Mpebelin-belin, Ngajari Dingen Negu-Negu anak Bagi Si Ngena Ate Tuhan - HUT PERMATA GBKP ( Bahan PA Mamre 8 - 14 September 2019 )


Bahan Bimbingen PA Mamre 8 - 14 September 2019
HUT PERMATA GBKP

Ogen : Epesus 6:4
4. Kam orang tua! Ola pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi si ngena ate Tuhan.
Tema : Mpebelin-belin, Ngajari Dingen Negu-negu Anak Bagi Si Ngena Ate Tuhan
Tujun : Gelah Mamre
  1. Mulihi ipepaguhi nginget pendilo Dibata i bas mpebelin-belin ras negu anakta sentudu ras peraten Dibata
  2. Jadi usihen ras pendukung utama i bas PERMATA GBKP 
Metode : Studi Kasus ( Perbahanen menyimpang i Kalangen Anak Singuda ) + Diskusi

KATA PENARUH
Lirik lagu Karo sierjudul Rudang-Rudang Mejile, nina bagenda syairna: "Adina enggo mbelin bage, mbelin daging ni baba nake. Mbelin bekas pendidong doah, nande bapa perkuah... Maka ersinalsal gelah babah nande bapanta si mehuli me kap. Payo me ateta tuhu me dagena sipake me pedahna...dst". Pesan singkat lagu Karo enda eme pengarapen segelah dikune enggo mbelin anak si kin kitik-kitik nari enggo impebelin-belin meteh mehuli, janah lagu langkahna pe mehuli bagi singena ate Tuhan. Pengajaren orangtua e nandangi anak-anakna tuhu-tuhu jadi palas si penting kal i bas pertumbuhenna subuk secara kula bage pe pertendinna. Ola min kula na ngenca bertumbuh tapi kinitekenna lang. Tapi kinata si idah maka labo kerina anak si enggo mbelin e meteh janah ngelakoken hal si mehuli bagi si ngena ate Tuhan. Kai nge ndia sebabna? Selaku Orangtua ( khususna Mamre ), kai nge ndia harus silakoken?

Rasul Paulus ngajarken perpulungen Epesus subuk man Orangtua bagepe anak-anak guna meteh kuga kearusen geluh selaku kalak si enggo nandai Dibata.Tentu saja sie arus teridah ras tergejap i bas kegeluhenna tep-tep wari. Kuga hubungenna ras Dibata, kuga interaksina nandangi sapih-sapih manusia, bagepe interaksina nandangi anggota i bas jabu e pe perlu kal iperdiateken alu mehuli.

Rasul Paulus ngingetken maka sada kewajiben anak harus patuh man orangtuana ( Ep. 6:1 ). Mpehaga nande bapa e me pedah sipemena arah Dibata si la banci itawar-tawar ( Ep. 6:2 ). Orangtua emekap wakil Dibata i doni enda. Kai siniajarken orangtua e me guna kiniulin anak. Tujun pengajaren orangtua e me gelah kerina anak, termasuk me PERMATA GBKP meteh mehuli, mbiar man Dibata janah pe sukses i bas kegeluhenna. Ulih dikune anak ngikut ajar orangtua labo saja erbahansa orat geluh anak e mehuli tapi pe erbahanca mejuah-juah janah ndekah geluh i doni enda 'panjang umur' ( Ep. 6:3 ).

Janah patuh man Orangtua eme bukti kekelengen ras kepatuhenna nandangi Dibata. Labo hanya terjeng man anak, Rasul Paulus pe ngingetken orangtua maka rutang orangtua guna mereken si mehulina man anak bas sie, orangtua sebagai 'guru' segelah mehuli lagu langkah anak e. Nina Rasul Paulus: "Kam Orangtua! Ola pesega-sega anakndu si erbahanca ia merawa. Tapi i bas mpebelin-belin ia ajari dingen tegu-tegulah ia bagi singena ate Tuhan" ( Ep. 6:4 ). 

Sue ras ogenta Epesus 6:4, maka i bas pembinaan kerohanian man anak e me tugas Orangtua ( ayat 4a ). Bapame imam i tengah-tengah jabu, si ertanggungjabab mereken pengajaren si mehuli segelah bangsa e la binasa tapi bangsa e banci nandai Dibata janah ngelakoken singena ate Dibata. Sekalak imam e me perantara antara manusia ras Dibata. I bas jabu, sekalak bapa si idampingi nande ertugas guna mpebelin-belin, ngajari dingen negu-negu anak e bagi si ngena ate Tuhan ( sue ras Tema ). Nande pe iarapken seraduen ras bapa e notoken kerina anak-anakna bage pe ngajari anak-anakna kerna Kata Dibata.

Sekalak bapa harus jadi usihen i bas nuduhken kegeluhen badia man anak-anakna.Sekalak bapa harus banci ngepkep jabuna alu mehuli janah ngasup erbahanca anak-anakna ngikutken katana dingen mehamat man bana ( 1 Tim. 3:4 ). Janah adi sioge kerna maksud Paulus i bas bahasa Indonesia rikut pe bahasa asli Ibrani, maka istilah "kam Orangtua" i bas ogenta e me itujuken man bapa ( dilaki ). I bas konsep teologis ate Paulus ngatakenca maka lit piga-piga hal siharus iperdiateken sekalak bapa.

Sipemena: Ertanggungjabab siutamana kel eme guna mereken pembinaan kerohanian man anak, tugas bapa ) ( Imam ). Labo maka sekalak bapa harus beluh kel ngerana, ertoto entahpe beluh nuriken Kata Dibata maka banci ngajari, tetapi i bas mediate ras jadi usihen secara pertendin saja pe situhuna enggo jadi pembinan rohani man seisi jabuna.

Sipeduaken: selaku bapa, ola menyalahgunaken otoritas / daulat siibereken Dibata man bana. I bas kata "Ola pesega-sega anakndu sierbahanca ia merawa", lit penekanen maka i bas budaya Romawi, sekalak dilaki ( bapa ) lit hakna secara mutlak guna mengontrol ras pe "memiliki" kerina benda bagepe jelma siberlindung man bana Emaka Paulus nekanken, ola min lit pengelako bapa si ate-atena saja man seisi jabuna. Kerina arus ilakoken alu mbiar man Tuhan ( disiplin si mendidik ).

Sipeteluken :selaku bapa i bas mpebelin-belin anak e, tetap ajari dingen negu-negu anak e bagi singena ate Tuhan. Enda me pengarapen Dibata man kerina seisi jabu, janah jadi penekanen man bapa selaku imam i bas jabu.

APLIKASI
Kerina orangtua erpengarapen makana anak i tengah jabu si enggo ipebelin-belin mulai kin kitik-kitikna nari meteh mehuli janah ngelakoken hal simehuli bagi singena ate Tuhan. Tapi jadi penungkunen sekaligus perenungen man banta selaku Orangtua ( khususna Mamre ), enggo nge ndia si mpebelin-belin, si ajari dingen sitegu-tegu anakta bagi singena ate Tuhan ( sue ras tema )?

Kinata si terjadi genduari labo sitik anak si bertumbuh i bas jabu si enggo ceda, siusur igelari broken home 'rumah tangga rusak'. Bapa ras nande sibuk i bas aktifitasna sekalak-sekalak, antara bapa ras nande pe lanai lit komunikasi, apaika ras anak-anak. Jam tunduh pe enggo berbeda-beda, mawen-mawen bapa ras nande 'la ras tunduh' perban lit dahin harus idahiken seh mbages berngi i ruangen masing-masing. Kuga nari ningen man ras-ras, apaika saat teduh entahpe ertoto ras-ras.

Ertoto sekalak-sekalak pe usuren lupa. Mamre sindauh tading ras anak jabu perban pendahin, rikut pe anak si merantau perban sekolah / pendahin, si sada kali sebulan pe labo banci jumpa tapi selaku bapa la membangun komunikasi janah la nuduhken keleng ate ras kepedulian man anakna.

Lit denga Mamre sidadapna denga dahin-dahin silabo arusna ilakoken sekalak imam. Nggit denga erjudi, minem-minem keras seh mabuk, kisat ia ku Gereja, kisat ia reh ku PA MAMRE, kisat ia reh ku Perpulungen Jabu-jabu.

Rikut ras kecibal rumah tangga si bagenda, tentu saja anak e pe enggo milih kesibukenna sendiri. Anak ndarami teman si banci mbegiken keluh kesahna. Anak ndarami ingan si banci erbahanca tenang ukurna. Jore adina reh ia ku rumah Pandita, Pt / Dk entah ku Gereja, bage pe dahina ingan-ingan si banci ertoto i je.

Tapi sitejadi, dahina ternan sierbahanca lalar, lanai meteh mehuli. Dahina ingan si erbahanca ia rneteh minemen beralkohol janahna mabuk. Ku kafe ia jumpa ka ras teman si ngajari ia make NARKOBA. Enda me si jadi kebiarenta dikune Orangtua ja mpebelin-belin, ngajari dingen negu-negu anak i tengah jabu bagi singena ate Tuhan. Enda me Mamre si la jadi usihen ras pendukung utama seisi jabuna.

Rikut ras Hari Ulang Tahun PERMATA GBKP tanggal 12 September 2019 enda, si pe 71 tahunken, arus tetp iinget bahwa PERMATA e lit alu semangat juang, kebersamaan ras mbiar man Dibata. Emaka i bas tambahna umur katagorial PERMATA GBKP enda iarapken PERMATA reh jorena i bas kerina dampar kegeluhenna. Tentu saja jore i bas orat geluh, jore i bas pendidiken, jore i bas pendahin, jore i bas ndarami teman geluh, ras sipaling penting e me reh jorena kinitekenna man Dibata. Kerina enda banci tersehi tapi labo hanya cukup PERMATA GBKP siberperan ije, tapi pe sangat ibutuhken peran orangtua ( khususna Mamre ) mpebelin-belin mulai kin kitik-kitik nari, ngajari kerna sura-sura Tuhan dingen negu-negu anakta bagi singena ate Tuhan. Tetap mendukung i bas hal-hal si memajuken ras notoken anak-anak i bas jabu, termasuk me PERMATA GBKP semakin lebih baik. Orangtua mereken waktu sierkualitas man anakna. Adina anak merantau perban sekolah atau erdahin, tetap kontrol arah komunikasi telepon atau media si debanna. Janah pe selaku orangtua, perlu meteh ise nge teman bergaul anak tep-tep wari. Tetap siinget maka jabu, eme ingan siterbaik guna nepa orat geluh PERMATA GBKP jadi mehuli. Enda me pendilo Dibata man Orangtua ( khusuna Mamre ).

Studi Kasus ( Perbahanen Simenyimpang i Kalangen Anak Singuda ) + Diskusi 
Adi si oge i bas media massa ( koran, majalah ) rikut i bas media sosial ( facebook, line, instagram ), bagepe sidedah i bas TV maka labo sitik kasus-kasus siilakoken anak singuda nuduhken perbahanen menyimpang si erbahanca mela Orangtua janah la ngena ate Tuhan. I teruh enda i daftarken kami piga-piga kasusna.



Diskusi :
  1. Idatas enda, lit daftar piga-piga kasus perbahanen menyimpang si terjadi i kalangen anak singuda gundari. Cuba siksiki dingen daftarken tole perbahanen-perbahanen menyimpang si debanna! Mari sipelajari arah piga-piga kasus ndai, kai nge ndia penyebab makana perbahanen menyimpang enda banci terjadi i bas anak singuda? Janah kai nge ndia kira-kira sibanci silakoken selaku Orangtua ( khususna Mamre ) guna ngatasisa? ( bandingken ogen ) 
  2. I bas Hari Ulang Tahun Kategorial PERMATA GBKP si pe-71 tahunken enda, bahan aksi guna nuduhken pengajaren si mehuli rikut pe kekelengen man PERMATA GBKP! 

USULAN ENDE-ENDEN
  1. KEE GBKP No. 124: 2, 3     ( KLIK JUDUL UNTUK MELIHAT LIRIK )
  2. KEE GBKP No. 331: 1, 2, 3 ( KLIK JUDUL UNTUK MELIHAT LIRIK )
  3. KEE GBKP No. 374:1, 2      ( KLIK JUDUL UNTUK MELIHAT LIRIK )
  4. KEE GBKP No. 359             ( KLIK JUDUL UNTUK MELIHAT LIRIK )

Pdt. Mira Mutianta Br. Sinulingga, S.Th
Pendeta PERMATA GBKP
HP.


Belum ada Komentar untuk "Mpebelin-belin, Ngajari Dingen Negu-Negu anak Bagi Si Ngena Ate Tuhan - HUT PERMATA GBKP ( Bahan PA Mamre 8 - 14 September 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel