Spiritualitas - Tudu Kata Ras Perbahanen ( Bahan PA Mamre 2 - 8 Februari )


Bahan Bimbingen PA Mamre 2 - 8 Februari 2020
Spiritualitas

Ogen : 1 Korinti 13: 1 - 7
Keleng-ate
1. Bicara beluh kal pe aku ngerana i bas kerina cakap manusia janah i bas cakap malekat pe, tapi adi la aku erkeleng ate man kalak si deban, maka kai si kubelasken e la lebih asangken gung si erbulnang ntah pe penganak si erdeping.
2. Aminna gia lit i bas aku pemere ernubuat, aminna gia kueteh kerina rahasia, janah lit i bas aku kerina pemeteh, aminna gia cukup kinitekenku seh maka ngasup aku mindahken deleng pe, tapi adi la aku erkeleng ate nandangi kalak si deban, sia-sia me aku.
3. Bicara kusumbangken pe kerina erta-ertangku, janah bicara kukorbanken pe diringku seh mate guna ndatken kemegahen, tapi adi la aku erkeleng ate nandangi kalak si deban labo lit untungna man bangku.
4. Kalak si erkeleng ate, ia arus megenggeng, mehuli, la percian, la meganjang ukur, la sombong.
5. IA labo mekarus, la ncariken untung man bana saja, la pergelut, la ngkira kesalahen kalak.
6. La meriah ukurna adi kalak erbahan si jahat, tapi ikut ermeriah ukur i bas si benar.
7. Kalak si erkeleng ate ngasup nggengken kai-kai pe, tek maka lit si mehuli i bas kerinana, tetap erpengarapen dingen saber i bas kai-kai pe.
Tema : Tudu Kata Ras Perbahanen

Tujun : Gelah Mamre:
  1. Meteh maka keleng ate eme sipentingna ibas kegeluhen perpulungen 
  2. Ertekad ningkatken ras ncidahken spiritualitas subuk ibas cara rukur, pengerana bage pe perbahanen Metode : Ceramah/Diskusi
KATA PENARUH
1 Korinti 13 eme pasal si cukup penting man banta kalak Kristen. Penting erkiteken pasal enda ngerana kerna KELENG ATE (Kasih). Adi si oge entah sibegi kata 'keleng ate' ntah pe `kasih', kira-kira kai si turah ibas pikiren / pusuhta? Selaku kalak Kristen / Mamre, akap kami si lit ibas pikiren / pusuhta e me: Jesus, Dibata. Engkai? Jawabenna eme erkiteken keleng ate / kasih e me Dibata sendiri ibas Tuhan Jesus.
Bagi nina ibas 1 Johanes 4:8 : "Kalak si la erkeleng ate, labo itandaina Dibata, sebab Dibata Kekelengen kap". 
Dibata e kekelengen' ertina kita nandai Dibata la arah ngidah ras njemak la tapi arah kai si enggo ibahanNa ibas Jesus Kristus si enggo mate ras keke erkiteken keleng ateNa (Joh. 3:16). Kita ngasup engkelengi manusia perbahan Dibata enggo leben engkelengi kita (1 Joh.4: 19).

URAIAN
Rasul Paulus nulisken pasal 13 enda sebage persinget si tegas man perpulungen Korinti. Perpulungen Korinti eme perpulungen si mbue ngaloken karunia kesah (karunia Roh Kudus) umpamana beluh erbahasa roh, ernubuat, beluh ngajari, megegeh nampati, tutus ersembah, rst. Tapi perpulungen Korinti eme perpulungen si mbue persoalen umpamana soal doktrin/ajaren sipapak, masalah moralitas ras pergaulen bebas. Ngenca Paulus ngajarken kerna kerina pemere kesah, emaka isimpulkenna maka sipentingna ibas si e kerina eme erkeleng ate (kasih) :
  • Ayat 1 - 3 enda eme kerna MOTIVASI ibas erkeleng ate. 
  • Ayat 4 — 8a, eme kerna KARAKTER ibas ndalanken perbahanen erkeleng ate (karakter kasih) umpamana: megenggeng, mehuli, la percian, la meganjang rukur, la sombong, la mekarus, la ncariken untung man bana saja, la pergelut, la ngkira kesalahen kalak, la meriah ukurna adi kalak erbahan sijahat, ngasup nggengken kai-kai pe maka lit simehuli ibas kerinana, tetap erpengarapen dingen saber ibas kai-kai pe. Jadi karakter manusia si erkeleng ate (nggeluh ibas kasih) lit 13 erbage.
  • Ayat 8a, eme kelebihen erkeleng ate (kasih) eme la erkeri-kerin. Ras erkeleng ate eme sipentingna ibas kerinana.
Erkeleng ate (kasih) si imaksudken Paulus ijenda eme "agape" ertina keleng ate Dibata, kasih sejati, la mementingkan diri, la nuntut balas ras kasih si ibas pusuh sipeduli man kalak sideban. Kasih agape bali ras kasih Kristus man manusia ras eme jadi perayakenta kerina.

APLIKASI
Tema PA nta sendah : Tudu Kata ras Perbahanen. Selaku Mamre si enggo nandai ras ngaloken keleng ate Tuhan ibas Jesus Kristus maka la banci lang kai si iakuina (kerna keleng ate Dibata) arus sendalanen ras perbahanenna sitep-tep wari. Mamre selaku imam arus ngasup ncidahken biak Kristus arah geluhna ku tengah-tengah jabu bage pe masyarakat. Spiritualitas Mamre simehuli eme adi sekalak Mamre tudu katana ras pendalankenna (subuk ibas ngerana, rukur bage pe perbahanenna). Kekelengen (kasih) simbelinna eme kekelengen si enggo idahiken Jesus ibas kiniseran, kematenNa si pelin-pelin erkiteken keleng ateNa. (kasih yang sempurna = agape). Keleng ate Kristus e me jadi perayakenta si la pernah ngadi (terus-menerus). Kita erkeleng ate perbahan kita enggo leben ikelengi Dibata, emaka tandana kita tetap sikerajangen Dibata arus dage kita nehken keleng ate. Alu bage erkeleng ate eme pengataken bujurta man Dibata ibas kita enggo ngaloken keleng ateNa / keselamaten. Jadi kai pe siibahan kita sekali pe pemere kesah, tapi adi la erpalasken keleng ate. Kerina sia-sia. Kedungenna, kata Dibata ibas 1 Johanes 3: 18 nina: "O anak-anakku, kekelengenta ola terjeng biber saja ntah pe ibas cakap saja ngenca. Arus maka tuhu- tuhu kekelengenta e, si teridah arah perbahanenta".

DISKUSI
  1. Cuba situriken engkai maka erkeleng ate (kasih) e simbelinna!
  2. Sedekah enda pe tentu kita enggo engkelengi temanta. Cuba si diskusiken terjeng ja nge kwalitas kekelengen si ibahan kita? Bahan pe tekadta!
USULEN ENDE-ENDEN
  1. KEE GBKP No. 177 : 1,3 
  2. KEE GBKP No. 281 : 1 - 3  
  3. KEE GBKP No. 62 : 2, 4  
  4. KEE GBKP No. 254 : 1 -   

Pdt. Hermanto Tarigan, MTh 
Pendeta Mamre GBKP 
HP. 081396050383



Belum ada Komentar untuk "Spiritualitas - Tudu Kata Ras Perbahanen ( Bahan PA Mamre 2 - 8 Februari )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel