Liturgi Pekan Kebaktin Keluarga Wari Pemena Minggu 17 November


Liturgi Pekan Kebaktin Keluarga Wari Pemena Minggu, 17 November 2019
Tema Umum : Jabu Sierbuah (Bdk. Nism.1:1-3)

I. PRA-KEBAKTIN / PERSIKAPEN 
• Mehuli adi lit ije guru KA/KR ta banci kita i babaiNa lebe rende-rende sope si benaken Pekan kebaktin keluarganta wari / berngi si pemena enda. Salah sada laguna banci "Yesus Pokok."
Yesus pokok dan kitalah carangnya, tinggallah di dalam-Nya 
Yesus pokok dan kitalah carangnya, tinggallah di dalam-Nya 
Yesus pokok dan kitalah carangnya, tinggallah di dalarn-Nya 
Pastilah kau akan berbuah 
Yesus cinta ku, kucinta kau, kau cinta Dia 
Yesus cinta ku, kucinta kau, kau cinta Dia
• Asa bancina sipake alat musik si lit i bas gerejanta entah sektorta. Umpamana musik digital GBKP entah key board, gitar rsd.
• Siusahaken rikutken kecibal runggunta entah sektorta banci melibatken anak-anakta kerina, gelah ia pe tuhu-tuhu iakapna bagin gerejanta.
• Mehuli ka adi i bas kebaktin enda i litken buah jadi simbol. (bancj modifikasi rikutken kecibal runggun entah sektotta).

II. KEBAKTIN ( I babai Sekalak Pertua Diaken ) 
Mejuah-juah ... Ras kita ertoto.....
Mari ras kita kerina rende alu dem keriahen i bas KEE No. 399:1-2 (Perp. Tedis)
Mari surak puji Tuhan, Endeken nde enden m'riah
O surga, doni ersurak kerina
Mari rende muji IA, alu ukur si meriah
Puji gelarNa si Badia
Reff :
La erngadi-ngadi, ku puji Kam Tuhan
Bas krina dampar kegeluhen
Ersurak m'riah, pusuhku i bas Kam
Terpuji Tuhan rasa lalap

Mari k'rina manusia, si puji dage Dibata
Rendelah ersuraklah kita kirina
Ersadalah ukurta e mujiken gelar Dibata
Ersurak dage kita kirina Reff...
( Sanga rende ngendesken perlengkapen man si mbaba kebaktin)

L   : Kebaktin enda lit i bas gelar Dibata Bapa si njadiken langit ras doni, i bas gelar AnakNa Jesus Kristus si jadi juru selamat man doni enda ras bas gelar Kesah Si Badia si jadi penampat man banta (bandu) i bas mentasi kegeluhennta (ndu). Perkuah ate ras dame i bas Dibata Bapa, AnakNa Jesus Kristus ras Kesah Si Badia nemani kita (kam) genduari seh rasa lalap. Amin.

P   : Amin...Amin...Amin... (iendeken)

L   : Tetaplah min kam i bas Aku, janah Aku pe tetap i bas kam. Dahan labo ngasup erbuah adi la kin ersada dahan e ras batangna. Bage me pe kam, adi la kin kam ersada ras Aku labo kam erbuah (Joh. 15:4)
Mari radu ras kita rende KEE No. 62:1-2
Min lalap Kam inganku Tuhan, Kam Yesus batang anggur nge
GegehNdu maler min ku dahan, Di lang bene kap aku pe
KesahNdu bengket aku min, Gelah erbuah aku kin

Di bulung saja nge teridah, buahna lang la r'guna kap
Oh bunuh min di dahan turah, si la metunggung la tetap
Kuteh beluhNdu nektek e, gelah erbuah aku pe
L   : Dibata ertedeh ate maka bangsa pilihenNa banci mereken buah si meramis dingen entebu. Guna si e maka ipilihNa bangsaNa gelah erguna nandangi bangsa si deban. Kegeluhenna sekalak-sekalak iarapkenNa banci engkelengi kalak si deban. Nggeluh alu bujur, terteki janah la ngukurken dirina jine. Tapi Dibata kecewa nandangi kualitas kegeluhen si cidahken bangsaNa. Jesaya nuratken pusuh Dibata nandangi bangsaNa, "Begikenlah ende-enden si kuendeken enda, sada ende-enden kerna temanku ras peken anggurna: Temanku lit peken anggurna i das uruk-uruk si seh kal mehumurna. icangkulna tanehna, iambekina batu-batuna; jenari isuanna batang anggur si mejilena. Ipajekkenna pantar man ingan njagasa, janah ibahanna lubang ingan ngerik buahna. Itimaina buah anggur ndai seh tasak kerina, tapi kepeken macem kerina nanamna."


J   : Nggejap nge kami Tuhan, maka kami pe megati lenga bo bagi si arapkenNdu. Rusur denga nge kami terjeng ngukurken diri kami, jabu kami, sektor kami, runggun kami, gereja kami asa kalak si deban. Nggejap nge kami pe maka Kam pe tah kecewa ngenehen kualitas kegeluhen kami. Alemilah kami Bapa ras pegegehilah kami kerina gelah banci mereken buah si meramis dingen entebu i bas kegeluhen enda.
Rende KEE No. 377:1-2
Kuakuken me dosangku i lebe Tuhan
Megati aku lalar bas kegeluhenku
Keleng ateNdu, pengarapenku
I teruh perkuahNdu malem me pusuhku
Keleng ateNdu, pengarapenku
I teruh perkuahNdu malem me pusuhku

Erlebuh aku baNdu o Yesus Tuhanku
Alemi min o Bapa salah ras lepakku
Keleng ateNdu, pengarapenku
Tedeh `teku ngidah belinna perkuahNdu
Keleng ateNdu, pengarapenku
Tedeh ateku ngidah belinna perkuahNdu

L   : Ngena ate Tuhan kalak si nggit ngargari perdalanen geluhna. Singgejap kekoten geluhna ras nggit tetap i pegegehi ras ipelimbarui Dibata. Maka pertoton kerina perpulungen erpalas Masmur 80:15-16, nindulah sekalak-sekalak:

J   : O Dibata si Mada Kuasa, mulihlah, tatap min i Surga nari, reh Kam engkelini bangsaNdu. Mari kelini peken anggur si enggo isuanNdu ndube. Batang anggur si nguda, si megegeh ibahanNdu perturahna

L   : Dibata erpengarapen maka geluhta (ndu) sekalak-sekalak tetap i bas Tuhan. Maka kalak si tetap i bas Tuhan maler me gegeh Dibata man bana. "Bali ia ras kayu si isuan i Rumah TUHAN , dingen turah i bas Rumah Dibatanta. Lalap ia meratah dingen paguh, aminna pe enggo metua, tetap erbuah" (Msm. 92:15).
Rende KEE No. 244:1,3
Nusur min o Kesah Tuhan, Bengket ku pusuhku e
Maka Kata si ni suan, turah ras erbuah pe
Kam i bas Dibata nari, kepkeplah ukurku min
Pasu-pasu pendahin, maka aku genduari
Ndaram tuah si tetap, alu ate si telap

T'rang Badia ras Penuduh, dalin kegeluhen e
Ajar kami maka mubuh, kami arah Kam kepe
`Lah ersada ras Dibata, maka aku tutus e,
Rembak min ras Kristus pe, seh me dungna lanai lata
Haleluya pujin, asa lalap baNdu min

L   : Seh me paksana pengogen Kata Dibata si pemena. Pengogen si pemena i bas enda iogeken si mada jabu ( Ogen : Kolose 1:9-12 )
9. Erkiteken si e me, maka mulai kin ibegi kami kerna kam, rusur kam itotoken kami man Dibata. Ipindoken kami man baNa gelah banci ietehndu kerina sura-suraNa, alu pemeteh ras kepentaren si ibereken KesahNa.
10. Alu bage ngasup kam nggeluh bagi si ngena ate Tuhan dingen erbahan meriah ukurNa. Seh maka kegeluhenndu erbuahken perbahanen si mehuli, janah erbagesna pe penandaindu Dibata.
11. Mbera-mbera reh gegehna kam ibahan gegeh si reh i bas kuasaNa si mbelin e nari, gelah megenggeng kam i bas kai pe.
12. Katakenlah bujur man Bapa alu meriah ukur, sabap IA me si erbahanca kam metunggung dat bagin i bas si enggo isikapkenNa man anak-anakNa, i bas Kerajan Terang.
L   : Ketuahen kalak si megiken Kata Dibata dingen singelakokenca i kegeluhenna si teptep wari. Haleluya.

P   : Haleluya...Haleluya...Haleluya... (iendeken)

L  : Khotbah (Ertoto Sope Ras Kenca)
       Khotbah: Masmur 1:1-3
Kemalemen ate si tuhu-tuhu
1. Malem me ate kalak
si la megiken pedah kalak jahat,
si la ngusih perbahanen kalak perdosa
si la erteman ras kalak megombang man Dibata.
2. Tapi keriahenna e me matuhi Undang-undang TUHAN
dingen ngukurisa suari ras berngi.
3. Ia seri ras batang kayu si turah i tepi lau anak
erbuah i bas paksana,
dingen bulungna pe la melus.
Sangap ia i bas kerina pendahinna.
       Tema : Jabu si Erbuah

L   : Mari radu ras kita ngakuken kinitekenta raduken kerina kalak Kristen bas kerina paksa ras ingan i doni enda ninta dage radu ras, Aku tek man Dibata Bapa,  ( Perp. Tedis ) 

L   : Seh me paksana kita ngendesken persembahen pengataken bujurta man Dibata. Kata Dibata si jadi palas i bas kita nehken persembahen eme i bas KEE No. 445:1-3 (Perp. Kundul)
Si pepulung me persembahenta, si endesken dage man Dibata
Tanda m'riah ukur, ban pasu-pasuNa, si simpar breNa man banta
Reff : Asa si enggo isikapken , asa si nggo itotoken,
          Em pengataken bujurta, kempak Dibata
Tuhu simpar pemere Dibata, man perjuma ras si erbinaga
K'rina si erdahin, si ngarap man baNa, i tuahi pasu-pasuNa
Reff....
Pengataken bujur man Dibata, enda mbelin ka tuhu gunana
Jadiken geluhta, kula ras tendinta, persembahenta si nggeluh
Reff....
Pertoton Persembahen ras Syafat (simabaisa sekalak mamre ras moria)
Topik pertoton syafaat :
• Kerna persembahen
• Gelah jadi jabu si erbuah eme erguna ras ernanam man kalak si deban
• Bangsa ras negara lndonesia
• GBKP jadi aron Dibata guna jadi pasu-pasu man doni enda.

L   : Mari sisehken perpadanenta kerina. (Perp. Tedis)
       Tetaplah erbuah meramis i bas kegeluhenNdu.
J    : Rende KEE No. 62:5
La kal ateku sirang Tuhan, k'rajangNdu aku lalap me
Keleng ateNdu me ku nanam, gegehNdu min geluhku pe
Gegeh Ndu terbeliden min, bas aku lah erguna kin
L   : Tetaplah ras Tuhan katawari pe, begiken KataNa, ikutken pedahNa
J    : Rende KEE No. 62:6
Adi bage erketuahen, tendingku reh teguhna kap
Si picet arah kesusahen, kuakap longge ras tetap
Sini bas mutik erbunin, e jadi tangkas me pagin
L   : Rende kita sekali nari guna mpeteguhi perpadanenta i bas KEE No. 203:1
Pasu-pasu ni Tuhanta, Si nemani geluhta
Tiap wari seh man banta, La ersibar ngaruhNa
Aku pe, aku pe, pasu-pasu aku pe

L   : Ras kita ertoto bagi ni ajari Tuhan ninta dage: O Bapa kami
        Alokenlah pasu-pasu idur Dibata nari si jadi gegehndu gelah ngasup kam erbuah meramis dingen entebu:
Labo kam si millh Aku. Tapi Aku nge milih kam janah nuruh kam lawes gelah erbuah meramis, e me buah si tahan rasa lalap. Adi bage, kai pe ipindondu i bas gelarKu ibereken Bapa e nge man bandu. (Joh. 15:16). 

P   : Amin...Amin...Amin...(iendeken)

III. DISKUSI 
  1. Kai-kai saja si iperluken maka banci sada sinuan seh erbuah meramis? Adi rimo meramis ras entebu. 
  2. Enggo me siakap gerejanta, jabuta ras dirinta erguna man kalak si deban? Bas kai saja e.

Pdt. Yunus Bangun, M.Th


2 Komentar untuk "Liturgi Pekan Kebaktin Keluarga Wari Pemena Minggu 17 November"

  1. Bujur melala untuk bahan liturgi pekan maupun PJJ yang selalu di upload

    Kami sangat terberkati
    Salam dari Perpulungen Makassar

    BalasHapus
    Balasan
    1. Bujur kerna komenndu..Si usahaken si terbaik man pelayanennta i GBKP. Semua karena kasih sayang Tuhan..Dibata simasu-masu kita kerina.

      Hapus

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel