Aku Arus Erdahin - Entrepreneurship: Erbintuas ( Bahan PJJ 15 - 21 September 2019 )


Bahan Bimbingen Perpulungen Jabu-Jabu 15 - 21 September 2019
Entrepreneurship: Erbintuas

Ogen : Masmur 121: 4 - 8
4. Sekawal Israel,
la pernah madat mataNa, la tertunduh pe Ia.
5. TUHAN kap sekawalndu,
arah kemuhenndu kap Ia guna ngampang-ngampangi kam.
6. La kam bangger iparpari las matawari tupung suari,
ntah pe erkiteken sinalsal bulan tupung berngi.
7. TUHAN kap sekawalndu i bas kerina mara nari,
Ia kap si njagai geluhndu.
8. Ia kap si ngkawali perberkat ras permulihndu,
genduari nari seh rasa lalap.
Ogen : Johanes 5: 17
7. Tapi nina Jesus man kalak Jahudi e, “BapangKu erdahin kap lalap; e maka Aku pe arus erdahin.”
Tanggat 15 -21 September 2019

Tradisi kalak Jahudi eme ersembah ku rumah pertoton telu kali sada tahun. Rumah pertoton e lit i Jerusalem, i datas deleng Sion. Rumah pertoton man kalak Israel e lambang kehadiren Dibata. Emaka gelah jumpa ras Tuhan, bangsa enda arus nangkih ku deleng Sion. Biasana nangkih deleng labo mesunah melala rungga-runggana; kerangen si man bentasen, batu-batu galang si man alanken, uruk-uruk si man nangkihen, bas perdalanen e banci ka jumpa rubia-rubia si merawa. Erkiteken melala perbeben e megati si erdalan ku rumah pertoton e er aru ate, ngasup nge ndia aku ndalanisa, seh nge ndia aku alu mejuah-juah? Penungkunen enda ijawab pemasmur alu ende-enden gelah kerina ia megegeh ras tetap erpengarapen.

Nina pemasmur e, Tuhanta e tetap njagai ras engkawali kam. IA tetap emperdiateken kalak si reh ndahi IA dingen iberekenNa kegeluhen. Ertina la cilaka kalak si reh ndahi Tuhan ku rumah pertoton. lampang-ampangi Tuhan ia i bas mara nari, itamaken Tuhan ia arah tanNa si kemuhen, dingen iberekenNa kemenangen seh ku rumah Tuhan alu mejuah-juah ras permulihna pe pagi mejuah-juah. Seh ka pagi paksana bangsa e reh ka mulihken ku rumah Tuhan.

Adi siperdiateken renungenta enda maka Dibata tetap erdahin engkawali bangsaNa si tetap ersembah man baNa, isampatiNa ras iberekenNa serpang pulah, seh maka bangsa e tetap nggeluh alu mejuah-juah. Erkiteken Dibata Bapa e lalap erdahin, nina Jesus, "Aku pe arus erdahin" (Joh. 5:17).

Erdahin e tanggungjawab kalak si tek guna nehi pendilo Dibata eme nguasai, ngusahai, ras njagai kerina tinepa Dibata. Nguasai ningen e makeken si enggo lit e alu mehuli ras ertanggungjawab. Ngusahai ningen e tetap, erdahin alu bujur, tutus ras ertanggungiawab. Jesus Kristus jadi usihenta i bas erdahin. La pernah dahinNa itadingkenNa lolo la erkesehen. Asa seh kedungenna IA tetap erdahin. Janah i bas erdahin e IA tetap erkemalangen man BapaNa, patuh kal IA i bas ndahiken dahinNa.

Nguasai ras ngusahai tinepa Dibata ilakoken alu erbintuas. Erbintuas ertina lit kiniraturen i bas makeken paksa-paksa si lit, gegeh, asam ( modal ), kengasupen ras sidebanna. Kalak si erbintuas erdahin si jadi perayakenna eme segelah kegeluhenna ras kegeluhen kalak si deban reh ulina. Erbintuas e teridah arah pentarna kita makeken kesempaten si ibereken Dibata. Erpagi-pagi nari seh ku ciger ras ku benna, sieteh kai si man dahinken janah sidahiken kerina e alu ratur. Tapi la ka kita lupa makeken waktu guna pekesahken. Kai si enggo si dahiken kita e pe sibaba ka ku bas pertoton gelah tetap ipasu-pasu Tuhan. Kerna ulih pendahin e Dibata enggo ngaturkenca. Ieteh Dibata nge uga caranta erdahin, bujur, tutus ras ertanggungjabab entahsa nokoh, nebu-nebu, nipu erkiteken mekisat erdahin.

Kalak si erbintuas, ngena ate Dibata, sabab e sada bentuk penembahenta man baNa. I bas kita erdahin, iberekenNa gegeh dingen penampat, ipengasupna ngalaken rungga-rungga ras perbeben, iberekenNa kemenangen ras kejuah-juahen bas ndalani kegeluhen.

I bas erusaha ras erdahin perlu pengembangen diri alu nggit erlajar ras nggargari kengasupen si lit. Terbuka nandangi kemajun teknologi ras makekenca alu erkemalangen tetap man Dibata. Emaka marilah ninta sekalak-sekalak, "aku pe arus erdahin." Alu bage enggo sisehken pendilo Dibata man banta guna mpekena-kena doni enda. Dibata si masu-masu.

EVALUASI
Enggo nge sidalanken ndarami serpang pulah i bas kegagalen dahin ntah usahanta? Janah pang denga nge kita ngulihi dahin e?

DISKUSI : 
  1. Turiken kai-kai saja si teridah arah orat geluh kalak si erbintuas erdahin!
  2. Turiken kai-kai saja nge erbahansa maka lit kalak si la erbintuas erdahin? Bereken serpang pulah segelah salih jadi kalak si erbintuas.
AKSI :
Bahanlah ceramah kerna 'Etika Kerja'.

USULEN LAGU : 
  1. KEE GBKP No. 282 : 1,2  ( KLIK JUDUL KEE UNTUK MELIHAT LIRIK TEKS )
  2. KEE GBKP No. 286 : 2-4  ( KLIK JUDUL KEE UNTUK MELIHAT LIRIK TEKS )
  3. KEE GBKP No. 331 : 1,2  ( KLIK JUDUL KEE UNTUK MELIHAT LIRIK TEKS )
  4. KEE GBKP No. 334 : 1-2  ( KLIK JUDUL KEE UNTUK MELIHAT LIRIK TEKS )

TOPIK PERTOTON SYAFAAT :
  1. Notoken segelah ngawan perpulungen jadi kalak si erbintuas. 
  2. Notoken teman si enggo erusaha tapi langa maksimal keberberhasilenna.
  3. Notoken teman adi lit denga si perkisat.
  4. Notoken kerina usaha-usaha ras pendahin perpulungen.
  5. Notoken topik doa si ipeseh perpulungen i bas pjj nari.

Pdt. Ekwin Wesly Ginting Manik, S.Th. M.Div.



Belum ada Komentar untuk "Aku Arus Erdahin - Entrepreneurship: Erbintuas ( Bahan PJJ 15 - 21 September 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel