Mamre Tetap Erpengarapen - Ngataken Bujur I Bas Sikugapana Pe ( Bahan PA Mamre 10 - 16 November )


Bahan Bimbingen PA Mamre 10 - 16 November 2019
Mamre Tetap Erpengarapen

Ogen : 1 Kronika 16:28-32; 1 Samuel 7:12
1 Kronika 16:28-32
28. Pujilah TUHAN, o kerina bangsa i babo doni!
Pujilah kemulianNa ras kinimbisanNa.
29. Pujilah gelar TUHAN si mulia;
babalah persembahen, jenari ngadaplah man baNa ku bas Rumah PertotonNa.
Sanga TUHAN ncicdahken baNa alu kemulianNa,
erjimpuhlah i adep-adepenNa.
30. Nggirgirlah i adep-adepen TUHAN, o kerina doni!
Doni itamaken i bas inganna alu paguh janah la banci ipiser.
31. Meriahlah, o doni ras langit!
Turiken man bangsa-bangsa maka TUHAN nge raja.
32. Ergeruhguhlah, o lawit ras kerina mahluk si lit i bas;
meriahlah, o mbalmbal ras kerina si lit i je!

1 Samuel 7:12
12. Jenari ibuat Samuel sada batu, itamakenna kelang-kelang Mispa ras Jesana, janah nina, “TUHAN enggo nampati kita seh ku ingan enda” janah igelarina batu e “Batu Penampat”.
Tema : Ngataken Bujur I Bas Sikugapana Pe

Tujun : Gelah Mamre
  1. Nggejapken maka Dibata tetap masu masu kegeluhenna.
  2. Tetap ngataken bujur ras erpengarapen man Tuhan
Metode : Sharing

KATA PENARUH
Kai kin ertina erpengarapen? Alu sederhana banci igambarken arah ilustrasi berikut: sengkeret gadung ras sada tinaruh imasukken kubas lau si luam. Kenca enggo piga piga menit, gadung ras tinaruh e iangkat jenari ipebergeh. Kai si terjadi? Gadung si awalna piher / mekeng berubah menjadi medate / lembut Sedangken tinaruh si awalna cair / lembut kedungenna jadi kental / piher. Lau si luam ibarat persoalan si mberat ntah pe si la bagi ukur, janah katawari pe banci terjadi bas geluhta. Gadung ras naruh e me gambaren diri manusia; gadung simbol kalak si erpengarapen ras naruh simbol kalak si la erpengarapen. Jadi erpengarapen berarti ngasup ngaloken keadaan ras situasi si la bagi ukur ( survive ) jenari menjadi pribadi si lebih baik ( bd. Rom. 5:3-4 ). Kisah Samuel ras Daud alu tegas nuriken kerna pengalamen nggeluh erpengarapen man Tuhan. Uga kin bentuk pengarapen? Kai hubungen pengarapen ngataken bujur i bas si ugapana pe?

URAIAN TEKS / TAFSIREN
Duana teks ogenta enda memiliki latarbelakang si seri, tapi beda tahun ras ingan kejadinna. Intina duana teks enda e me; Dibata mereken kemenangen man kalak si malang man baNA.

I bas Kitab 1 Samuel 7 ituriken kerna berita kemenangen Israel ngelawan Filistin, kenca Peti Perpadanen si pernah irampas kalak Filistin iulihken man kalak Israel (1 Sam. 5) i Kiryat Yearim. Peti perpadanen enda iulihken kalak Filistin erkiteken Peti Perpadanen e mpeturah mara man kalak Filistin subuk i Kuil Dagon, Gat ras Ekron. Alu mulihna Peti Perpadanen, Samuel selaku Hakim ngajuk kerina kalak Israel gelah robah dingen jera man Dibata. Pertobaten kalak lsrael, minter iumputi kalak Filistin alu merangi kalak Israel (ay 7), si erbanca kalak Israel mbiar dingen nggir-gir (ay 8). Tapi bangsa e la ngadi erpengarapen man Tuhan ras pang ngalaken kalak Filistin (ay 9,10), janah ije Dibata ncidahken kuasaNa ras Israel menang (ay 10,11). Peristiwa enda iabadiken alu tanda batu (ay 12) si igelari Batu Penampat = Eben Haezer.

Alu kisah si la ndauh berbeda, kitab I Kronika pe nuriken kerna pengalamen Daud kenca ia itangkuhken jadi Raja ras naluken kota Jerusalem (1 Kro. 11), maka tindaken sipertama ilakokenna e me mindahken Peti Perpadanen Dibata i Kiryat Yearim ku kota jerusalem (1 Kro. 13), ibu kota Kerajaan Israel. Secara kiniteken ras politis, tindaken enda menegasken maka Dibata e me pusat peribadahen bangsa Israel sekaligus lalit dibata-dibata sideban singasup naluken Dibata ras bangsa pilihenNa. Alu kata sideban, kemenangen tetap ijujurken Dibata man kalak si malang man baNa. I bas situasi enda me Daud ngangkatken puji-pujinna man Dibata. Daud nuriken pengalamen geluhna i bas pengarak-ngarak Dibata, rikut pe ras kinimbisan Dibata si la terukuri manusia. Si jadi inti puji-pujin Daud e me:
  • Pujilah IA erkiteken kemulian ras kinimbisanNa (ay 28)
  • Puji IA, baba persembahen man baNa, ngadaplah baNa i rumah pertoton (ay 29)
  • IA dem alu kuasa, tunduklah man baNa (ay 30)
  • Tuhan kap Raja (ay 31)
  • Si mereken keriahen man kerina (ay 32)
APLIKASI
Nabi Samuel ras Raja Daud e me peminpin si cukup dikenal berhasil i bas kegeluhen bangsa Israel. Perbeben si mberat dingen rumit bagi "buah simalakama" ntah kecibal geluh si la bagi ukur megati kal reh secara tumpang tindih nderpa kegeluhen bangsa Israel. Kerina persoalen enda la erbanca Nabi Samuel ras Raja Daud menyerah i bas kegeluhenna, tapi sebalikna tetap ia semangat berjuang ngalaken perbebenna erkiteken tek dingen mbelin pengarapenna man Dibata.

Pengarapen ras ngataken bujur i bas si ugapana pe e me dua hal si la banci ipisahken. Sebab kalak si ngasup ngataken bujur i bas si ugapana pe, e tanda maka i bas dirina tetap lit pengarapen. Alu bahasa sideban aku labo pecundang tapi pejuang bas kegeluhen bagi si enggo isaksiken Nabi Samuel ras Raja Daud. Keuniken Samuel ras Daud, labo erkiteken ia raja si la pernah ngenanami kiniseran, tapi erkiteken ia jadi usihen kiniteken i bas ngalalcen kiniseran. Mbelin pengarapen gereja ras anak jabunta, maka Mamre GBKP mewarisi kiniteken Samuel ras Daud. Mamre nggeluh selaku pejuang tangguh i bas ngalaken perbeben geluh, si sekaligus mabai jabuna tetap erkiniteken dingen ngataken bujur man Dibata i bas kerina kecibal geluh.

I bas pendungi tahun 2019 enda enggo mbue kecibal geluh si ialami kita, subuk si pagit tah entebu, subuk si bagi ukur ntah la bagi ukur. Enda me kesempatenta ngidah keleng ate Dibata bagi Samuel Ras Dsaud. Perbeben e eme inganta nuduhken kiniteken, kesetian ras pengarapenta man Tuhan. Janah Tuhan tetap mereken kejuah-juahen man anakNa si setia ras malang man baNA. I bas minggu - minggu Advent enda, tentu melala ka dahin gereja si sekaligus jadi tanggungjababta selaku anggota keluarga Kristus (subuk i bas mbagi waktu keluar malam guna latihen koor, biaya natal anak-anakta, adangen-adangen natal PJJ - Kategorial - Runggun, nikapken ongkos anak mulih ku kuta, persiapen tahun baru, rsd.), mari tetap kita erpengarapen ras ngataken bujur man Dibata. Sebab melala ijujurken Dibata kiniulin ilebe mata kalak si tek, si setia ras erpengarapen man Dibata. Bagepe sipesikap dirinta i bas menyambut tahun baru 2019 alu dem pengarapen maka pasu pasu Tuhan reh simparna seh man banta

DISKUSI
  1. Rikutken bahan oratennta, uga pandangenta kerna hubungen "Erpengarapen ras ngataken bujur i bas si ugapana pe?" Turiken ras bereken contoh arah pengalaman sipernah si alami.
  2. Kenca enggo silakoken PA Mamre sedekah tahun 2019, kai nge pengarapen siturah i bas kita guna kiniulin perdalinen kegiaten Mamre bas inganndu i bas tahun 2019 si reh enda?
USULEN ENDE ENDEN
  1. KEE GBKP No. 51 : 1-3  
  2. KEE GBKP No. 92 : 1-3 
  3. KEE GBKP No. 165 : 1-4  
  4. KEE GBKP No. 174 : 1-5 
  5. KEE GBKP No. 275 : 1-  

Pdt. Darius R. Sembiring, M.Th 
Ketua Klasis Medan Delitua 
HP. 08121931648


Belum ada Komentar untuk "Mamre Tetap Erpengarapen - Ngataken Bujur I Bas Sikugapana Pe ( Bahan PA Mamre 10 - 16 November )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel