Megah Kuakap Ikut Meritaken Berita Si Meriah - Mamre Ermissi ( Bahan PA Mamre 3 - 9 November )


Bahan Bimbingen PA Mamre 3 - 9 November 2019
Mamre Ermissi

Ogen : Roma 15:14-21.
Sura-sura Paulus si mbelinna e me meritaken Berita Si Meriah
14. O seninang-seninangku, kugejap tuhu-tuhu maka melala kal si mehuli i bas kam. Kam pe dem alu erbage-bage pemeteh maka kam ngasup siajar-ajaren.
15. Tapi i bas surat enda enggo kusuratken piga-piga persoalen man bandu alu terus terang gelah mpersingeti kam mulihken. Pang aku nurutkenca erkiteken lias ate Dibata si enggo iberekenNa man bangku.
16. Lias ateNa e enggo ngangkat aku jadi pejabat Kristus Jesus guna kalak si labo Jahudi. Aku erdahin selaku imam si meritaken Berita Si Meriah si rehna i bas Dibata nari, gelah kalak si labo Jahudi e banci desken sada persembahen si ngena ate Dibata si ikhususken Kesah Si Badia man Dibata.
17. Dage megah kuakap i bas persadanku ras Jesus Kristus erkiteken pendahinku guna Dibata.
18. Kai si ibahan Kristus arah aku, e ngenca aku pang ngatakenca, e me mabai kalak si labo Jahudi e erkemalangen man Dibata. erkemalangen ia man Dibata arah kata si kubelasken ras arah perbahanen si kubahan.
19. Arah gegeh tanda-tanda sengget si mbelin, bage pe arah gegeh Kesah Si Badia. Bage me i bas aku niari daerah-daerah mulai i Jerusalem nari seh ku propinsi Iliria enggo serser kuberitaken Berita Si Meriah kerna Kristus.
20. Sura-surangku si mbelinna e me meritaken Berita Si Meriah ku ingan i ja langa pernah ibegi kalak kerna gelar Kristus, gelah ola aku tempa-tempa majekken rumah i babo palas si enggo ipajekken kalak si deban.
21. Bagi lit tersurat i bas Pustaka Si Badia,
“Kalak si man bana langa iberitaken kerna IA, idahna me pagi,
janah kalak si langa pernah megi, iangkana me pagi.”
Tema : Megah Kuakap Ikut Meritaken Berita Si Meriah.

Tujun : Gelah Mamre
  1. Ngeteh uga erga ras pentingna Berita Si Meriah.
  2. lkut muat bagin i bas meritaken Berita Si Meriah. 
Metode : Diskusi/ Aksi.

KATA PENARUH.
Adi rukur kita secara doni, kisah kegeluhen Rasul Paulus, ia termasuk kalak si menderita bas kegeluhenna. Sebab melala kiniseran si engkenai ia. Piga-piga kali ia harus masuk penjara, piga-piga kali gedap kapalna i bas ndahiken dahinna. Janah megati ia ibenteri tare batu, isiksa, ipelawes anak kuta si idahina, bage pe pinakitna si lalap la madan. Tapi ia sendiri la pernah ngataken maka ia Rasul si menderita ras liah. Sebalikna, megah iakapna kerna dahinna, erkiteken banci ia ikut ngenanami kai si nanami Tuhan. Engkai maka megah iakapna, adi secara doni labo lit idatsa ulih si luar biasa, umpamana: kebayaken ras jabaten si meganjang. Rasul Paulus ermegah ate i bas pendahinna, e me erdandanken ia rukur secara kiniteken. Idatsa 3 (telu) hal si mbelinna i bas kegeluhen enda. Janah telu hal si mbelinna enda me erbahansa geluhta pe ndatken ulih si kekal ( erpengaruh guna hal si rasa lalap ), labo ulih si bersifat sementara ras maba kearun ate si mbaru. Telu hal si mbelinnna e, e me:
  1. Ia enggo ndatken kepastin kerna keterkelinen geluh si rasa lalap, erdandanken kiniteken man Tuhan Jesus Kristus (Ep. 2:8-9).
  2. Kepastin enda me si isaksikenna man kalak si deban, seh maka kalak si deban pe banci ndatken kepastin ka i bas keselamaten ndai.
  3. Ia pe banci memperlengkapi kalak si tek, jenari banci ka nerusken Berita si Meriah (BSM) ku kalak si deban ka. Alu bage kengasupen meritaken BSM sambung-menyambung, la erpeltep, si erbahansa kari dungna seh ku kerina bangsa manusia, bagi si iarapken Tuhan jesus. (Mat. 28:18-20). 
Si 3 (telu) enda me si idat ras banci ilakoken Rasul Paulus bas geluhna, ras si jadi kemegahnenna.

URAIAN TEKS / TAFSIREN.
Perikop bahan PA enda, e me bagin penutup i bas surat Roma enda. Amin bage gia, teridah denga i je kerna tujun Rasul Paulus nulisken surat enda. Kota Roma i bas jaman Rasul Paulus, e me Kota Metropolitan dunia, bali ras kedu bas Indonesia bas paksa enda. Ikataken Kota Metropolitan, erkiteken hampir setiap suku bangsa i doni enda, lit tading i Roma. Erdandanken si e, merincuh kal Paulus guna erberita si meriah ku jah. Sebab adi bangsa-bangsa si lit i jah e kari ngaloken Berita Si Meriah (BSM), janah adi sada paksa pagi kalak enda mulih ku kutana (bangsana), maka ia pagi maba BSM e ku kutana / bangsana. Alu bage alu strategi si e, meter pagi mbar BSM e ku kerina bangsa. Jelma si enterem ras erbage-bage enda me peluang nehken pengajaren si payo, gelah pengajaren pagi si berkembang ku belang-belang doni. E maka i bas kitab Roma enda me teridah ajaren / teologi Paulus si paling lengkap itulisna, adi bandingken ras surat-suratna si deban.

Memang kalak si tading i Kota Roma bas paksa si e, rata-rata kalak hebat ras lit ka kelebihenna maka pang ku jah. Emaka wajar saja, tupung ibegi kalak maka lit sura-sura Rasul Paulus berkunjung ku Roma, nina kalak:"Kai kin kelebihen Paulus maka pang ia reh ku Roma ?". Tapi nina Paulus njabapsa:" La aku mela kerna Berita Si Meriah e; sabap Berita Si Meriah e kap Kuasa Dibata guna nelamatken kerina kalak si tek man Jesus Kristus, perlebe man kalak Jahudi, jenari man kalak si deban si labo kalak Jahudi. Sabap arah Berita Si Meriah tangkas uga Dibata ngerambakken manusia kempak diriNa. Si enda ibenaken i bas kiniteken janah erkedungen i bas kiniteken. Bagi lit tersurat i bas Pustaka Si Badia, "Kalak si enggo iperembakken Dibata kempak diriNa erkiteken kinitekenna nggeluh me ia." (Rom. 1:16-17). Alu kata si deban, nina Paulus:"Kai ertina kam hebat, adi tanpa BSM, bene ka nge kari kam kedungenna. E maka reh aku maba BSM bandu, seh maka kehebatenndu e tuhu-tuhu hebat, adi idasari alu BSM".

I bas diri Paulus teridah sura-sura Tuhan, maka ia maba berita si meriah labo man kalak si latar belakang Jahudi saja, tapi pe man kalak si la kalak Jahudi. Tuhan make ras mperlengkapi Paulus lako mpersadaken si 2 (dua) latarbelakang e i bas berita si meriah sebab i bas Perpulungen Roma, lit i je persoalen antara Jahudi ras non Jahudi. Kalak Jahudi rusur rnerasa lebih unggul asangken kalak si la Jahudi, erkiteken akapna ia enggo leben nandai Tuhan erkelang-kelangken tradisi ras Taurat, mulai kin jaman Padan si Ndekah nari. Kalak Jahudi rusur merendahken kalak si latarbelakang perbegu / kafir si menurutna kurang erpemeteh (Ayat 15 nina; "Tapi i bas surat enda enggo kusuratken piga-piga persoalen man bandu alu terus terang gelah mpersingeti kam mulihken. Pang aku nurutkenca erkiteken lias ate Dibata si enggo iberekenNa man bangku".(Rom. 15:15). Paulus mpersadaken si dua latarbelakang e, alu ngataken maka kerina nge manusia enda enggo erdosa. Janah guna ndatken keterkelinen, labo arah Undang-undang ras pemeteh maka manusia terkelin, tapi arah kiniteken nandangi perkuah ate Dibata (Rom. 3:28). Alu bage seri nge kerina ergana manusia i bas mata Dibata, e maka ula lit si peganjangken bana, lebih asa kalak si deban.

Jadi, salah sada kemegahen Paulus si mbelinna e me; ija ia banci mpersadaken perpulungen alu Gegeh BSM, njadiken geluh perpulungen si hebat jadi lebih luar biasa erkiteken BSM ras pe mpersiapken perpulungen e jadi perberita si Meriah ku daerah-daerah si selama enda lenga megi BSM e.

APLIKASI.
Dage i bas kemajun jaman enda, kita Mamre pe enggo semakin luar biasa i bas bidangta masing-masing, janah kehebatenta e semakin luar biasa adi erpalasken Kata Dibata. Kata Dibata e me kuasa Dibata lako empersadaken kita kerina. Sebab sia-sia kal kerina kehebaten manusia adi kehebatenta masing-masing ningken kita sada ras sidebanna, janah kedungenna kita kebenen kegeluhenta. Bagi nina Tuhan Jesus: "Lit kin gunana man sekalak jelma, adi man bana gia kerina erta-erta doni enda tapi bene kegeluhenna si tuhu-tuhu? Tentu lang! (Mat. 16:26a).

Perpecahen ras la siangkan i bas perpulungen, e me salah sada dampak kehebaten manusia si la erpalasken kata Dibata, janah e me jadi penghambat i bas dahin meritaken BSM. Kehebaten tanpa kata Dibata mabai jelma meganjang rukur ras merasa lebih asa kalak si deban. Biak si e banci bene i bas kita tutus bas BSM, sebab kalak si nggit nehken BSM semakin ipelimbarui i bas kata Dibata. Kedungenna turah pengertinta maka kerina kita meherga i bas Tuhan ras kerina kita ertanggungjabab maba keleng ate Tuhan. Kalak si maba BSM teridah i bas biak nggeluh siergan sada ras sidebanna. Jenari; Persadaan si mehuli, e kap BSM situhu-tuhu man doni enda. Bali ras Rasul Paulus, si jadi kebanggaan man Mamre i bas geluhna, labo soal mbue erta sipepulung, pangkat meganjang, tah pe gelar si termurmur i doni enda (amin pe enda mehuli). Tapi si paling membanggaken man banta e me:
  1. Kita enggo ndatken kepastin kerna kegeluhen si rasa lalap ras kerina isi jabunta 
  2. Sangap kita jadi mamre si banci maba berita si mehuli ketimbang maba ate mesui 
  3. Sangap kita banci jadi aron Dibata siperlengkapi kalak sideban gelah ngasup ka ersaksi ras memperlengkapi kalak si deban ka.
Engkai maka si enda kerina meherga man Paulus ras Mamre? Pasti erkiteken si enda bersifat kekal. Sifat erta; adi la kita itadingkenna, kita pagi nadingken ia. Kedungenna labo ka lit kai pe pagi si baba i doni enda nari. Si Job ialamina; ia bayak. Erkiteken bencana, bene kerina ertana, itadingken ertana ia. Ban setia ia man Tuhan iulihken Dibata ertana ndai man bana, tapi kenca si e, mate ka ia, itadingkenna ka ertana ndai. Bage pe kerna pangkat ras gelar termurmur, bersifat sementara ngenca. Rugi kal kita adi kita buang-buang tenaga ras umur nandangi hal-hal si bersifat sementara. Si berdampak bas kekekalen e me BSM si engkelini.

DISKUSI.
  1. Adi si perdiateken bas perikop enda, uga nge cara perukuren Rasul Paulus maka megah iakapna bas dahinna, aminna pe situhuna labo lit hal si luar biasa si idatsa secara perayaken doni enda?
  2. Kai nge si jadi kemegahen geluhta selaku Mamre sedekah enda? Kai ulihna?
  3. Rikutken bahan PA-nta enda, kai ndia kemegahen geluh situhu-tuhu si ateta silakoken ras siajarken itengah jabunta?
USULEN ENDE-ENDEN. 
  1. KEE GBKP No. 257:1-3   
  2. KEE GBKP No. 300:1,2,4
  3. KEE GBKP No. 295:1-3   
  4. KEE GBKP No. 322:1-3  

Pdt Kongsi Kaban, S.Th 
Kabid Marturia Moderamen GBKP 
HP. 08126587327


4 Komentar untuk "Megah Kuakap Ikut Meritaken Berita Si Meriah - Mamre Ermissi ( Bahan PA Mamre 3 - 9 November )"

  1. Megah ku akap Adi aku banci er Minggu Er PA bagepe ngajari VG ras Koor bagepe ndahiken dahin Kalimbubu sabab Enda me contoh nyata BSM bujur

    BalasHapus
    Balasan
    1. Bujur komentarndu i bas mereken contoh penggejapen man perpulungen. Dibata simasu2 kerina pelayanenta.

      Hapus
  2. Megah ku akap Adi aku banci er Minggu Er PA bagepe ngajari VG ras Koor bagepe ndahiken dahin Kalimbubu sabab Enda me contoh nyata BSM bujur

    BalasHapus
    Balasan
    1. Bujur komentarndu i bas mereken contoh penggejapen man perpulungen. Dibata simasu2 kerina pelayanenta.

      Hapus

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel