Pang Aku Ngelawansa - Okultisme Ras Pinakit Sosial ( Bahan PA Mamre 20 - 26 Oktober )


Bahan Bimbingen PA Mamre 20 - 26 Oktober 2019
Okultisme Ras Pinakit Sosial

Ogen : Galati 5:16-21
Kesah Si Badia ras manusia
16. Sura-surangku e me: Kesah Si Badia min si negu-negu kegeluhenndu maka ola iikutkenndu perukurenndu secara manusia.
17. Sura-sura ukur manusia erlawanen ras Kesah Si Badia, janah Kesah Si Badia erlawanen ras sura-sura ukur manusia. Si dua enda ermusuhen, janah si enda ertina maka la banci idalankenndu peratenndu.
18. Adi Kesah Si Badia negu-negu kam lanai bo kam iteruh Undang-undang.
19. Perbahanen-perbahanen si erpalasken sura-sura ukur manusia tangkas kap. Si enda teridah i bas: erlua-lua, si nggesuh, la meteh mela;
20. nembah man berhala ras erbahan ilmu sihir; simusuhen, rubati, mecimberu, perampus dingen kepentingenna saja ngenca iukurina. Erbahan perpecahen dingen erpihak-pihak.
21. Sician-cianen, mabuk, pesta minem-minem seh mabuk ras si debanna. Kukataken man bandu genduari, bagi enggo kukataken bandu nai maka, kalak si ndalanken perbahanen-perbahanen si bagi enda labo banci dat bagin i bas Kinirajan Dibata si reh pagin.
Tema : "Pang Aku Ngelawansa" ( Okultisme ras Pinakit Sosial )

Tujun : Gelah Mamre
  1. Meteh kerna okultisme ras pinakit sosial
  2. Erpartisipasi meneken okultisme ras pinakit sosial 
Metode : Sharing ras Aksi

KATA PENARUH
Almolonga, e me sada kota kitik i Guatemala. Kota e genduari igelari "Kebun buah ras sayur-mayur Amerika". Bas kota e nari iproduksi erbage jenis buah ras gulen si ikirim ku kota-kota ras negara si deban seputaran Amerika Tengah. I kota Almolonga terjadi transformasi. Nai, kota e pernah nggeluh i bas biak si la mehuli, murde, melket ras jahat. Lit ije penembahen berhala, nembah man dibata-dibata si isembah leluhur. Kota e mbarenda musil, penjara-penjara dem, tiap wari lit kalak rubat, semal erlua-lua, enterem alkoholik. Alu kata si deban kota e nggesuh.
Tapi kenca kota e erdalan i bas terang Kata Dibata, salih me ia jadi sada kota si makmur. Penjara lume, juma pe meramis ras mburnis. Kepeken, lit hubungen antara kiniteken ras kecibal geluh. Lit hubungen antara penembahan berhala ras moralitas bage pe penakit sosial.

URAIAN TEKS / TAFSIREN
Nina RA.Cole, surat Galati eme "dinamit spiritual". Emaka adi sioge kitab e, la banci lang arusna jadi ledakan spiritual ntah transformasi bas geluhta. Kitab enda jine isuratken Rasul Paulus nandangi gereja si paksana kal ngalaken serangen idur guru-guru palsu si atena nintapken ngawan perpulungen idur kiniteken kempak Tuhan jesus. Guru-guru e nuruh perpulungen gelah makeken Taurat ( Undang-undang ) lako jadi dalan keselamaten. jadi banci ikataken maka, Surat Galati enda e me pembelaan Paulus nandangi Berita Si Meriah ( Injil ), sabab lit kalak si nggugat ras ersura-sura nggantiken Berita e jadi berita si deban.

Paulus ngajarken maka la lit dalan keselamaten seakatan bas jesus ngenca. Dibata ngalemi dosa manusia arah kematen Jesus. Jadi kalak si tek man Jesus enggo terkelin dingen ibenarken. Ertina; i lebe-lebe Dibata kita ijadiken benar. Perbahan si e maka geluhta i bas Kristus arus erpalasken kebenaren.

Perikopta enda si tuhuna bagin i bas Galati 5:13b-6:10, si biasa pe igelari "Nasehat Etis" ntah pe Paranese. Arah sie, Paulus ngajarken kerna standar moral man kalak si erkiniteken man Jesus, sebab moralitas e me ulih pendahin Kesah Si Badia jine, labo erpalasken sada pemahaman filsafat. Alu kata si deban: bila Roh Allah absen dalam kehidupan kita maka hidup kita diwarnai ketidak bermoralan. Ija Kesah Si Badia la erdahin bas sekalak jelma i jeme ia enggo jadi budak dosa. Kalak si la idemi Kesah Si Badia erbahan kalak e ndalanken sura-sura daging.

Kalimat, "Kesah Si Badialah si negu-negu kam," itulisken Paulus i bas bentuk kalimat perintah, si intina e me; sada ke arusen kel man kalak Kristen ndalani kegeluhen iteruh penegu-negu Kesah Si Badia, sabab Kesah e mabai geluhta kempak kebenaren, kebujuren ras keadilen si erbahan kita erciga ate kempak biak-biak daging; erlua-lua, permusuhen, la meteh mela, mabuk-mabuk, nembah berhala, ilmu sihir, perampus, mecimberu ras si debanna. Kalak si lit i bas ia biak bagenda, labo banci bengket ku Kinirajan Dibata.

"Ija lit Kesah Si Badia, ije lit kebebasen" ( 2 Kor. 3:17 ). Kesah Si Badia mbebasken kalak si tek idur kuasa gelap, si misterius ras mengerikan e. Alu bage, kalak si ngelakoken erbage perbahanen si la mehuli ntah si igelari "Pinakit Sosial" banci ikataken ia ijajah kuasa kegelapen kap. Sabab labo lit kalak si idemi Kesah Si Badia ngelakoken perbahanen jahat. Adi lit kalak ter aku-aku maka ia idemi Kesah Si Badia, tapi pengkebetna murde, kalak si bage perbual belin, pengeranana erbahan kiniteken teman monce, dahinna lolo la mbera tembe. Jelma si bagidi e la man teken, sebab maba buah kesah si jahat. Kalak si iliami kesah si jahat la banci lang pergeluhna rarat, la rorat.

APLIKASI
Okultisme e me penembahen ras penalemen kempak kuasa-kuasa gelap; si biakna misterius ras umumna ipraktekken alu cara erbuni-buni. Okultisme mpeturah biak geluh si gelap. Emaka kalak si ersada ras kuasa gelap biakna pe "Menggelapkan', umpamana: pejabat si ersada ras kuasa gelap mahan bana ia menggelapkan dana masyarakat, saksi si erteman ras kuasa gelap biasana nggit nggelapken berita ras nuriken kesaksin palsu. Perbapan si erteman ras kuasa gelap mahan bana ndambahi te man gelap. Padahal, ngasuhi jabu si terang-terangen pe mberat, apalagi ngasuhi kegelapen, nggo pasti rayung ras la mungkin maba untung.

Okultisme e bali ras mindo modal kegeluhen kempak kuasa kegelapen, janah kuasa gelap e jadi pemegang saham i bas kegeluhen kalak si mindo e. Janah bungana erkinanting mekelek, seh maka maba kebiaren ras kehancuren geluh seh ku anak kempu, bage pe ma kalak sideban. Emaka labo man paken adi ateta geluhta mejuah-juah. Metenget ras jagailah diri gelahna kita la ikenai ras ikuasai kuasa jahat. Lebuh rusur Kesah Tuhan guna ndemi pusuhta, maka ula kesah si jahat bengket ku bas. Kesah Si Badia mabai kita kempak kegeluhen si mbaru maka lagu langkahta la mbau.

DISKUSI
  1. Turiken pengalamenta selaku Mamre si pernah ngasuhi ntah terlibat okultisme. Uga ndia ulihna?
  2. Kai saja siakap hubungen okultisme ras pinakit sosial si jadi i sekelwetta?
  3. Kai si banci silakoken guna ngelawan okultisme?
USULEN ENDE-ENDEN 
  1. KEE GBKP No. 197:1-2 
  2. KEE GBKP No. 244:1,3 
  3. KEE GBKP No. 245:1-3
  4. KEE GBKP No. 187:1-2 
Bacaan Herman Ridderbos, Paulus: Pemikiran Utama dan Theologinya, ( Surabaya: Momentum, 2008 )
Peter Oakes, Galatians, ( Grand Rapids, MI: BakerAcademic, 2015 )
Stanley E.Porter, The Apostle Paul: his life, thought, andletters, ( Grand Rapids, MI: W.B.EerdmansPublishing Company,2016 )
Tim Chester, Rediscovering Joy, ( London: IntervarsityPress, 2017 ) www.priorgistories/2016-08-26, DidreligionsavethisGuatemalantown. Diakses pada Sabtu, 29 September 2018 pukul 14.05 WIB

Pdt. Albert Purba, M.Th
GBKP Rg. Jakarta Pusat
HP. 081361139496


Belum ada Komentar untuk "Pang Aku Ngelawansa - Okultisme Ras Pinakit Sosial ( Bahan PA Mamre 20 - 26 Oktober )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel