Talenta - Pakekenlah Kepentaren, Kengasupen, Ras Pengertin ( Bahan PA Mamre 9 - 15 Februari )


Bahan Bimbingen PA Mamre 9 - 15 Februari 2020
Talenta  ( Gelah Kerina Mamre Ikut Muat Bagin Rikutken Talentana )

Ogen : Keluaren 35: 30 -35
Tukang-tukang si beluh erbahan Kemah si Badia
(Kel. 31:1-11)

30. Nina Musa man bangsa Israel, “TUHAN enggo milih Besalel, anak Uri, kempu Hur i bas suku Juda nari.
31. Ia enggo idemi Dibata alu kesahNa, janah enggo iberekenNa man bana kepentaren, kengasupen, ras pengertin erbahan kerina barang-barang si mejilena,
32. guna ngerencanaken potongen barang si mejile, jenari erbahanca i bas emas, pirak ras tembaga nari;
33. erbahan permata-permata ras namakenca i bas bingkena; erbahan ukir-ukiren kayu, ras erbage-bage dahin si deban, erbahan barang-barang si mejilena.
34. Man Besalel ras man Oholiap anak Ahisamah, i bas merga Dan nari, enggo ibereken TUHAN kengasupen ngajarken kebeluhenna ertukang man kalak si deban.
35. Man bana duana enggo ibereken TUHAN pemeteh i bas erbage-bage dahin jadi tukang ukir, ras tukang tenun si ngasup erbahan lenen halus; wool biru, ungu, ras megara; ras uis si deban. Ia ngasup erbahan kai-kai pe janah pentar ka pe ngerencanaken potongen barang si mejile.
Tema : Pakekenlah Kepentaren, Kengasupen ras Pengertin

Tujun : Gelah Mamre:
  1. Meteh maka Dibata alu kesahNa mereKen kepentaren, kengasupen ras pengertin man anak-anakNa
  2. Makeken kesempaten si lit sue ras talentana sekalak-sekalak
Metode : Diskusi

KATA PENARUH
I bas Kamus Besar Bahasa Indonesia kata talenta iertiken sebage: pembawaan seseorang sejak lahir: bakat ; Allah telah menganugerahkan — memberi kekuatan dan petunjuk. Defenisi enda mereken pengertin maka talenta e eme pemere Dibata man manusia, si teridah i bas kegeluhen manusia si banci ipakekenna guna kiniulin kegeluhenna bagepe kegeluhen kalak si deban. Arah kata enda tentu teridah maka teptep jelma ibereken Dibata kepe kengasupen ntahpe talenta man bana. Talenta e arusna min ipakeken kalak si erkiniteken i bas geluhna guna encidahken kiniulin Dibata man doni enda. Hal si enda me si megati langa teridah i bas kegeluhen kalak si tek. Lit denga piga-piga kalak si langa nggejapken talenta e lit i bas ia, dingen la ipakekenna i bas geluhna. Min searusna teptep jelma makeken talenta si lit i bas ia. Arah bahan PA Mamre si sendah enda, banci ka min igejapken Mamre ntahpe perbapan maka talenta enggo iberekan Dibata man bana.

Pemilihen Besalel ras Oholiab jadi tanda bukti man kalak si erkiniteken kuga Dibata enggo mereken talenta man teptep jelma. Si pemena ituriken kuga Dibata milih Besalel, anak Uri, kempu Hur i bas suku Juda nari. Tupung Dibata milih Besalel, ibereken Dibata ka pe man bana kuasa arah Kesah Dibata. Enda ngertikensa maka kuasa si lit i bas Besalel e rehna i bas kuasa Dibata nari. Ertina maka Besalei kedungenna idemi alu kuasa Dibata, si erbahansa lanai gegehna si ngaturken ia, tapi enggo kesah Dibata. Emaka jenari ialokenna ka me erbage-bage kepentaren, kengasupen ras pengertin i bas Dibata nari. Kepentaren, kengasupen ras pengertin e ipakeken guna erbahan kerina barang-barang si mejilena, ngerencanaken potongen barang si mejile, erbahan barang si mejile e i bas emas, pirak ras tembaga nari. Jenari kepentaren, kengasupen ras pengertin e pe ipakeken erbahan permata-permata ras namakensa i bas bingkena; erbahan ukiren-ukiren kayu, ras erbage-bage dahin si deban, erbahan barang-barang si mejilena. Kai si ialoken Besalel e labo pemere si biasa saja man bana. Sebab ngasup nge ia ngelakoken perbahanen si mehuli si mbelin gunana man kalak si deban.

Jenari pemere e la terjeng man sekalak jelma ntahpe Besalel saja ngenca. Tapi raduken Besalel maka si Oholiapanak Ahisamah, i bas merga Dan nari pe ngeloken pemere i bas Dibata nari. ibereken Dibata man bana kengasupen ngajarken kebeluhenna ertukang man kalak si deban. Ertina maka Oholiap pe ipakeken Dibata banci ka mereken ntahpe mbagiken pemetehna man kalak si deban. Gelah kalak si deban pe banci ka lit kengasupen i bas ia lako ndalanken kegeluhenna. Pemere si deban si ialoken Besalel ras Oholiap eme pemeteh i bas erbage-bage dahin jadi tukang ukir, tukang tenun, ngasup erbahan kai-kai pe dingen ngerencanaken potongen barang si mejile. Bagem kengasupen si ialoken Besalel ras Oholiap i bas Dibata nari si arus ipakekenna guna mpepajek Kemah e (Bnd. Bhs Indonesia: tempat kudus atau Kemah Suci). Teptep jelma ipakeken rikutken talenta si lit i bas dirina guna mpepajek ingan si Badia e.

Penjelasen enda mpetangkas maka talenta e ibereken Dibata man manusia labo guna diri pribadi sekalak jelma. Tapi talenta e arus nge ipakekenna guna kiniulin kalak si deban. Talenta e ikataken erguna adina kin banci mereken kiniulin man kalak si deban. E maka talenta e arus nge ikembangken bagepe ibagiken man kalak si deban. Biakna labo guna diri sendiri saja ngenca. Kai si ilakoken Besalel ras Oholiap tentu jadi usihen. Kerina talenta si lit i bas ia ipakekenna ka nge guna ngajari kalak si deban. Labo ipediatna ngadi i bas dirina saja ngenca. Sabap talenta e tujunna labo guna mpehaga diri, labo guna kehormaten diri. Tapi talenta e fungsina guna mbangun semangat kalak si deban guna makeken talenta si lit i bas ia. Alu bage, arah talenta e me ia banci nuduhken kuga belinna kuasa ras keleng ate Dibata e i bas tengah-tengah geluhna.

Tole pe ipetangkas kitab Keluaren, maka kerina pemere e rehna i bas Dibata nari kap. Talenta e labo jadi tanda bukti kinihagan ras kebeluhen sekalak jelma. Bicara lit i bas sekalak jelma talenta si khusus, labo berarti maka enggo mbelin kal kuasaNa bas doni enda. Tapi justru sebalikna, maka talenta e ipakeken guna hal-hal si mehuli bas kegeluhen manusia. ije me teridah maka talenta e rehna i bas Dibata nari kap. E maka teptep manusia lit nge talenta i bas dirina. Sebab e ibereken Dibata gelahna manusia banci ndalanken sura-sura Dibata bas doni enda. Alu bage, talenta e banci erguna adina kin ipakeken guna ngelakoken biak-biak si mehuli bas doni enda. Janah si terutamana kal maka arah talenta e pagi banci terberita dingen termulia gelar Dibata i bas doni enda. Umpamana: kalak si beluh rende ula min gelarna si ipehaga jelma si nterem e, tapi arah sora ras ende-endenna e banci min reh buena jelma ngataken bujur man Dibata.

APLIKASI
Selaku tinepa Dibata, Mamre pe tentuna ndatken talenta i bas Dibata nari. Talenta e tentuna erbage-bage macamna. Defenisi si ipake kita eme kepentaren, kengasupen ntahpe pemeteh si ibereken Dibata man manusia. Tentu sie kerina lit i bas sekalak perbapan (Mamre). Umpamana: pemeteh kerna peradaten, kepentaren i bas mbangun sada rumah, bagepe ras kengasupen i bas ngaturken kegeluhen jelma si nterem e ras erbage talenta si debanna. Sie kerina tentu erguna i bas kegeluhen masyarakat, perpulungen, gereja, negara ras si debanna. Emaka perlu kal Mamre meteh kerna talenta si lit i bas ia dingen ipakekenna pe i bas geluhna. Ipakekenna e labo guna kepentingen ras kinihaganna, tapi ipakekenna sie kerina guna kiniulin kalak si deban. Bageme biak sekalak Mamre, si meteh katawari paksana ia arus makeken talenta si lit i bas ia.

DISKUSI 
  1. Rikutken bahan oratenta, turikenlah kai-kai saja bentuk kepentaren, kengasupen ras pemeteh (talenta) si lit i bas diri Mamre?
  2. I bas dahin kai saja Mamre enggo nuduhken talenta si lit i bas ia si erguna man jelma si nterem?
USULEN ENDE ENDEN 
  1. KEE GBKP No. 424:1-3  ( KLIK JUDUL KEE UNTUK MELIHAT LIRIK TEKS )
  2. KEE GBKP No. 165:1-3  ( KLIK JUDUL KEE UNTUK MELIHAT LIRIK TEKS )
  3. KEE GBKP Na. 302:1,-    ( KLIK JUDUL KEE UNTUK MELIHAT LIRIK TEKS )
  4. KEE GBKP No. 350:1-2  ( KLIK JUDUL KEE UNTUK MELIHAT LIRIK TEKS )
Pdt. Dicky A. Bangun, M.Th 
HP. 081263231231


Belum ada Komentar untuk "Talenta - Pakekenlah Kepentaren, Kengasupen, Ras Pengertin ( Bahan PA Mamre 9 - 15 Februari )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel