Mpesusur Kengasupen (Potensi) Man Si Nursur - Ulih:Mampu Memberdayakan Potensi & Peluang ( Bahan PA Moria 3 - 9 November )


Bahan Bimbingen PA Moria 3 - 9 November 2019
Ulih: Mampu Memberdayakan Potensi Dan Peluang

SI MAN OGEN : 2 Timotius 1:3-7
Pengataken bujur ras pengajuk
3. Bujur kukataken man Dibata, si kusembah alu tutus, bagi nini-niningku nai. Bujur kukataken man Dibata asum kuinget kam rusur i bas pertotonku subuk suari bage pe berngi.
4. Kuinget kuga pertangisndu, janah mesikel kal aku jumpa ras kam gelah meriah kal min kuakap.
5. Kuinget tutus atendu erkiniteken bali ras kiniteken nini tudungndu Lois ras nandendu Enike. Tek aku maka i bas kam pe lit kiniteken si bage.
6. Erkiteken si e kupersingeti man bandu gelah gara mulihken i bas kam pemere Dibata, si ialokenndu asum kutamaken tanku i babo takalndu.
7. Sabap Kesah si ibereken Dibata man banta labo erbahanca gelah kita percik-cik; tapi KesahNa e ndemi kita alu kuasa, kekelengen, bage pe gelah ngasup kita ngkuasai dirinta.
T E M A : MPESUSUR KENGASUPEN (POTENSI) MAN SI NURSUR

TUJUN : Gelah Moria:
  • Ngidah Paulus i bas ncidahken potensi nini ras nande Timotius. 
  • Nerusken kengasupenna (potensina) man si nusurna.
METODE PA : Niksiki potensi ras peluang si lit i bas dirinta.

Kata Penaruh.  
Kerina jelma pasti lit kelebihenna, subuk i bas erdahin, mereken ide, mbangun ras ngajari bagepe nampati ras sidebanna. Kengasupen ntah pe kelebihen enda perlu ipakeken gelah erguna man si nterem ras man dirina jine. Makeken kengasupen enda mbelin gunana, labo saja i bas dampar wirausaha (enterpreunership) tapi pe i bas kegeluhen jabu ras erkiniteken. I bas erbage kepentaren ras kesuksesen si lit megati ngadi i bas dirinta jine sabap la kita ngasup mbagikenca man kalak sideban. Enterem orangtua si 'gagal' i bas mereken ntah pe nerusken kelebihenna ntah pe potensina e (usaha, talenta ntah pe kebayakenna) man sinursurna. I ja ngenda salah benangna? Kai-kai saja kin si arus si pebelin dingen si perdiateken gelah ngasup mpesusursa man anak kempunta alu la nebeng potensi si lit i bassa. Arah PA wari enda mari tole kita erlajar.

Mpebagesi Pengangkan Kerna Ogen. 
Teks si jadi ogenta nuriken kerna pengataken bujur Paulus man Dibata. Pengataken bujur enda ilakokenna alu penembahen si tutus bagi si ilakoken ninina nai. Arah e teridah maka ketutusen ninina i bas nembah Dibata nusur man Paulus. Kai-kai saja si erbahanca Paulus ngasup ngataken bujur man Dibata? Tentuna geluh ras kesempaten si banci denga inanamina i bas naksiken keleng ate Dibata bagepe meriah kal ukurna nginget Timotius si enggo reh belinna i bas kiniteken ras pelayanen: Iingetna kerina perjuangen kiniteken ras pembarken keleng ate Jesus si enggo ilakoken Timotius i bas erbage kekurangenna.

Arah surat enda pe atena tole mpegegehi ras 'memotivasi' Timotius gelah reh sikapna i bas pelayanen si enggo ibenakenna. Paulus nuriken kerna dukungen si idahna idat Timotius i bas keluarga nari. Pendidiken ras pengajaren keluarga jadi sada gegeh (modal) i bas pelayanen Timotius. Arah teks enda si idah kuga belinna pengajuk ras dukungen man Timotius i bas ia ndahiken pendilona selaku perberita si meriah:
a. Ninina Lois ras nandena Enike, nama ngaruh si mbelin ku bas ketutusen ras kengasupen Timotius bas ngelai perpulungen. Amin bapa Timotius kalak Junani tapi pemeteh, didiken ras kinitekenna isehken nini ras nandena alu pengajaren kinitekenna selaku kalak Jahudi si enggo nandai Jesus selaku juru selamat. Kai si idatkenna i bas orangtua nari jadi asam si arus iasah, iulih-ulih dingen ibangun guna kesuksesenna i bas wari si reh.
b. Paulus selaku bapa rohani Timotius, tetap ndukung dingen mpegegehi ia gelah tetap paguh, la talu ras minder erkiteken biak si permela ibassa. Amin Paulus sangana i bas penjara erkiteken kekejamen kaisar Nero, tapi la ia ngadi mereken pedah, gegeh ras semangat man Timotius. Paulus alu 'nginget ras mpersingeti' paksa si lepas amin sitik bernostalgia tapi banci mpegara semangat mulihken i bas 'kekoten' Timotius ngidah situasina, perpulungen bagepe kecibal Paulus jine.

Si enda nuriken maka anak i bas potensi si enggo lit i bas ia arus tetap idukung, iarak-arak gelah la sempat ndabuh ras talu ngaloken tantangen si lit. Usaha ras perjuangen guna ngembangken diri ras talenta bage pe dahin la menukah, arus tetap mpeturah semangat. Paulus meteh kekurangen ras kelemahen Timotius selain permela tapi pe percikcik. Gelah la luntur semangat si enggo lit erkiteken kebiaren ras ngalaken situasi arus tetap idampingi orangtua. Paulus ngelakokenca alu tetap erkomunikasi alu nehken surat penggembalan. Dahin (pelayanen) si ilakoken Timotius enda eme ulih dukungen Lois ras Enike selaku orangtua jasmani bagepe arah Paulus selaku orangtua rohani. Kuga duana pihak enda radu mpegegehi Timotius gelah ngasup nerusken kiniteken bagepe pelayanen si enggo iendesken man bana alu makeken ras mpebelin talentana.

Pengkenaina.
Perlu si usih nini Paulus bage pe nini Timotius ras nandena i bas ngajarken kinitekenna man sinursurna. Paulus ras Timotius eme generasi si peteluken si tetap tutus erkiniteken erpalasken pengajaren orangtua. Adi si perdiateken i bas jamanta enda, salah sada si erbahanca ngadi ntah pe peltepna potensi si lit i bas keluarga eme erkiteken la kita ngasup mpesusursa uga cara nerusken usahanta e man anak ras kesusrenta. Tentuna erbage-bage si erbahanca erkiteken la ngasup ngalaken tantangen i bas jamanna. Perenungen man banta, maka perlu kal metode pendidiken ras pengajaren i bas kita orangtua si evaluasi. Umpamana ntah kin kita terlalu memanjaken anak-anakta ntahsa maksaken sura-suranta man bana. Silakoken kita megati labo pendampingen tapi banci memaksaken sura-suranta. Rikutken temanta maka perlu si pesusur kengasupenta (potensi) man sinursurta umpamana: kengasupen i bas erbinaga, erjuma, erbengkel, main musik ras sidebanna. Gelah benaken kin kitik-kitik nari, lit ketrampilenna guna ipebelin i bas wari-wari si reh. Seh banci ia terpenalem i bas kengasupenna e.

I babo si e perlu si eteh terjeng ja kengasupen anak-anakta janah i bas dampar si apai si jadi bakatna. La mehuli adi si paksaken sura-suranta man anak-anakta. Gelah ula kari sempat salah jurusen si idalanina ras bakat si lit i bas ia. Bagi kuan-kuan Karo nina "tutupnalah langgumna." Sabap adi lang labo danci sikap percibal tutupna. Aminna gia la seri kengasupenta ras anakta e, tetap perlu itemani ras iarahken rikutken kengasupenta. Alu bage keberhasilen orangtua banci iterusken anak-anakta janah si langa berhasil pe banci mpesikap si langa ratur.

Niksiki Potensi.
Ibahan kelompok 3 - 4 kalak sada kelompok, i bas kelompok si diskusiken kerna potensi diri ras teman. Subuk i bas pelayanen bagepe usaha perlu kal si siksiki kengasupen kai si lit bas kita guna kiniulin. Guna si enda perlu kita si sampat-sampaten guna ngetehsa.
  1. Kerna Kegeluhen er-Gereja. Siksikilah kengasupen lebe i bas dirinta. Jenari bereken kesempaten man temanta i bas grup diskusi e.
  2. Daftarkenlah peluang ras kesempaten kai si lit i bas kita guna banci si bereken man temanta. Enda kerna pencarin ntah peluang-peluang bisnis.

Pdt. Pliestanta Surbakti, S.Th.


Belum ada Komentar untuk "Mpesusur Kengasupen (Potensi) Man Si Nursur - Ulih:Mampu Memberdayakan Potensi & Peluang ( Bahan PA Moria 3 - 9 November )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel