Beluh Ras Pentar Make Media Sosial - Media Sosial ( Cerdas Menggunakan Media Sosial / Hoaks ) ( Bahan PA Mamre 1 - 7 Maret )


Bahan Bimbingen PA Mamre 1 - 7 Maret 2020
Media Sosial ( Cerdas Menggunakan Media Sosial / Hoaks )

Ogen : Masmur 19:15, 
15. Min ngena ateNdu rananku ras perukurenku,
O TUHAN, kam kap kecionku dingen penebusku.

Kuan-kuanen 17:27-28
27. Kalak si beluh rukur iangkarna nge ngerana,
kalak si saber ukurna ia kap kalak si pentarna.
28. Kalak bodoh pe iakap cerdik dingen pentar,
adi ia sinik dingen la ngerana.
Tema : Beluh ras Pentar Make Media Sosial

Tujun : Gelah Mamre:
  1. Ngasup njaga perukuren ras pengerana bagi si ngena ate Dibata
  2. Meteh makeken media sosial alu mehuli 
Metode : Sharing pengalaman

KATA PENARUH
Siap ntah la siap, genduari kita nggeluh i tengah-tengah jaman moderen si igelari sebage era digital, si itandai alu erbage-bage kemajuan tehnologi khususna tehnologi informasi. I bas era Digital, khususna arah tehnologi informasi, doni enda/tep-tep jelma terhubung sada ras si debanna. Kemajun tehnologi informasi erbahanca lanai lit "tembok/batas" si nirangken jelma sada ras sidebanna, janah mereken peluang sicukup mbelin guna ndatken informasi kerna erbage-bage hal, guna erkomunikasi, guna ndatken erbage-bage hal sinibutuhken. Kemajun tehnologi khususna tehnologi informasi tuhu-tuhu mereken erbage-bage hal si positif. Kegeluhen manusia jadi serba mudah ras terbuka, janah kemajun e mereken peluang guna ndatken erbage-bage hal si positif, subuk i kuta ntah i kota, subuk tua ras nguda banci ndatken informasi si seri.

Salah sada bentuk tehnologi informasi sigundari eme media sosial (Facebook, Twitter, Instagram, Youtube, rsd.). Media sosial mereken pengaruh si luar biasa nandangi kegeluhen manusia era digital, si banci mpengaruhi perukuren, pengerana ras perbahanen. E maka adi pengguna media sosial e pentar maka mbelin kel perulihenna si positif, baik secara ekonomi, budaya, sosial, pendidiken bahwa kedamen (persatuan i tengah masyarakat lokal bahkan dunia). Tapi adi isalah-gunaken, misalna mereken informasi si lepak/menyesatkan/hoax, maka ia banci "desken tsunami sosial", efekna si ncedaken pe cukup luar biasa.

URAIAN
I bas Masmur 19:8-15, pemasmur nuriken pengarapenna man Dibata, erkiteken igejapkenna keleng ate Dibata man bana, si mbebasken ia i bas kesalahen/kejahatenna nari. I bas padan sindekah adi kita erbahan dosa maka reh me ukumen sebage "buah" kejahatennta nari. Tapi igejapken pemasmur maka Dibata ngalemi ia dingen nelamatken ia arah ulih kejahaten/dosa siilakokenna. Pemasmur sadar maka undang-undang Dibata eme gegeh man manusia si nampati manusia nilahi erbage-bage si jahat gelah ula ndabuh ku bas ukumen Dibata. Undang-undang Dibata jadi panduan ras "lampu penerang" man manusia i bas ia makeken kebebasan si ibereken man banta. Sabab kebebasen alu la erpengertin situhuna desken siding si meneken. Emaka i bas ermedia sosial pe, labo ketrampilen ngalatkenca si utamana, tapi palasna eme kepatuhen nandangi undang-undang Dibata si jadi ulu pengertin si nerangi kita makekenca.

I bas ayat 15, pemasmur nuriken pengarapenna gelah ia ngasup ngerana ras rukur bagi singena ate Dibata. Pemasmur sedar maka Dibata nge si ngasup ia ngelakoken si ipindona, e maka iturikenNa man Dibata. I jenda pemasmur mindo gelah Dibata mereken gegeh man bana maka ia ngasup nggeluh ndalanken undang-undang Dibata. I bas kitab cakap Karo nina pemasmur: "min ngena ateNdu... ", kata "ngena ate" i bas cakap Heber make kata rason. Kata enda megati ipake i bas Padan si Ndekah si ncidahken keriahen ukur Dibata, nandangi persembahen/kurban umatna si bersih (Im. 1:4). Jadi ngena ate Dibata pengerana ras perukuren ndesken persembahen si bersih. Janah i bas Jesaya 42:1 kata enda bermakna ngena ate Tuhan nandangi serayan/hambaNa (Mesias). Jadi ngena ate i jenda tuhu-tuhu mendalam.

I bas Kuan-kuanen 17:27-28, ituriken kerna meteh kalak pentar teridah arah sikap ras pengeranana. I bas ayat 27 isingetken maka kalak pentar meteh angkar, terlebih-lebih i bas pengeranana. Janah saber ia. Saber i bas cakap Indonesia i terjemahken sebage "berkepala dingin". Meteh angkar ikombinasiken ras kepala dingin jadi sada kombinasi si sempurna, maka kalak pentar e kalak si meteh katawari ia ngerana, katawari sinik, kai si icakapkenna, hal-hal kai saja si banci i cakapken, ja inganna. Janah si paling penting iukurina lebe kai si ibelaskenna, sabab kai singgo ndarat i bas babahta nari lanai banci mulihken. Kalak pentar la reaktif, ia tenang. Alu bage bicara lit pe pengerana kalak si la bagi ukurna tapi carana ngaloisa la erbahanca ia ndabuh ku bas kecedan, kelepaken si seri bagi ilakoken kalak, tapi pengerana e bagi lau si penimpet api si gurlah.

I bas ayat 28, ikataken maka sikap si tepat maba kiniulin. Salah sada terjemahan Alkitab i bas bahasa Inggris (NIV), nterjemahken kata "sinik" alu "menahan lidahnya". Seorang yang sanggup mengendalikan perkataannya, menahan diri untuk tetap diam (banci jadi erkiteken la iangkana, atau banci jadi itehna pengeranana banci maba kecedan) iperhitungken sebage kepentaren. Tentu kepentaren i jenda labo sekedar predikat/gelar, tapi nuduhken kondisi si menyebabken kalak ngaloken kiniulin sebage ulih kepentaren.

APLIKASI 
Arah penjelasen i datas tentu siarapken gerejanta maka Mamre GBKP beluh ras pentar makeken media sosial. Iperluken pendidiken ras ketrampilen makeken tehnologi informasi ras erbage media sosial, gelah ola kita ketadingen ntah pe talu bas perlumban perkembangen jaman enda. Tapi pe siinget maka kerina e ngasup kita ndalanisa adi kemampuan e i barengi ras kepatuhennta nandangi undang-undang Dibata (termasuk patuh man undang-undang negaranta) bagepe sikap cerdas. Alu bage media sosial sebage pemere Dibata maba kejuah-juahen labo maba perpecahen khususna i bas kita ergereja bagepe ermasyarakat ras ernegara. Ermedia sosial e pe i golongken sebage ibadah/persembahennta ras Dibata, sabab ibadah situhu-tuhu labo bas gereja tapi i bas kerina dampar kegeluhenndu. Jadi kai si ituangken i bas medsos pe, sigejap sebagai wujud ibadahta si tuhu-tuhu.

Sharing Pengalamen (sekalak jelma pilih sada saja)
  1. Turiken pendapatta cara si payo ibas makeken media sosial erpalasken ogenta.
  2. Turikenlah ketrampilen-ketrampilen si lit i bas kam i bas makeken tekhnologi informasi ntah pe i bas ermedia sosial guna nambahi pemeteh teman-teman Mamre, ras kai ulihna.
USULEN ENDE - ENDEN
  1. KEE GBKP No. 338:1,3  ( KLIK JUDUL KEE UNTUK MELIHAT LIRIK / TEKS )
  2. KEE GBKP No. 255:1  ( KLIK JUDUL KEE UNTUK MELIHAT LIRIK / TEKS )
  3. KEE GBKP No. 323:1  ( KLIK JUDUL KEE UNTUK MELIHAT LIRIK / TEKS )
  4. KEE GBKP No. 381:1  ( KLIK JUDUL KEE UNTUK MELIHAT LIRIK / TEKS )

Pdt. Vicardo A. Ginting 
Ketua Klasis Tigabinanga 
HP. 081362439302


Belum ada Komentar untuk "Beluh Ras Pentar Make Media Sosial - Media Sosial ( Cerdas Menggunakan Media Sosial / Hoaks ) ( Bahan PA Mamre 1 - 7 Maret )"

Posting Komentar

Iklan Atas Artikel

Iklan Tengah Artikel 1

Iklan Tengah Artikel 2

Iklan Bawah Artikel