Ngidah Si Mehuli I Bas Dirinta - Ngergaken Si Kitik ( Bahan PA Moria 6 - 12 Oktober 2019 )


Bahan Bimbingen PA Moria 6 - 12 Oktober 2019
Ngergaken Si Kitik

SI MAN OGEN : Kejadin 41: 14-32
14. E maka idilo raja me Jusup, janah minter ia ibaba ipenjara nari. Kenca ia ercukur, ras ganti uis, reh ia ngadap raja.
15. Nina raja man bana, “Lit nipingku, tapi la lit ise pe si ngasup ngantusisa. Lit singatakenca maka kam beluh ngantusi nipi.”
16. Nina Jusup njabapsa, “Labo terantusi aku, o Raja, tapi Dibata banci mereken antusen si mehuli.”
17. Nina raja, “Ernipi aku maka tempa-tempa tedis aku i tepi Lau Nil.
18. Kuidah pitu lembu mejile ras mbur, ndarat i bas lau e nari, jenari nggagat ia.
19. Kenca bage ndarat ka pitu lembu si deban si kertang-kertut, tempa-tempa tading tulanna nari ngenca. I belang-belang taneh Mesir enda e denga nge kuidah lembu si bage mejinna.
20. Ipangani lembu si kertang-kertut ndai lembu si mbur e seh keri.
21. Tapi ise pe la meteh kerna si e, erkiteken lembu kertang-kertut ndai tetap nge kertang ras mejin. Dungna medak aku.
22. Ernipi ka aku, maka kuidah pitu ruhi page perngis, turah i bas sada ngkebena.
23. Kenca bage luar pitu ruhi page si lambang ras melus iembusken angin si melas.
24. Pituna ruhi page si lambang ndai nelen ruhi page si perngis ndai. Kuturiken nipi e man guru-guru si baso, tapi sekalak pe la ngasup ngantusisa.”
25. Nina Jusup man raja, “Duana nipi e seri antusenna; enggo ikataken Dibata man bandu, kai atena ilakokenNa.
26. Pituna lembu si mbur e, e me pitu tahun, pituna ruhi page si perngis e, e pe pitu tahun; duana seri ertina.
27. Pituna lembu kertang-kertang e si reh arah pudi, bage pe pituna ruhi page si lambang ras melus iembus angin si melas e, e me pitu tahun kelihen.
28. Bagi si kukataken ndai, maka Dibata enggo nuduhken kai ateNa si ibanNa.
29. Pitu tahun dekahna riba-iba pangan i belang-belang Mesir.
30. Kenca bage jadi me pitu tahun dekahna kelihen, e maka tahun-tahun si lepas e ilupaken kalak, erkiteken kelihen e ncedaken negeri e.
31. Paksa nakan riba-iba ilupaken kalak kerina, erkiteken kelihen e tuhu-tuhu seh serana.
32. Kam ernipi dua kali, ngatakenca maka kerina kejadin e enggo itetapken Dibata. Pasti ilakokenNa i bas paksa si lanai ndekah.
TEMA : NGIDAH SI MEHULI I BAS DIRINTA

TUJUN : Gelah Moria:
  • Ngidah maka Jusup meteh lit simehuli ibas dirina ras igejapna Dibata makeken ia ngelakoken simehuli 
  • Ngasup ngelakoken simehuli si lit ibas dirina alu dem persikapen
METODE PA : Study Kasus

Kata Penaruh. 
Lit sada ungkapen i bas bahasa Inggris nina "You are what you think".  Dirindu eme kai si ukurkendu", bageme terjemahenna ku bahasa Karo. Ertina, uga penandaita kerna dirinta e nentuken uga kita mabai diri i bas kegeluhen tep-tep wari. Kai si isuanken kita i bas dirinta e mpengaruhi caranta erbelas, caranta rukur, bagepe perbahanenta i bas hubungenta ras kalak sideban. Adi si idah kekurangen ngenca lit i bas kita ( Konsep diri negatif ), tentu ulihna pe bas pengelakonta kurang mehuli. Enterem jelma teriket ku bas cara rukur si negatif. Misalna adi ninta man dirinta "aku kalak si bodoh", maka si megati si belasken kita pe "aku labo beluh" entah "aku labo ngasup". Belas-belas si bage tentuna mabai kita pe jadi pasif sabap si akapkin pe labo kita beluh erbahan kai pe. Tapi adi kita ngidah si mehuli i bas dirinta ( Konsep diri positif ), tentu kai si ibelasken, si iukurken ras si ibahan kita pe si mehuli man dirinta. Kegeluhen ras biak si mehuli tentu jadi perayaken man banta Moria. Ogenta sendah nuriken kerna pengalamen Jusup si ngidah lit si mehuli i bas dirina amin pe erbage-bage kiniseran reh nderpa ia. Pengarapenta arah bahan PA enda Moria pe ngasup ngidah maka melala hal si mehuli i bas dirina.

Mpebagesi Pengangkan Kerna Ogen
I bas kejadin 37 seh pengkerin kitab Kejadin ituriken kerna pengalamen kegeluhen Jusup. Melala kiniseran si inanami Jusup. Seninana ernembeh ate man ia seh pe lit sura-sura kalak e munuh Jusup. Tapi kedungenna ia idayaken jadi budak ku taneh Mesir man sekalak pegawai istana gelarna Potipar. I rumahna, ndehara Potipar erbahan pengakun si palsu si erbahansa Jusup itangkap dingen itamaken ku bas tutupen ( penjara ).

Tentu si eteh maka kegeluhen i bas penjara labo menukah. Amin bage, Jusup tetap ngasup rukur alu positif. Ia meteh lit si mehuli i bas dirina ras igejapna Dibata makeken ia guna ngelakoken si mehuli nandangi kalak Mesir. Emaka Tuhan tetap ngarak-ngarak kegeluhen Jusup.

Puncak keberhasilen Jusup teridah tupung ia ngertiken nipi Raje Mesir. Raja ernipi tupung tedis i tepi Lau Nil idahna pitu lembu mejile ras mbur ndarat i bas lau e nari. Kenca bage ndarat ka pitu lembu si kertang tempa-tempa tading tulanna nari ngenca. Ipangani lembu si kertang ndai lembu si mbur seh keri, tapi lembu e tetap kertang ras mejin. Ernipi ka Raja idahna pitu ruhi page si perngis, bagepe pitu ruhi page si melus ras lambang. Pitu ruhi page si lambang ndai nelen ruhi page si perngis ndai. La lit guru si baso si ngasup ngantusi nipi e. Kerna e nina Jusup man Raja: "labo terantusi aku o Raja, tapi Dibata banci mereken antusen si mehuli" ( ayat 25 ). Nina Jusup man Raja maka duana nipi e seri antusenna. Lit pitu tahun paksa si mehumur janah pitu tahun paksa kelihen. Jusup mereken piga-piga strategi guna ilakoken raja, eme: 1). Gelah ipilih Raja sekalak si erpemeteh ras pentar guna ngaturken negeri Mesir 2). Ngangkat pegawai guna mpepulung seperlima iba ulih peranin tupung riba-iba pitu tahun 3). Mbuniken pangan e i tep-tep kuta jadi persedian man negeri e i bas paksa kelihen.

I bas ia ngertiken nipi e, tek Raja maka Jusup idemi Kesah Dibata. Raja milih ras ngangkat Jusup jadi wakil Raja i belang-belang Mesir. Ipercayakenna Jusup ngaturken negeri Mesir ras ise pe la banci erban adi la erpenungkunen lebe man Jusup. Nina Raja man kalak Mesir: "Labo lit dat kita jelma tersikapen asa Jusup enda, sekalak si lit Kesah Dibata i bas dirina jine"( ayat 38 ). Arah ogenta kerna Jusup si idah maka:
  1. Jusup kalak si erkemalangen man Tuhan, igejapkenna maka Dibata si makeken ia guna si mehuli (ayat 16). 
  2. Jusup labo nggit nalahken kalak si deban bagepe nalahken Dibata i bas kiniseran si terjadi i bas geluhna.
  3. Ia nandai dirina alu payo. Kai si ibelasken, iukurken ras idalanken Jusup mehuli kerina (positif).
  4. Kiniseran labo erbahansa Jusup kote. Amin i bas penjara igejapna maka lit pemere Dibata si meherga bas ia janah ipakekenna gelah erguna nandangi kalak sideban.
  5. Guna ncidahken pemeteh ras kiniulin si lit i bas ia, Jusup ersikap ngadap raja Mesir. Persikapenna ngadap raja la ia mekarus.
Pengkenaina
Bas kegeluhenta enterem jelma si mesera iakapna ngidah si mehuli i bas ( konsep dirina negatif ). Biasana ciri-ciri kalak si bage eme: (1). La erdame ras dirina mahan bana ia rendah ras pesimis, labo akapna ia ngasup ersaing ras kalak, (2). Ia megati nalahken kalak i bas kegagalen entah pe kekurangenna (3). Menukah megelut di kune ipandang kalak ( kritik ) (4). Mesera akapna ngergaken entah mujiken kelebihen kalak si deban (5).Curiga ras cara rukurna pe negatif. Biak-biak si bage tentu mbelin ngaruhna ku bas kualitas kegeluhen sekalak jelma. Cara rukur si bage labo mehuli bage ka pe hubungenta ras kalak si deban pe jadina la mehuli.

Sada hal situriken man banta arah kitab Kejadin emekap kita itepa Dibata selaku manusia si sue ras tempasNa. Kita ibereken Dibata kepentaren, talenta, bagepe kengasupen lebihen asangken tinepa si deban. Ate Dibata tentuna gelah kita erguna man dirinta, keluarga, teman, doni enda terlebih man Tuhan Dibata. Guna si e mari radu ras kita nadingken biak-biak si la mehuli, kenca e gargari kai si mehuli i bas dirinta si perlu si kembangken. Si penting si arus silakoken emekap perobahi caranta rukur kerna dirinta bagepe kalak si deban. Kalak si ngasup ngidah si mehuli i bas dirina tuhu-tuhu meherga akapna bana. Sedarina maka lit kekurangenna, tapi ngasup ia ngaloken kinata si lit. Sedarina ka lit potensi i bas ia emaka iergakenna tuhu-tuhu dirina ( percaya diri ). La iakapna dirina ganjangen entah teruken asangken kalak si deban. Dirina bagepe kalak si deban meherga iadep-adepen Dibata. Pang ngaloken kata persinget ( kritik ) i bas kalak si deban nari alu lapang dada ( erbage kepe ), bagepe la ia mecikurak, encakapken kekurangen teman man kalak si deban. Bagi Jusup, kalak si positif ngasup ngalaken perbeben. Amin mbue perbebenna labo ia menukah putus asa. Idaramina kai denga si banci ibahanna guna keke ras erjuang ndarami serpang pulah. Tek ia maka lit si mehulina isikapken Dibata guna ia.

Study Kasus
Lit dua kalak kebenen pendahin erkiteken PHK ( pemutusan hubungan Kerja ), gelarna sada si Jore sada nari si Kote. Duana kalak enda tuhu-tuhu mberat perbebenna erkiteken lanai erdahin emaka nggo mberat baban geluhna. Si Kote minter bene ukurna, lanai iakapna ia erguna i tengah-tengah jabu. Ngidah kade-kade ras jelma si enterem pe mela ia. Lanai ia pang ndarat i rumah nari erkiteken kitik enggo akapna bana. Kedungenna si Kote pe depresi seh maka ia lanai jore ukurna. Tapi si Jore, amin la ia PHK la bene ukurna, keke i bas perbebenna nari. Tek ia maka lit nge potensi sideban i bas dirina. Amin lenga datna dahin bagi si mbarenda, dahikenna ka banci idahikenna. Emaka kedungenna ku juma ia, seh sada paksa ia jadi sekalak pi si erjuma si sukses. Enterem pe jelma si salut nandangi perjuangen si Jore.
Mari si diskusiken uga tanggapenta cara si Jore bagepe Si Kote bas ndungi persoalen geluhna? Si apai nge si akap si mehulina? Turiken!

Pdt. Dewi Setianna Tarigan , S.Si


Belum ada Komentar untuk "Ngidah Si Mehuli I Bas Dirinta - Ngergaken Si Kitik ( Bahan PA Moria 6 - 12 Oktober 2019 )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel