Sehken Penampatndu Mpekena-kena Rumah Pertoton - Minggu Perawatan Inventaris ( Bahan PJJ 4 - 10 Agustus 2019 )


Bahan Perpulungen Jabu-Jabu 4 - 10 Agustus 2019
Sehken Penampatndu Mpekena-kena Rumah Pertoton
(Minggu Perawatan Inventaris) 

Ogen : Nehemia 7:70-73
70-72. Nterem i bas bangsa e si mereken penampatna guna nggalari ongkos pekena Rumah Pertoton e, e me:
Gubernur: -- 8 kilo emas 50 mangkuk 530 jubah imam
Kepala-kepala terpuk: -- 168 kilo emas 1.250 kilo pirak
I bas bangsa e nari: -- 168 kilo emas 140 kilo pir 67 jubah imam
73. Imam-imam, kalak Lewi, pengawal Rumah Pertoton, pemain musik, nterem rayat biasa ras si erdahin i bas Rumah Pertoton e, kerina kalak Israel -- ringan i bas kuta-kuta ras kuta-kuta Juda.
Nehemia ertina Dibata si Menghibur / mbelin, e me kalak si ertanggungjawab i bas majekken mulihi Rumah Pertoton ( Beth Hamiqdash= Bait Allah ) i Jerusalem. Kecibal paksa si e mesera, erkiteken edenga mulih i bas pembuangen Babel nari. Secara ekonomi kegeluhen kalak Juda sangana gulut — rumah, juma, kuta ingan tading terulang. Tole pe bangsa-bangsa i sekelewet tanah Kanaan si nggasgasi kalak Juda erbanca tambah kiniseran. Tapi i bas situasi si bagenda tetap lit semangat guna majekken mulihi Rumah Pertoton.

Kenca tembok Jerusalem enggo dung maka dahin iterusken majekken mulihi Rumah Pertoton. Ngkai maka bage? Tentu lit perkara si mbelin si nggo tersuan i bas pusuh kalak Juda maka ergiah-giah ukurna i bas majekken Rumah Pertoton e. Kiniteken kalak Juda ngataken maka Rumah Pertoton e mbelin kel ertina i bas kegeluhenna. I bas kecibal si dem kiniseran, kalak Juda la ngadi i bas mbangun Rumah Pertoton. Tetap semangat aminna lit ancamen, pang mere i bas kekurangen, tetap ergiah-giah aminna lit si mpembiar-biarsa. Uga kin perukuren kalak Juda kerna Rumah Pertoton? Man bana, erti Rumah Pertoton eme:
  1. Rumah Pertoton jadi ingan kerehen Dibata ( bdk. 1 Raj. 8 : 12,13). 
  2. Rumah Pertoton eme ingan nehken persembahen ( bdk. 2 Kro. 7:12 ). 
  3. Rumah Pertoton eme pusat pengajaren ras penembahen man Dibata, ingan guna nandai Dibata alu mbages ( bdk. Jes 2:3 ). 
Jadi, Rumah Pertoton labo terjeng bangunen saja, tapi perlu sigejap ije ingan perjumpan ras Dibata. Emaka perlu sijaga dingen si pekena-kena. Alu bage maka Rumah Pertoton e banci teridah sikap, erlayas ras mehuli. Guna si e maka perlu lit rencana si mehuli i bas runggun umpamana ngaturken barang-barang inventaris bage pe jadwal mbersihkenca.

Bahan PJJ enda erkawiten ras Minggu Perawaten Inventaris Gereja, ertina minggu siningetken kerna pentingna perawaten inventaris gereja. Kai saja sitermasuk inventaris gereja? Inventaris gereja eme kerina alat-alat ( bangunen ntah barang ) siipake guna mendukung pelayanen gereja umpamana gedung gereja, kursi, mimbar, perlengkapen ibadah, alat musik, sound system rsd. Bage pe termasuk rumah pastori, gedung KA/KR ras perlengkapenna. Kerina alat-alat ras bangunen enda perlu ipekena-kena gelah tetap banci ipake alu mehuli. Selaku anggota ngawan, enda nggo jadi dahin ras tanggungjawabta ras-ras.


Kata Dibata si jadi oratenta ncidahken uga ketutusen bangsa enda i bas majekken ras mpesikap Rumah Pertoton. Kecibal kegeluhen si mesera radu ras ancamen si reh, la ngolangi bangsa e nehken tanggungjawabna. Tentuna kita pe selaku rarasen Dibata ula ketadingen i bas ikut ngelitken ras mpekena-kena nehken inventaris gereja. Emaka sehkenlah penampatndu i bas mpekena-kena Rumah Pertoton.

EVALUASI :
Nggo nge silakoken aksi i bas HUT Saitun?

DISKUSI  
  1. Uga nge sedekah enda kita perdiateken ras mpekena-kena Rumah Pertoton? Turiken! 
  2. Arihken i bas PJJ kerna si banci ilakokenndu guna ndukung program runggun i bas perawaten inventaris gerejanta ! 
AKSI :
Cakapkenlah i bas sektor guna erban aksi kebersihan nandangi inventaris gereja. Aturken ras dalankenlah i bas sada minggu enda.

USULEN LAGU : 
  1. KEE GBKP No. 68 : 1-3       ( KLIK JUDUL KEE UNTUK MELIHAT LIRIK )
  2. KEE GBKP No. 102 : 1,4,5  ( KLIK JUDUL KEE UNTUK MELIHAT LIRIK )
  3. KEE GBKP No. 368 : 1-3     ( KLIK JUDUL KEE UNTUK MELIHAT LIRIK )
  4. KEE GBKP No. 358 : 1        ( KLIK JUDUL KEE UNTUK MELIHAT LIRIK )
TOPIK PERTOTON SYAFAAT :
  1. Notoken perpulungen GBKP gelah semangat pesikap dingen pekena-kena Rumah Pertoton,
  2. Notoken perpulungen GBKP gelah ikut ertanggung jawab i bas pesikap dingen pekena rumah pertoton.
  3. Si turah i bas perpulungen.

Pdt. Darius Rinaldi Sembiring, M.Th.








5 Komentar untuk "Sehken Penampatndu Mpekena-kena Rumah Pertoton - Minggu Perawatan Inventaris ( Bahan PJJ 4 - 10 Agustus 2019 )"

  1. Bisa turiken penggejabken ayat enda

    BalasHapus
    Balasan
    1. dari bahan itu ada dua yang bisa kita ambil berdasarkan ayat alkitabnya
      1. Semua kalangan / semua pihak mau nampati
      Mulai gubernur, Kepala terapul, Imam2, Suku Lewi, Pemusik
      Dll. Ertina kerina merasa bertanggung jawab. Lalit erkendobahen .

      2. Kerina meriah ukur ibas nampati. Janah berusaha mereken si mehuli na si terbaik sesuai ras keberadaaanna. Bisa kita lihat rakyat biasa pe lit kang nge terpepulung emas
      La hanya arah gubernur . Ertina labo hanya bertanggung jawab. Tapi Ula ka min mekarus. Harus yang terbaik ( Simehulina ). Adi kita nampati mpekena2 rumah pertoton.

      Hapus
    2. Mohon bantuannya like subscribe dan komen channel youtube, fanspage gbkp facebook dan instagram..Bujur ras mejuah-juah kita kerina.
      1. https://m.facebook.com/gbkpkm8/
      2. https://instagram.com/gbkponline?utm_source=ig_profile_share&igshid=16biz21nba3q5
      3. https://www.youtube.com/channel/UCdKm4iRs1KbNvGDTJp0wNGg

      Hapus
  2. I jenda kita i ajari gelah ibas mpekena rumah pertoton banci kita erlajar arah kalak juda
    Ija ibas sangana ia bias kesuliten pe tetap ia ergiah2 guna majekkn rumah pertoton
    Kita pe bage ka min
    ula min rumah pertoton e si akap terjeng bangunen saja tapi sigejapkn min rumah pertoton e ingan perjumpanta ras sonata.
    Bagepe ibas inventaris gereja
    Gelah min kita pe kerina ikut ermediate nangdangi kerina inventaris gereja
    Sebab Gereja ras isina kerina tanggung jawabta ras2
    Bujur

    BalasHapus
    Balasan
    1. Bujur enggo tambahindu pengangkan kerna bahan pjj minggu enda. Dibata simasu2 kerina perpulungen GBKP.

      Hapus

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel