Kita Imerdekaken Kristus Guna Maba Kemerdekan - HUT RI ( Bahan PA Mamre 4 - 10 Agustus 2019 )


Bahan Bimbingen PA Mamre 4 - 10 Agustus 2019
HUT RI

Ogen : 1 Petrus 2:16
16. Nggeluhlah bagi kalak bebas; tapi ola bahan kebebasenndu nutupi si jahat, tapi nggeluhlah bagi budak Dibata.
Tema : Kita Imerdekaken Kristus Guna Maba Kemerdekan

Tujun  : Gelah Mamre
  1. Meteh maka Dibata nge simereken Kemerdekaan man bangsaNa
  2. Ngisi Kemerdekaan alu nggeluh i has biak Kristus 
Metode : Sharing

KATA PENARUH
Ngerana kerna kemerdekaan Indonesia, tentu melala pengajaren siidatken ije nari. Selaku kalak si tek, sieteh nge maka Dibata nge simereken kemerdekaan e man banta. Labo berarti kita mpersilahang perjuangen para pahlawanta. Harus si hargai maka mberat nge tuhu perjuangen para pahlawanta i bas peperangen ngelawan bangsa penjajah, melala kesah jadi teruhenna selama 350 tahun penjajahen Indonesia. Saja ngenca adi ibandingken kemajun ilmu ras teknologi antara penjajah (Belanda, Jepang) ras kita, tentu labo kita ngasup naluken penjajah. Senjatanta (bambu runcing, senjata si terbatas) adi ibandingken ras senjanta penjajah tentu labo banci sitaluken. Ijeme Dibata erbahan cara kuga gelah Indonesia banci merdeka. Bangsa sideban ipake Dibata guna memerdekaken kita: sekutu, ipake Dibata guna nge-bom Hirosima ras Nagasaki si erbahanca mundur Jepang i negaranta enda nari, emaka kita merdeka.

URAIAN TEKS / TAFSIREN
Menurut Barclay, 1 Pet 2:16 enda e me sada bagin "tugas kalak Kristen". Ayat enda memang ngerana kerna kemerdekaan kalak Kristen, janah kemerdekaan enda tetap nge ikawitken ras tugas tanggungjabab selaku kalak Kristen. Janah lebih asa si e, tanggungjabab tetap ka nge ikawitken ras keleng ate, keleng ate kalak si tek e e me awih keleng ate si ialoken i bas Dibata nari. Erkiteken sie Bapa gerejenta Agustinus ngataken "kelengilah Tuhan janah bahanlah kai akapndu Si pas man Ertina kalak si tek bebas ngelakoken kai pe atena sebatas perbahanenna e nuduhken kekelengenna man Dibata. Alu bage, kalak Kristen e merdeka tupung ia ngasup ndalanken kai sinisuraken Dibata. Banci kataken maka kemerdekaan kalak labo ngatakenca maka ia bebas ngelakoken kai sura-surana, tapi bebas ngelakoken kai si arusna ilakokenna. Dietrich Bonhoeffer ngataken maka lit hubungen si ndeher antara kebebasen ras ketaaten. Ija kebebasen ras ketaaten e ibarat "dua muka dari satu mata uang" sada ras sidebanna la banci pisahken. Guna ngangkai kerna sie, arus siienget maka kalak Kristen nggeluh itengah-tengah persadaan (komunitas). Kalak Kristen labo kalak si terisolir (serap), tapi ia nggeluh i bas sada persadaan, janah ije me kemerdekaan ndai icidahken. Kemerdekaan kalak Kristen e me kemerdekaan si ngelai. Erkiteken kemerdekaan si enggo ibereken Kristus maka kalak si tek bebas i bas sura-sura dagingna bage pe dosana nari jenari banci nggeluh bagi arusna. Kemerdekaan e rehna tupung sekalak jelma ngaloken Kristus jadi raja i bas pusuhna dingen Tuhan i bas kegeluhenna.

Alexander Nisbet ngataken maka kalak Kristen merdeka labo ertina bebas ngelakoken dosa, justru adi kalak Kristen erbahan dosa ia jadi budak dosa ( Joh. 8 : 34 ). Janah pe labo merdeka i bas erti bebas i bas kerina kewajiben-kewajiben selaku kalak Kristen. Merdeka siimaksudken jenda e me merdeka i bas Hukum Taurat nari selaku "covenant of work" ( perjanjian perbuatan baik ), si ngertiken maka kita ibenarken erkiteken perbahanenta simehuli. Kalak si tek imerdekaken i bas hukum si ngiket ia guna ndatken keselamaten, erkiteken Kristus enggo mereken kemerdekan man kalak si tek: merdeka i bas kuasa iblis bage pe dosa nari.

APLIKASI
Arah bahan PA-nta enda, mamre ipersingeti gelah ngangkai maka dirina situhuna enggo nge merdeka. Banci kataken merdeka jasmani ( secara kegeluhen kebangsaan ), bagepe merdeka rohani ( Kristus si enggo mereken kemerdekaan e ). Alu bage, arusna min mamre GBKP banci encidahken kemerdekanna e alu maba kemerdekaan ku sekelewetna. Sijadi penungkunen:
Enggo kin merdeka mamre GBKP? Enda jadi refleksi man kerina mamre, khususna si er-PA wari enda. Sabab labo terbuali kita maka enterem denga kal mamre tertaban ( la merdeka ) khususna i bas Perjudin nari, Narkoba, penakit sosial sidebanna nari. Selain sie pe melala denga kal kebiasaan si la mehuli si naban mamrenta umpamana, engkeriken waktu i kedei kopi, mbue ka nge si ngisap, la tutus erdahin, malas ku Gereja, rsd. Adi bagenda denga cara geluhta, kuga nge kita banci memerdekaken kalak sideban, adi kita pe langa merdeka. Banci jadi turah penungkunenta kai hubungenna ngisap ras maba kemerdekaan? Situhuna arah ngisap, langa bo kita memerdekaken kalak sideban i bas asap rokok nari, termasuk anak, ndehara bagepe kalak sideban. Alu bage banci kataken maka adi lit biakta langa merdeka pasti lit kalak sideban sitaban arah lagu langkahta.

Selain arah cara geluhta, kita pe ituntut gelah banci min maba kemerdekaan man kalak 'sideban i bas segi kiniteken seri ras biak Kristus. Kristus arah kerehen , mereken perdamen nandangi manusia ras Dibata, bage min pe kita; kerehenta banci min maba perdamen sapih-sapih manusia. Sigejap maka Tuhan enggo memerdekaken kita, erkiteken sie kita pe banci min encidahken kemerdekan e salu neruskenca ku sekelewetta. Ija kehadiren mamre banci mereken kenyamanen, ketenangen ras ketetapen ukur i bas kerina paksa; subuk i rumah ( keluarga ), i gereja bagepe i bas ingan erdahin.

SHARING
  1. Turiken pengangkanta kerna kemerdekaan siituriken i bas bahan PA-nta wari enda!
  2. Kemerdekaan si kuga nge si banci ibaba mamre kutengah-tengah kegeluhen enda, turiken pengalamenndu maba kemerdekaan ku bas kegeluhen enda!
USULEN ENDE-ENDEN
  1. KEE GBKP No. 282:1-3
  2. KEE GBKP No. 334 :1,2 
  3. KEE GBKP No. 400:1-3  
  4. KEE GBKP No. 366:1-3 

Pdt. Liza Br. Tarigan HP. 081370442166




Belum ada Komentar untuk "Kita Imerdekaken Kristus Guna Maba Kemerdekan - HUT RI ( Bahan PA Mamre 4 - 10 Agustus 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel