi dirindu.”
15. Tapi adi bagi rubia-rubia perbahanenndu, si karaten dingen si atahen kam, metengetlah; adi la kam metenget nandangi kernep me persadanndu e.
T E MA : KEBEBASEN GUNA KINIULIN

TUJUN : Gelah Moria:
  • Meteh kebebasen si imaksudken Paulus.
  • Ngisi kemerdekan ( kebebasen ) alu ndahiken dahin-dahin si mehuli.
METODE PA : Diskusi ras Aksi

Kata Penaruh. 
Merdeka...merdeka....merdeka! Kai kin ertina merdeka? Merdeka berarti bebas i bas perbudaken, penjajahen nari, bebas i bas tuntuten, la ergantung man kalak si deban, la terbelenggu ku bas sada situasi si mperbudak ia. I bas kata merdeka terkandung dua pengertin eme merdeka secara de jure ( hukum ) ras merdeka secara de facto ( nyata ). Contohna negaranta secara 'de jure' enggo merdeka i bas 17 Agustus 1945, tapi secara 'de facto' ( kinatana ) masyarakatta lenga tuhu-tuhu merdeka erkiteken lit denga si ketadingen secara ekonomi, si la bujur mekatep denga terjadi ras sidebanna. Bagepe selaku kalak Kristen, kita ngataken tek man Tuhan Jesus selaku Juru Slamatta, maka secara de jure kita enggo imerdekaken i bas dosa nari tapi secara de facto mbue denga kalak Kristen lenga merdeka, teriket denga ku bas erbage kerincuhen daging, perubaten, perjengilen, perbahanen si la ngena ate Dibata. Arah kita er-PA wari enda, mari kita erlajar arah Paulus uga kita makeken kemerdekan e guna dahin-dahin si mehuli.

Mpebagesi Pengangkan Kerna Ogen.
I tengah-tengah Perpulungen Galati terjadi persoalen antara si mbaru jera ( kalak si non Jahudi ) ras hukum-hukum Jahudi. Man kalak Junani maka ngaloken Kristus e sada keriahen si mbelin, Kristus labo saja nebusi dosa manusia ras mereken jaminen keselamaten ( hidup kekal ) tapi pe mbebasken kalak i bas erbage bage aturen ( ritus ) agama si arus ilakoken ope sie. Tapi kai si jadi, kalak Kristen Jahudi nuntut kalak si labo Jahudi gelah ngelakoken aturen-aturen agama, umpamana tep-tep anak dilaki i arus sunatken. Enda me si erbahanca turah la si angkan, perjengilen i tengah-tengah perpulungen. Guna ngalaken situasi si jadi e, Paulus ningetken perpulungen gelah ula makeken kebebasen e guna erbahan dosa tapi ipakeken guna nehken kekelengen, ngelai ( ayat 13 ). Paulus ningetken maka arah Kuasa Salib Kristus perpulungen enggo ibebasken arah:
  • Hukum Taurat ( seremonial keagaman ) si ipake sebage sada sistem guna ngaloken keselamaten. 
  • Perbudaken dosa si erbahan kita jadi budak dosa (Joh. 8: 34-36; Rom 6: 14-23). 
  • Sura--sura daging si fokusna ku bas diri jine eme i bas pangan, sura-sura daging ras kejahaten ( Gal. 5 : 24; 1 Kor 8 : 9,1 Ptr 2 : 16 ). 
Kita lanai nggeluh i bas kuasa dosa, emaka i bas kebebasen sialoken kita e arus si cidahken si mehuli i bas kegeluhenta si maba kemalemen ate man kalak sideban ras doni enda ( Galatia 5:22-23 ). Paulus ngajarken gelah makeken kebebasen e guna ngelai alu dem kekelengen. Ayat 13 " ..... Tapi berelah maka keleng ate e ( agape-keleng ate Tuhan si enggo mbebasken ras mpelimbarui kegeluhen manusia ) njemba-njemba kam guna si sampat-sampaten, ielailah (douleuo, abdikanlah dirimu untuk keuntungan sesamamu)". Keleng ate Dibatalah si jadi penjemba i bas kita makeken kebebasen e. Kebebasen kalak Kristen labo guna merugiken kalak sideban tapi guna engkelengi, si sampat-sampaten, ndalanken si mehuli ula sebalikna (ay.14-15 ). Kita ibebasken, imerdekaken ertina lanai erbahan dosa, erciga ate man si jahat ras sikap guna ngisi ras makeken kebebasen e alu encidahken keleng ate Kristus arah kerina dampar kegeluhen.

Pengkenaina.
I bas kita ngaloken kebenaren Kata Dibata bagi si enggo iajarken Paulus man perpulungen Galatia, maka kita pe selaku kalak si enggo merdeka, bebas i bas perbudaken dosa nari, marilah si cidahken perbahanen si mehuli sebage buah kebebasenta. Perlu kita erlajar guna ngendaliken dirinta, engkuasai sura-suranta gelah teridah i je sura-sura Dibata. Kemerdekan ntah pe kebebasen e ula si maknai alu sada kesempaten si terbuka guna kita rate-ate, tapi i je teridah ise kita selaku kalak si enggo ibebasken i bas perbudaken dosa nari

I bas tanggal 17 Agustus 2019 enda, bangsa ras negaranta Republik Indonesia mperingeti wari kemerdekan si pe-74-tahunken. Si inget uga kerina pejuangta ndatken kemerdekan ras negaranta enda seh kita banci e. Uga kita genduari ngisi ras makeken kemerdekanta (kebebasen) si jadi tanggungjababta selaku perbahanen si mehuli, umpamana la kita lupa masang bendera, banci si akap e hal si kitik padahal e nuduhken kekelengenta man negaranta enda. Meriah min ukurta jadi bangsa Indonesia si enggo bebas i bas penjajahen nari alu la kita lupa masang benderanta.

Bagepe i bas kebebasenta e labo gelah kita rate-ate termasuk nehken kritiken-kritiken ku bas kebijaken bangsanta enda, mandang kalak sideban alu hinan, caci maki ras sidebanna. Contohna i bas memposting berita-berita arah media sosial, update statusta arah FB, wA, Twitter ras sidebanna ula jadi penyebar berita si la payo ( berita HOAX ) si erbahan perpecahen, menyinggung kalak sideban, erbahan sakit hati tapi berita si maba damelah si bahan. Sosial media si pake jadi sada alat pelayanen, nehken kekelengen. La banci ninta HP e sekerajangenku, bebas aku makesa, kai ras uga ateku ku bahan. Kebebasenta mak ertanta, geluhta labo banci bagi entabeh si akap saja tapi guna mehulilah si ban, si membangun ras jadi pasu-pasu man kalak sideban, ermulia Tuhan arah kemerdekanta e.

Diskusi ras Aksi :
  1. Uga nge pengangkanta adi ituriken "kemerdekan ( kebebasen ) e guna kiniulin. Cuba sibereken contoh-contohna.
  2. Guna ngisi kemerdekanta sibahanlah sada aksi encidahken kekelengenta ( kecintanta ) man NKRI enda. Jenda piga-piga si banci si bahan ras adi lit si deban banci si tambahi sue ras situasi inganta tading. 
    • Ningetken temanta, sekitarta, kade-kadenta gelah masang bendera. 
    • Aksi kasih sayang 170819 ( maksudna sue ras tgl, bln, thn HUT RI si pe-74 tahun) eme:
      • Alu erbahan kunjungen ku makam para pejuangta si lit i bas daerahta.
      • Ndahi keluarga para pejuang si lit i sekitarta, veteran, pensiunen guru si enggo mencerdasken pendidiken anak bangsa ras sidebanna si kin si akap erjasa i bas nnpertahanken kemerdekanta. Alu kita maba luah si enggo si sepakati i bas PA-nta ras erbagi pengalamenna. 
    • Banci denga si arihken kai nari aksi sidebanna si banci si bahan rikutken situasi i bas inganta tading si jadi bukti keleng ateta rnan NKRI enda.
Pdt. Erniyanti Pinem, MM


Belum ada Komentar untuk "Kebebasen Guna Kiniulin - Hari Ulang Tahun RI ( Bahan PA Moria 11 - 17 Agustus 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel