Dibata Erberita Alu Erbage-Bage Cara - Dasar Teologi Informasi ( TI ) ( Bahan PA Mamre 23 -29 Februari )


Bahan Bimbingen PA Mamre 23 - 29 Februari 2020
Dasar Teologi Informasi ( TI )

Ogen : Masmur 19:1-7
Dibata ermulia i bas tinepaNa
1. Masmur Daud.
2. Langit encidahken kemulian Dibata,
awang-awang erberita kerna perbahanenNa.
3. Tep-tep wari erberita kempak wari si pagina,
tep-tep berngi nuri-nuri man berngi si pagina ka.
4. La lit si ngerana ntah melasken kata,
la lit sora si terbegi.
5. Tapi sorana erdengung i belang-belang doni enda,
terbegi seh ku tampuk doni.
Ibahan Dibata rumah i langit man ingan matawari,
6. erpagi-pagi pultak matawari desken dilaki si mbaru empo luar bas bilik nari,
bali ras si mbisa erlumba alu dem keriahen.
7. Erdalan ia i bas ujung langit nari,
terus ku ujungna si deban ikeparina.
Kai pe la banci cebuni i bas las sinalsalna nari.
Tema : Dibata Erberita AIu Erbage-Bage Cara

Tujun : Gelah Mamre:
  1. Meteh Maka Dibata erberita arah sinasa Iit i doni enda.
  2. Makeken kerina media si lit guna meritaken berita si mehuli. 
Metode : Diskusi

KATA PENARUH
Erkiteken bahan PA Mamrenta terkait ku TI, perlu ituriken alu ringkas kai /  kin TI e? "Teknologi informasi (TI) atau dalam bahasa Inggris information \ technology (IT) adalah istilah umum untuk teknologi apa pun yang membawa manusia dalam membuat, mengubah, menyimpan, mengkomunikasikan dan/atau menyebarkan informasi" (http/id m wikipedia org). lbas jaman genduari, menam kerina bagin kegeluhen manusia lit kaitenna ku informasi ras teknologi (IT): Pendidikan, kesehatan (kedokteran), transportasi, bisnis, informasi, transaksi keuangen, data, pertanian, ibas nehken Berita si Meriah ras sidebanna. Lanai waktuna kita ngerana perlu ntah langna TI, tetapi kita enggo seh ku level uga kita makeken TI e sue ras kata Dibata, jadi alat Dibata nehkenken sura-suraNa.

URAIAN
1. Masmur 19 enda igolongken Masmur Daud, si kemungkinen asalna ibas menaken jaman raja-raja. Masmur enda, khususna ayat 1-7, ipake i bas ibadah guna muji/mpebelin (mpermuliaken) Tuhan arah kiniulin tinepaNa. Pemasmur labo terjeng kagum (takjub) nandangi kai si idahna i bas tinepa Dibata e, tapi lebih asa sie, idahna tinepa (alam) e nuri-nuri kerna kemuliaan Dibata.
2. Ayat 2-5a, ituriken maka langit ras awang-awang (cakrawala) ncidahken kemulian ras perbahanen Dibata (ay.2). ljadiken Dibata langit ras awang-awang jadi rumah matawari (ay.5b). Arah pengaturken Dibata sie kerina maka terjadi hukum alam: Lit suari ras lit ka berngi. Duana pegancih alu ergiliren."Tep-tep wari erberita kerna wari si pepagina, tep-tep berngi nuri-nuri man berngi si pagina ka" (ay.3). Desken pelari estapet si terus kiam ku pelari berikutna, pelari berikutna ngaloken tongkat estapet e guna kiam ka. Desken perawat rumah sakit si aplusan (bergantin) erjaga, aminna ganti-ganti gia perawat, rumah sakit e tetap melayani pasien. Bageme iandingken maka aturen alam erdalin alu mekanisme si enggo itentuken Dibata. Arah kiniraturen ras kiniulin tinepa Dibata e, gia benda-benda e labo beloh ngerana, tetapi ia karina banci `nuri-nuri' alu carana ncidahken kemulian ras perbahanen Dibata si mejin (luas biasa). "La lit ia ngerana ntah melasken kata, la lit sorana terbegi. Tapi sorana erdengung i belang-belang doni enda, terbegi seh ku tampuk doni" (ay.4, 5a). Pemasmur ngajuk perpulungen guna meteh kemulian Tuhan arah tinepaNa.
3. Ayat, 5b-7, amin pe matawari (benda penerang sidebanna, Msm.8:4), benda angkasa si seh kal mbelinna ras pentingna, tapi matawari hanyalah tinepa Dibata. Amin pe matawari teridah tuhu-tuhu har-har (terang) ras paguh (perkasa), si igambarken desken "dilaki si mbaru empo luar i bas bilikna nari, bali ras si mbisa si si erlumba alu dum keriahen" (ay.6). Amin gia matawari e "Erdalan i bas ujung langit nari ku ujungna sideban ikeparina. Kai pe la banci cebuni i bas las sinalsalna nari" (ay.7), tapi matawari e hanyalah ciptaan si bergantung man si nepasa. Dibata nge si ngaturken peredaren (lintasen) si man bentasenna. E maka matawari labo banci "idibataken" bagi si ibahan kalak Babil si nembah dewa Samsy (dewa matawari). Ola sempat "kelang-kelang jadi pematang", ola jadiken tinepa jadi dibata. Matawari e itepa ras lit, guna nuriken kemulian Dibata ras ncidahken kuasa Dibata si mbelin. Alu ngantusi sie me, maka erburak ukur perpulungen guna muji/nembah Dibata ras ngikutken undang-undangNa.

APLIKASI
1. Tema: Dibata Erberita alu Erbage-bage Cara
Ibas ajaren Kristen, Dibata mpetandakan (menyatakan) diriNa alu bagin: Pemena, pernyataan umum (arah tinepaNa/ciptaan ras sora pusuh/hati nurani). Peduaken, pernyataan khusus (arah sejarah, kataNa ras Jesus Kristus). Arah bahan PA-nta, Dibata erberita arah tinepaNa. Alu bage enggo si eteh maka erbage-bage kepe cara Dibata erberita man banta kerna kuasa ras kemulianNa. Tujunna, gelah kita meteh ras nandai maka IA me Dibata si man pujin ras man ikutenken i bas geluhta, maka banci kita terkelin.
2. Teknologi informasi (TI/IT) eme pemere Dibata man manusia. Kengasupen rukur, merakit, ngumban kerina bagin TI ras pe perangkat-perangkatna reh i bas Dibata nari. Ate Tuhan gelah kita la terjeng `mengagumi kehebaten ras manfaat TI e, tetapi seh min kita ku bas pengangkan (pengetahuan), maka Dibata kap si mereken inspirasi, gegeh ras kreatifitas man manusia guna ngelitken TI e. Manusia ijadiken segambar ras Dibata, ndatken tugas ras mandat guna ngkelola ras njagai doni enda (Kej.1:26, 29; 2:15). lbas rangka sie me TI lit. Guna "naluken ras njagai" doni enda. Memang manusia nge si `merakit', mencipta IT e, tapi Dibata nge si si erbahansa maka e kerina banci jadi. Alu bage TI erberita kerna kemulian ras
perbahanen Dibata si mbelin. Ti mpeturah kekagumen ras pujin man Dibata (Mat.5:16; Ko1.1:16).
3. Selaku Mamre, perbapan GBKP, si memiliki peran (pengaruh) penting guna ngajari (mengedukasi) kerina anggota keluarga (alu verbal, non verbal, alu kata ras keteladanen) kerna T1 ras penggunaanna. T1 arusna mpermudah kinerja, mperlancar komunikasi, mperluas wawasen, reh mesunahna ndat informasi ras sidebanna. Alu gendek kata, TI hadir jadi pasu-pasu. Kita arus metenget ola sempat TI jadi berhala si erbahan kita lanai erdiate er-Dibata ras lanai tertib cara geluhta. Pakelah TI guna keperlun si mehuli, waktu si tepat ras cara si bijaksana. Ola sempat jabunta jadi korban erkiteken buta T1 atau erkiteken kecandun (ediktif) TI.
4. Sekedar ngingetken, revolusi industri 4.0 (four point zero) enggo berlasung ras kemungkinen berlanjut ku tingkat lebih tinggi ka. Kegeluhen manusia melala ipengaruhi digital, robot ras internet si terhubung ku bas kerina lini kegeluhen. Melala hal-hal (usaha) si ndekah banci runtuh, tapi melala ka peluang si mbaru. E maka Mamre arus erlajar ras mabai anak jabuna erlajar kerna T1 gelah mampu kita bersaing ras eksis ibas jaman enda. Sekaligus banci ka kita erberita arah Tl. Inget! Dibata tetap erdahin ras erberita, termasuk arah kerina revolusi industri, termasuk arah T1 (band. Joh.5:17).

DISKUSI
Turiken pengangkandu kerna tema PA ?
Bereken pendapatta, uga caranta erberita si mehuli arah TI bas jaman genduari enda?

USULEN ENDE - ENDEN
  1. KEE GBKP No. 306 : 1, 4   ( KLIK JUDUL KEE UNTUK MELIHAT LIRIK )
  2. KEE GBKP No. 298 : 1 - 3   ( KLIK JUDUL KEE UNTUK MELIHAT LIRIK )
  3. KEE GBKP No. 263 : 1, 4    ( KLIK JUDUL KEE UNTUK MELIHAT LIRIK )
  4. KEE GBKP No. 31 : 1-    ( KLIK JUDUL KEE UNTUK MELIHAT LIRIK )

BACAAN: 
  1. Barth, M.C & Paraira, B.A, Tafsir Alkitab Mazmur 1-41, BPK Gunung Mulia, Jakarta, 1989 
  2. Preiffer, Charles F, Harrison Everett F, The Wycliffe Bible Commentary Vo1.2, Gandum Mas, Malang, 2009.
  3. Verkuyl J, Etika Kristen Kebudayoan, BPK Gunung Mulia, Jakarta, 1989
Pdt. Arapen Perangin angin, M.Th 
HP. 081362120955


Belum ada Komentar untuk "Dibata Erberita Alu Erbage-Bage Cara - Dasar Teologi Informasi ( TI ) ( Bahan PA Mamre 23 -29 Februari )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel