Usihlah Dibata Si Ratur - Hidup Sehat ( Fisik, Psikis Ras Kiniteken )


Bahan Bimbingen PA Moria 15 - 21 September 2019
Pendidikan Kebersihan dan Penatan Ruang

SI MAN OGEN : Masmur 104:13-18
13. I datas langit nari iusekenNdu udan ku deleng-deleng,
dingen dem doni enda alu pasu-pasuNdu.
14. IpeturahNdu dukut-dukut guna rubia-rubia,
kerina erbage sinuan-sinuan man manusia.
Gelah banci ia nuan-nuan,
15. dingen ibahanNdu anggur si periahken atena.
Minak saitun si erbahanca meriah akapna,
pangan guna mereken gegeh man bana.
16. Batang cemara i Libanon ndatken lau udan si cukup,
kayu cemara e, Kam jine nuanca, o TUHAN.
17. I je rasar perik-perik,
i das batang cemara rasar me perik si gedang kerahung.
18. Deleng-deleng si meganjang jadi ingan nggagat kambing kerangen,
i bas liang-liang batu-batu cebuni me landak.
TEMA : USIHLAH DIBATA SI RATUR

T U J U N : Gelah Moria:
  1. Ngidah maka Dibata njadiken sinasana alu ratur
  2. Nggit terus erlajar nggeluh bersih ras teratur.
METODE PA : Diskusi

Kata Penaruh. 
Adi bersih jabunta ras lingkungenta erbahansa teneng pusuhta, malem ateta ras meriah ukur kalak si natap pe, jadi la man banta ngenca sikap, kalak sideban si natap-natap pe meriah ukurna. Adi nen secara kinata kegeluhen, kurang denga kal ibereken penyuluhen entah pe pendidiken man banta kalak Karo kerna kebersihen ras penatan ruang, seh maka enggo jadi kuan-kuan pekarangen rumah si la bersih, la ratur emaka minter kalak ngataken uga pe enda lingkungen kalak Karo. Beda ras lingkungen kalak Jawa i bas sada-sada wilayah, adi ia je kerina ratur rumah ras halamenna pe bersih. Engkai maka banci bagenda? Mari radu ras kita ngukurisa, entah erkiteken la kita mediate kerna kebersihen entahsa la si akap perlu kebersihen. PA-nta sendah mbuka perukurenta gelah banci kita jadi Moria si bersih ras ratur.

Mpebagesi Pengangkan Kerna Ogen.  
Masmur enda nuriken kerna pujin-pujin man si mada tinepa erkiteken Dibata nggo njadiken doni ras kerina isina. Kemulian ras Kuasa Tuhan e banci igejapken arah tinepaNa janah e me alasen guna nehken pujin man Tuhan. I bas Dibata nepa doni enda pe ratur kerina la lit si la ijadikenNa. Pemasmur ngendeken pujin, tendina rende muji Tuhan erkiteken iidahna uga belinna kemulian Tuhan e si la lit nandingisa. Arah udan i deleng-deleng si kuse pe igejapkenna dem kal pasu-pasu Tuhan man doni enda. Lau eme keperlun manusia si utama, lau la banci la lit subuk man manusia ras man kerina rubia-rubia kerina batang kayu banci turah erkiteken lit lau, janah e igejapken pemasmur pasu-pasu sinibereken Tuhan. Kerina ilitken Tuhan keperlun manusia, dukut-dukut guna rubia-rubia, erbage-bage sinuan-sinuan, anggur pe erbuah guna banci inikmati jadi keriahen, minak saitun ilitken guna kesehaten. Pemasmur ngidah ras kepentaren Dibata arah kerina tinepaNa si dem alu kiniraturen. Lau, pangan ras ingan tading eme si jadi kebutuhen si la banci lang man manusia ras e enggo isikapken Tuhan. Kerina sinijadiken Tuhan mehuli, ratur, rapi ras sempabu.

Erkiteken perbahanen manusia si ngukuri dirina jine, lau pe enggo melket erkiteken ngambekken sampah bagi ate-atena, sinuan-sinuan pe kerah. Batang kayu pe keri itabahi, si erbahansa murah jadi longsor ras banjir, si perjuma pe banci gagal panen erkiteken cuaca si la ertentun. Tapi Dibata tetap  ermulia nandangi kerina tinepaNa. IpelimbaruiNa tinepaNa e guna kiniulin kegeluhen doni. Seh asa genduari, Tuhan tetap ndilo manusia guna nguasai, njaga ras mpekena-kena tinepaNa. Selaku teman Dibata, manusia arus nggeluh tetap mehuli gelah ngasup muji Tuhan i bas kerina dampar kegeluhen. Adi pemasmur lit pengalamenna nggejapken ras muji Tuhan erkiteken iidahna kemulian Tuhan e arah tinepaNa, lit dage sigejapken kemulian Tuhan e arah teknologi, tingkat intelektual, perbeben geluh ras pengalamen kinitekenta si erbahansa ngasup kita muji Tuhan?

Pengkenaina. 
Lit genduari program pemerintah eme Perilaku Hidup Bersih dan Sehat (PHBS) janah enda perlu kal ilakoken tep-tep jelma erkiteken enda labo gunana man kalak sideban tapi pe guna dirinta jine. Benaken i bas anak-anak, seh dewasa ras kita selaku nande i bas tengah jabu. Erkiteken enda erkawiten ras kesehatenta. PHBS enda jadi cerminen keluarga si mperdiateken ras njaga kesehaten kerina anggota keluargana. Ngaturken rumah gelah bersih, displin man anak-anak i tengah jabu menaken ia kitik denga. Gelah ula i ruangen keluarga e ka gantungen baju, sunun manuk i teras rumah, i ja pe amparen piring kotor, ingan sepatu banci i japa pe. Gambaren bersih ras sehat i bas tengah jabu mbelin kal ngaruhna arah kita Moria. Adi menaken kitik anak-anakta idisplinken subuk mbersihken ingan medemna, kamar mandi ras kiniraturen i bas jabunta, tentu enda igejapkenna rumah e selaku rumah bersama, e maka ia pe dungna ikut njaga kiniraturen jabunta e. Biasakenlah nggeluh bersih ras teratur i bas tengah iabunta. Adi kita bersih ras teratur sie banci jadi investasi guna. kesehatenta. Usihlah Dibata si ratur e gelah ijapape kita terpenalem jadi Moria si ratur, sehat ras mediate nandangi lingkungen, keluarga bagepe ngasup njaga kesehatenta.

Diskusi:
  1. Uga nge penggejapenta natap rumah si rapi, ratur ras go green?
  2. Kai nge si erbahansa maka kurang kita mediatena nandangi kinraturen i bas menata rumah ras ruangenta?
  3. Sibenaken i bas jabunta kenca mulih PA enda, minter si aturken jabunta gelah bersih, rapi, ratur ras tenang. Enda sebage aksinta.

Pdt. Natalidna Tarigan, M.Th.


Belum ada Komentar untuk "Usihlah Dibata Si Ratur - Hidup Sehat ( Fisik, Psikis Ras Kiniteken )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel