Mpermakani Rarasen Biri-Biri Dibata - Ngataken Bujur I Bas Enggo Dungna Perdalinen Pemilihen Pertua Diaken ( Bahan PJJ 20 - 26 Oktober )


Bahan Bimbingen Perpulungen Jabu-Jabu 20 - 26 Oktober 2019
Mpermakani Rarasen Biri-Biri Dibata
( Ngataken Bujur I Bas Enggo Dungna Perdalinen Pemilihen Pertua Diaken )

Ogen : 1 Petrus 5: 2-4
2. Kupindo man bandu gelah mpermakani rarasen biri-biri si enggo ibereken Dibata man bandu, janah kepkeplah e alu ukur meriah bagi si ngena ate Dibata, ola alu ukur mberat. Ola erkiteken mata duiten maka idalankenndu, tapi lakokenlah e erkiteken ukurndu ersuruh guna ngelayani.
3. Ola atendu iperentahindu kalak si enggo iendesken jadi si man kepkepenndu, tapi bahanlah kam jadi usihen biri-biri e.
4. Janah asum reh pagi Kepala Permakan e, ialokenndu me rudang-rudang tanda kehagan si la ermelus-melus.
Surat 1 Petrus isehken man kalak sierkiniteken sipaksana ngenanami kiniseran. I bas ngalaken kiniseran enda, kalak sierkiniteken pe ipindo gelah mpermakani rarasen biri-biri Dibata. lje me biak sekalak permakan teridah arah ia mpermakani rarasen. Bagin enda nuriken maka sekalak serayan ntah pe permakan arus ngelai alu ukur ersuruh.

Kata "impermakani" eme sada pemindon Petrus man pertua-pertua gelah njagai rarasen biri-biri Dibata. Kata enda ertina labo saja mereken man, tapi pe mpekena-kena biri-biri e. Sekalak permakan ertanggungjabab nandangi biri-birina. Adi i bas cakap heber permakan eme ra'ah si ertina kalak si mabai asuh asuhen ku mbalmbal si meratah, njagai asuh asuhenna ( bdk. Msm. 23 ). Isuratken Petrus kerna ciri-ciri sekalak permakan, eme:

Ngelakoken tugasna alu ukur meriah (bdk. 1 Pet. 5:2b). Tugas permakan emekap sada dahin siidahiken alu ukur meriah. Sekalak si la alu ukur meriah ndahiken dahinna, maka la ia ngasup tetap ndahiken dahinna e. Permakan arus ertanggungjabab i bas kerina dampar kegeluhen biri-birina. Permakan la banci ngerana ras erbahan kai pe erpalasken sura-surana, tapi i bas pengerana ras perbahanenna arus erpalasken kata ras perentah sienggo isehken Dibata man bana. Sekalak permakan arus meteh maka Dibata Si empuna biri-biri simpengasup ia mpermakani i bas situasi sikugapana pe.

La mata duiten ( bdk. 1 Pet. 5:2c ). Sekalak permakan mpermakani biri-biri labo erkiteken ndarami ke.untungen (Money oriented), tapi tuhu tuhu sada pelayanen. Petrus nekanken maka sekalak

permakan i bas mpermakani rarasen biri-biri Tuhan alu la ngarapken keuntungen.

Meteruk ukur (bdk. 1 Pet. 5:3a). Rasul Petrus nekanken gelahna sekalak permakan ula merentah kalak si enggo iendesken jadi kepkepenna. la labo penguasa, tapi ia eme serayan. Aminna pe sekalak permakan eme sekalak pemimpin, tapi labo pemimpin si rate-ate. Kalak Parisi ngelakoken tugas pelayanenna alu cara merentah. Meteruk ukur labo sada keadaan mpeteruk diri, tapi sada biak si la ngukurken diri jine.

Mereken usihen simehuli (bdk. 1 Pet. 5:3b). Tuhan Jesus i bas kerina dampar kegeluhenna mereken usihen man jelma si nterem (bdk. Joh. 13:14-15). Tuhan Jesus jadi usihen. I bas sie, permakan pe arus jadi usihen i bas dampar kegeluhenna. Alu bage perpulungen pe ngidah maka serayanna e jadi usihen man bana. Arah kegeluhen si jadi usihen, la tondel ukur kalak si atena nandai Dibata.

Dahin selaku permakan emekap siiendesken Dibata sue ras si ngena ateNa. Enda me si isehken Petrus man pertua-pertua i bas paksa sie. Amin la seri kecibal geluh jaman Petrus ras kita genduari, tapi erti permakan si isuratkenna arus jadi usihenta. Jadilah Permakan si setia mpermakani rarasen biri-biri Dibata.

Enggo sibentasi proses pemilihen pertua diaken. Menaken pemilihen bakal calon pertua diaken, penetapen calon pertua diaken, seh kubas pemilihen bage pe penangkuhen rikut pengukuhen kerina enggo banci ibentasi. Erkiteken sie kerina si enggo ngayuken pendilo Tuhan guna mpermakani rarasen biri-biri Dibata e arus tetap nggeluh setia dingen badia seh reh pepagin kepala permaken e eme Jesus Kristus (bdk. 1 Pet. 5:4). Bage pe kita ngawan perpulungen si ergaken kerina serayan si enggo terpilih. Selamat ndahiken dahin mpermakani rarasen biri-biri Dibata.

EVALUASI
Uga nge ulihna adi keahlinta sipakeken lako nampati kalak si deban?

DISKUSI
Biak-biak permakan si kuga nge si perlu iusih i bas kegeluhenta
2. Dukungen kai nge si banci si bahan man pertua diakenta i bas periode enda?

AKSI
Bahanlah aksi ngataken bujur nandangi panitia pemilihen pertua diaken si enggo erdahin.

USULEN LAGU
  1. KEE GBKP No. 312 1-2    ( KLIK JUDUL KEE UNTUK MELIHAT LIRIK )
  2. KEE GBKP No. 304 : 1-2  ( KLIK JUDUL KEE UNTUK MELIHAT LIRIK )
  3. KEE GBKP No. 86 1-2      ( KLIK JUDUL KEE UNTUK MELIHAT LIRIK )
  4. KEE GBKP No. 200 : 1-3  ( KLIK JUDUL KEE UNTUK MELIHAT LIRIK )
TOPIK PERTOTON SYAFAAT
  1. Notoken serayan Tuhan i bas periode enda.
  2. Notoken panitia pemilihen gelah mejuah-juah.
  3. Si turah bas perpulungen.

Pdt. Merdiansa Putra Ginting, S.Th.


Belum ada Komentar untuk "Mpermakani Rarasen Biri-Biri Dibata - Ngataken Bujur I Bas Enggo Dungna Perdalinen Pemilihen Pertua Diaken ( Bahan PJJ 20 - 26 Oktober )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel