Kekekenlah, Angkat Amakndu Jenari Dalanken - PA HDS II ( Bahan PA Moria 23 - 29 Februari )


Bahan Bimbingen PA Moria Minggu, 23 - 29 Februari 2020
PA HDS II

SI MAN OGEN : Johanes 5:2-9a
2. I Jerusalem, deherken “Pintu Gerbang Biri-biri”, lit sada kolam si igelari Betesda i bas cakap Heber. Kolam e lit lima serambina.
3. I bas serambi e nterem kalak si penakiten medem; lit si pentang, lit si cempang bage pe lit si mate serapen. [Itimaina lau e erburak,
4. sabap lit paksana lau e erburak ibahan malekat Tuhan si nusur ku bas kolam e. Kalak si tangtangna bengket ku bas kolam e asum launa erburak malem penakitna, amin sakit kai pe ia.]
5. Lit pe i je sekalak si enggo telu puluh waluh tahun dekahna ia penakiten.
6. Idah Jesus ia ampar i je janah ietehNa maka enggo ndekah ia sakit. E maka nina Jesus man bana, “Atendu kin gelah malem penakitndu?”
7. Ngaloi si penakiten e, “O Tuan, la kap lit kalak si namaken aku ku bas kolam e asum erburak launa; asum kupala-palai ku bas, enggo lit kalak si deban leben asa aku.”
8. Nina Jesus man bana, “Kekekenlah, angkat amakndu jenari dalanken!”
9. Paksa si e pe minter malem penakitna. Iangkatna amakna jenari erdalan ia.
TEMA : KEKEKENLAH, ANGKAT AMAKNDU JENARI DALANKEN

TUJUN : Gelah Moria:
  • Ngidah ras mediate nandangi perbeben kalak si pinakiten.
  • Ngumban perbahanen Jesus mulahi kalak si pinakiten. 
METODE PA : Brainstorming

Kata Penaruh.
I bas kegeluhenta, adi lit sehat pasti lit sakit, meriah ukur ras ndele ate, senang ras susah. I bas situasi si bagenda me kesetian iuji, emaka i bas padan perjabun model II i bas Gerejanta, enda me perpadanen si iakuken pasangen si erjabu. Si sedari kal enda, tapi adi reh pinakit la banci lang ndele kal ate sabap la saja si sakit ukurna gulut tapi pe isi jabu ras keluarga erndele ate apai ka pinakit enda enggo nahuni. Kai ketedehen ate ras pengarapen kalak si sakit? Tentuna malem i bas pinakitNa nari. Emaka kai pe ilakoken gelah banci malem, i ja tambar man daramen tentu idarami, ise si banci mpepalem pinakit pasti idahi. Dikune malem tentu seh kal riahna ukur, apai ka tambar e tempa naruhken bana. Bagenda me si jadi i bas bahan PA HDS tahun enda si isikapken seninanta i bas Zimbabwe nari.

Mpebagesi Pengangkan Kerna Ogen
Kekeken, angkat amakndu jenari erdalanlah! Enda perentah si ikataken Jesus man kalak si sakit e. Tentuna enda sada perbahan si metahat kal ngelakokenca. Adi banci pe labo atena ndekah sakit. Adi ngasup nge ia, labo merhat bage kecibalna. Ituriken maka i bas perdalanen Jesus seh IA i Jerusalem guna sada perayan kalak Jahudi. Paksa e posisina ideher kolam Betesda si i je nterem kalak pinakiten medem, pentang, cempang mate serapen. Kerina ia nimai paksa lau i kolam e erburak si imaknai dingen itekina maka malekat Tuhan si erbahanca kolam e erburak. Pengangkan dingen arapen e erbahan maka kerina si i je tertima jadi kalak si pemenana bengket ku kolam paksa lau erburak. Radu ras kalak si nterem si tertima-tima lit pe sekalak si enggo telu puluh waluh tahun dekahna sakit, ikut i bas nimai dingen erlumba jadi kalak si pemenana bengket ku kolam e. Idah Jesus ia dingen sangap kal ia sabap ia jadi kalak si ndatken perhatin i bas bage teremna kalak si tertima. Ertina ku japa pe Jesus lawes tetap lit si idahNa dingen ipakekenNa jadi sada pelayanen si luar biasa i-bas mulahi kalak si kelsehen. Perjumpan e erbahan percakapen bas duana.
  • Penungkunen Jesus, atendu kin gelah malem pinakitndu? Tentuna penungkunen enda man kemamangen sabap la mungkin kalak sakit la merhat malem. Ikut ia bas kalak si nterem e guna ndatken tambar paksa lau erburak. Tentuna penungkunen Jesus,'menstimulus' pengarapen si lit denga i bas pusuh sakit e. Banci saja enggo ngelabuh kal ia i bas pinakit si bage dekahna.
  • Jabapen si sakit e labo 'ue malem ateku' tapi nuriken paksa-paksa si enggo lewat bas ingan dingen perjuangenna secara pribadi bagepe sekelewetna si la lit nampati ia. Ertina, perlu kal ia penampat i bas kelemahen si lit i bas ia, aru atena la lit si banci nampati ia. Tertima-tima kal ia gelah lit kalak si namaken ia ku bas kolam e, ngarapken perkuah ate.
  • Jesus ngaloi ia labo njabab arah kai si iturikenna e, tapi nuruh ia keke dingen ngangkat amakna ras erdalan. Tentuna enda si metahat kal banci ilakoken sekalak si lumpuhi. Banci saja perentah enda iakapna megombang. Tapi arah perentah Jesus e, ilakokenna maka ieteh ia enggo malem. Ertina patuh ia nandangi perentah Jesus, lit usahana dingen tek ia maka ia keke. Labo ijabapina Jesus nuriken pinakit dingen kinilangasupenna. Janah arah enda nuriken maka i bas pinakit ras kelemahenna paksa e, amin nggo ndekah ia sakit, lit denga semangat guna malem, la ia putus asa, Jesus reh maba kemalemen. 
Keke eme simbol, naluken kelemahen si lit, sedekah enda la banci keke tapi ipala-palai. Ngangkat amak ertina, amak eme ingan ampar, simbol kenyamanen, arus tadingken ingan kenyamanen e. Erdalan, nuriken la saja tedis tapi lit aksi si banci iidah dingen nerusken kegeluhen si arusna idalanina. Kuasa Jesus tangkas i bas doni enda, kuasa e arus irespon alu sada kepatuhen, tek dingen nggit ngelakokenca. Mujijat jadi i deher kolam Betesda, kerehen Jesus ndahi sekalak si sakit, si sitik kal pe labo iarapna tapi reh ndahi ia. Sangap kal ia, bage teremna kalak siringan i je, nimai paksa lau erburak dingen penampat si maba ia ndahi lau e.

Pengkenaina. 
Mpepalem manusia si lit i bas pinakiten jadi sada tema si 'mbwlin' segedang jaman. Kuasa Jesus nai nari seh asa genduari enda iarapken manusia, emaka la sitik kebaktin 'penyembuhen' ibahan i bas kegeluhenta sabap tek kita Jesus ngasup mpepalemsa. La sitik kecibal manusia i bas jaman enda desken kalak si ampar deher kolam Betesda, nimai mujijat lau erburak bagepe lit kalak si rutang pusuh namaken ia ku bas lau e, sabap labo ia ngasup nampati dirina jine pe. Enda kesempaten man banta guna ngusih Jesus, la terjeng ngerana ngataken 'kekeken, angkat amakndu dingen erdalan'. Tapi lebih asa sie, sampati ia gelah keke, ngangkat amakna gelah banci ia erdalan bagi arusna dingen si iarapkenna sedekah enda. Mediate ras nampati kalak si pinakiten, ndahi ras notokenca subuk i rumah ntah i rumah sakit. Nampati materi kalak si musil si man sampaten. Konteks kegeluhenta, paksa enda kita iperhadapken ku bas sada penungkunen guna perubahen i bas geluhta, kai ateta silakoken. Sipakeken nge kesempaten si mehuli, rikutken penungkunen Jesus e man banta? Enda jadi sada perenungen i bas kita er-Hari Doa Sedunia i bas tahun 2020, subuk secara pribadi, i bas jabu, persadan Moria, masyarakat ras i bas sekelewetta. Seninanta i Zimbabwe nari ngajuk ras ndilo kita kerina gelah ngelakoken dahin keleng ate enda, guna mpelimbarui (rekonsiliasi) ras transformasi erbage-bage kecibalta si erbahan kita ampar, lanai ngasup keke, man sampaten. Jesus enggo merentahken kita guna keke, mari keke. Ipepalem Jesus kita i bas erbage pinakit sosial si naban ras ngiket kita janah si sampati teman ras sekelewetta guna keke. Kita arus malem gelah banci mpepalem kalak sideban. Emaka arus tetap si asuhi semangat ras pengarapen maka lit paksana reh man banta, janah kesempaten e labo rusur tapi uga kita ngidah kesempaten ras penampat e reh, mari si aloi alu semangat.

Si persada semangat kerina diberu i doni enda radu ras temanta i Zimbabwe nari, keke, angkat amak ras erdalan! Sitaluken perbeben, si tadingen ‘zona nyamanta' mari silakoken tugasta selaku anak-anak Dibata. Seh maka kita keke, semangat ras jadi pasu-pasu i bas doni enda.

Brainstorming (kai si banci ilakoken/rnereken alternative, nampati keperlun). 
Pemimpin PA, ngajuk kerina peserta PA lako mperdiateken diri ras lingkungenna kenca e mabai peserta guna:
  1. Nuriken ras daftarken lebe kai-kai saja si erbahan kita sakit, ampar, la lit semangat guna keke.
  2. Kai kai saja ka si erbahan kita la ngasup keke i bas situasi e nari?
  3. Kai-kai saja ka si banci si bere dalan pulah gelah banci kalak si sakit ndai malem (keke ras erdalan)?

Pdt. Suenita Sinulingga,MTh. 


Belum ada Komentar untuk "Kekekenlah, Angkat Amakndu Jenari Dalanken - PA HDS II ( Bahan PA Moria 23 - 29 Februari )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel