Dahin Eme Penembahen Man Dibata - Ulih: Erdahin Eme Penembahen Man Dibata ( Bahan PA Moria 10 - 16 November )


Bahan Bimbingen PA Moria 10 - 16 November 2019
Ulih: Erdahin Eme Penembahen Man Dibata

SI MAN OGEN: Kuan-kuanen 12:24-28
24. Kejingkaten erbahanca kalak ndatken kuasa,
tapi kemalasen erbahanca kalak jadi suruh-suruhen.
25. Aru ate erbahanca keriahen lesap,
tapi ranan mehuli erbahanca ate malem.
26. Kalak bujur jadi penegu-negu man temanna,
tapi dalan kalak jahat mabai ia jadi papak.
27. Kalak malas la pernah seh sura-surana,
tapi kalak si erdahin alu tutus ndatken untung si mbelin.
28. Kalak si erdalan i bas kinibujuren, nggeluh me,
si ngikutken dalan kejahaten, kematen me perayakenna.
TEMA : DAHIN EME PENEMBAHEN MAN DIBATA

TUJUN : Gelah Moria:
  • Ngidah makna erdahin i bas pengogenta.
  • Ndalanken dahin sebagai amanah.
METODE PA : Diskusi.

Kata Penaruh. 
I bas sada tahun enda Moria enggo ngaloken pemeteh si mabai kita megegeh i bas erkiniteken, pentar erwira usaha bagepe pentar njagai kesehaten ras lingkungen. I bas pengujung PA Morianta tahun 2018, si temana "menumbuhkan jiwa kewirausahan, serta peduli terhadap kesehatan dan lingkungan" kentisik nari enggo ganti me, tapi dahinta labo ngadi. Pengarapenta reh teridahna min ulihna, turah semangat kalak si erusaha. Erlajar kita arah piga-piga pengalamenta si enggo lepas: enggo ibahan pelatihen-pelatihen misalna pelatihen ermanuk, ngasuhi lele, dawan ras sidebanna, kenca dung pelatihen kurang ulihna, erkiteken la ilakoken i bas inganta sekalak-sekalak. Bagepe ilitken ka pelatihen erbahan pangan-pangan, kue, cemilan ras sidebanna, si tulis nge resepna, cara erbahanca, tapi e pe banci la silakoken adi merincuh kita pangan tetap nge kita nukur. Ibahan ka pelatihen keterampilen jait, mbordir, masang payet, ngerangkai bunga tapi e pe la iprakteken (ipakeken) pemeteh e ndai. Tuhu lit ka nge piga-piga perpulungenta si erkembang usahana tapi labo nterem. Uga kita mpraktekkenca ras uga ketutusenta ndahiken sie kerina aminna pe lit tantangen ateta maka pemeteh si enggo sialoken banci min ilakoken la gia guna idayaken tapi nandangi jabunta lah gia banci erguna.

Mpebagesi Pengangkan Kerna Ogen
Kitab Kuan-kuanen biasa pe igelari kitab hikmat sabap isina mabai kita pentar (berhikmat) i bas kerina dampar geluhta. Ciri pengajaren i bas kitab Kuan-kuanen, kalak si ndalanken perbahanen si mehuli ras perbahanen si jahat. I bas kinatana kalak si ngelakoken perbahanen si mehuli eme si nggit erlajar. Perikop enda bagin kata pertenget Salomo nari, si encidahken kegeluhen kalak si mejingkat erdahin ras kalak perkisat.
  1. Erdahinlah alu mejingkat ras bujur.
    Penulis kitab Kuan-kuanen ngajarken mejingkat erdahin. Kalak mejingkat eme kalak si erdahin alu tutus dingen bujur. Bujur eme erkemalangen man Tuhan ras erkeleng ate man manusia. Tujun geluhna eme maba kiniulin man kalak sideban. Kalak si mejingkat ras bujur i bas pendahinna ndatken ulih, umpamana erjuma, erbinaga, pegawai ras dahin sidebanna. Adi mejingkat maka banci ia jadi tuan i bas dahinna e. Jadi bayak me ia ras lit kuasana. I bas keberhasilenna e enterem jelma si erpenalemen man bana. Melala si idah turi-turin kalak sukses si menaken usahana i bas si kitik nari. I bas si kitik e tutus, mejingkat ras bujur ia, ertambah-tambah rusur si erdahinna bage pe mitra-mitra usahana seh maka enterem kalak banci nggeluh i bas ia nari. Kalak mejingkat ras bujur banci itegu-teguna kalak sideban jadi kalak si rulih i bas usahana. Ibabaina kalak sideban guna ngikuti carana, alu ngajari i bas wirausaha ras mbuka keran (nampati) man kalak sideban. 
  2. Kecibal kalak malas ras jahat.
    Perkisat eme kejahaten. Kalak kisat aru atena kerna kai pe, si idahna kegagalen, kiniseran ras persoalan ngenca janah la lit sura-surana guna mpekena geluhna. La diatena erdahin, erban usaha; nebu-nebu ia ndarami keperlun geluhna. Inanamina atena pangan si entabeh, uis si mejile ras kenikmaten sideban tapi labo arah ulihna latih. Emaka kalak kisat labo pernah seh sura-surana. Bicara iandingken ras kalak si erburu, kalak kisat tertaren-taren, mis ilebei kalak burunna ndai emaka dongal nari nge sekerajangenna, la datna kai pe. Kalak kisat jadi budak ngenca, jadi suruh-suruhen kalak pe enggo iakapna puas, (aminna pe labo kerina si erdahin selaku suruh-suruhen e kalak kisat). Sabap lit ka nge kalak jadi suruh-suruhen erkiteken terbatas pemeteh, dana ras gegehna). Kalak kisat ngikutken dalan si jahat, dalan ku bas kematen, ngarapken rejeki alu kejahaten ras ngerugiken kalak sideban.
Jadi arah pertenget Salomo enda si idah maka kerina manusia arus erdahin. Mekisat eme kejahaten, perdalanna ku kematen. Arus erdahin alu mejingkat, tutus ras bujur. I bas erdahin pakeken pemeteh, kepentaren ras talenta si lit i bas kita.

Pengkenaina
Enggo ibereken Dibata man banta erbage-bage pemeteh, kesempaten. guna erlajar, enggo si idah erbage-bage peluang i bas geluhta, gundari idilo kita guna ncidahken lebih asa arusna, kerina e guna kemulian Tuhanta. Erdahin eme penembahenta man Dibata. Kenca manusia ijadiken Dibata, isuruhNa manusia erdahin, erkarya guna ngusahai ras njagai doni enda. Kalak si mejingkat erdahin maka erkuasa me ia nandangi kalak si perkisat. Erlajar kita arah turi-turin sekalak perbapan si bayak, ngajarken anakna gelah mejingkat erdahin.

"Lit sekalak perjuma anggur si tuhu-tuhu ipasu-pasu Dibata i bas pendahinna seh maka mbelang kal juma anggurna. Anakna lit 3 tapi perkisat kerina, tujun geluhna senang-senang saja, la perlu latih erdahin tapi kerina keperlun lit. Perjuma enda ndai enggo metua, tapi aru atena ngidah pengkebet anakna. Sekali jadi perbapan enda ndilo teluna anakna, iberekenna pedah nina: "aku enggo metua. Kerina si lit i bas aku jadi sekerajengen kena teluna. Enggo kutanemken erta si melala i teruh taneh i kelang-kelang batang anggur e. Adi enggo pagi aku lanal lit kurkuri kerina taneh si lit i bas kelang-kelang batang anggur e. La perlu mbages kurkurindu pasti kari ijumpaindu. Kenca mate perjuma anggur enda ndai. Minter teluna anakna ndai ersada arihna ngkurkuri juma bapana, dikune idat erta e maka ibagi alu seri. Erbintuas ia teluna ngkurkuri taneh si lit bas kelang-kelang batang anggur, seh megembur kerina taneh e tapi la idatsa erta e. Dungna ngadi ia ngkurkurisa kenca piga dekahna, teridah kerina batang anggur ndai mbur ras buahna pe meramis kal. Mbuah anggur ndai dingen teluna anak ndai pe enggo seh suksesna. Emaka isadarina kai maksud bapana, gelah mejingkat ia nangkuli jumana e, seh megembur tanehna dungna mbuah anggur e. Pentar kal bapana ndube ngubah tabiat anakna, perkisat jadi kalak si mejingkat. langka anak e teluna, maka erta si meherga eme kerja keras / mejingkat. 

Mejingkatlah, tutus ras kreatif i bas erdahin, pake kerina pemeteh, kepentaren si enggo idat kita guna ngembangken kesejahteran ekonomi i bas jabu. Erdahinlah tupung wari terang denga, tupung lit denga kesempaten sabap labo lalap lit kesempaten. Nina Pengerana 10:18 (B. Indo): "Oleh karena kemalasan runtuhlah atap dan oleh karena kelambanan tangan bocorlah rumah"

Diskusi:
  1. Turiken pelajaren kai si idatndu arah bahan PA-nta enda kerna: kecibal geluh kalak mejingkat ras kalak perkisat!
  2. Turiken kai-kai saja kin tujun erdahin, arah 3 dampar: guna dirinta, kalak sideban ras sura-sura Dibata! 

Pdt. Sariyani Barus M.Th.


Belum ada Komentar untuk "Dahin Eme Penembahen Man Dibata - Ulih: Erdahin Eme Penembahen Man Dibata ( Bahan PA Moria 10 - 16 November )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel