Angkarlah! - Hari Kesehatan Nasional ( Bahan PJJ 10 - 16 November )


Bahan Bimbingen Perpulungen Jabu-Jabu 10 - 16 November 2019
Angkarlah!
( Hari Kesehatan Nasional )

Ogen : Kuan-Kuanen 23: 1-3
1. Kune kam kundul man ras si biak raja, ingetlah ise ia.
2. Adi kam merincuh kal manca, angkarlah.
3. Ola sangkar man nakan si iberekenna man bandu, nggit mawen ijeratna atena kam.
"Pangan e labo ate keleng, beltekndulah angkar" kalimat enda jelas sada persinget singataken maka lebih penting kap kesehaten asangken sen. Pangan banci i tukur, tapi kesehaten la tertukur. Angkarlah eme salah sada kalimat perintah, dikune la siangkar lit dampak siterjadi simerugiken man banta. Umpamana, senik (besursa) lanai lit sura-sura erdahin. Obesitas (kegemukan), turah diabetes militus emaka arus ertambar ku rumah sakit. Kepeken mbue kerugin siterjadi dikune la siangkar man, tenaganta, waktunta bage pe duitta.

Renungenta enda ngajarken kita segelah aminna gia kita man ras raja, ula kita sangkar ntah merangap. Sebab adi man i bas perjamuan raja nggo pasti kerina pangan siisikapken ntabeh-ntabeh. Emaka i bas ayat si pemena ikataken "ingetlah ia" nuriken maka ula kita lupa temanta man e sekalak raja ntah pe sierpangkat. Emaka perlu kel siperdiateken caranta man, misalna: ula erkulcap, ula angkat nahenta, sopan ras sidebanna. Enda ncidakehken maka kita ngasup bergaul ras temanta sada meja e, sebab singundang kita man e kalak si mehamat i bas mata masyarakat.

Janah tole pe kuan-kuan mpersingeti pembacana, gelah njagai menjaga kesehaten dirinta. Adi kam merincuh kel manca, angkarlah. Kalimat enda ngatakenca maka ula sura-sura babahta, sebab e la mehuli man kesehaten daging kulanta. Banci jadi pangan siisikapken e, kerina ntabeh janah kerina kita pe, tapi la tentu pangan e mehuli man daging kulanta. Kerina jelma ntabeh kel akapna daging, janah daging salah sada sumber gizi siiperluken daging kulanta, adi sue ras takaren. Adi lang banci jadi pinakit. Emaka kuan-kuanen enda ngingetken pembacana, "angkarlah" gelah ula kam bene, Sebab adi ikutkendu kerincuhen babah, e banci jadi sinanggel man daging kulanta. Kerina pangan mehuli dingen sumber gizi man daging kula adi ngasup kita ngangkarsa.

I bas jaman sigenduari enda melala kel pangan-pangan sintabeh nanamna tapi la mehuli man kesehaten, epe perlu siangkar geIah sehat daging kulanta. Umpamana, pangan-pangan instan, pedas nasakkenca, ntabeh nanamna, janah menukah ndatkenca. Megati la siukuri ku kesehaten daging kulanta erkiteken nanamna ntabeh, ras mesunah ndatkensa. I bas wari memperingati hari kesehaten nasional (12 Nopember) bagepe diabetes sedoni (14 Nopember), gerejanta GBKP ikut ngerana man kerina ngawan perpulungenta gelah min mediate kita nandangi kesehaten dirinta ras jabunta. Melala faktor-faktor simendukung kesehaten daging kulanta, umpamana, kebersihen lingkungan, kebersihen daging kulanta, janah pe pangan si sehat. Marilah sidukung program kesehaten enda, Sebab didalam raga yang sehat terdapat jiwa yang sehat.

EVALUASI:
Enggo nge sikirimken ayat-ayat entah renungen Kata Dibata arah sms, WA entah FB si mereken motivasi man temanta?

DISKUSI :
  1. Rikutken bahan PJJnta enda, ngkai maka perlu siangkar pangannta. Turiken!
  2. Kai-kai saja nge si erbahanca menukah kena pinakit?

AKSI
Oratken menu sehat i bas jabunta, adi perlu konsultasi ras ahli gizi

USULEN LAGU :
  1. KEE GBKP No. 194 : 1-2  ( KLIK JUDUL KEE UNTUK MELIHAT LIRIK )
  2. KEE GBKP No. 335 : 1-2  ( KLIK JUDUL KEE UNTUK MELIHAT LIRIK )
  3. KEE GBKP No. 201 : 1-3  ( KLIK JUDUL KEE UNTUK MELIHAT LIRIK )
  4. KEE GBKP No. 168 : 1-    ( KLIK JUDUL KEE UNTUK MELIHAT LIRIK )
TOPIK PERTOTON SYAFAAT
  1. Notoken pemerintahan Jokowi ras kabinet na gelah sehat i bas ngaturkan negaranta.
  2. Notoken Moderamen bage pe ras krina Pendeta, Pertua, ras diaken gelah sehat i bas ngepkep perpulungen Tuhan.

Pdt. Lody Sitepu, S.Th.


Belum ada Komentar untuk "Angkarlah! - Hari Kesehatan Nasional ( Bahan PJJ 10 - 16 November )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel