DIbata Si Telu Sada - Konfesi GBKP: Allah ( Bahan PJJ 2 -8 Februari )


Bahan Bimbingen Perpulungen Jabu-Jabu 2 - 8 Februari 2020
Dibata Si Telu Sada
( Konfesi GBKP: Allah )

Ogen : Johanes 14: 23 - 26
23. Erjabap Jesus, “Kalak si engkelengi Aku, ikutkenna kap katangKu. Alu bage ikelengi BapangKu me ia, janah Bapa ras Aku reh ndahi ia dingen ringan ras ia.
24. Kalak si la engkelengi Aku, labo ikutkenna katangKu. Kata si ibegikenndu labo katangKu tapi rehna i bas Bapa si nuruh Aku e nari.
25. Si enda Kukataken man bandu asum Aku ras kam denga.
26. Si nampati, e me Kesah Si Badia, si isuruh Bapa pagi i bas gelarKu, iajariNa kam kerna kai pe; dingen ipersingetiNa kam pagi kerna kerina si enggo Kukataken man bandu.
Tertulianus (160-225) eme sekalak bapa Gereja, kutana i Afrika Utara (Kartago). Ia me si pemena nuriken kerna istilah Trinitas, eme telu pribadi si isaksiken Pustaka Si Badia (Bapa, Anak, Kesah Si Badia) eme sada. Dibata sada tapi ipetandakenNa diriNa alu telu cara. Istilah Latin si ipake Tertulianus eme una substantia tres persona (bahasa Indonesia: Allah tidak terbagi dalam substansi betapa pun berbeda dalam pribadi).

I bas perkembangenna, kira-kira tahun 200 Sabelius nuriken kerna Trinitas si igelarina "Trinitas Modalis". Iturikenna maka Dibata e sada (esa). Jesus Kristus ras Kesah si Badia e labo Dibata. Bapa, Jesus Kristus ras Kesah Si Badia e me model entah pe cara penampilen Dibata si sada e. Lit ka si ngangkai Trinitas i bas "Dogma Trinitas Subordinatif", si e me Arius (wafat 336). Bali ras "modalis" atena mpertahanken prinsip "monotheisme" (Allah itu esa). Arius ngajarken maka Dibata Bapa ngenca si tuhu-tuhu Dibata, kekal, mutlak ras benar. Jesus Kristus la seri ras Bapa, janah Jesus Kristus eme tinepa Dibata. Igelari subordinatif erkiteken telu pribadi e la bali mutu "keallahanNya."

"Ahli teologi" erdebat kerna Dibata Sitelu Sada e i bas Konsili Nicea 325 ras Konstantinopel 381. Emaka iputusken i bas Pengakun Kiniteken Nicea Konstatinopel maka Dibata Bapa, Jesus Kristus ras Kesah Sibadia eme sada, seri, "sehakekat". "Bapa, Anak, Roh Kudus adalah satu dalam keberadaan dan kehendak (homoousios), tapi tiga dalam kedirian (hypostasi)."

Amin bage gia lit ka nge piga-piga aliren gereja si la ngikuti keputusen konsili Nicea Konstantinopel enda. Umpamana, aliren Saksi Jahowa, iakuina Dibata Sitelu Sada tapi Jahowa eme Dibata Bapa saja. Tapi uga pemahamenta selaku warga GBKP kerna Trinitas?

I bas perdalanen menuju Jerusalem ingan Jesus ipakuken, Jesus melasken kata-kata persirang sirangen man ajar-ajarNa: kentisik nari, lanai bo Aku idah doni enda (ay. 19). Maksud Jesus labo persirang-sirangen seh rasa lalap, sabab bagi Jesus ersada ras Bapa bage pe Jesus ersada ras ajar-ajarNa. Tentulah ajar-ajarNa la ngangka kai siikataken Jesus e. I bas Johanes 14:23-26, Jesus njabab penungkunen sekalak si tergelar Judas (labo Judas Iskariot) gelah ipetandaken Jesus diriNa. Jabapen Jesus i bas nas enda mereken pengangkan kerna keberadan Dibata i tengah-tengah kegeluhen kalak si tek man baNa, eme kiniersadan Dibata Bapa, Jesus Kristus ras Kesah Si Badia. Jabapen Jesus enda mereken pergegeh man ajar-ajarNa gelah ula mbiar ndalani kegeluhen enda sabab Kesah Si Badia (parakleetos: istilah enda nuduhken sekalak siidilo reh erkiteken ibutuhken guna ndampingi, nampati, mbela ajar-ajar i adep-adepen doni enda) reh sinampati. Aminna secara kula IA lanai ras ajar-ajar, tapi ijanjikenNa Kesah Si Badia si isuruh Bapa i bas gelar Jesus. Kesah Si Badia eme wujud kehadiren Jesus si biakna ersada ras kalak si tek lanai ibatasi ruang ntah pe waktu. Emaka ajar-ajar arus tetap setia ras patuh. Selaku ajar-ajar tetap ngelakoken kataNa tanda kekelengen man Jesus sekaligus Bapa sinuruh Jesus reh ku doni enda. Sabab erkiteken kekelengen Dibata nge maka iperembakkenNa diriNa man manusia gelah itandai manusia IA.

GBKP erbahan rumusen kerna Trinitas i bas buku Konfesi GBKP BAB II kerna Dibata, "Kami percaya Allah adalah yang awal dan yang akhir. Keesaan Allah dinyatakan dalam tiga pribadi yang disebut Tritunggal (Trinitas) yakni dalam ketunggalanNya terdapat tiga pribadi: Bapa, Anak dan Roh Kudus. Tiga pribadi ilahi ini selalu ada bersama-sama dan secara serentak, tidak berdiri sendiri, tidak bekerja sendiri-sendiri dan rentang waktu yang susul menyusul. Sang Bapa, Sang Anak dan Roh Kudus selalu hadir bersama-sama dan mengerjakan pekerjaan yang sama (penciptaan, penyelamatan dan penebusan), masing-masing dengan peran dan tugas untuk membuat karya semakin nyata. Pribadi ilahi yang satu tidak lebih tinggi keilahiannya dari keilahian pribadi yang lain. Di dalam Allah ada keesaan, tetapi juga kebhinekaan." (ogendu Iebih lengkap buku Konfesi GBKP BAB II). Arah pengajaren enda, GBKP nulak dogma Trinitas Modalis, dogma Trintitas Subordinatif, bage pe dogma Saksi Jahowa.

Sada ilustrasi si nuriken kerna Trinitas,
Ibaratken sada ruangan si terbentuk arah unsur panjang, lebar dan tinggi. Meneiken salah sada unsur pembentuk ruangen maka meneiken ruangan tersebut. Bagem Trinitas, Dibata lit i bas relasi telu pribadi. Si enda mastiken man banta maka Dibata i bas kesempurnanNa tetap ras kita seh rasa lalap. Secara perukuren labo kita ngasup ngangkai Dibata si Maha Kuasa e. Ersibar kel kengasupenta ngukurisa erkiteken kita terjeng tinepa. Tapi Dibatanta tetap erkeleng ate man banta katawari pe ras ijapa pe.

EVALUASI
Ma enggo sibenaken ngoge Pustaka Si Badia i bas jabu ntah pribadinta?

DISKUSI :
Kuga nge pengangkanta sedekah enda kerna Bapa, Anak ras Kesah si Badia eme sada?
Kai nge si lakokenndu adi kune reh aliren pengajaren si deban si la bagi pengajaren gerejanta?

AKSI
Tetap terusken ngoge Pustaka Si Badia i bas jabuta. Man si langa menakenca maka minggu enda sibenaken i bas jabu entah pribadinta

USULEN LAGU :
  1. KEE GBKP No. 213:1-3 
  2. KEE GBKP No. 99:1-3 
  3. KEE GBKP No. 187:1-3 
  4. KEE GBKP No. 6: 1- 
TOPIK PERTOTON SYAFAAT
  1. Gelah perpulungen tek nandangi Dibata Sitelu Sada
  2. Gelah setiap orang tua ngajarken man anak-anakNa kerna kiniteken nandangi Dibata Sitelu Sada. kern
  3. Si turah bas perpulungen.

Pdt. Berthalyna Br Tarigan, M.Th





Belum ada Komentar untuk "DIbata Si Telu Sada - Konfesi GBKP: Allah ( Bahan PJJ 2 -8 Februari )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel