Aku, TI Ras Dibatangku - BIjak Nggunaken TI ( Bahan PA Moria 8 - 14 Maret )


Bahan Bimbingen PA Moria 8 - 14 Maret 2020
Bijak Nggunaken TI

SI MAN OGEN : 2 Petrus 1 : 3 - 9
Pendilo dingen pilihen Dibata
3. Dibata enggo ndilo kita gelah kita dat bagin i bas kemulian ras kiniulinNa. Alu kuasaNa ras arah penandainta kerna IA enggo iberekenNa man banta kai keperlunta guna nggeluh nembah man baNa.
4. Arah padan si mbelin dingen meherga si iberekenNa man banta e, ngasup kam mulahi bandu i bas kerincuhen daging nari, si ncedaken si lit i doni enda, jenari dat bagin kam i bas kinidibatanna.
5. Erkiteken si e usahakenlah maka irakutkenndu ku kinitekenndu kai si mehuli, tapi aminna gia enggo ibahanndu kai si mehuli, rakutken ka lah ku perbahanen si mehuli e pemeteh kerna Dibata.
6. Adi enggo lit pemetehndu kerna Dibata, arus maka irakutkenndu ku pemetehndu e penguasan diri; janah adi enggo ngasup kam ngkuasai dirindu, rakutken ka ku je ate megenggeng. Adi enggo lit i bas kam ate megenggeng, arus irakutkenndu ku ate megenggeng e ate tutus er-Dibata.
7. Tapi aminna gia enggo lit i bas kam ate tutus ngikutken sura-sura Dibata, rakutken ka lah ku je ate keleng man teman sapih-sapih Kristen; janah adi enggo lit i bas kam ate keleng nandangi teman-teman sapih-sapih Kristen, arus maka irakutkenndu ku je ate keleng nandangi kerina manusia.
8. Enda me kerina biak-biak si iperlukenndu, janah adi biak-biak enda turah alu mehumur i bas kam, si e erbahanca maka pemetehndu kerna Tuhanta Jesus Kristus nggeluh janah erbuah.
9. Tapi kalak si la lit i bas ia biak-biak si bage, pentang kap mata perukurenna; la ia ngasup ngidahsa, janah enggo ilupakenna maka dosa-dosana si enggo lepas enggo ibersihken.
TEMA : AKU, TI, RAS DIBATANGKU

T U J U N : Gelah Moria:
  1. Meteh kerincuhen daging si encedaken, Si lit i bas doni enda.
  2. Matuhi UU ITE si jadi tanda mehamat man Dibata ras engkelengi manusia.
METODE PA : Diskusi ras nonton bareng

Kata Penaruh. 
Jadi manusia si pentar (seterusna ipake kata bijak) la menukah, perlu proses ras waktu si gedang man kerina manusia seh maka banci jadi kalak bijak. Sabap labo kerina si lit i doni enda bagepe pengalamen geluhta ngasup erbahan kita jadi kalak bijak. Kerina si ijumpai kita subuk manusia si jadi teman nggeluh, i bas kerina orat nggeluh, i bas ngerana, erdahin ras sidebanna arus bijak kita ngelakokenca ras ngalakenca. Rikut pe kerina tinepa Dibata bagepe kerna hasil karya manusia pe arus bijak kita makekenca sabap adi la ialaken, ipakeken alu mehuli labo jadi kiniulin man geluh manusia tapi banci ncedai ras meneken dirina bagepe kalak sideban. Gelah geluhta reh ulina ras raturna perlu kal kita nguji kerinana alu bijak termasuk bentuk-bentuk teknologi informasi si lit i sekelewetta. Arah PA Moria wari enda, si siksiki tole seh maka reh ergunana man banta kerina.

Mpebagesi Pengangkan Kerna Ogen  
Surat Petrus si peduaken enda itujuken man kalak Kristen si pemena. Surat enda nehken pedah guna ngalaken erbage persoalen si ngancam kiniteken perpulungen. Perlu tole ipegegehi kiniteken perpulungen gelah ngasup ia ngelawan pendahin ras ajaren guru-guru perguak ras erbage lagu langkah si la mehuli sebage ulih pengajaren e. Sabap erbage-bage pengajaren si erbahanca kiniteken lanai megegeh. Emaka perlu kal kalak si tek ncikep pemeteh situhu-tuhu kerna Tuhan Jesus. Arah teks si jadi oratenta enda lit piga-piga si ateta iperdiateken bagepe si tengeti i bas kegeluhenta paksa enda.
a. Kalak si idilo Dibata man bana isehkenNa padanNa si mbelin ras meherge eme kegeluhen i doni enda. Kalak si tek dat bagin i bas kemulian ras kiniulin Dibata, ikuhiNa keperlunta nggeluh selakuk anak-anakNa termasuk kegeluhen si nembah IA. Paksa e ajaren Gnostik mbelin dingen megegeh mpengaruhi perpulungen janah penulis ncubaken mpeangkaken man perpulungen alu erbage istilah filsafat 'Junani' eme kerna doni
b. Arapen Dibata nandangi kalak si enggo idiloNa eme ngasup ngkuasai dirina jine si banci ncedaken. I jenda ipersingeti kalak si tek gelah nandai diri ras erbage kerincuhen daging kula. Kengasupen ngkuasai diri salah sada tanda kalak si dewasa, la menukah ipengaruhi erbage situasi ras perkembangen si langa tentu maba kiniulin.
c. Petrus mereken piga-piga cara guna njagai diri alu ngerakut dirina ku bas pemeteh kerna Dibata, piga-piga tahapen si ituriken Petrus :
• Adi enggo lit pemeteh kerna Dibata maka pemeteh e arus irakut ku kengasupen ngkuasai diri, sabap Dibata si jadi persukuten i bas kai pe lanai sura-suranta.
• Adi enggo ngasup ngkuasai diri maka arus megenggeng, tentuna kinigenggengen naluken erbage godan si ngajuk kita.
• Adi enggo lit ate megenggeng arus tutus er-Dibata, ertina ngikutken Dibata si jadi pilihenta, arus si geluhken.
• Adi tutus er-Dibata arus icidahken ate keleng kusus teman kalak Kristen si senasib sepenanggungen, mpebelin pengajaren kepate (solidaritas).
• Adi enggo lit keleng ate man kalak sisada kiniteken arus isaksiken maka kerina manusia seri iadepen Dibata, emaka kelengilah.
• Adi biak-biak enda enggo mehumur maka pemeteh kerna Jesus enggo erbuah.

Kerina enda jadi sada penandai ras penilen diri kalak si tek alu bage ngasup ia njagai diri i bas erbage si banci ncedaisa. Lanai ia pentang kerna perbahanen Dibata nandangi geluhna. Bageme Petrus nuriken kerna uga arusna kegeluhen kalak kristen si enggo ipilih Dibata. Arus isiksikina dirina arah erbage tahapen si ituriken Petrus guna nggeluh naluken pengajaren papak si banci mabai ia bene erkiteken adi la terkuasaina dirina ndabuh me ia ku bas godan pengajaren e.

Pengkenaina.  
Salah sada si megati la terkuasaisa dirinta eme i bas makeken teknologi informasi (TI) si sangana meriah kal i bas kegeluhenta. Adi si pergermetken media sosial, sitik kal kalak si la aktif makesa. La salah, TI enda ulih kepentaren manusia si ibereken Dibata i bas kegeluhen enda. Mbelin kal ulih ras kegunanna nandangi kegeluhen manusia adi paslah pemakenta. Megati la si ukuri lebe maka si belasken (tulisken) kenca e si kirim, ukurta e enggo sikerajangen kalak si nterem si ngogesa guna ngertikenca. Ntahsa lit kalak si tersinggung, enggo iakap kita `menebar kebencian', enggo sakit hati si erbahansa banci lit kelompok-kelompok lanai si angkan. Mbue kalak rubat. Lit ka si arus ipengadi i bas dahinna nari deba seh iukum (penjara) kerna sie. Erkiteken nggo lit undang-undangna si ngaturkenca. Kai kin undang-undang TI enda? I bas wikipedia nina 'Undang-undang Informasi dan Transaksi Elektronik (disingkat UU ITE) atau Undang-undang nomor 11 tahun 2008 adalah UU yang mengatur tentang informasi serta transaksi elektronik, atau teknologi informasi secara umum. UU ini memiliki yurisdiksi yang berlaku untuk setiap orang yang melakukan perbuatan hukum sebagaimana diatur dalam Undang-Undang ini, baik yang berada di wilayah Indonesia maupun di luar wilayah hukum Indonesia, yang memiliki akibat hukum di wilayah hukum Indonesia dan/atau di luar wilayah hukum Indonesia dan merugikan kepentingan Indonesia." Khusus, pasal 27 ayat 3 UU ITE menyebut melarang setiap orang dengan sengaja dan tanpa hak mendistribusikan dan/atau mentransmisikan dan/atau membuat dapat diaksesnya Informasi Elektronik dan/atau Dokumen Elektronik yang memiliki muatan penghinaan dan/atau pencemaran nama baik. 

Adi la si angkai UU enda, kita si aktif i bas dunia maya banci ikenai pasal enda. Emaka perlu kal Moria pentar i bas makeken kai pe i bas geluhna. Gelah ula kari rusuren kita man runggunken erkiteken la kita bijak makeken erbage perkembangen jaman enda. Aku, TI ras Dibata, manusia tinepa Dibata rikut ras TI ulih tinepa manusia erkiteken kepentaren ras kengasupen si ibereken Dibata tujunna min mpermuliaken Dibata. Ertina, i bas si telu e Dibata si utama: TI ngelai manusia, manusia ngelai Dibata alu make TI, Dibata me terpuji sabap IA me si mereken kepentaren. Si pakeken e guna kiniulin geluhta. La sitik usaha ras peningkaten ekonomi si banci si lakoken alu makeken kecanggihen TI enda bagepe i bas pembarken Kata Dibata, TI lebih asa jarak, ruang, waktu bagepe manusia'.

Diskusi ras Nobar
  1. Kuga sedekah enda penguasan dirinta rikutken bahan PA-nta khususna i bas pemaken TI?
  2. Erbahan dua kata-kata mutiara arah teks PA-nta si mereken motivasi man temanta manusia.

Film dengan Judul: Bijak menggunakan media social


Pdt. Suenita Sinulingga, MTh.


Belum ada Komentar untuk "Aku, TI Ras Dibatangku - BIjak Nggunaken TI ( Bahan PA Moria 8 - 14 Maret )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel