Percaya Diri - Ulih Percaya Diri ( Bahan PA Moria 20 - 26 Oktober )


Bahan Bimbingen PA Moria 20 - 26 Oktober 2019
Ulih Percaya Diri

SI MAN OGEN : Perbahanen Rasul 5:33-39
33. Megi kata e merawa kal ate anggota sidang. Ibunuhna pe atena rasul-rasul e.
34. Tapi tedis sekalak anggota sidang e, e me kalak Parisi, gelarna Gamaliel. Ia sekalak guru Undang-undang janah kerina kalak mehamat man bana. Isuruhna gelah ibaba lebe ndarat rasul-rasul e.
35. Jenari nina man anggota sidang, “O kam kalak Israel, ukurkenlah manjar-anjar kai si atendu ibahanndu nandangi rasul-rasul enda.
36. Sabap nai reh si Tudas, ikatakenna maka ia sekalak si mbelin; janah lit pe si ngikutken ia empat ratus kalak. Tapi kenca ia ibunuh kerina pengikut-pengikutna e merap janah pergerakenna ngadi.
37. Kenca si e, sanga ilakoken cacah jiwa reh ka Judas i Galilea nari. Ibabaina kalak si nterem mbrontak. Tapi ia pe ibunuh janah kerina pengikut-pengikutna merap.
38. Perbahan si e kukataken man bandu, ola ugapa pe ibahan ia. Pelepas sajalah, sabap adi i bas manusia nari kin ajarenna e, masap nge pagi.
39. Tapi adi i bas Dibata nari, labo mungkin kam ngasup ngolangisa. Banci jadi kam nge si ngelawan Dibata.” Kai si ikataken Gamaliel e ikutken anggota sidang.
TEMA : PERCAYA DIRI

TUJUN : Gelah Moria:
  • Ngidah kinipangen Gamaliel ndalanken ras nuriken kebenaren. 
  • Pang ngelakoken ras ndalanken si mehuli amin gia lit tantangen.

METODE PA : Study Kasus Ras Diskusi

Kata Penaruh.
'Percaya Diri' seh kal pentingna i bas kegeluhenta sabap biak si bage mbelin kal ngaruhna guna mbentuk sikap geluhta subuk ku bas pengerana bage pe perbahanenta. Lit ahli psikologi ngatakenca maka kalak si percaya diri ngasup ngembangken penilaianna si mehuli nandangi dirina bage pe nangdangi situasi si ialakenna. La erbera-bera i bas nehken pendapat ntah pe ide guna nuriken kebenaren si banci pehuliken ras pekenaken, amin gia lit tantangen ntah resiko si man alanken. I bas jaman genduari enda, enterem kal jelma si la pang nuriken kebenaren, nuriken ketuhu-tuhun, erkiteken perukurenna ipengaruhi kepentingen pribadina erbera-bera janah ertimbang ku bas untung rugi. PA-nta sendah kita iajuk erlajar arah kinipangen ras cara Gamaliel ncidahken ras nuriken kebenaren.

Mpebagesi Pengangkan Kerna Ogen.  
Sope perikop ogenta enda, enggo ituriken rasul-rasul si pang meritaken kerna Jesus ras pengajarenNa. Arah kesaksin rasul-rasul e, reh teremna kalak tek man Jesus dingen reh ku perpulungen e. Emaka imam si mbelin ngulihi erban tindaken alu menjaraken rasul-rasul e peduakaliken sabap cian janah nembeh atena nggo reh teremna kalak ngikutken pengajaren rasui e. Tapi Tuhan ngasup makeken ise pe guna nehi sura-suraNa. I bas paksa si gulut e keke me sekalak anggota sidang gelarna Gamaliel (ert gelarna: "upah i bas Dibata nari). Ia sekalak ahli Taurat si meteh undang,-undang. Gamaliel eme pengajar si terkemuka janah ihamati kalak erdandanken biakna persabar ras perkuah. Janah ngasup ngamper bana. Gamatiel ngasup mpengadi perubaten .ras sura-sura jahat anggota persidangen.

Nina: "o kalak Israel, ukurken manjar-anjar" ( ay. 35 ), ertina kalak e perlu kal ngendaliken perukuren ku si mehuli. Ibabaina peserta persidangen nulih ku pengalamen si enggo lewat guna mpekeskesi pendapatna. Iturikenna kerna 2 contoh kelompok si maba perpecahen ( ay. 36 ). Si Judas ikatakenna ia kalak si mbelin, enterem pengikutna tapi kenca ia ibunuh pengikutna merap ras kelompokna e sontar. Reh ka Judas i Galilea nari babaina enterem kalak mberontak, tapi kenca ia ibunuh kerina pengikutna merap ( ay. 38 ). Gamaliel muat sada keputusen guna ipertimbangken si enterem alu la nggasgasi rasul e, pelepas saja sabap adi pengajaren e uluna i bas manusia nari kin, kugapa pe masap nge tapi adi pengajaren e memang i bas Dibata nari labo kam ngasup ngolangisa. Gamaliel alu 'percaya diri' makeken kengasupen ( potensina ) ras pengalamenna guna mabai perukuren peserta sidang ku si mehuli dingen pendapat Gamaliel iikutken kerina anggota sidang. Teridah maka Dibata makeken perukuren Gamaliel selaku anggota sidang alu percaya diri pang nehken pendapat si lain ras temanna guna nehken sura-sura Dibata.

Pengkenaina.
Nggeluh percaya diri bagi si Gamaliel perlu iusih Moria. Tapi percaya diri e pe arus erpalasken kiniteken si paguh man Kuasa Dibata bagepe pengangkan kerna persoalen e. Emaka arah PA-nta sendah iajuk kita gelah jadi Moria si percaya diri nggit makeken kengasupen si lit, pang nuriken ras ngataken si tuhu-tuhu la ertimbang kerna untung rugi tapi iutamaken kebenaren teridah. Arus lit prinsip kataken ue adi ue kin, lang adi lang kin sabap alu sengkebabah kita ngerana banci mulahi kalak i bas kepiceten ntah perbeben nari bage pe banci ka erbahan kalak bene. Emaka ula mbiar nuriken ketuhu-tuhun sabap Dibata makeken kalak si 'percaya diri' jadi perkakasNa guna nehken sura-suraNa. Enggo jelas i bas kita nuriken kebenaren tetap ikapiti Tuhan amin gia lit tantangen ( segat ate kalak, ketersinggungen si erjabaten, ipedungu ras sidebanna ). Tapi teklah maka Dibata sekawalta, kebenaren njagai kita. Ula leja amin i bas proses e banci ndekah waktu, ertahanlah!!

Studi Kasus. 
Sekalak anak perana gelarna si Lamegogo, erlajang ku sada kota. Jumpa ia ras temanna emaka ibabana ia erdahin jadi buruh bangunen. Ia megegeh, mejingkat ras la pertewas, nggit nampati teman i bas ndungi dahin. Ipegermetken pengawas bangunen, mehuli akapna erkiteken bujur ras terteki, emaka iangkatna jadi kepercayanna janah suruhna tading i

deher gudang barang bangunen e. Piga-piga temanna ercian ate daramina dalan guna ndabuhken Lamegogo kususna temanna si tangtangna ndilo ia erdahin, sabap la akapna metunggung si Lamegogo ganjangen asa ia. Piga wari kenca sie lit 3 kalak temanna sada arihna guna nangko barang i gudang gelah idayaken, janah ertaki ia njuruken si Lamegogo sabap ia njagaisa. Kejadin e nggo piga-piga kali ilakokenna. I bas sada wari iidah sekalah buruh bangunen si gelarna Beren Mehuli, langsung ifotona, emaka iancam kalak enda ia, adi ngelapor kesah taruhenna. Kenca piga-piga wari kemamangen pengawas sabap barang lanai melala, sedangken bangunen lenga dung. Emaka ipepulungna kerina si erdahin janah isungkunna ise nangkosa. Adi ngaku ia, la ia iaduken, sada pe la ngaku. Reh si pelaku manas-manasi situasi nina kami labo mungkin pak, si Lamegogo nge nangkosa sabap ia njagasa ma ia meteh barang gudang. Kerina mis sepakat nuduh Lamegogo, tapi ipertahanken Lamegogo maka labo ia, ngerana ia alu tangis man pengawas, la mungkin kutokohi kam pak adi aku nggo isampatindu nina. Pengawas pe ikut nguekensa emaka iputuskenna Lamegogo ipecat ras ipenjaraken, kerina setuju. Kenca bage alu nggir-nggir keke Beren Mehuli, ngerana ia nina, "manjar-anjar kita rukur sabap adi kuidah perngandung Lamegogo janah uga penjuruken teman-teman kerina la erbukti, kuakap ula lebe bagena ban keputusen". Kerina kalak merawa, ikatakenna ia petua-tuaken ras angkat-angkat telor. Si pelaku lanai tenang, ijerlengna si Beren Mehuli gelah ia sinik, tapi ibuat Beren Mehuli HP-na icidahkenna maka si pelaku labo Lamegogo tapi temanna si 3 kalak ndai. Minter mindo maaf Pengawas man Lamegogo, icabutna keputusen ndai janah ipenjarakenna buruh si 3 kalak e. Bage me isadari Lamegogo adi ngelakoken kebenaren amin gia ijuruken ras idabuhken kalak tapi tek ia maka Tuhan tetap ngkapiti kalak si benar. Amin gia tangtangna ia rate mesui tapi isuruh Tuhan kalak si pang guna nuriken kebenaren si erbahanca malem ate Lamegogo.

Arah kasus i datas enda ndai cuba si diskusiken:
  1. Kai nge akapndu si mahanca teman-teman Lamegogo ersura-sura kal ndabuhken ras njuruken si Lamegogo?
  2. Nginget kualitas kinitekenta, kuga ndia penggejapen Moria kerna sinilakoken si Beren Mehuli enda? Pang nge kita pe nuriken ketuhu-tuhun?
  3. Adi jumpa kita persoalen si menam seri ras Lamegogo enda, arah si apai nge kita? Si renungken!

Pdt. Misalta Kaban, S.Th


Belum ada Komentar untuk "Percaya Diri - Ulih Percaya Diri ( Bahan PA Moria 20 - 26 Oktober )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel