Dahilah Tuhan - Spiritualitas ( Bahan PJJ 22 - 28 Maret )

Bahan Bimbingen Perpulungen Jabu-Jabu 22 - 28 Maret 2020

Dahilah Tuhan

( Spiritualitas )

Ogen : Jesaya 45:22-25

22. Mari, dahilah Aku maka kam Kukelini,
o kam kerina manusia i doni.
Sabap Aku ngenca Dibata,
la lit si debanna.
23. Padan si Kubahan, tuhu, janah la mobah-obah;
i bas gelarKu jine Aku ersumpah.
Kerina manusia, i lebengKu pagi erjimpuh,
janah ersumpah, maka rasa lalap tutus atena nembah.
24. Kerna Aku ikatakenna,
‘Arah TUHAN ngenca maka lit kemenangen ras kuasa.
Tapi kerina kalak si ernembeh ate man bangKu,
mela pagi akapna tedis i adep-adepenKu.
25. Tapi kesusuren Jakup la banci lang dat kemenangen,
janah ermulia ia erkite-kiteken Aku, TUHAN.’

Mari, dahilah Aku maka kam Kukelini, o kam kerina manusia i doni. Sabab Aku ngenca Dibata la lit si deban.

Mari, dahilah Aku, enda sada kata tenah i bas Tuhan nari man kerina manusia (kerina bangsa-bangsa). Engkai maka Tuhan ertenah? Tupung e melala denga bangsa bas doni enda lenga nandai Tuhan, mbue denga bangsa-bangsa si nembah man patung ras berhala-berhala, lit deba enggo meteh kerna Tuhan tapi erpenulak, la mehamat ras megombang man Tuhan. Lit deba bagi sanggar uruk-uruk, kuja angin si rembus ku je permbulakna, Ia paguh bas erkiniteken man Tuhan.

Biasana adi kalak ertenah, lit atena si man turinken, entah si man sehenken man si itenahkenna. Bage me Tuhanta, itenahkenNa kerina bangsa i doni enda lako pulung ku bas sada persadan (perpulungen, ay.20). I bas persadan, Tuhan enggo ije lako arih-arih, nuriken kerna ise IA man doni enda bage pe man perpulungen e sekalak-sekalak. Nina Tuhan, "ma kin Aku, Tuhan, Dibata si adil ras siengkelini?" Perkatan Tuhan e nuriken maka IA me Tuhan (tuan, pemilik) doni enda, seakatan IA lalit Dibata si bali ras IA. Patung-patung, berhala-berhala i bas doni enda la lit gegehna ibandingken ras Tuhan e. IA ndauh belinen asangken dibata-dibata si deban. KuasaNa la tersipati, IA si njadikensa kerina sinasa lit bas doni. Tuhan jine singaturken perdalanen kegeluhen doni enda, benaken bas pemenana nari seh pagi ku pendungina. Banci kataken IA me penentu sejarah doni enda (bdk. Ay. 18,22).

Amin pe ia Tuan (pemilik) doni ras kerina isina, tapi IA adil. Antusen adil, la berat sebelah, bujur, la memihak. Adil i bas Padan si Ndekah Iebih asa sie, eme mehuli perbahanenna man kerina jelma. La IA ngukum tapi ngalemi salah. Nggit nampati kalak si kote dingen mereken gegeh man manusia. Em dalan-dalanna Tuhan ertenah kegeluhen ras man kerina bangsa, sabab ateNa mereken keselamaten, la iukumNa tapi ialemiNa kalak si sedekah enda la mehamat ras nundalken IA. IpetetapNa ukur kalak si sedekah enda monce bas erkiniteken, IbereNa kesempaten man kerina bangsa reh ndahi IA guna iselamatken dingen nggeluh i bas persadan ras Tuhan.

Erpadan pe IA lako tetap engkelini manusia, padan e tuhu, la mobah, sabab IA jine si ersumpah man diriNa, i bas gelarNa, sabab lanai bo lit si terganjangen asangken IA. Kai si enggo ipadanken Dibata kerina isehiNa, sabab IA Dibata si erdolat. La IA jagar-jagar i bas erbelas apai ka ersumpah. TujunNa gelah kerina jelma ras doni enda ngidah ras nggejapken uga belinna kuasa ras keleng ateNa arah keadilen, ras keselamaten si enggo ituduhkenNa.

Man kerina manusia si ngidah keadilen Dibata ras ngaloken keselamaten e, iberekenNa kesempaten lako nembah erjimpuh ilebe-lebeNa, janah ersumpah lalap tutus atena reh nembah (spiritualitas). Lit ije kesetian, kepatuhen ersembah man Tuhan selaku tanda pengataken bujur i bas kerina si mehuli si enggo si aloken i bas Dibata nari. I bas ketutusen ersembah e turah sada pengakun, 'arah Tuhan ngenca lit kemenangen ras kuasa.' Em dalan-dalanna kita ermegah i bas Tuhan. Labo kita ngasup nandai Tuhan adi arah usahanta, IA jine nge si reh ku tengah-tengahta mpetandaken diriNa, alu encidahken kuasa ras keleng ateNa man banta. I bas Jesus Kristus tangkas kal keleng ateNa e man banta. Emaka itenahkenNa kita gelah reh ndahi IA ku bas perpulungen. Ije me inganta jumpa, arih-arih ras Tuhan. Enggo pasti, man kalak si reh ndahi Tuhan nge si nggejapken keadilen ras keleng ateNa e. Kemalemen ate ras kemenangen tetap jadi sikerajangenna. Tapi si la reh ndahi tenah Tuhan e, mela pagi akapna tedis i lebe-lebeNa. Tupung iberekenNa denga kesempaten reh, dahilah Tuhan!

EVALUASI
Lit nge kita ngkirim kata-kata penjemba (motivasi) arah media sosialta sada minggu enda?

DISKUSI

Reh ndahi Tuhan e teridah arah ketutusen ras kesetian bas ersembah subuk ku rumah pertoton bage pe ku perpulungen. Kai nge si biasana jadi kendala i bas dirinta entah jabunta maka la tutus ras la setia ndahi Tuhan?
Saksikenlah penggejapen ras pengalamenndu tupung kam tutus ersembah ndahi Tuhan!
Daramilah teman entah sangkep geluhndu si paksa enda la mejingkat ndahi Tuhan guna ersembah subuk ku rumah pertoton entah ku perpulungen. Bereken motivasi entah semangat man bana gelah tetap ukurna ndahi Tuhan banci arah telepon, messenger, grup WhatsApp, entah ndahisa ku rumahna.

USULEN LAGU :

TOPIK PERTOTON SYAFAAT :

Gelah perpulungen alu tutus ras setia reh ndahi Tuhan ersembah subuk ku rumah pertoton bage pe ku perpulungen.
Gelah perpulungen ngasup makeken T1 ngiahken teman ras sangkep geluhna guna ndahi Tuhan.
Gelah kerina perpulungen njagai persadan erpalasken keleng ate Tuhan

Pdt. Nurbety br Ginting, M.Th.