Aku Pancur Kekelengen! - Diakonia ( Penjemaatan YKPD Alpha Omega ) ( Bahan PA Permata 3 - 9 November )


Bahan Bimbingan PA Permata 3 November - 9 November 2019
Diakonia ( Penjemaatan YKPD Alpha Omega )

Ogen : Matius 22:34-40
Undang-undang si pentingna
(Mrk. 12:28-34; Luk. 10:25-28)
34. Kenca idah kalak Parisi maka lanai pang kalak Saduki nungkun man Jesus, arih-arih ia,
35. jenari sekalak i bas ia nari, e me guru agama, ncubai Jesus alu penungkunen nina,
36. “O Guru, perentah si apai kin si pentingna kal i bas kerina Undang-undang agama?”
37. Erjabap Jesus, “Kelengilah Tuhan Dibatandu asa ukurndu, asa tendindu, dingen asa gegehndu lit.
38. Enda me perentah si mbelinna dingen si pentingna.
39. Si peduaken bali ras si ndai e me, ‘Kelengilah temanndu manusia bagi kam ngkelengi dirindu.’
40. Kerina Undang-undang agama si ibereken Musa ras nabi-nabi erpalasken duana perentah enda ndai kap.”
Tema : "Aku Pancur Kekelengen!"

Gelah PERMATA GBKP:
  1. Nggejabken keberadaan kaum disabilitas sebagai teman manusia 
  2. Ncidahken kekelengen nandangi kaum disabilitas, nyata ibas aksi
  3. Erbahan aksi ku YKPC GBKP Alpha Omega
Metode: Diskusi

I. BENA KATA 
Rikutken kelender pelayanen gerejanta, Minggu Pertama November enda silakoken penjemaatan YKPD GBKP Alpha Omega. Emaka PA PERMATA GBKP enda pe sibahas kerna pelayanenta enda. Iarapken Tuhan ras Gerejanta maka selaku PERMATA GBKP selaku Aron Dibata, banci berpartisipasi aktif nangdangi pelayanen diakonianta sipaksa bimbingen enda itulis, me-rehabilitasi 92 (45 dilaki ras 47 diberu) kalak anak Tuhan si berkebutuhen / hambatan khusus ( Disabilitas ). Ibas cataten sejarah berdirina, ( 27 Tahun silewat ), 23 kalak penghuni sipemena, eme anak-anak si idapeti / ijemput oleh Pdt Salomo Sitepu ras rombongenna i kuta-kuta sekitar taneh karo, buen ibas situasi `irendahken' baik oleh keluarga anak kuta ras ikut pe tentu pemuda gerejanta, labo saja iasingken ( ikurung, ipasung, rsd ), mbue pe ipermainken / i bully, i eksploitasi oleh sebagin masyarakat / anak kutana. Ibas situasi sibage me YKPC Alpha Omega ibentuk jadi wujud `perpanjangen tan Gereja' ncidahken perbahanen Dibata si memelihara doni pemenana nari seh pendungina ( Alpha Omega - bd. Why.1:8, 21:6, 22:13 ) guna memproklamasiken Berita Si Meriah (bdk.Luk. 4:18-19) sekaligus menjawab masalah humanis, khususna mengangkat harkat ras martabat penyandang disabilitas.

Penungkunen penting man banta: ibas perkembangenna, uga nge kesetian / konsistensi Gerejanta ras ngawan perpulungenna, ( termasuk ije PERMATA GBKP ) ibas ngergaken turang seninanta enda? Kai nge siharus silakoken / sikap sikuga si ituntut Tuhan ibas kita nari guna ngergaken keluarganta enda? Mari si wujud nyataken Tema-nta enda.

II. ISI
Perikop Matius 22:37-40 jadi ibas minggu terakhir kegeluhen Jesus. Menurut ahli Biblika, percakapen enda jadi ibas wari Selasa ibas Minggu Paskah ope Jesus isalibken. Berarti, perikop enda termasuk bagin terakhir ibas pengajaren Tuhan Jesus. Matius pasal 22 si jadi bahan perikopta wari enda secara khusus nuriken percuban-percuban si ilakoken kalak Jahudi guna ndarami kesalahen Jesus. Penungkunen-penungkunen si isungkun kalak Jahudi e tuhu labo penungkunen si menukah guna ijabab, tapi Jesus, anak Dibata si dem alu kepentaren ngasup erbahan jelma si nterem jengang alu kata-kataNa. Kenca penungkunen kerna nggalar pajak bagepe penungkunen kerna kekeken ibas si mate nari ngasup ijabab Jesus, arih-arih ka me kalak Parisi ras Saduki, si situhuna dua golongen enda bertentangen, tapi khusus menghadapi Jesus ersada arihna guna nampilken sekalak guru agama guna ncubai Jesus.

Ibas masyarakat Jahudi penungkunen enda labo penungkunen si mbaru, penungkunen enda jadi bahan diskusi, bahkan perdebaten selama bertahun-tahun. Ibas hukum taurat kalak Jahudi lit 613 hukum / aturen / perintah. 248 positif ( anjuren, perintah ) janah 365 negatif ( larangen ), janah la lit kalak si ngasup ngelakoken alu sempurna 613 hukum e. Guru agama enda reh alu sada penungkunen, "perentah si apai kin si pentingna kal ibas kerina undang-undang agama?" Penungkunen enda tuhu penungkunen si mesera erkiteken seolah-olah harus ipilih salah sada ibas 613 undang-undang si lit jadi undang-undang si mbelinna. Ibas perukuren guru agama e, matuhi sada undang-undang jadi undang-undang si pentingna tentu mengabaiken undang-undang si debanna. Enda me mungkin si itimai guru agama, kalak Saduki ras Parisi e guna ndabuhken ras nalahken Jesus.

Guru agama e nungkun sada penungkunen, tapi Jesus mereken dua jabab si mungkin la pernah terbayangken kalak enda. Pemena, Jesus nuriken kerna shema Israel, si tertulis ibas Ulangen 6:4-5, " O Israel ingetlah enda! Maka Tuhan si sada e kap ngenca Dibatanta! Kelengilah Tuhan Dibatandu asa ukurndu, asa tendindu, asa gegehndu lit." Shema enda enggo ieteh kalak Jahudi bahkan jadi pengakun kiniteken kalak Jahudi.Enda me perentah si mbelinna dingen si pentingna kal. Peduaken, Jesus nuriken undang-undang agama si seri pentingna ras si e ibuat Jesus ibas Imamat 19:18, "ola kam erbalas man ise pe, ntah pe tetap rate segat man bana, tapi kelengilah temanndu manusia, bali ras kam ngekelengi dirindu jine, Aku kap Tuhan." Jesus merangkum 613 undang-undang agama si reh bas Musa ras nabi-nabi alu dua undang-undang enda. Kelengilah teman manusia seri pentingna ras ngkelengi Tuhan Dibata. Janah ngkelengi teman manusia e, labo terbatas nandangi keluarganta, teman kuliah, sada perpulungen, tapi pe kerina manusia si ngasup kita nampatisa. Secara khusus ibas minggu enda, eme erkeleng ate nandangi teman-temanta, anak-anak Tuhan penyandang disabilitas i YKPD Alpha Omega. Disabilitas labo ertina urak tempas Dibata selaku manusia ibas ia, tapi ibas situasi disabilitas e pe teridah kuasa ras kemuliaan Dibata, dingen kita idilo jadi saluren / pancur kekelengen man teman-temanta enda.

Undang-undang si ipeseh Tuhan Jesus situhuna undang-undang si enggo ieteh dingen itandai kalak e. Persoalenna guru-guru agama e terjeng ngoge, meteh, tapi la idalanken ibas kegeluhenna tep-tep wari. Undang-undang e terjeng jadi ritual kegamaan, guna iidah kalak si deban, seh maka ikataken Jesus kalak e pekulah-kulah ( munafik ). Seharusna guru-guru agama si meteh kerna aturen agama jadi ujung tombak, jadi teladan guna nehken kekelengen man kerina kalak si lit i sekelewetna.

III. PENGKENAINA 
Rick Warren nulis sada buku si seh gundari jadi best seller, eme Purpose Driven Life ( Hidup yang digerakkan oleh tujuan ). Buku enda nuriken kai nge si njemba, si menggerakken kita ibas geluh enda? Lit deba jelma igerakken sen, materi, lit deba igerakken gengsi, harga diri. Penungkunenna gundari, kai nge si menggerakken PERMATA GBKP gundari enda? Kata-kata Jesus ibas bahan perikopta i datas seharusna jadi penggerak kegeluhen bagepe persadanta selaku PERMATA GBKP. Kegeluhenta selaku pribadi bagepe selaku perpulungen harus igerakken / ijemba sada tujun, eme ngkelengi Dibata bagepe manusia. Janah tujun e teridah ibas aksi nyata bagepe kegeluhenta tep-tep wari.

Wari enda, PERMATA GBKP idilo guna jadi saluren kekelengen man teman-temanta, anak-anak si lit i YKPD Alpha Omega. Banci jadi, PERMATA GBKP punya rasa iba nangdangi teman-temanta si iasuh ras ididik i YKPC GBKP Alpha Omega. Piga-piga temanta sipernah berkunjung seh ngamburken iluh pe paksa ituriken kami kerna kecibal `keluarga'-nta enda. Jenari tentuna kita bersyukur pe sebab kita itepa Tuhan isempurna. Lebih asa sie, ngadi nge kita ibas 'rasa iba' ras ndiskusikenca ibas PA nta enda ? Kai nge ndia nggo silakoken man bana? Ntah `kemer'(risih) nge siakap adi bergaul ras keluarganta enda? Harus siinget, tupung `ciger' denga wari (lit denga kesempaten ibere Tuhan man banta), kita harus ndahiken dahin Tuhan, sebab reh me (gelap' (lanai lit kesempatenta).

Melala potensi ras kesempaten si lit bas anak-anak PERMATA GBKP guna banci erdiate dingen ngekelengi teman-temanta i YKPD Alpha Omega. Banci berbentuk kunjungen kasih, mpepulung penampat (sabun, odol, detergen, buah, gulen, rsd). Banci erbahan konser amal PERMATA GBKP, guna Alpha Omega, ntahpe publikasi ibas media sosial guna nuriken anakta bagepe pengasuh i Alpha Omega, jadi donatur tetap tiap bulanna. Si penting eme, ula kari erkiteken sibuk kita membahas soal tehnis ( uga keberangkaten, jam piga kita pulung, kai si pepulung ) soal esensi, eme kekelengen ndai dungna la surung ilakoken. Si gejaplah maka kekelengen Dibata si iberekenNa man banta lit tanggung jawabta guna nehken kekelengen e guna jadi pasu-pasu man kalak si deban.

IV. DISKUSI 
  1. Uga sedekah enda pengertinta kerna kalak si igolongken "Difable"? Kai nge siberubah ibas pengertinta e kenca sipepayo kata Yesus enda? 
  2. Kai nge ndia banci siban selaku PERMATA GBKP man pelayanen YKPC GBKP Alpha Omega, subuk ibas minggu penjemaatan YKPC GBKP Alpha Omega, aksi natalta tahun enda ( jangka pendek ) ras masa sireh ( jangka panjang ) - sijadi tanda bukti maka YKPC GBKP Alpha Omega e keluarganta? Diskusiken ras Dalankenlah!
V. USULAN ENDE-ENDEN 
  1. KEE No. 177:1-3 
  2. KEE No. 281:1-3 
  3. KEE No. 254:1-3 
  4. KEE No. 296:1-4
  5. KEE No. 165:1-4 

Pdt. Mestika Ginting, S.Th, M.Psi.


Belum ada Komentar untuk "Aku Pancur Kekelengen! - Diakonia ( Penjemaatan YKPD Alpha Omega ) ( Bahan PA Permata 3 - 9 November )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel