Sirangilah Perbahanen Si Melket - Usaha Pelestarian Secara Sosial / Manusia Ras Pinakit Sosial ( Bahan PA Mamre 18 - 24 Agustus 2019 )


Bahan Bimbingen PA Mamre 18 - 24 Agustus 2019 
Usaha Pelestarian Secara Sosial / Manusia Ras Pinakit Sosial

Ogen : 1 Korinti 5 : 1 - 13
Lagu la mehuli si lit i bas perpulungen
1. Si tuhuna enggo kubegi berita maka i tengah-tengahndu lit kalak perlua-lua. Janah perlua-lua si bage kalak si langa nandai Dibata pe ciga atena, e me: lit kalak si nggeluh erlua-lua ras ndehara bapana.
2. Amin bage pe meganjang ka ukurndu! Kin min arus ceda atendu, janah si perlua-lua e arusna ipedarat i bas persadanndu nari.
3. Secara badan aku ndauh i bas kam nari, tapi ukurku lit i tengah-tengahndu. Enggo kuukum kalak si perlua-lua e, tempa-tempa aku tuhu-tuhu lit i tengah-tengahndu.
4. Kam kerina pulung i bas gelar Tuhanta Jesus, janah aku lit i tengah-tengahndu i bas ukur alu kuasa Tuhanta Jesus,
5. guna ngendesken si perlua-lua e man Iblis, gelah daging ras kerincuhenna ikernepken, guna nelamatken tendina i bas wari kerehen Tuhan.
6. Labo mehuli meganjang ukurndu! Ma ietehndu kin maka lit kuan-kuan ngataken, “Ragi si sitik isiarina cimpa e kerina?”
7. Arus dage iambekkenndu ragi si ndekah, e me dosa, gelah kam jadi cimpa si mbaru, si la itama ragi, bali ras roti Paskah Jahudi. Janah si tuhuna Paskahta enggo sikap, sabap biri-biri Paskahta enggo igeleh, e me Kristus jine.
8. Dage sirayakenlah pestanta, labo alu roti si lit i je ragi si ndekah -- ragi dosa dingen kejahaten -- tapi alu roti si la itama ragi, alu biak si bersih dingen benar.
9. I bas suratku si mbarenda enggo kukataken man bandu gelah ola kam erteman ras kalak perlua-lua.
10. Maksudku labo perlua-lua si la nandai Tuhan, ntah kalak rangap, ntah tukang kompas, ntah si nembah berhala, sabap adi isirangindu atendu kalak si bage, ndarat kam i bas doni enda nari.
11. Dage si kumaksudken, ola kam erteman ras kalak si ngaku ia Kristen tapi ia perlua-lua, ntah rangap, ntah nembah berhala, ntah pengisak-ngisak, ntah pemabuk, ntah tukang kompas. Kalak si bage, man pe ola kam ras.
12-13. Labo urusenku ngadili kalak si labo Kristen. Dibatalah pagi ngadili ia. Ma kin kam nge arusna ngadili anggota perpulungenndu? Bagi lit tersurat i bas Pustaka Si Badia, “Pedaratlah kalak si jahat i bas perpulungenndu nari.” 
Tema : Sirangilah Perbahanen si Melket

Tujun : Gelah Mamre
  1. Sedar maka perbahanen si melket nembeh ate Dibata
  2. Mamre nadingken perbahanen si melket 
Metode : Sharing / nadingken salah sada perbahanen si melket i bas diri Mamre

KATA PENARUH
Kegeluhen kalak Kristen labo terjeng pengakun saja. Kekristenan erkaiten ras moralitas. Rusur pe sibegi maka kegeluhen kalak Kristen tep-tep wari eme surat Kristus si banci ioge kerina jelma katawari paksa pe. Emaka penting kel man banta ngukuri ras ngejabken kerna uga seharusna kegeluhen kalak Kristen si tuhu-tuhu gelah gelar Kristus e la icurnaken ise pe. Justru arah kegeluhen kalak Kristen searusna mabai kalak sideban guna nggeluh mehuli.

URAIAN TEKS / TAFSIREN
Perpulungen Korinti ipanteki rasul Paulus. Kuta Korinti e me sada kuta si mbelin. Kuta Korinti termasuk kuta si perekonomian berkembang alu pesat. Nterem bangsa-bangsa sideban ringan i kuta Korinti erkiteken perkembangen pedagangen. Situasi sibage rupana tentu saja mabai pengaruh si mehuli ntah pe si la mehuli man masyarakat i kuta Korinti. Emaka secara moral, kegeluhen masyarakat i kuta Korinti pe mbue mengalami permasalahan. Situasi sie pe kedungenna berdampak ku kegeluhen perpulungen Tuhan i kuta Korinti. Erkiteken sie maka Paulus mbue mereken pengajaren tentang persoalen-persoalen moral siterjadi i bas perpulungen i kuta Korinti.

Secara khusus i bas bahan renungenta 1 Kor. 5:1-13, Paulus nuriken kerna litna sada masalah si terjadi i tengah-tengah perpulungen Korinti. Masalah e eme terkait ras moralitas perpulungen e. Secara khusus itegasken Paulus maka i tengah-tengah perpulungen Korinti lit kalak nggeluh erlua-lua ras ndehara bapana. Lit penafsir singataken maka sinimaksud "ndehara bapana" labo iertiken sebagai ibu kandung tapi ibu tiri si labo lit iketen dareh ras anakna e. Perbahanen sibage tentu ciga ate Dibata. Janah kalak si la nandai Dibata pe ciga atena perbahen e. Tradisi kalak Jahudi pe melarang perbahanen sibage, bahkan adi lit si terdat ngelakokenca, maka ia iukum alu ibenteri batu. Sie nuduhken maka labo lit pembelaan nandangi perbahanen erlua-lua e.

Persoalen siterjadi labo terjeng masalah erlua-lua saja, tapi Paulus pe mengkritik sikap perpulungen i Korinti si la tegas i bas ngenen persoalen e. Searusna perpulungen e erceda ate erkiteken lagu langkah anggota perpulungen e si enggo lepak. Labo nuduhken sikap si la peduli ntah pe mereken toleransi si kedungenna mabai kalak sideban pe ngelakoken dosa si seri.

Aminna Paulus ringan i kuta sideban, tapi Paulus ncidahken persadaanna si nteguh ras perpulungen i kuta Korinti. Arah suratna, Paulus tetap ncidahken persadan sinteguh i bas perpulungen Tuhan erpalasken keleng ate Tuhan. Paulus mereken penekanen kerna kebadiaan perpulungen Tuhan, emaka secara tegas ikataken Paulus guna ngendesken si perlua-lua e man Iblis, gelah daging ras kerincuhenna ikernepken, guna nelamatken tendina i bas wari kerehen Tuhan. ( Ay. 5 ) Arah ayat enda teridah maka tuhu-tuhu Paulus menolak kerincuhen daging ntah pe perbahanen si melket.

Sikap apatis ras meganjang ukur perpulungen la lit gunana. Perpulungen Korinti lit biak meganjang rukur nandangi persadaanna, padahal lit nge si moralitasna la ngena ate Dibata. Terlebih adi ikaitken ras kuan-kuan "Ragi si sitik isiarina cimpa e kerina". Ragi e me dosa. Pengangkan kerna kuan-kuan enda banci ibagi i bas dua dampar e me sipemena i bas kegeluhen secara pribadi. Ragi e me dosa si ilakoken manusia si banci ncedai cimpa e me daging kula ras kegeluhen manusia. Erkiteken dosa, maka daging kula ras kegeluhen manusia kedungenna ceda ntah pe menderita. Sipeduaken i bas kegeluhen persadaan perpulungen Tuhan. Ragi e me perbahanen dosa si ilakoken salah sada ntah pe sebagian anggota persadaan e. Perbahanen dosa e kedungenna ncedai kegeluhen persadaan e. Aminna pe terberita perpulungen e mbelin dingen mehaga, tapi kesan e mis berubah adi lit anggota perpulungen e si ndalanken si la mehuli. Erkiteken sie, maka ragi ( perbahanen dosa ) e arus iambekken gelah kita jadi cimpa ( manusia / persadaan ) simbaru bagi roti paskah Jahudi si la itama ragi.

Situhuna sikap Paulus simenentang lagu si la rnehuli i bas perpulungen enggom pernah isingetkenna piga-piga paksa si lewat man perpulungen Korinti. Jenari mulihi isingetken Paulus alu nekanken gelah kalak sierkiniteken alu tutus man Tuhan ola erteman ras kalak si ngaku Kristen tapi ia erlua-lua, ntah rangap, ntah nembah berhala, ntah pengisak-ngisak, ntah pemabuk, ntah tukang kompas, kalak si bage, man pe ola kam ras. ( ay.11 ) Ketegasen guna njagai kebadiaan perpulungen e itekanken Paulus. Emaka Persadaan e arus pang menindak ntah pe mereken sangsi man anggotana si ngelakoken perbahanen si la payo. Ketegasen enda iperluken guna mabai kerina anggota perpulungen tetap konsisten i bas kinitekenna ras kebadian perpulungen e.

APLIKASI
Labo terjeng i bas kegeluhen perpulungen i kuta Korinti saja, perbahanen si melket pe mbue ilakoken kalak si ngaku Kristen i bas zaman genduari enda. Perbahanen melket e banci saja i bas erbage-bage contoh misalna erlua-lua, nangko, munuh, korupsi, rubat, penyalahgunaan NARKOBA ras sidebanna. Kerina perbahanen melket e la ngena ate Dibata. Harus sisadari maka pebahanen melket e ncedai dirinta, kinitekenta, bagepe persadannta seh maka lanai lit kedamen i bas pusuhta.

Sue ras statusta selaku anak-anak Dibata siitepana alu mehuli dingen enggo itebusna alu meherga, tentuna kita pe harus sadar dingen berjuang guna njaga kebadian dingen kiniulin tinepa Dibata i bas dirinta. Memang godaan setan i bas doni enda mekatep ngerintak kita guna sirang ras Dibata. I bas tantangen enda selaku Mamre GBKP, harus kita ngasup ngerembakken dirinta ras Dibata i bas pertoton ras komitmen guna ndalanken kata Dibata alu tutus.

I bas persadanta GBKP enda, kita pe harus njagai kinibadian persadan e. Sue ras TATA gereja GBKP BAB XII tentang Penggembalaan, memang enggo iaturken kerna sikap ras tindaken GBKP nandangi anggota perpulungen si ngelakoken perbahanen si melket I bas kerina tahapen proses siberlaku ( percakapan pastoral, pendampingan, pertoton khusus, rsd.) seh kubas "pedarat i bas perpulungen", labo nuduhken penolaken nandangi kalak si erbahan dosa. Tapi si e ilakoken sebagai komitmen i bas njagai kebadiaan persadaan e bagepe sebage bentuk penolaken nandangi perbahanen si melket alu tujun gelah si melket e la ncedai si deban. Kerina e nuduhken sada tujun e me kalak si enggo erbahan dosa bertobat janah mulihken ersada ras Dibata. Emaka marilah si sirangi perbahanen si melket e sebab kegeluhen ras Dibata ngenca ngasup mereken kedamen man banta.

DISKUSI: 
  1. Turiken terbagesen pengangkanndu kerna "Ragi si sitik isiarina cimpa e kerina"! 
  2. Turiken perbahanen-perbahanen si melket si lit isekelewetndu, Janah kai nge siarus ibahanndu guna mpekenasa?
USULEN ENDE-ENDEN
  1. KEE GBKP No. 323:1-3 
  2. KEE GBKP No. 377: 1-2 
  3. KEE GBKP No. 309:1-3 


Pdt. Monalisa Br Ginting,S.Si THEOL 
Pdt Khusus Komisi HIV-AIDS Moderamen 
HP. 085276144903


Belum ada Komentar untuk "Sirangilah Perbahanen Si Melket - Usaha Pelestarian Secara Sosial / Manusia Ras Pinakit Sosial ( Bahan PA Mamre 18 - 24 Agustus 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel