Kai Nina Pustaka Kerna Iptek - Dibata Simereken Pengertin, Kebeluhen Ras Kengasupen ( Bahan PA Mamre 29 September - 5 Oktober )


Bahan Bimbingen PA Mamre 29 September - 5 Oktober 2019
Kai Nina Pustaka Kerna Iptek

Ogen : Keluaren 32:1-11
Lembu emas
(Ul. 9:6-29)

1. Sanga iidah bangsa Israel maka Musa lalap la nusur i das Deleng Sinai nari, tapi ndekah ia tading i je, iulung-ulungna Harun janah nina, “La sieteh ntah kai enggo jadi man Musa, kalak si minpin kita ndarat i Mesir nari; e maka bahanlah sada dibata si man sembahen, guna minpin kita.”
2. Nina Harun man bana kerina, “Tangtangilah anting-anting emas si ipake ndeharandu, anak-anakndu si dilaki ras si diberu, jenari bereken man bangku.”
3. E maka kerina bangsa Israel nangtangi anting-antingna jenari iberekenna man Harun.
4. Ibuat Harun kerina anting-anting ndai, ileburna, jenari ituang emas ndai ku sada cetaken, jenari itepana sada lembu emas.
Nina bangsa ndai, “O Israel, enda me dibatanta si mabai kita ndarat i Mesir nari!”
5. Kenca idah Harun si e ipajekkenna sada batar-batar i lebe-lebe lembu emas ndai, jenari imomokenna nina, “Pagi ibahan sada pesta guna kemulian TUHAN.”
6. Pepagina lampas, ibaba kalak ndai asuh-asuhen man tutungen jadi persembahen, ras si debanna si man pangan jadi persembahen persadan. Kundul ia kerina man ras minem-minem; dungna enggo sambar jadi sada pesta mabuk-mabuk, janah perlagu langkah dilaki ras diberu lanai erpepah.
7. Nina TUHAN man Musa, “Pedas kam mulih ku teruh, sabap bangsandu si enggo ibabandu ndarat i Mesir nari enggo erdosa janah nulak Aku.
8. Itadingkenna dalan si enggo Kupedahken gelah ikutkenna; ibahanna sada lembu emas tuangen janah enggo isembahna ras ibahanna persembahenna ku je. Ikatakenna e si mabai ia ndarat i Mesir nari.
9. Enggo Kueteh kuga kengna bangsa enda.
10. Genduari, ola cubaken ngambati Aku. Nembeh kal ateKu man bana kerina, janah Kukernepken ateKu. Kenca bage, Kubahan ateKu kam ras kesusurenndu jadi sada bangsa si mbelin.”
11. Tapi meseksek ipindoken Musa man TUHAN, Dibatana nina, “TUHAN, ngkai maka bage rawanNdu man bangsaNdu, si enggo iselamatkenNdu i Mesir nari alu gegeh ras kuasa si mbelin?
Tema : Dibata Simereken Pengertin, Kebeluhen Ras Kengasupen.

Tujun : Gelah Mamre:
  • Ngasup nuriken ras makeken pemeteh.
  • Ngasup mbedaken dampak positif ras negatif IPTEK ras ndalanken sipositif. 
Metode : Diskusi

KATA PENARUH
Perkembangen ilmu pengetahuan ras teknologi (IPTEK) selaku alat bantu kubas kegeluhen genduari enda enggo mencapai tingkat si luar biasa arah kerina dampar. Untuk pengobaten lit teknologi sel punca siiarapken banci nambari erbage pinakit sigenduari enda langa lit tambarna. Untuk media digital ras kornunikasi enggo ipersiapken tingkat 5G si lebih cepat plus gambar realtime. Artificial Intelligence (AI) selaku robot sikepentarenna ras kengasupenna mbaboi manusia terus iperlengkapi. Untuk transportasi enggo lit silebih cepat asa sigel-gel, seh untuk eksplorasi ruang angkasa ipersiapken pendaraten i Planet Mars bagepe idarami planet-planet si deban sibanci ingan manusia masa depan tading selain doni sienggo dem dingen sontar enda. Secara ekonomi transaksi perdagangan online, simpan-pinjam arah hp android pe nggo jadi gampang. Bage pe bahan renungen / kotbah mbue iposting arah media sosial nari.

Tapi ula kita lupa maka persaingen kecanggihen alat perang pe genduari enda tuhu-tuhu berkembang pesat antar bangsa-bangsa dunia. Untuk mendukung kemajuan teknologi sumber daya alam pe ieksploitasi habis-habisen. Modus penipuan pe gundari enda mbue alu cara menyalah gunakan teknologi, jadi perlu ka itengetti. Mamre perlu menyadari situasi perkembangen si pesat enda gelah banci makeken peralaten dingen perkembangen teknologi guna kiniulin nggeluh, kemajun keluarga secara kiniteken reh deherna ras Tuhan dingen bas ngepkep anak-anak gelah ula lepas kendali dingen salah makeken teknologi.

Bangsa Israel ipilih ras ipulahi Tuhan i perbudaken taneh Mesir nari tujunna eme gelah ia lanai jadi budak persuruhen si idedeh bangsa Mesir. Janah i bas kebebasen e ia jadi bangsa Dibata, ertina itandaina alu payo Dibata simulahi ia, dingen nggeluh bas kebadiaan alu ndalanken peraten Tuhan bas geluhna dingen jadi usihen man bangsa-bangsa si deban.

Perdalinen enda ibabai Musa ras senina Harun mbentasi taneh mesawang dingen bahaya. Bas segedang perdalanen e ituduhken Tuhan tiap wari tanda pengkawali ras penemanina alu binangun awan ras binangun api bagepe pangan manna ras peril leto seh ku Deleng Sinai, ingan ija Dibata nehken 10 pedahNa guna kiniulin kegeluhen bangsa Israel. Alu 10 pedah Tuhan tangkas man bangsa Israel uga peraten Tuhan gelah idalanken mbabai kiniulin ku bas kegeluhenna.

Tapi siterjadi, ija asum Musa ndahi Tuhan ku datas deleng Sinai, ije me bangsa Israel nadingken ras nundalken Tuhan alu jungut-jungut man Harun dingen nuduhken maka labo itandaina ras ikelengina Tuhan. Tuhan si enggo nuduhken perkuah ate penaruhken ras penampatNa mbabai kalak Israel ku Taneh Pembebasen. Iulung-ulungna Harun janah alu meseksek ipindona gelah iban dibata si man sembah-sembahen guna minpin perdalan geluhna kerina. Harun ndalanken pemindon kalak Israel alu erbahan sada lembu emas bas anting-anting emas si ibere jelma sienterem nari.

Enda me teknologi si iban Harun guna mperiahken sura-sura sienterem. Talu ia iban sora sienterem, janah idahna maka patung lembu emas e nge dibatana simbabai ia ndarat i Mesir nari. Lembu ipajuh selaku dibata sinuduhken dalan dingen mabai bangsa Israel ku pembebasen. Enda pengkhianaten situhu-tuhu mbelin i adep-adepen Dibata ( Kel. 20:4-5 ).Terdauhen pe iban pesta simbelin nehken persembahen bas kenggesuhen simabuk ras lagu langkah si la erpepah sapih-sapih kalak Israel (Kel. 20:14).Pemeteh manusia enggo njadiken gana-gana siman sembahenna, dingen nulak peraten Tuhan. Si enda erbanca mbelin kal kinirawan Dibata dingen ateNa ngkernepken bangsa Israel, dingen milih sinursur Musa saja sijadi sada bangsa si mbelin.

Pertoton syafaat ras kemeteruken Musa mindo perkuah ate ras pengalemi Tuhan ngenca erbanca erkusur sura-sura Tuhan ngkernepken bangsa Israel simekeng e. Pertoton situhu-tuhu banci ngubahken keadaan manusia sienggo ngeluh bas dalan Tuhan nari, ndatken perkuah ate Tuhan si dem kekelengen man kalak si tetap setia erpengendes man baNa, dingen taruhkenna ku keselamaten situhu-tuhu.

Mekatep situasi si bagenda siterjadi bas pemeteh manusia ngembangken teknologi. Bom / dinamit sinuate penemuna nampati tambang ras pembangunen, ijadiken alat Pembunuhh massal. Media sosial sinuate iban gelah jelma banci erkomunikasi reh ulina ras reh deherna kepe jadi ingan erselfi-selfi ras up date status, entah pe selingkuh dingen nipu. Bagepe lit sijadi pemuja teknologi alu mengutamaken akal dingen lanai nggit sitik pe ngaloken ajaren agama.

Erpalasken kepentaren si rehna bas Tuhan nari, si idahlah kerina kemajun ras pencapaian teknologi e selaku pemere ras cara Dibata mbabai manusia ku tingkat kebebasen sierguna mulahi bas kemusilen, kebodohen dingen kiniseran nari. Dingen ingetlah maka teknologi tetap nge selaku alat, bali ras lembu sijadi alat angkut ras transportasi i Mesir nari ku Kanaan, labo jadi gana-gana siman sembahen. MAMRE !!!Pentarlah makeken teknologi guna ingan erlajar nambahi pemeteh, subuk bas erusaha dingen mbuka jaringen ( enterprenuership ), bagepe ndatken motivasi entah pemeteh simbaru kerna kesehaten ras lingkungen. Mamre makeken teknologi selaku alat komunikasi ras transaksi ekonomi si lebih cepat, lebih murah nambahi untung ras pendapatenta. Teknologi ipakeken guna mbegiken lagu puji-pujin rohani tupung pulung ras anak jabunta. Tetap kita ertoto gelah lit kemajuan teknologi tanpa batas bas Tuhan nari gelah terpepalem pinakit si langa lit tambarna, tersampati kalak si lit bas keterbatasen, mbaboi sie kiniteken ras pengendesenta man Tuhan tetap reh paguhna.

DISKUSI
  1. Kai-kai saja kemajun teknologi situhu-tuhu mpengaruhi kegeluhen ras kinitekenta gundari enda? (daftarken minimal 10)
  2. Uga si bahan makeken setiap teknologi e guna kiniulin geluhta ndalanken peraten Dibata? 


USULAN ENDE-ENDEN
  1. KEE GBKP No. 255:1,4   
  2. KEE GBKP No. 317:1,2,3  
  3. KEE GBKP No. 316:1,2,3  
  4. KEE GBKP No. 249:1,5  

Pdt Imanuel K. Ginting, STh. 
HP. 081362180453


Belum ada Komentar untuk "Kai Nina Pustaka Kerna Iptek - Dibata Simereken Pengertin, Kebeluhen Ras Kengasupen ( Bahan PA Mamre 29 September - 5 Oktober )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel