Idilo Nggejapken Kinseran Jesus - Ngalo-Ngalo Minggu Pasion ( Bahan PJJ 23 - 29 Februari )


Bahan Bimbingen Perpulungen Jabu-Jabu 23 - 29 Februari 2020
Idilo Nggejapken Kiniseran Jesus
( Ngalo-Ngalo Mingug Passion )

Ogen : 1 Petrus 2:21-25
21. Guna si enda me kam idilo Dibata; sabap Kristus jine pe enggo ngenanami kiniseran man gunandu, janah itadingkenNa sada usihen si man usihenndu, gelah iikutkenndu dalanNa.
22. IA la erdosa. Ise pe la enggo megi kata si la tuhu i bas biberNa nari.
23. Asum IA igombang-gombangi kalak, la ibalasNa alu kata megombang. Janah asum IA ngenanami kiniseran, la ilawanNa kalak, tapi erpengendes IA man Dibata, Hakim si bujur.
24. Kristus jine enggo ngangkut dosa-dosanta i bas kulaNa i kayu persilang, gelah kita mate nandangi dosa, jenari nggeluh nandangi si ngena ate Dibata. Erkiteken lukaNa, kam enggo ipepalem.
25. Nai kam bagi biri-biri si enggo papak, tapi genduari kam enggo ibaba mulihken guna ngikutken Permakan Singkawali tendindu e.
Ngerana kerna kiniseran tetap menarik guna idiskusiken, sabab kiniseran eme bagin kegeluhen manusia. Gereja pe arus tetap erdahin guna erban penjelasen si teraloken bas pusuh perpulungen kerna kai kin tujun kiniseran e. Uga maka Dibata mpelepas anak-anakNa nggeluh i bas kiniseran? Uga maka kalak bujur arus ndatken kiniseran? Uga maka gereja i bas perdalinenna lalap ndatken kiniseran? I bas minggu-minggu Passion enda kita iajuk guna ngangkai erti kiniseran Tuhan Jesus janah erlajar man baNa i bas ngalaken kiniseran.

Kerina teolog ras bapa-bapa gereja nai-nai nari enggo ersada arih maka pengangkanna kerna Dibata sekalak jelma i bas ngangkai kiniseran si reh man bana eme jadi palas utama guna nehken pengangkan carana ngalaken kiniseran. Alu kata si deban faktor kiniteken sekalak jelma eme faktor penentu man bana, i bas ia natap kiniseran si reh man bana. Pengangkanna kerna Dibata nampati kita i bas njabab penungkunen : "Tuhu kin kiniseran e ukumen erkiteken dosa?...", "tuhu kin kiniseran e nuduhken maka kita enggo itadingken Dibata?" Ntah kin kiniseran e eme dalan guna memurniken pusuhta ras dalan guna ngerembakken dirinta ku Dibata?

Adi nulih kita ku kegeluhen Tuhan Jesus teridah maka kiniseran ' enggo jadi ayam-ayam geluhNa, bage pe rasul-rasul ras perpulungen sipemena, kemusilen (Mat. 17:24-27), itulak(Mrk. 3:21) ate nembeh, seh ku kematen i kayu persilang arus inanamiNa.

Kiniseran e kepe la ngadi i bas Jesus saja tapi pe seh ku ajar-ajarNa misalna kematen/pembunuhen, ipenjaraken ras igudami (Perb.4:3; 12:4-11; Kis.16:23-40, 24:27; Pip.1:12-14). Si idah pe maka menam kerina rasul mate ibunuh (martir) selain Johanes (ia ibuang ku Pulau Patmos seh ujung geluhna).

Adi sipegedang ateta banci sioge kesaksian sejarah mulai jaman Kaisar Nero nari (54-68 M) seh ku kejadin penutungen gereja/pengebomen gereja, penutupen gereja, pembubaren kebaktian-kebaktian i mbue ingan i doni enda nuduhken maka kiniseran si inanami gereja terus denga jadi seh genduari.

Isi 1 Petrus 2:21-25 eme pengapul si tuhu-tuhu maka kiniseran si rehna i bas ndalanken kebenaren labo ukumen tapi pendilo (panggilan), bali bagi Dibata enggo ndilo kita kubas keselamaten i bas Kristus Jesus (1 Pet. 2:9) bage pe kita idilo guna ngenanami kiniseran (1 Pet. 2:21a) bagi si inanami Kristus Jesus.

Jesus enggo ngenanami kiniseran erkiteken kebenaren alu bage asum kita pe ngenanami kiniseran erkiteken kebenaren, ula ndele ateta sabab penebusta enggo leben ngenanamisa ras e jadi usihen kinitekenta. Tugasta eme ngikutken usihenNa e alu setia.

Kai si isuratken Petrus i bas bahanta enda enggo inubuatken i bas Jesaya 52:13-53:12 kerna kiniseran serayan Tuhan alu kata si deban kiniseran enggo itetapken Dibata jadi dalan man kalak Kristen guna mpertahanken kinitekenna alu sabar dingen megenggeng (1 Pet. 2:23).

Doktor Viktor Frankl (sekalak psikiater) ndatken sada pengangkan kerna erti kiniseran. Pengangkan enda idatna rikutken pengalamenna sebage sekalak tawanen kamp konsentrasi Nazi Jerman si berhasil ertahan ngelewati kekejaman ras penyiksaan si luar biasa. ia banci mejuah-juah mentasi kerina penyiksaan e erkiteken idaramina erti si mbagesna kiniseranna alu nina : "Apabila sungguh ada tujuan hidup ini, maka haruslah ada suatu tujuan dalam penderitaan dan kematian." Alu kata si deban Frankl erpengakap maka adi labo kita ngasup ngidah litna hubungen antara kiniseran, kematen ras kinikeken i bas simate nari, maka geluh enda labo lit ertina.

Pengangkan teologi Frankl enda turah tupung sada per sada tawanen Nazi igantung ilebe-ilebe tawanen si deban, erkiteken kondisi kulana si lemah i bas waktu si kentisik minter mate tawanen si igantung e, seakaten sekalak anak si igantung, mungkin perban berat kulana menahang cukup ndekah sangket dingen erjuang nggengken kiniseran i bas tiang gantungen ope mutus kesahna. Kejadin enda mpeturah kebiaren si mbages man kerina tawanen si ngidahsa, kenca si e enterem tawanen dungna sakit jiwa, deba munuh bana. Tapi Frankl lain carana ngaloken kejadin e. Ia ngidah tempa-tempa Tuhan Jesus jine me si sangket i bas tiang gantungen tupung anak ndai igantung. Kejadin e mpeturah pengangkan man banta maka Kristus jine si ngenanami kiniseran e, iangka Tuhan Jesus kap kiniseranku e, igejapNa kap kiniseranku e. Alu mata kiniteken igejap Frankl maka sada kap ia i bas kiniseran Tuhan Jesus. Kiniseran Tuhan Jesus i kayu persilang maba ia ku kemulian kekeken, alu bage tek ia maka kiniseran i doni i bas mpertahanken kiniteken mpersada manusia ras Tuhan Jesus i bas kemenangen kekeken.

Kita pe i bas ngalaken kiniseranta arus ngasup ngidah kiniseranta i bas kiniseran Tuhan Jesus. Tupung melungen kel siakap, melenget kel pusuhta sitatap kayu persilang Tuhan Jesus maka teridah IA pe sisada ije sangket, la lit sada pe ajar-ajarNa si setia i bas kiniseranNa. I bas si e tergejap man banta maka igejapNa kap pusuhta si kelungunen e...igejapNa kap perasaanta si kebenen erkiteken itadingken teman-temanta kita. Kiniseran Tuhan Jesus mperturah pengangkaan man banta uga tutusna ateNa nelamatken kita kalak perdosa, uga belinna sura-suraNa gelah kalak perdosa salih jadi kalak si benar (2 Kor. 5:21) janah kinikekenNa i bas kematen e eme puncak i bas perjuangenNa naluken kuasa si Iblis si erbanca lanai kita mbiar i bas ngalaken kematen e jine.

EVALUASI
Lit nge kita engkirim ayat Pustaka Si Badia man temanta entah keluarganta. Entah erban status FB si erkawitwen ras kiniteken.

DISKUSI:
  1. Cuba situriken penggejapenta tupung jadi kiniseran, umpamana: sakit pinakit, kearun ate erkiteken kematen, anak la bagi ukur, ia seh sura-sura, la setia teman-teman ntah kade-kade! Kidekah enda uga kita ngalakenca? 
  2. Cuba si turiken i bas pengalamenta erbage-bage kiniseran si inanami kita janah si kelompokken apai kiniseran si reh i bas ndaianken/mpertahanken kebenaren janah apai ka kiniseran si reh erkiteken ulih perbahanenta?
AKSI
Bahanlah perenungen si mbages i bas rumahta kerna kiniseran Tuhan Jesus nebusi dosanta. Subuk pribadi entah ras isi jabunta.

USULEN LAGU : 
  1. KEE GBKP No. 76:1 
  2. KEE GBKP No. 360 (3X)  
  3. KEE GBKP No. 222:1-2  
  4. KEE GBKP No. 357 (3X)   
TOPIK PERTOTON SYAFAAT :
  1. Ngawan perpulungen si paksana ndalani kiniseran si mesangat i bas geluhna gelah tetap megegeh dingen natap ku kiniseran Tuhan Jesus.
  2. Gelah perpulungen GBKP ngasup ndatken sura-sura Dibata bas kiniseran si paksana ialakenna.
  3. Ngawan perpulungen si paksana sakit mekelek, i bas kearun ate erkiteken kematen, kebenen, usaha si gagal, anak-anak si la bagi ukur, ras si debanna.
Pdt. Sinar Rehaganta Barus, M.Th.

2 Komentar untuk "Idilo Nggejapken Kinseran Jesus - Ngalo-Ngalo Minggu Pasion ( Bahan PJJ 23 - 29 Februari )"

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel